Հա

Համայնք

15/02/2020 - 14:30

Դոկտ. Կարէն Խանլարեանի եւ Արա Շահվերդեանի այցը՝ Թաւրիզ եւ Ուրմիա

Խորհրդարանական նախընտրական քարոզարշաւի երկրորդ օրը Ատրպատականի հայոց թեմի հայ համայնքների համար իւրայատուկ մեկնարկ ունեցաւ եւ լի էր անակնկալներով:

Արա Շահվերդեան.

«Իմ ծրագիրը հիմնւած է նախորդ պատգամաւորների գաղափարների վրայ»

 

Դոկտ. Կարէն Խանլարեանը ուրմիահայերի հետ հանդիպմանը.

«Եթէ կան յաջողութիւններ ու ձեռքբերում, ապա այն գոյացել է ժողովրդի վստահութեան ու համագործակցութեան շնորհիւ»

 

«ԱԼԻՔ», Թաւրիզ - Խորհրդարանական նախընտրական քարոզարշաւի երկրորդ օրը Ատրպատականի հայոց թեմի հայ համայնքների համար իւրայատուկ մեկնարկ ունեցաւ եւ լի էր անակնկալներով:

Ուրբաթ, փետրւարի 14-ի առաւօտեան Թաւրիզ էին ժամանել գործող պատգամաւոր դոկտ. Կարէն Խանլարեանը եւ պատգամաւորութեան թեկնածու Արա Շահվերդեանը:

Երկու թեկնածուները համատեղ ելոյթներով հանդէս եկան Թաւրիզի Հ. Մ. «Արարատ» կազմակերպութեան Թաւրիզի մասնաճիւղի կենտրոնատեղիում, ապա այցելեցին առաջնորդարան, որտեղ հանդիպեցին Ատրպատականի հայոց թեմի առաջնորդ Տ. Գրիգոր եպս. Չիֆթճեանին, Թեմական խորհրդի ատենապետ՝ Ռուբիկ Ջանանեանին եւ ՊԺ-ի ատենապետուհի Արմինէ Յովսէփեանին:

Հանդիպմանը թեկնածուների ելոյթին յաջորդեց Սրբազան Հօր օրհնանքի խօսքը, որտեղ նա կարեւորելով իրանահայութեան մասնակցութիւնը ընտրութիւններին, այն համարեց ժողովրդի կամքի ձայնը սեփական եւ համայնքային իրաւունքների պահպանման համար:

Թեկնածուները նաեւ ներկայ են եղել ՀՕՄ-ի կենտրոնատեղիում, որտեղ գործում է նաեւ «Ծերունի Գասպարեան» մանկապարտէզը իր թւով 9 բալիկներով: Թաւրիզահայ համայնքի հետ հանդիպումների շարքը եզրափակւեց «Համազասպ Ոսկանեան» սրահում հաւաքւած բազմութեան հետ հանդիպմամբ:

Նոյն օրը, երեկոյեան, Արա Շահվերդեանը՝ դոկտ. Կարէն Խանլարեանի ընկերակցութեամբ այցելեց Ուրմիա, որտեղ թեկնածուներին դիմաւորելու էին եկել Գործխորհրդի նախագահ՝ Վահիկ Յակոբեանսը, ՊԺ-ի Բ ատենապետ՝ Սաքօ Մեջլումեանը, ՀՕՄ-ի Ուրմիայի մասնաճիւղի նախագահուհի՝ Սեդա Մեջլումեանը:

Ժողովրդական հանդիպման ընթացքում թեկնածու Արա Շահվերդեանը ներկայացրեց իր նախընտրական ծրագիրն ու նպատակները: Արա Շահվերդեանի բնութագրմամբ իր ծրագիրը հիմնւած է նախկին նստաշրջաններում պատգամաւորների որդեգրած գաղափարների ու գործունէութեան վրայ:

Դոկտ. Կարէն Խանլարեանը խօսափողին էր մօտեցել նախքան Արա Շահվերդեանի ելոյթը: Նա իր խօսքի ընթացքում նշեց. «Եթէ ձեռքբերում կայ, ապա դա գոյացել է սիրելի ժողովրդի հետ միասնական աշխատանքի բերումով»: Նա շնորհակալութիւն յայտնելով ժողովրդին նշեց, որ Արա Շահվերդեանի մօտ նոյնպէս տեսնում է այն որակն ու գաղափարները, որոնց կարելի է վստահել ժողովրդի այսօրն ու վաղը:

Հանդիպմանը յաջորդեց թեկնածուների հանդիպումը անւանի իրանահայ գործարար Էդիկ Մեջլումեանի հետ, որով էլ եզրափակւեց թեկնածուների Ատրպատական կատարած այցը:

Յարակից լուրեր

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։