Հա

Համայնք

10/11/2021 - 11:00

«Արժանապատւութեան եւ դիմադրութեան կազմակերպում» խորագրով բանախօսական երեկոյ՝ Նոր Ջուղայում

Հայ Դատի «Արձագանք» քարոզչական յանձնախմբի նախաձեռնութեամբ, երկուշաբթի՝ 2021 թւականի նոյեմբերի 8-ի երեկոյեան, Նոր Ջուղայի Հայ Մ. Մ. «Արարատ» միութեան սրահում տեղի ունեցաւ բանախօսական երեկոյ՝ «Արժանապատւութեան եւ դիմադրութեան կազմակերպում» խորագրով: Երեկոյին ներկայ էին՝ Սպահանի հայոց թեմի առաջնորդ գերշ. Տ. Սիփան Եպս. Քէչէճեանը, շրջանի Հայ Դատի յանձնախմբի եւ ազգային մարմինների անդամներն ու ժողովուրդ:

«alikonline.ir» - Հայ Դատի «Արձագանք» քարոզչական յանձնախմբի նախաձեռնութեամբ, երկուշաբթի՝ 2021 թւականի նոյեմբերի 8-ի երեկոյեան, Նոր Ջուղայի Հայ Մ. Մ. «Արարատ» միութեան սրահում տեղի ունեցաւ բանախօսական երեկոյ՝ «Արժանապատւութեան եւ դիմադրութեան կազմակերպում» խորագրով: Երեկոյին ներկայ էին՝ Սպահանի հայոց թեմի առաջնորդ գերշ. Տ. Սիփան Եպս. Քէչէճեանը, շրջանի Հայ Դատի յանձնախմբի եւ ազգային մարմինների անդամներն ու ժողովուրդ: Տեղեկացնում է Նոր Ջուղայի մեր թղթակիցը:

Ծրագրի մեկնարկը տրւեց «Հայաստան» դաշինքի նախաձեռնութեամբ նոյն օրը Երեւանի «Ազատութեան» հրապարակում տեղի ունեցած հանրահաւաքից կադրերի ցուցադրմամբ: Այնուհետեւ հաղորդավար Միգանուշ Տէր-Մարտիրոսեանը ներկաներին հրաւիրեց մէկ րոպէ յոտնկայս լռութեամբ յարգել Արցախեան 44-օրեայ պատերազմում զոհւած հայորդիների յիշատակը: Նա անդրադառնալով Հայաստանում կայացած հանրահաւաքին, շեշտեց, որ այն ոչ թէ քաղաքական, այլ ժողովրդական համահաւաք է եղել եւ ընդգծեց, թէ հարկաւոր է ձեւաւորել համահայկական դիմադրութիւն ու մթնոլորտ՝ հայրենիքին սպառնացող բոլոր վտանգները կանխելու համար:

Յաջորդիւ բանախօսական ելոյթով հանդէս եկաւ ազգային-հասարակական գործիչ Վրէժ Շիրւանեանը: Նա իր խօսքի սկզբնական բաժնում հակիրճ անդրադարձ ունեցաւ Հայ Յեղափոխական Դաշնակցութեան՝ հայրենիքին եւ հայութեանը նպաստող կարեւորագոյն գործունէութեանը՝ յատկապէս շեշտելով այդ շարանից վերջինը՝ ազգային դիմադրութեան կազմակերպման ուղղութեամբ աշխատանքները եւ ասաց. «Այսօր եւս նկատի առնելով Հայաստանի եւ Արցախի անվտանգութեան լրջագոյն խնդիրները, Ադրբեջանի եւ Թուրքիայի հետ Հայաստանի իշխանութեան բացայայտ եւ կուլիսային պայմանաւորւածութիւնների յարուցած վտանգներն ու անդառնալի հետեւանքները, ձեւաւորել է ազգային դիմադրութիւն, կանխելու համար անձնատւական նոր գործընթացը, ինչը կարող է յանգեցնել Հայաստանի թրքացմանն ու Արցախի հայաթափմանը»:

Այնուհետեւ նա նշելով, որ այս համահաւաքի կազմակերպումը հերթական փաստն է սփիւռքի եւ հայրենիքի միասնականութեան ու համախմբւածութեան՝ Հայաստանի եւ հայութեան իրաւունքների պաշտպանութեան ուղղութեամբ, աւելացրեց. «Անտարակոյս նոյեմբերի 9-ը այսուհետ մնալու է պատմութեան գրքում, որպէս սեւ էջ, ընդ որում հայ ժողովուրդը կորցրեց իր ազնիւ զաւակների արեամբ ձեռք բերած յաղթանակները, ազատագրւած Արցախի 75 տոկոսը՝ թողնելով շուրջ 5000 զոհ, 10000 հաշմանդամ եւ տասնեակ հազար անօթեւաններ: Ցաւալի իրողութիւն, որի հետ դեռեւս կախւած են բազմաթիւ ինչուներ, հարցադրումներ, ինչու չէ նաեւ տրամաբանական կասկածներ»:

Ապա բանախօսն հերթաբար նշեց անցնող երեք տարիների ընթացքում ՀՀ իշխանութեան վարած ոչ հայրենանպաստ քաղաքականութիւններն ու ժողովրդին տւած կեղծ խոստումները, Արցախեան 44-օրեայ պատերազմի հետեւանքները եւ այն սպառնալիքները, որոնք ներկայ դրութեամբ վտանգի տակ են դնում Հայաստանի հողային ամբողջականութիւնը:

Ահա եւս հատւածների մէջբերում բանախօսութիւնից.

«Եթէ Նիկոլ Փաշինեանն առանց որեւէ մէկի հետ խորհրդակցելու, շրջանցելով ՀՀ սահմանադրութիւնը, միանձնեայ որոշումով, բանակը 15 կլիոմետր յետ է քշել Հայաստանի սահմաններից, տւել է Շուշին ու Հադրութը, Սոթքի մի մասը, Շուրնուխի կէսը, Գորիս-Կապան ճանապարհի 21 կիլոմետրը, ի՞նչ երաշխիքներ կան, որ վաղը նոր զիջումների չի գնալու կամ պաշտօնապէս չի ճանաչելու այժմեան սահմանները: Այսօր Նիկոլ Փաշինեանը որդեգրել է մի քաղաքականութիւն, առ այն, որ յանձնի այն ամէնը, ինչ ուզում են թուրքերն ու ադրբեջանցիները եւ ամբողջ պատասխանատւութիւնը գցի Ռուսաստանի վրայ, իսկ ինքը շարունակի իշխանութեան ղեկին մնալ»:

«Թէ բանակցութիւնների սեղանի շուրջ նստածներն ի՞նչ որոշումներ են կայացնելու, չափազանց կարեւոր է ու օրհասական. թէ բանակցութիւնների սեղանին ո՞վ է նստած լինելու մեր կողմից, կրկնակի կարեւոր է: Տայ Աստւած, որ նոր զիջումների ու նոր պարտւածութիւնների ականատեսը չլինենք … Փաշինեանի վարչապետ մնալու ամէն օրը վճարւում է Հայաստանի Հանրապետութեան հաշւին՝ մեր երկրի ինքնիշխանութեան, արժանապատւութեան եւ ապագայի հաշւին»:

Վերջում ցուցադրւեց «Հայաստան դաշինք»-ի անդամ Գեղամ Մանուկեանի պատգամի տեսանիւթը՝ ուղղւած Նոր Ջուղայի համահաւաքի մասնակիցներին:

Պատգամում ասւած էր. «Ողջ հայութիւնը 30 տարիներ է, որ ամէն ինչ դրել է յանուն Արցախի, եւ Արցախի Հանրապետութիւնն արդիւնքն էր այդ 30-ամեայ պայքարի, որով հպարտանում էինք բոլորս: Մինչեւ այդ դաւադիր հարւածը, որը կոտրեց բոլորիս մէջքը»:

Նա շարունակութեան մէջ անդրադարձ կատարելով անցնող մէկ տարւայ ընթացքում հայրենիքում եւ սփիւռքում իրականացւող դիմադրութեան զանազան ակտերին, ասաց. «Դիմադրութիւնը պէտք է դառնայ համաժողովրդական. ամէն ոք պէտք է իրեն համարի դիմադրութեան ղեկավար: Հայաստանի դէպքում պէտք է փորձենք համոզել մոլորութեան մէջ գտնւող մեր հարեւաններին ու մերձաւորներին: Պէտք է մոլորւած մտքերից հանենք այդ կեղծ հաւատքն ու թոյնը… Պէտք է դիմագրաւենք Արցախի հայաթափմանը, քանի որ առանց հայ բնակչութեան Արցախն այլեւս Արցախ չէ: Իրականում համահայկական այս դիմադրութիւնը, որը նոր թափ պէտք է ստանայ գալիք օրերի, շաբաթների եւ ամիսների ընթացքում, նաեւ դիմադրութիւն է յանուն տարածաշրջանի կայունութեան եւ տարածաշրջանում թշնամական նոր երեւոյթների բացակայութեան»:

Նա իր խօսքի աւարտին աւելացրեց. «Վստահ եմ, որ այս դիմադրական շարժումը թափ է ունենալու. միայն իւրաքանչիւր ոք պէտք է մաս դառնայ այս համահայկական դիմադրութեանը»:

 

 

Յարակից լուրեր

  • Տեղի ունեցաւ «Համահայկական երիտասարդական դիմադրութիւն» շարժման առցանց հաւաքը
    Տեղի ունեցաւ «Համահայկական երիտասարդական դիմադրութիւն» շարժման առցանց հաւաքը

    ՀՅԴ Բիւրոյի Երիտասարդական գրասենեակը հաղորդում է, որ սոյն թւականի յունւարի 16-ին տեղի ունեցաւ «Համահայկական երիտասարդական դմադրութիւն» շարժման առցանց ընդհանուր հաւաքը, որին մասնակցեցին 20 երկրներից շարժմանը միացած 70-ից աւել երիտասարդական կազմակերպութիւններ՝ շուրջ 115 ներկայացուցիչներով։

  • Ամանորի առիթով ս. պատարագ՝ Նոր Ջուղայում
    Ամանորի առիթով ս. պատարագ՝ Նոր Ջուղայում

    Շաբաթ՝ 2022 թւականի յունւարի 1-ին, Ամանորի առթիւ ս. եւ անմահ պատարագ մատուցւեց Նոր Ջուղայի Ս. Ամենափրկիչ վանքի Ս. Յովսէփ Արիմաթացի եկեղեցում՝ ձեռամբ Սպահանի հայոց թեմի առաջնորդ գերշ. Տ. Սիփան Ս. եպս. Քէչէճեանի եւ մասնակցութեամբ թեմի եկեղեցականաց դասի։

  • Երիտասարդական հանդիպում՝ «Դիմադրութեան շարժում» թեմայով
    Երիտասարդական հանդիպում՝ «Դիմադրութեան շարժում» թեմայով

    Նախաձեռնութեամբ Հ.Յ.Դ. «Ռուբէն» երիտ. միութեան վարչութեան, կիրակի` դեկտեմբերի 19-ին, Նոր Ջուղայի Հայ Մ.Մ. «Արարատ» միութեան սրահում կազմակերպւեց «Դիմադրութեան շարժում» խորագրով երիտասարդական հանդիպում, ուր զեկոյցներով հանդէս եկան Նոր Ջուղայի Հայ Դատի գրասենեակի անդամ Արիս Դաւթեանը եւ Հ.Յ.Դ. Բիւրոյի Երիտասարդական գրասենեակի պատասխանատու Արշակ Մեսրոպեանը։ 

  • Նոր տարւան ընդառաջ՝ վաճառք-տօնահանդէս Նոր Ջուղայում
    Նոր տարւան ընդառաջ՝ վաճառք-տօնահանդէս Նոր Ջուղայում

    Կազմակերպութեամբ Նոր Ջուղայի Հայ մարզա-մշակութային «Արարատ» միութեան Կենտ. վարչութեան, ուրբաթ՝ դեկտեմբերի 17-ին, ժամը 10:00-ից 22:00-ը, միութեան հանդիսութիւնների դահլիճում տեղի ունեցաւ Ամանորեայ տօնավաճառ, որտեղ վաճառքի էին հանւել Նոր տարւայ թեմայով ձեռարւեստ եւ զարդեղէն, տնական ուտելիքներ ու թխւածքներ եւ մի շարք այլ իրեր՝ կազմակերպիչ միութեան եւ նոյն միութեան Շահինշահրի մասնաճիւղի Երէցների միաւորների, Նոր Ջուղայի «Փերիոյ» կրթ. միութեան, ինչպէս նաեւ անհատ ձեռներեցների մասնակցութեամբ։

  • Աշխարհով մէկ 70 Հայ Երիտասարդական կազմակերպութիւններ միացան Դիմադրութեան շարժմանը
    Աշխարհով մէկ 70 Հայ Երիտասարդական կազմակերպութիւններ միացան Դիմադրութեան շարժմանը

    ՀՅԴ Բիւրոյի Երիտասարդական Գրասենեակը հաղորդում է, որ ստորեւ յայտարարութեամբ՝ Արցախի եւ սփիւռքի աւելի քան 20 երկրներում գործող երիտասարդական, ուսանողական, մարզական, եկեղեցական, հասարակական-քաղաքական եւ մշակութային միութիւններ եւ կազմակերպութիւններ, միանում են Հայաստանի մէջ թափ առած դիմադրութեան շարժմանը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։