Հա

Համայնք

27/12/2021 - 09:40

Երիտասարդական հանդիպում՝ «Դիմադրութեան շարժում» թեմայով

Նախաձեռնութեամբ Հ.Յ.Դ. «Ռուբէն» երիտ. միութեան վարչութեան, կիրակի` դեկտեմբերի 19-ին, Նոր Ջուղայի Հայ Մ.Մ. «Արարատ» միութեան սրահում կազմակերպւեց «Դիմադրութեան շարժում» խորագրով երիտասարդական հանդիպում, ուր զեկոյցներով հանդէս եկան Նոր Ջուղայի Հայ Դատի գրասենեակի անդամ Արիս Դաւթեանը եւ Հ.Յ.Դ. Բիւրոյի Երիտասարդական գրասենեակի պատասխանատու Արշակ Մեսրոպեանը։ 

«alikonline.ir» - Նախաձեռնութեամբ Հ.Յ.Դ. «Ռուբէն» երիտ. միութեան վարչութեան, կիրակի` դեկտեմբերի 19-ին, Նոր Ջուղայի Հայ Մ.Մ. «Արարատ» միութեան սրահում կազմակերպւեց «Դիմադրութեան շարժում» խորագրով երիտասարդական հանդիպում, ուր զեկոյցներով հանդէս եկան Նոր Ջուղայի Հայ Դատի գրասենեակի անդամ Արիս Դաւթեանը եւ Հ.Յ.Դ. Բիւրոյի Երիտասարդական գրասենեակի պատասխանատու Արշակ Մեսրոպեանը։ Տեղեկացնում է Նոր Ջուղայի մեր թղթակիցը:

Արիս Դաւթեանը բացատրութեամբ հանդէս եկաւ «Հայաստանի եւ Արցախի քաղաքական վերջին զարգացումները եւ սահմանային իրավիճակը» թեմայի շուրջ։ Նա սկզբում նշեց, որ Արցախեան 44-օրեայ պատերազմում հայկական կողմը պարտւեց՝ իր թոյլ ղեկավարութեան, ինչպէս նաեւ թոյլ հնարաւորութիւնների պատճառներով։

Բանախօսն իր խօսքում անդրադառնալով այն իրողութեանը, որ ներկայ դրութեամբ Ադրբեջանն իր վերահսկողութիւնն ունի Գորիս-Կապան մայրուղու վրայ, շեշտեց, թէ դա իր բացասական ազդեցութիւնն է ունեցել Հայաստանի համար, քանի որ մեր երկիրը ոչ միայն կորցրել է իր տարածքի մի հատւածը եւ ձեռքից տւել է իր տրանսպորտային կարեւոր ճանապարհի վրայ լիարժէք վերահսկումը, այլեւ կրճատւել են երկրի տրանզիտային եկամուտները, նկատի առնելով, որ անցնող մէկ տարւայ տւեալների համաձայն 90 տոկոսով պակսել են Իրանի կողմից տրանսպորտային երթեւեկութիւնները այդ ուղղութիւնով եւ փոխարէնը 50 տոկոսով աճել է Իրան-Ռուսաստան կապը Ադրբեջանի տարածքով։

Շարունակութեան մէջ նա նշելով այն փաստը, թէ համաձայնութիւններ են կայացել Հայաստանի եւ Ադրբեջանի սահմանները սահմանազատման յանձնաժողովի միջոցով ճշտելու կապակցութեամբ, շեշտեց որ այդ համաձայնութեան մէջ որեւէ խօսք չի եղել Արցախի սահմանների կամ կարգավիճակի մասին։ Այնուհետեւ նա քարտէզների միջոցով մի շարք տեղեկութիւններ հաղորդեց 44-օրեայ պատերազմի հետեւանքով, ինչպէս նաեւ նոյեմբերի 9-ի համաձայնագրի պատճառով կորցրած տարածքների մասին, շեշտելով, որ նոյեմբերի 9-ի համաձայնագրով կորցրած տարածքները աւելին են քան 44-օրեայ պատերազմի ընթացքում ձեռքից տւածը։

Խօսքի մի այլ բաժնում անդրադառնալով նաեւ Ադրբեջանին քորիդորային ճանապարհ տրամադրելու խնդրին եւ հայ-թրքական յարաբերութիւնների բարելաւման նախագծին, զանազան դիտանկիւններից վերլուծեց այդ երկու երեւոյթների խորքում հիմք դրւած հայակործան եւ Հայաստանակործան պարագաները, որոնք են՝ տարածքների կորուստը, Հայ Դատի մոռացութեան ենթարկւելը, մեծ թուրանի ծրագրի իրականացմանը նպաստելը եւ այլն։

Աւարտին պրն. Դաւթեանը տեղեկացնելով, որ շուրջ 20 օրեր առաջ եղել է Արցախում եւ մօտիկից ականատեսը եղել, թէ ինչպէս արցախցի մեր հայրենակիցները վերադառնալով իրենց հայրենի օջախ, փորձում են վերակառուցել եւ շէնացնել իենց հարազատ բնակավայրը, ասաց. «Երբ արցախցին յոյս ունի եւ կառչած մնալով իր հայրենի հողին ու օջախին, փորձում է շէնացնել իր երկիրը, մենք յուսահատւելու իրաւունք չունենք եւ պէտք է մեր բոլոր ուժերով սատար հանդիսանանք նրանց»։

Յաջորդիւ երեկոյի երկրորդ զեկուցաբեր Արշակ Մեսրոպեանը հեռակայ կապով միացաւ ներկաներին եւ անդրադառնալով «Դիմադրութեան շարժում»-ի հինգ ճակատներին, այսպէս բացատրեց. «Առաջին՝ թուրք-ադրբեջանական ագրեսիայի դէմն առնել, քանի որ դրա նպատակը հայկական շրջանների հայաթափումն ու փանթուրքական ծրագրի քայլ առ քայլ գործադրումն է։ Երկրորդ՝ պայքարել Հայաստանի Հանրապետութեան իշխանութեան վարած քաղաքականութեան դէմ յատկապէս, որ ՀՀ իշխանութիւնը չի պաշտպանում երկրի ազգային-պետական շահերը։ Երրորդ՝ գերպետութիւններին փոխանցել մեր պատգամը, առ այն, որ դուք չէք կարող տարածաշրջանում ձեր շահերն իրականացնել հայ ժողովրդի եւ Հայաստանի ընդհանրական շահերի հաշւին։ Չորրորդ՝ կանխել Արցախի եւ Սիւնիքի հայաթափման ընթացքը, համապատասխան հնարաւորութիւններ ստեղծելով նշւած շրջանները զարգացնելու եւ շէնացնելու համար։ Հինգերորդ՝ առաջացնել ներազգային համախմբում, որը յոյժ կարեւոր է ազգային շահերը միասնական ուժերով առաջ տանելու համար»։

Նա իր խօսքի երկրորդ բաժնում ներկայացրեց Հ.Յ.Դ. Բիւրոյի Երիտասարդական գրասենեակի նախաձեռնած աշխատանքները՝ սկսած 44-օրեայ պատերազմից մինչեւ յետ պատերազմեան ժամանակաշրջանը՝ արցախահայութեանը սատարելու եւ վերաշինութեան ուղղութեամբ իրականացւած աշխատանքներ, Դիմադրութիւն շարժման շրջագծում վարած գործունէութիւն, երիտասարդներին առնչւող, ինչպէս նաեւ պատանիների համար իրականացւած դաստիարակչական ծրագրեր։ Նա յատկապէս ընդգծեց, որ բազմաթիւ սփիւռքահայ երիտասարդներ այցելել են Արցախ եւ Սիւնիքի մարզ՝ մարդասիրական գործողութիւնների ներքոյ իրենց մասնագիտութիւնը ծառայեցնելու հայրենակիցներին սատարելու ճանապարհին։

Պրն. Մեսրոպեանն իր խօսքի աւարտին շեշտեց. «Հայրենիքի համար այս ամենաօրհասական պահին որպէս երիտասարդներ իրաւունք չունենք յուսահատւելու եւ պէտք է ամէն ջանք ի գործ դնենք հայրենիքի շահերն պաշտպանելու համար»։

Երեկոն վարեց Մեղրի Ղուկասեանը։

 

Յարակից լուրեր

  • Տեղի ունեցաւ «Համահայկական երիտասարդական դիմադրութիւն» շարժման առցանց հաւաքը
    Տեղի ունեցաւ «Համահայկական երիտասարդական դիմադրութիւն» շարժման առցանց հաւաքը

    ՀՅԴ Բիւրոյի Երիտասարդական գրասենեակը հաղորդում է, որ սոյն թւականի յունւարի 16-ին տեղի ունեցաւ «Համահայկական երիտասարդական դմադրութիւն» շարժման առցանց ընդհանուր հաւաքը, որին մասնակցեցին 20 երկրներից շարժմանը միացած 70-ից աւել երիտասարդական կազմակերպութիւններ՝ շուրջ 115 ներկայացուցիչներով։

  • Ամանորի առիթով ս. պատարագ՝ Նոր Ջուղայում
    Ամանորի առիթով ս. պատարագ՝ Նոր Ջուղայում

    Շաբաթ՝ 2022 թւականի յունւարի 1-ին, Ամանորի առթիւ ս. եւ անմահ պատարագ մատուցւեց Նոր Ջուղայի Ս. Ամենափրկիչ վանքի Ս. Յովսէփ Արիմաթացի եկեղեցում՝ ձեռամբ Սպահանի հայոց թեմի առաջնորդ գերշ. Տ. Սիփան Ս. եպս. Քէչէճեանի եւ մասնակցութեամբ թեմի եկեղեցականաց դասի։

  • Նոր տարւան ընդառաջ՝ վաճառք-տօնահանդէս Նոր Ջուղայում
    Նոր տարւան ընդառաջ՝ վաճառք-տօնահանդէս Նոր Ջուղայում

    Կազմակերպութեամբ Նոր Ջուղայի Հայ մարզա-մշակութային «Արարատ» միութեան Կենտ. վարչութեան, ուրբաթ՝ դեկտեմբերի 17-ին, ժամը 10:00-ից 22:00-ը, միութեան հանդիսութիւնների դահլիճում տեղի ունեցաւ Ամանորեայ տօնավաճառ, որտեղ վաճառքի էին հանւել Նոր տարւայ թեմայով ձեռարւեստ եւ զարդեղէն, տնական ուտելիքներ ու թխւածքներ եւ մի շարք այլ իրեր՝ կազմակերպիչ միութեան եւ նոյն միութեան Շահինշահրի մասնաճիւղի Երէցների միաւորների, Նոր Ջուղայի «Փերիոյ» կրթ. միութեան, ինչպէս նաեւ անհատ ձեռներեցների մասնակցութեամբ։

  • «Խելամիտ կը լինէր ի դէմս Իրանի ունենալ ուժեղ բարեկամ մեր երկրի թիկունքում». Արիս Դաւթեան
    «Խելամիտ կը լինէր ի դէմս Իրանի ունենալ ուժեղ բարեկամ մեր երկրի թիկունքում». Արիս Դաւթեան

    ՀՀ ներկայ իշխանութիւնների շրջանում մի քանի սխալ քայլեր եղան Իրանի հանդէպ աւելորդ եւրոպամէտ եւ ամերիկամէտ լինելու հարցով՝ նկատի չառնելով մեր երկրի գերոպոլիտիկ դերը եւ մեր հարեւանների հարցերը՝ Սիւնիքում Yerkir.am-ի հետ հարցազրոյցում ասաց Նոր Ջուղայի Հայ Դատի գրասենեակի անդամ Արիս Դաւթեանը, որը տարբեր երկրների 50-ից աւելի ներկայացուցիչների հետ մասնակցում էր ՀՅԴ Հայ Դատի յանձնախմբերի եւ գրասենեակների 5-օրեայ խորհրդաժողովին, որն անցկացւեց Երեւանում, Գորիսում ու Ստեփանակերտում։

  • «Հայը պէտք է յարատեւ վրէժի տրամաբանութեամբ շւարժւի, եւ մենք պատրաստ ենք առաջնորդելու երիտասարդութեանը». Արշակ Մեսրոբեան
    «Հայը պէտք է յարատեւ վրէժի տրամաբանութեամբ շւարժւի, եւ մենք պատրաստ ենք առաջնորդելու երիտասարդութեանը». Արշակ Մեսրոբեան

    Ներքին դաւաճաններին ու արտաքին թշնամուն պատժելու՝ «Նեմեսիս» գործողութեան կնքահայր Շահան Նաթալիի «յարատեւ վրէժի» պատգամի հետ Դաշնակցութիւնը մի քանի այլ արտայայտութիւններ էլ ունի՝ «յարատեւ պայքար», «յարատեւ կռիւ», եւ հայ ազգը՝ համազգային մակարդակով, այսօր պէտք է հէնց այդ տրամաբանութեամբ շարժւի առաջ՝ Yerkir.am-ի հետ հարցազրոյցում համոզմունք յայտնեց ՀՅԴ Բիւրոյի երիտասարդական գրասենեակի պատասխանատու Արշակ Մեսրոբեանը։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։