Հա

Համայնք

18/02/2019 - 16:00

Հ. Մ. Մ. «Նայիրի» միութեան նախաձեռնութեամբ՝ Փետրւարեան ապստամբութեանը նւիրւած միջոցառում

Հայ ազատագրական շարժման հիմնասիւներից համարւող Փետրւարեան  համաժողովրդական ապստամբութեան 89-ամեակը նշւեց Հ. Մ. Մ. «Նայիրի» միութեան յարկի տակ:

«ԱԼԻՔ»,Կ.Դ. - Հայ ազատագրական շարժման հիմնասիւներից համարւող Փետրւարեան  համաժողովրդական ապստամբութեան 89-ամեակը նշւեց Հ. Մ. Մ. «Նայիրի» միութեան յարկի տակ:

Հ. Մ. Մ. «Նայիրի» միութեան Արւեստից բաժանմունքի նախաձեռնութեամբ, միութեան կենտրոնատեղի «Սուքերեան» սրահում, գեղարւեստական-բանախօսական յայտագրով յագեցած ծրագրով նշւեց Փետրւարեան ապստամբութեան ամեակը:

Միջոցառմանը բանախօս էր հրաւիրւել «Ալիք» կայքէջի պատասխանատու-խմբագիր Արամ Շահնազարեանը, ով անդրադառնալով 1920 թւականին Փետրւարի 18-ի  ապստամբութեանը յանգեցրած պայմաններին եւ այդ ժամանակաշրջանի պատմական տւեալներին ընդգծեց, որ Փետրւարեան համաժողովրդական ապստամբութիւնը հայ ժողովրդի ազգային ամենանշանակալից իրադարձութիւններից մէկն է, որը իր կարեւորագոյն  եւ անջնջելի դերը խաղաց հայ ժողովրդի հետագայ պատմութեան ընթացքում: Նա համապարփակ տւեալներով անդրադարձաւ Փետրւարի 18-ի ապստամբութեան հիմքերին եւ ներկայացրեց Փետրւարեան ապստամբութեան բնութագիրը, այն համարելով համաժողովրդական ապստամբութիւն ժամանակի բոլշեւիկեան իշխանութեան դէմ, որի այդօրինակ գոյութեան դէպքում աղէտ էր սպառնալու Հայաստանին եւ նշեց, որ թէեւ Փետրւարեան ապստամբութիւնից յետոյ, շատ կարճ կեանք ունեցաւ Հայաստանի ազատութեան եւ անկախութեան վերականգնումը, սակայն այն մեծ եւ անջնջելի նշանակութիւն ոնեցաւ մեր ժողովրդի պատմութեան մէջ:

Նշենք, որ օրւայ միջոցառմանը բացման խօսքով եւ ասմունքով հանդէս եկաւ Թենի Աղաբաբեանը, ազգային երգերի կատարմամբ՝ Սիրարփի Մելիքեանը, որին դաշնամուրի կատարումով ընկերակցում էր Արին Միրզայեանը, իսկ հայկական ազգային-ժողովրդական պարերի շարանով ելոյթ ունեցան Հ. Մ. Մ. «Նայիրի» միութեան պարախմբի թիւ երկուսի սաները, ղեկավարութեամբ Արտաւազդ Աւետիսեանի:

Հանդիսութեան աւարտին կազմակերպւել էր ընդունելութիւն:

 

Յարակից լուրեր

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։