Երէկ, «Ֆաջր» միջազգային թատերական փառատօնին մասնակցելու նպատակով Իրան ժամանած «Համազգային» թատերախումբն այցելեց թերթիս խմբագրատուն հանդիպելով «ԱԼԻՔ» օրաթերթի գլխաւոր խմբագրին, վարչութեան նախագահին եւ խմբագրութեան աշխատակազմին:
«ԱԼԻՔ» - Երէկ, «Ֆաջր» միջազգային թատերական փառատօնին մասնակցելու նպատակով Իրան ժամանած «Համազգային» թատերախումբն այցելեց թերթիս խմբագրատուն հանդիպելով «ԱԼԻՔ» օրաթերթի գլխաւոր խմբագրին, վարչութեան նախագահին եւ խմբագրութեան աշխատակազմին:
Հանդիպմանը, որտեղ ներկայ էին՝ «Ալիքօնլայն»-ի պատասխանատու խմբագիրը եւ Հ.Մ.Ա.Կ.-ի Արւեստից միութեան վարչութեան ներկայացուցիչներն, անցաւ ջերմ մթնոլորտում, ուր հիւրերը կիսւեցին տպաւորութիւններով միաժամանակ ծանօթանալով իրանահայ 90-ամեայ թերթի գործունէութեանը:
Յիշեցնենք, որ թատերախումբն Իրան է ժամանել 6 հոգանոց կազմով՝ «Լոռեցի Սաքօն» ներկայացմամբ, որն ի դէպ, «Ֆաջր»-ում բեմ բարձրանալուց յետոյ արժանացել է ժիւրիի յատուկ ուշադրութեանը: Ներկայացումը հայ հանդիսատեսի համար խաղարկւելու է նաեւ այսօր՝ Նոր Ջուղայի «Արարատ» միութեան բեմում, իսկ վաղը՝ Հ.Մ.Ա.Կ.-ի «Կոմիտաս» համերգասրահում:
Յատկանշական է, որ փառատօնի երկրորդ օրւայ ներկայացումների շրջանակում «Լոռեցի Սաքօն» բեմականացւել է երկու անգամ, որտեղ հանդիսատեսի կողքին ներկայ է եղել նաեւ ԻԻՀ-ում ՀՀ արտակարգ եւ լիազօր դեսպան դոկտ. պրոֆ. Արսէն Աւագեանը:
Անւանի դերասան Արման Նաւասարդեանը պատմեց, որ Արցախեան 44-օրեայ պատերազմից մի երկու ամիս անց «Համազգային»-ը մանկական ներկայացում բեմադրելու համար այցելում է Արցախի հեռաւոր գիւղեր:
Պատմեց, որ ներկայացումների ժամանակ երեխաների ծիծաղը չէր դադարում ու միայն երեկոյթներից մէկի ժամանակ նկատել է, որ մի կին հեկեկում ու լաց է լինում: Ներկայացումից յետոյ գտնում է կնոջն ու հարցնում՝ ինչի էր լալիս.
Կինն էլ թէ՝ «երկու ամիս ա ինչ կռիւն աւարտւել ա ու առաջին անգամ լսում եմ երեխայիս ծիծաղի ձայնը»...
Ու էստեղ լռեց դերասանը ու երկար ժամանակ փակ պահեց աչքերը:
Իսկ ներկայացման ռեժիսոր Նարինէ Գրիգորեանը Արմանի պատմածին աւելացրեց, որ ներկայացումները համընկել էին Նոր տարւայ տօնական օրերին ու նւէրների մեքենան ձեան պատճառով ուշանում էր: Պատմեց, որ ինքը (Նարինէն) բեմից դիմելով երեխաներին ասել է՝ ձեր նւէրները Ձմեռ պապը կը դնի ձեր տօնածառի տակ...ու երեխաներից մէկը մօտենում ու ասում է «բայց մենք ծառ չենք դնելու»...
Ու Նարինէն պատմելիս աչքերը լցրեց...
