Խոյ քաղաքի վերջին երկրաշարժը տեղի ունեցաւ 28 յունւարի 2023-ին, 5.9 մագ. ուժգնութեամբ: Դրանից մի քանի օրեր անց, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը հեռախօսային կապ հաստատեց Խոյի Մշակութային ժառանգութեանց հիմնարկի տնօրէնի հետ եւ տեղեկացաւ քաղաքում եւ շրջակայ գիւղերում թեմապատկան եկեղեցիների եւ մշակութային այլ ժառանգութեանց իրավիճակի մասին:
«alikonline.ir» - Խոյ քաղաքի վերջին երկրաշարժը տեղի ունեցաւ 28 յունւարի 2023-ին, 5.9 մագ. ուժգնութեամբ: Դրանից մի քանի օրեր անց, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը հեռախօսային կապ հաստատեց Խոյի Մշակութային ժառանգութեանց հիմնարկի տնօրէնի հետ եւ տեղեկացաւ քաղաքում եւ շրջակայ գիւղերում թեմապատկան եկեղեցիների եւ մշակութային այլ ժառանգութեանց իրավիճակի մասին: Տեղեկացնում է Ատրպատականի ազգային առաջնորդարանը:
Տնօրէնը արդէն իսկ այցելած լինելով մեր եկեղեցիները, տեղեկացրեց, որ Խոյի կենտրոնական մասում գտնւող Ս. Սարգիս եկեղեցու արտաքին պատերից երկուսը թեթեւ ճաք էին ստացել, իսկ ներքնամասում, ատեանում, սիւներից մէկի վրայ քարերի արանքն էր բացւել, ինչպէս նաեւ աղիւսահիւս առաստաղի վրայ մի քանի մետր երկարութեամբ ճաք էր առաջացել: Նա յայտնեց, որ արդէն դրանք ծեփւելու են շուտով, յատուկ նշանամեխերի տեղադրմամբ, որպէսզի յետցնցումների դէպքում կարելի լինի ճշտել պատի ամրութիւնը, եւ ըստ այնմ կանխել փլուզման վտանգը:
Տնօրէնը տեղեկացրեց նաեւ, որ նախկին հայաբնակ Ֆանայի գիւղի Ս. Յակոբ (Հոգեվանք) եկեղեցու ճակատն էր թափւել, եկեղեցու արեւմտեան պատի դրսի մասը, որտեղ գտնւում է եկեղեցու մայր մուտքը: Երկրաշարժը պատճառ էր հանդիսացել նաեւ, որ սոյն քարաշէն ամրակառոյց եկեղեցու արեւելեան պատի անկիւնապահ հսկայ քարերը եւս փլուզէին:
Հազար փառք Աստուծոյ, որ Մահլազան գիւղի Ս. Խաչ եկեղեցին ամբողջովին անվնաս էր մնացել սոյն երկրաշարժից, իսկ Գրիս գիւղի Սբ. Հոգի եկեղեցին աննշան ցնցում էր կրել միայն, երեւելի վնաս չկրելով:
Գրիգոր Սրբազանը Թեմական խորհրդի եւ իր անունից շնորհակալութիւն յայտնեց տնօրէնին, խոստանալով որ յառաջիկայ շաբաթներին անձամբ կայցելի շրջան, մօտկից տեսնելու համար ազգային ժառանգութեանց կրած վնասները, նաեւ խորհրդակցելու վերականգնողական աշխատանքների շուրջ:
Յայտնենք, առաջնորդարանից գործուղղւած մի յանձնախումբ արդէն իսկ այցելութիւն տւեց սոյն եկեղեցիներին, իր զեկոյցը ներկայացնելով Թեմական խորհրդին:
