Հա

Համայնք

07/10/2019 - 09:10

Հայաստանի Հանրապետութեան վերանկախացման 28-ամեակի հանդիսաւոր նշումը՝ Նոր Ջուղայում

Սպահանի հայոց թեմի Թեմական խորհրդի նախաձեռնութեամբ եւ պատկան յանձնախմբի կազմակերպութեամբ, ուրբաթ՝ 2019 թւականի հոկտեմբերի 4-ի երեկոյեան, Նոր Ջուղայի Հայ Մ. Մ. «Արարատ» միութեան սրահում, բանախօսական-գեղարւեստական միջոցառմամբ նշւեց Հայաստանի Հանրապետութեան վերանկախացման 28-րդ տարեդարձը։

«alikonline.ir» - Սպահանի հայոց թեմի Թեմական խորհրդի նախաձեռնութեամբ եւ պատկան յանձնախմբի կազմակերպութեամբ, ուրբաթ՝ 2019 թւականի հոկտեմբերի 4-ի երեկոյեան, Նոր Ջուղայի Հայ Մ. Մ. «Արարատ» միութեան սրահում, բանախօսական-գեղարւեստական միջոցառմամբ նշւեց Հայաստանի Հանրապետութեան վերանկախացման 28-րդ տարեդարձը։ Տեղեկացնում է Նոր Ջուղայի մեր թղթակիցը:

Ծրագրին ներկայ էին՝ Սպահանի հայոց թեմի առաջնորդ գերշ. Տ. Սիփան եպս. Քէչէճեանը, օրւայ բանախօս Հայաստանից ժամանած քաղաքական գործիչ, տնտեսագէտ եւ ՀՅԴ Հայաստանի Գերագոյն մարմնի անդամ Արծւիկ Մինասեանը, ազգային մարմինների, շրջանի Հայ Դատի յանձնախմբի եւ միութիւնների ներկայացուցիչներն ու հոծ թւով ժողովուրդ։

Տօնակատարութիւնն սկիզբ առաւ Իրանի Իսլ. ու Հայաստանի Հանրապետութիւնների օրհներգերի յոտնկայս ունկնդրութեամբ եւ հանդիսավարուհի Մեղրի Ղուկասեանի ողջոյնի ու տօնին պատշաճ խօսքերով։

Այնուհետեւ բանախօսական ելոյթ ծաւալեց Արծւիկ Մինասեանը, ով սկզբում դրւատանքով արտայայտւեց Նոր Ջուղայի մասին՝ որպէս ամենացայտուն հայրենասիրական մղումներով արտայայտւած եւ համահայկական նշանակութեամբ աշխատանքներում իր ներդրումն ունեցած համայնք։

Բանախօսն անցնելով բանախօսութեան բուն թեմային, նշելով, որ 1918 թւականին ձեռք բերւած ՀՀ անկախութիւնը հիմք հանդիսացաւ 1991-ին ՀՀ անկախութեան վերականգնմանը, ասաց. «1991 թւականի անկախութեանը յաջորդեցին հսկայածաւալ ռազմական գործողութիւններ Արցախեան ճակատում՝ Հայ Դատի հերթական մի հանգրւանում, որտեղ դարձեալ մենք որպէս ժողովուրդ, ազգ եւ միասնականութիւն հաստատեցինք, թէ հայ ժողովուրդը, Հայաստանը եւ ամբողջ աշխարհը պէտք է իմանայ՝ Արցախը հայկական է եւ Արցախում ապրող ժողովուրդը հայ ժողովուրդն է»։

Բանախօսն անդրադառնալով 90-ական թւականների Հայաստանի ապազգային իշխանութեանն ու պատկան գործողութիւններին, որն աւարտւեց 1998 թւականի ընդվզումներով եւ ազգային ձգտում ունեցող ուժերի իշխանութեան գլուխն անցնելով, կարեւորեց այն փաստը, թէ ինչպէս դրանից յետոյ մեծաքանակ երկրներ սկսեցին ճանաչել հայութեան Արդար Դատը։

Պրն. Մինասեանն իր ելոյթի շարունակութեան մէջ նշելով, որ այսօր ներքին պառակտումը, թշնամանքը, ատելութիւնը եւ մեր ներսում պարտադիր դաւադիր ուժեր տեսնելու մոլուցքը եւ օտարի օրակարգով գործող իշխանականների առկայութիւնը սպառնում է մեզ, կարեւորութեամբ ընդգծեց. «Օտարածին օրակարգը սպառնում է մեր ազգային եւ աւանդական արժէքները, եկեղեցին, ընտանիքը, մշակոյթն ու լեզուն։ Եթէ մենք այսօր միասնաբար ոչ չասենք այս դրսեւորումներին, վաղը կանգնելու ենք փաստերի առջեւ։ Եթէ մենք այսօր չպահանջենք վերջ տալ Հայաստանի ներքին թշնամանքին ու ատելութեանը եւ մեր արժէքների նկատմամբ ոտնձգութիւններին, կարող ենք կորցնել նաեւ այս պետականութիւնը»։

Բանախօսն իր խօսքի եզրափակիչ բաժնում յայտնելով, որ հարկաւոր է մեր ժողովուրդը եւս մի անգամ արթնանայ եւ Հայաստանի Հանրապետութեան քաղաքական պատասխանատուներից պահանջի ճիշտ մշակել ու ներգրաւել մեր համազգային նպատակները, շեշտեց, թէ ՀՅԴ կուսակցութիւնը որպէս քաղաքական ուժ լինելու է Հայ ժողովրդի իղձերն արտայայտող, քանի որ իր սնուցման աղբիւրն ազգն է եւ չի սնուցւում օտարից։ Նա շեշտեց նաեւ, որ անկախ եւ միացեալ Հայաստանի կերտումը նշանակում է, թէ այսօրւանից սկսած Հայաստանի եւ Սփիւռքի հայերը միասնականօրէն պէտք է հետամուտ լինեն հայ ժողովրդի նպատակներին ու ձգտումներին եւ տէր կանգնեն անկախութեանը՝ իրենց երազանքների պետութիւնն ու հայրենիքը կերտելու համար։

Պաշտօնական բաժնի աւարտին ներկաներին իր հայրական պատգամն ուղղեց գերշ. Տ. Սիփան եպս. Քէչէճեանը։ Թեմակալ առաջնորդն իր խօսքում շնորհաւորելով առիթի կապակցութեամբ եւ օրւայ բանախօսական ելոյթը ճշմարտութեան ակնոցով դիտւած հաշւետւութիւն համարելով, Հայաստանի իշխանութիւնը նմանեցրեց ընտանիքի ծնողների, իսկ ժողովրդին՝ զաւակների եւ ասաց, որ երբ ծնողներն ինքնագիտակցութեամբ հաշւետւութեան առաջ կանգնեն ու վերահաստատեն սէրը, յարգանքը, համերաշխութիւնն ու միասնականութիւնը, այդ տունը՝ այսինքը հայրենիքը զօրեղ կը լինի, սակայն երբ ծնողները արտաքին միջամտութեամբ ու թելադրանքով կամ մենատիրութեամբ որեւէ սխալ ընթացքի մէջ մտնեն եւ չկարողանան ընդունել երկրորդ կարծիք, այն ժամանակ այդ տունը դատապարտւած է կորստի եւ քայքայման։ Նա շեշտեց յատկապէս, որ Սպահանի հայոց թեմը պարտականութիւն ունի զօրավիգ կանգնելու ազգին ու հայրենիքին՝ իր արդար ուղին վերագտնելու համար։

Տօնախմբութեան գեղարւեստական բաժինը յագեցած էր ասմունքներով, պարային համարներով եւ հայրենասիրական-ժողովրդական երգերի կատարումներով, որոնք իրականացւեցին Ն. Ջ. Հայ Մ. Մ. «Արարատ» միութեան Մշակութային միաւորի «Կռունկ» համոյթի կրտսեր պարախմբի, նոյն համոյթի ասմունքի խմբի անդամուհիներ՝ Լեռնիկ Ծատուրեանի ու Ալինա Տէր-Սուքիասեանի եւ Թեհրանից ժամանած մեներգիչ Արմէն Փիլոսեանի միջոցով։ Երգերի նւագակցութիւնը կատարեցին մեներգիչը, Րաֆֆի Շահնազարեանն ու Էդմոնդ Ստեփանեանը։

Յարակից լուրեր

  • Իսլ. խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանի 2-րդ աշխատանքային այցը Նոր Ջուղա
    Իսլ. խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանի 2-րդ աշխատանքային այցը Նոր Ջուղա

    11-րդ գումարման Իսլ. խորհրդարանի աշխատանքային շրջանի մեկնարկից շուրջ երկու ամիս անց, սոյն խորհրդարանում Սպահանի եւ հարաւային իրանահայութեան պատգամաւոր Ռոբերտ Բեգլարեանն իր 2-րդ աշխատանքային այցով, երեքշաբթի՝ 2020 թւականի յուլիսի 28-ին ժամանեց Նոր Ջուղա:

  • Ադրբեջանական բանակի հերթական ոտնձգութեան հետեւանքով զոհւած հինգ զինւորների յիշատակին հոգեհանգստեան արարողութիւն՝ Նոր Ջուղայում
    Ադրբեջանական բանակի հերթական ոտնձգութեան հետեւանքով զոհւած հինգ զինւորների յիշատակին հոգեհանգստեան արարողութիւն՝ Նոր Ջուղայում

    Կիրակի՝ 2020 թւականի յուլիսի 26-ի առաւօտեան ժամը 8։00-ին, Ս. Ամենափրկիչ վանքի Ս. Յովսէփ Արիմաթացի եկեղեցում, նախագահութեամբ Սպահանի հայոց թեմի առաջնորդ գերշ. Տ. Սիփան եպս. Քէչէճեանի եւ մասնակցութեամբ թեմի եկեղեցականաց դասի, դռնփակ կերպով հոգեհանգստեան կարգ տեղի ունեցաւ՝ ի յիշատակ վերջին երկու շաբաթների ընթացքում հայ-ադրբեջանական հիւսիս-արեւելեան սահմանի՝ ՀՀ Տաւուշի մարզի ուղղութեամբ ադրբեջանական բանակի ռազմական սադրիչ գործողութիւնների արդիւնքում զոհւած 5 հայ զինւորների։

  • ««Օրինական պահանջի» ապօրինութիւնը». Արծւիկ Մինասեան
    ««Օրինական պահանջի» ապօրինութիւնը». Արծւիկ Մինասեան

    Վերջին օրերին սահմանին տեղի ունեցող իրադարձութիւններն ու աշխարհով մէկ համազգային համախմբման իրական օրինակները լաւ առիթ էին երկրի ներսում համերաշխութիւն եւ օրինականութեան վրայ հիմնւած հանրային ըմբռնում ձեւաւորելու համար: Ցաւալիօրէն, իշխանութիւնը հերթական անգամ բաց է թողնում այս հնարաւորութիւնը: Բաւական էր մի քանի օրւայ յարաբերական անդորրը, երբ դարձեալ գործի դրւեց ներքին լարւածութիւն առաջացնող իշխանական վարքագիծը:

  • ՍԴ վերաբերեալ օրէնքի՝ 30.06.2020 թ. փոփոխութիւնը խաթարում է իրաւական պետութեան բնութագիրը
    ՍԴ վերաբերեալ օրէնքի՝ 30.06.2020 թ. փոփոխութիւնը խաթարում է իրաւական պետութեան բնութագիրը

    Ինչպէս խոստացել էի, այս հրապարակմամբ կանդրադառնամ 2020 թ. յունիսի 30-ին մի քանի ժամւայ ընթացքում քննարկւած եւ ամբողջութեամբ ընդունւած «Սահմանադրական դատարանի մասին» օրէնքի փոփոխութեան բովանդակութեանը։ Արդէն սովորական դարձած արատաւոր պրակտիկային համապատասխան` այս փոփոխութիւններն ընդունւեցին «Իմ քայլը» խմբակցութեան կողմից՝ 80 կողմ ձայնով։ Առանց հանրային քննարկումների, ընդդիմութեան, ինչպէս նաեւ իրաւասու մարմինների կարծիքների, հապճեպ ընդունւած այս փաթեթի միակ շարժառիթը ընդամենը 8 օր առաջ ապօրինութեամբ ընդունւած եւ հրապարակւած` Սահմանադրութեան 213 յօդւածի փոփոխութիւնը գործադրելն էր։

  • Հայաստանի Սահմանադրութեան 213-րդ յօդւածի փոփոխութեան իրաւաքաղաքական հարցերի շուրջ
    Հայաստանի Սահմանադրութեան 213-րդ յօդւածի փոփոխութեան իրաւաքաղաքական հարցերի շուրջ

    Հայաստանում 2018 թ. տեղի ունեցած իշխանափոխութիւնից յետոյ պարբերաբար հետապնդւում էր դատական իշխանութիւնը քաղաքական իշխանութեանը ենթարկելու հարցը։ Քաղաքական մեծամասնութիւնը, շահարկելով ժողովրդի լայն աջակցութիւնը, որը գերզգացական պայմաններում Ազգային ժողովի ընտրութիւններում Նիկոլ Փաշինեանի ղեկավարած «Քաղաքացիական պայմանագիր» կուսակցութեան առանցքի շուրջ ձեւաւորւած «Իմ քայլը» դաշինքին տւել էր 70 % եւ աւելի ձայն, պարբերաբար պնդում էր, որ դատական համակարգը չի վայելում ժողովրդի վստահութիւնը։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։