Հա

Համայնք

15/07/2013 - 10:25

Չորեքշաբթի, յունիսի 19-ի երեկոյեան, Նոր Ջուղայի հայոց ազգ. կրթահամալիրի «Ալենուշ Տէրեան» սրահում, տեղի ունեցաւ «Քանանեան» աղջ. ուղեցոյց եւ միջնակարգ դպրոցի ամավերջի հանդիսութիւնը՝ ներկայութեամբ Սպահանի հայոց թեմի Կրթական խորհրդի ատենապետ Ջանսոն Աղաբաբայեանի, հայոց ազգային դպրոցների ներկայացուցիչների եւ «Քանանեան» դպրոցի տեսչութեան, ուսուցչական կազմի, աշակերտուհիների ու ծնողների:

alt

Սկզբում դպրոցի փոխտեսուչ Ռիմա Սիմոնեանը նշելով, որ «Ով ինչ ցանի այն էլ կը հնձի», ողջունեց ներկաներին եւ շնորհակալական խօսք ուղղեց բոլոր այն անհատներին, որոնց օժանդակութիւնների եւ տքնաջան աշխատանքների շնորհիւ՝ «Քանանեան» դպրոցը նւաճել է յաղթանակներ եւ բազմազան յաջողութիւններ։
Ապա հաղորդավարութեամբ հանդէս եկաւ ուսուցչուհի Կարինէ Մինասեանը, որը նոյնպէս ողջունելով ներկաներին՝ բեմ հրաւիրեց դպրոցի տեսչուհի տկն. Սալարիֆարին՝ օրւայ առթիւ արտայայտւելու: Տեսչուհին շնորհակալութիւն յայտնելով ուսուցիչներին, ծնողներին եւ աշակերտութեանը՝ իրենց կատարած տքնաջան աշխատանքի եւ անսահման համբերատարութեան համար, անդրադարձաւ, անցնող ուսումնական տարեշրջանի ընթացքում «Քանանեան» դպրոցի արձանագրած բազմաթիւ յաջողութիւններին։

alt

Նա տեղեկացնելով, որ ուսումնադաստիարակչութեան նախարարութեան կողմից կազմակերպւած «Լաւագոյն դպրոց» անւանակարգի ծրագրի շրջագծում, «Քանանեան» դպրոցն Ուսումնադաստիարակչութեան հիմնարկի 3-րդ շրջանում զբաղեցրել է առաջին պատւաւոր տեղը, իսկ նահանգի մակարդակում յայտնւել է 8 լաւագոյն դպրոցների շարքում, նա շնորհաւորեց սոյն բացառիկ յաջողութեան կապակցութեամբ։
Տկն. Սալարիֆարն առանձնաբար նշեց նաեւ դպրոցի միջոցով իրագործւած բոլոր ծրագրերն ու նորարարութիւնները՝ աշակերտների գիտական մակարդակի բարձրացման ուղղութեամբ։ Տեսչուհին իր խօսքի աւարտին շնորհակալութիւն յայտնելով Կրթական խորհրդին, դպրոցի ուսուցիչներին եւ անձնակազմին, ծնողներին ու աշակերտութեանը՝ յատուկ գնահատանքի խօսք ուղղեց դպրոցի տեսչութեանը, որին միացան ներկաները՝ յոտընկայս բուռն ծափողջոյններով։
Այնուհետեւ աշակերտուհիներ՝ Նազէ Ասատրեանը, Մեղրի Ղուկասեանը, Շաղիկ altՄատթէոսեանը, Սառա Ներսիսեանը եւ Ռոժին Ներսիսեանը մանրամասնօրէն ներկայացրին գիտական ասպարէզում եւ աշակերտների զարգացման ուղղութեամբ իրականացւած մի շարք աշխատանքներ, ինչպիսին են՝ «Խարազմի» փառատօնին եւ տարրալուծարանային մրցոյթներին մասնակցութիւնը, Քիմիայի եւ Կենսաբանութեան յանձնախմբերի գործունէութիւնը, «Ուսուցչի աջակից» ծրագրի կիրառումը եւ այլն:
Այնուհետեւ բեմ հրաւիրւեց դպրոցի ծնողական խորհրդի ներկայացուցիչ Մարգարիտ Դաւթեանը՝ խորհրդի խօսքը փոխանցելու: Նա նշելով, որ ազգերի գոյատեւման պայման-ներից է օրւայ տեխնոլոգիայի զարգացման հետ առաջ գնալը, դպրոցի արձանագրած յաջողութիւնը՝ նահանգի ութ լաւագոյն դպրոցների շարքում դասւելու կապակցութեամբ. տեսչութեան տքնաջան աշխատանքի շնորհիւ համարեց եւ կարեւորութեամբ ընդգծեց՝ նշւած յաջողութեան ձեռքբերման համար՝ Կրթական խորհրդի, ուսուցիչների, ծնողների եւ աշակերտութեան ունեցած դերակատարութիւնը։ Ծնողական խորհուրդն իր խօսքն աւարտեց շնորհաւորանքի արտայայտութիւններով՝ դպրոցի յաջողութիւնների կապակցութեամբ։
altԾրագրի շարունակութեան մէջ Կրթական խորհրդի ատենապետ Ջանսոն Աղաբաբայեանի, «Արմէն» տարրական կրթահամալիրի տեսուչ Վրէժ Շիրւանեանի եւ «Քանանեան» դպրոցի տեսուչ տկն. Սալարիֆարի, փոխտեսուչ Ռիմա Սիմոնեանի եւ վերակացու տկն. Իրաւանիի միջոցով գնահատագրեր շնորհւեցին հայերէն ու պարսկերէն առարկաներում՝ առաջին, երկրորդ եւ երրորդ կարգ հանդիսացած ու գերազանց աշակերտներին:
Սոյն արարողութիւնն ընդմիջւեց Աշակերտական խորհրդի ներկայացուցիչներ՝ Անդրիա Խաչատրեանի եւ Բարելի Այւազբալեանի արտայայտութիւններով, որոնք հայերէն եւ պարսկերէն լեզուներով խորհրդի անունից երախտիքի խօսք ուղղեցին դպրոցի տեսչութեանը եւ ուսուցչական կազմին։
Ապա գնահատւեցին նաեւ տարեշրջանի ընթացքում դասերում առաջադիմութիւն ցուցաբերած եւ մարզական յաջողութիւն արձանագրած աշակերտները, դպրոցին տարբեր բնագաւառներում օժանդակող շրջանւարատները եւ դպրոցի գրադարանի գրքերն ամենաշատն ընթերցող ուսուցիչը, ծնողը եւ աշակերտները։ Յատուկ գնահատականի արժանացան հաշւապահական ճիւղի երկրորդ դասարանի աշակերտուհիները՝ համակարգչի դասարանի կարգն ու կանոնը բծախնդրօրէն պահպանելու համար։

alt

Գնահատագրերի բաշխման բաժնին յաջորդեց Կրթական խորհրդի ատենապետ Ջանսոն Աղաբաբայեանի խօսքը։ Նա խորհրդի անունից շնորհաւորական խօսք ուղղելով դպրոցի բեղուն գործունէութեան համար՝ աշակերտներին մաղթեց գիտութեան բարձունքների եւ առաւել բարձր մակարդակների նւաճում եւ ասաց. «Կրթման եւ դաստիարակման գործում նիւթական ներդրումների միջոցով նւազագոյն հնարաւորութիւններն ենք կարող ստեղծել, իսկ նւիրւած եւ մարդկային բարձր արժէքներով օժտւած ուսուցիչներ ունենալը յաջողութիւններ արձանագրելու երաշխիքն է։ Ուսուցիչը հասարակութեան զարգացման գրաւականն է»։
Ծրագրի շարունակութեան մէջ ճկուն եւ համաչափ շարժումներով ելոյթ ունեցաւ դպրոցի Էյրոբիկի խումբը, որից յետոյ՝ պաստառի վրայ ցուցադրւեց լուսանկարների շարան՝ անցնող ուսումնական տարւայ ընթացքում դպրոցում իրականացւած աշխատանքներից։ Այնուհետեւ իրենց ջերմ ձայնով աշակերտուհիներ՝ Վանայ Շիրւանեանը, Թանիա Մինասեանը, Փրենի Ղազարեանը եւ Արիգա Յարութիւնեանը կատարեցին հայրենասիրական մի երգ, որին որպէս ծրագրի եզրափակում՝ յաջորդեցին խմբական երգեր՝ դպրոցի աշակերտութեան կատարմամբ։

Թղթակից (Նոր Ջուղա)

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։