Հա

Համայնք

24/09/2022 - 14:20

Սրբազահ Հօր խօսքը՝ դպրոցների վերամուտի առիթով

Շատ սիրելի աշակերտներ, աշակերտուհիներ,

Ամառը վերջանում է եւ գալիս է աշունը. ըստ մեր հայկական տօնացոյցի, ու աշնանամուտի հետ բացւում են նաեւ մեր դպրոցները, կրթական մեր բոլոր օջախները։

Գոհութիւն եւ փառք Աստծուն, որի օրհնութեամբ սկսում ենք մեր դպրոցական տարեշրջանը։

(Տարրական օղակ)

 

Շատ սիրելի աշակերտներ, աշակերտուհիներ,

Ամառը վերջանում է եւ գալիս է աշունը. ըստ մեր հայկական տօնացոյցի, ու աշնանամուտի հետ բացւում են նաեւ մեր դպրոցները, կրթական մեր բոլոր օջախները։

Գոհութիւն եւ փառք Աստծուն, որի օրհնութեամբ սկսում ենք մեր դպրոցական տարեշրջանը։

Անցեալ երկու տարիներում կորոնա համաճարակի պատճառով հնարաւոր չեղաւ ֆիզիկապէս դպրոցները բացել եւ կանոնաւոր դասաւանդութեամբ մեր ուսումնառութիւնը շարունակել։

Առցանց ուսումնառութիւնը չարեաց փոքրագոյնն էր. թէեւ աշակերտների համար թերեւս հաճելի էր, սակայն իրական դասաւանդութեան համար ոչ այնքան գովելի։ Այսուհանդերձ, մեր դպրոցները անցեալ երկու տարիներին մի մաս առցանց մի մասն էլ ֆիզիկապէս դպրոց գնալով իրենց գերագոյնը արեցին կանոնաւոր դասաւանդութեամբ իրենց տարեշրջանը ամբողջացնելով։

Վերամուտի այս օրերին, շնորհաւորում եմ ձեզ սիրելի աշակերտներ եւ աշակերտուհիներ, ուսուցչական կազմեր, տեսչութիւններ եւ ծնողական խորհուրդներ, ծնողներ եւ ողջ պաշտօնէութիւն եւ ի սրտէ աղօթում եմ, որ ունենանք խաղաղ, հանգիստ, հիւանդութիւնից ու համաճարակից հեռու դպրոցական մի տարեշրջան։

Դպրոցը մեր երկրորդ տունն է, որտեղ մենք ստանում ենք հոգեւոր սնունդ, գիտութիւն եւ ինչու չէ նաեւ սէր՝ մեր ուսուցիչների եւ պատասխանատուների կողմից, նրանց մեզ փոխանցած գիտութիւնը մեր աչքերի առաջ բացում է մեր լեզուն իր ողջ գեղեցկութեամբ եւ հարստութեամբ, մեր պատմութիւնն ու հերոսները, թագաւորներն ու նշանաւոր թագուհիները, մեր եկեղեցու պատմութիւնն ու մեր կրօնը, որ լոյս ու հոգեւոր սնունդ է տալիս մեզ։

Դպրոցում մեր ստացած, հաւաքած գիտելիքները մեզ տալիս են իմաստութիւն, հասկանալու մեր ճշմարիտ պատմութիւնն ու աստւածային ճշմարտութիւնը կրօնի եւ եկեղեցու պատմութեան ուսուցումով։

Դուք բոլորդ ձեր մայրենի դասագրքերում սովորած կը լինէք թէ ո՞վ է Րաֆֆին. նա մեծ գրող եւ մեր ազատագրական պայքարի առաջին շեփորահարներից է եղել։ Ահա Րաֆֆին իր գրքերի մէջ ասում է՝ հայրենասիրութիւնը, այսինքը՝ Հայրենիքը, հայերէն լեզուն եւ պատմութիւն սիրելը ծնունդ է առնում հայերէնաճանաչութիւնից։ Առանց մեր Հայրենիք իր պատմութեամբ եւ աշխարհագրութեամբ ճանչնալու չենք կարող ճշմարիտ ու հաւատաւոր հայրենասէրներ լինել։

Հետեւաբար, սիրելի աշակերտներ, տեսնում էք այսօր մեր թշնամին գրաւել է մեր հողերը, մեր գեղեցիկ Արցախի մեծ մասը եւ դեռ սպառնում է Հայաստանին։ Այս երեւոյթի դէմ պաշտպանւելու միակ զէնքը մեր լեզուն, մեր պատմութիւնն ու կրօնը լաւագոյն կերպով սովորելն է, սրանք մեր ինքնութեան զրահանդերձն են։

Տարեմուտի այս օրերին բոլորս ուխտելու ենք հաւատարիմ մնալ մեր լեզւին, պատմութեանը, կրօնին եւ ազգային ու հոգեւոր արժէքներին եւ նրանցով զօրացած շարունակենք հայօրէն ապրել մեր կեանքը։

Մէկ անգամ եւս շնորհաւորում եմ ձեզ վերամուտի առիթով, աղօթելով, որ Ամենաբարին Աստւած բոլորիդ տայ առողջութիւն, ձեզ հեռու պահի ամէն տեսակ հիւանդութիւններից եւ համաճարակից։

Օրհնութիւն եւ խաղաղութիւն բոլորիդ, իմ սիրելի աշակերտ-աշակերտուհիներ։

 

ԱՂՕԹԱՐԱՐ՝

ՍԵՊՈՒՀ ԱՐՔ. ՍԱՐԳՍԵԱՆ

ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ

Սեպտեմբեր 2022

Թեհրան

 

 

(Միջնակարգ օղակ)

 

Շատ սիրելի աշակերտներ, աշակերտուհիներ,

Վերամուտ է կրկին. հազարաւոր, տասնեակ հազարաւոր աշակերտներ, աշակերտուհիներ իրենց ծնողների հետ միասին շարւած աշխատանքի են լծւած. աշակերտները աշխատում են ձեռք բերել իրենց դասարանների համապատասխան դասագրքերն ու տետրերը, գրենական պիտոյքներն ու անհրաժեշտ դպրոցական իրերը, ծնողները մի կողմից մտածում են դպրոցական թոշակների հայթայթման, իրենց զաւակների դպրոցի յատուկ զգեստների, մի խօսքով իրենց զաւակներին արտաքնապէս նորոգելու եւ հոգեպէս պատրաստելու դպրոցական տարեմուտին եւ միւս կողմից էլ աշխատում են աստիճանաբար նրանց պատրաստել դպրոցական, կրթական կեանքին։

Սա տարիների աւանդութիւն է, եւ առիթ է տալիս հետաքրքրական եւ հաճելի եռուզեռի։

Մենք էլ անցել ենք այդ բոլորի միջից եւ յատուկ յուզականութեամբ ու երախտագիտութեամբ ենք յիշում այդ բոլորը։

Այսօր կեանքի պայմանները փոխւել են, քսանմէկերորդ դարը իր նւաճումներով եւ տեխնոլոգիական ձեռքբերումներով հանդերձ, չի կարող երանական մի կեանքի հեռանկարի առաջ դնել մարդկութեանը իր բոլոր խաւերով։

Հայակեանքը եւս մեծ մարտահրաւէրների, անորոշութիւնների առջեւ է կանգնել. տակաւին երեք տասնամեակ առաջ երազում էինք ու պայքարում յանուն մեր Հայրենիքի եւ չքնաղ Արցախի անկախութեան համար։ Մեր երազը իրականացաւ. Հայաստանը անկախացաւ. Արցախը եւս մեր ժողովրդի միահամուռ ու միասնական պայքարի շնորհիւ անկախացաւ, ու մի պահ ապրեցինք երանական այն պահը, երբ սկսւելու էր մեր ամբողջական հայրենիքի ձեռքբերման սուրբ գործը։

Դժբախտաբար 2018-ից սկսած Հայրենիքում եւ Արցախում տեղի ունեցած դէպքերը մեզ աստիճանաբար յետ մղեցին։ Արցախի մեծ մասը վերագրաււեց թշնամու կողմից եւ Հայաստանն էլ այսօր տատանւում ադրբեջանական եւ թուրքական «սուրի» միջեւ։ Ու հիմա մենք կոչւած ենք շարունակել մեր պայքարը, քանի որ թշնամին կրկին անգամ բանաստեղծի բառերով՝

Երբ մեր թշնամին իր սուրն է դրել,

Իր օրհասական սուրը՝ մեր կրծքին,…

Արդարութեան ձայնը հանած իր սրտից՝

Արտաքսել է մեզ մեր բնիկ երկրից։

Պանդո՜ւխտ, հալածեալ եղբա՛րք ո՞ւր դիմենք,

Հիմի է՞լ լռենք։ 

Պիտի չլռենք սիրելի աշակերտներ եւ աշակերտուհիներ, պիտի զինւենք մեր հայրերի կեանքից մեզ հասած փորձառութեամբ. պիտի զինւենք մեր ստացած ու ստանալիք գիտելիքներով, որոնք մեզ տալու են իմաստութիւն հասկանալու համար մեր բացթողումները եւ միաժամանակ լիցքաւորւելու ու կենսաւորւելու հայոց լեզւի ոգով, մեր պատմութեան ու հաւատքի զօրութեամբ, մեր հայրենիքի ճանաչողութեամբ. առանց հայրենիքը ճանաչելու չենք կարող իրական հայրենասէրներ լինել, դրա համար մեր անմահանուն Րաֆֆին մեզ կտակ է թողել հետեւեալ պատգամը՝ Հայրենասիրութեան ակունքը, աղբիւրը հայրենաճանաչութիւնն է. ճանչնալ, իմանալ մեր լեզուն, մեր պատմութիւնը, մեր կրօնը, մեր երկիրը իր լեռներով, գետերով, դաշտերով, լիճերով, մի խօսքով իր ողջ աշխարհագրութեամբ։

Հայրենաճանաչութեամբ զինւելը ի խնդիր մեր գոյատեւման, ի խնդիր մեր հայրենիքի պահպանման եւ ամբողջացման։

Այս տարւայ իմ պատգամը ձեզ, սիրելի աշակերտ-աշակերտուհիներ ա՛յս է. «Հայրենասիրութեամբ ապրենք, հայրենասիրութեամբ լցւենք եւ հայրենասիրութեամբ մեր գոյապայքարը շարունակենք»։

Այս խոհերով շնորհաւորում եմ ձեզ դպրոցական վերամուտի առիթով, շնորհաւորում եմ մեր ուսուցիչներին եւ ողջ պաշտօնէութեանը։

Աղօթում եմ բոլորիդ համար եւ մաղթում, որ այս տարի բոլորիս համար լինի Աստծու օրհնութեամբ եւ առաջնորդութեամբ մի տարի։

Խաղաղութիւն եւ սէր ձեզ սիրելիներ։

ԱՂՕԹԱՐԱՐ՝

ՍԵՊՈՒՀ ԱՐՔ. ՍԱՐԳՍԵԱՆ

ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ

Սեպտեմբեր 2022

Թեհրան

 

Յարակից լուրեր

  • Այցելութիւն ազգային առաջնորդարան
    Այցելութիւն ազգային առաջնորդարան

    Հինգշաբթի, 1 դեկտեմբերի 2022 թ.-ին, Թեհրանի հայոց թեմի առաջնորդ՝ գերշ. Տ. Սեպուհ Ս. արք. Սարգսեանը ազգային առաջնորդարանի դահլիճում ընդունեց Թիֆլիսի հայագիտութեան ֆակուլտետի դասախօս եւ միեւնոյն ժամանակ վրաց կրօնների երկխօսութեան կենտրոնի տնօրէն՝ տկն. Լէյլա Ջիջիլաւային, պրն. Ալի Ալիեւ վրաց սիւնի եւ շիա համայնքների առաջնորդին, հոջ. Մոհամադ Ջաւադ Ադաբիին եւ Սէյեդէ Նարգես Ղասեմիին։

  • Սրբազան Հայրն իր գրասենեակում ընդունեց «Իրանահայ ջրանկարիչներ» գրքի հեղինակ՝ պրն. Ամիր Դաւուդիփուրին
    Սրբազան Հայրն իր գրասենեակում ընդունեց «Իրանահայ ջրանկարիչներ» գրքի հեղինակ՝ պրն. Ամիր Դաւուդիփուրին

    Հինգշաբթի, 1 դեկտեմբերի 2022 թ.-ին, Թեհրանի հայոց թեմի առաջնորդ՝ գերշ. Տ. Սեպուհ Ս. արք. Սարգսեանն իր գրասենեակում ընդունեց «Իրանահայ ջրանկարիչներ» գրքի հեղինակ Ամիր Դաւուդիփուրին եւ «Արտակ Մանուկեան» թանգարանի տնօրէնուհի Ալիս Շահմուրադեանին:

  • Թեհրանի հայոց թեմի առաջնորդ՝ Գերշ. Տ. Սեպուհ Ս. արք. Սարգսեանի հարցազրոյցը «Ալ-Մայադին» հեռուստաընկերութեան հետ
    Թեհրանի հայոց թեմի առաջնորդ՝ Գերշ. Տ. Սեպուհ Ս. արք. Սարգսեանի հարցազրոյցը «Ալ-Մայադին» հեռուստաընկերութեան հետ

    Չորեքշաբթի, 2002-ի նոյեմբերի 23-ի երեկոյեան Թեհրանի ժամանակով «Ալ-Մայադին» հեռուստաընկերութիւնը յատուկ հարցազրոյց ունեցաւ Թեհրանի հայոց թեմի առաջնորդ Գերշ. Տ. Սեպուհ Ս. արք. Սարգսեանի հետ, փոքրամասնութիւնների եւ յատկապէս իրանահայութեան մասին։ Թղթակցի հարցերին ի պատասխան Սրբազան Հայրը կարեւորութեամբ շեշտեց իրանեան հասարակայնութեան բազմազանութիւնն ու կրօնական ազատութիւնները։

  • Հանդիսաւոր ս. պատարագ «Ս. Աստւածածին երից Ամաց ի տաճարն ընծայման» եւ համանուն եկեղեցու անւանակոչութեան տօնի առիթով
    Հանդիսաւոր ս. պատարագ «Ս. Աստւածածին երից Ամաց ի տաճարն ընծայման» եւ համանուն եկեղեցու անւանակոչութեան տօնի առիթով

    Նոյեմբերի 21-ը տօնն է «Ընծայման Ս. Աստւածածնի երից ամաց ի տաճարն» եւ տօնն է նաեւ համանուն եկեղեցւոյ անւանակոչութեան:

    Այդ առիթով կիրակի, 20 նոյեմբերի 2022 թ.-ի առաւօտեան, Ս. Աստւածածին եկեղեցում նախագահութեամբ Թեհրանի հայոց թեմի առաջնորդ՝ գերշ. Տ. Սեպուհ Ս. արք. Սարգսեանի եւ ձեռամբ Մեծի Տանն Կիլիկիոյ կաթողիկոսութեան Ն.Ս.Օ.Տ.Տ. Արամ Ա Վեհափառ Հայրապետի արտօնութեամբ եւ առաջնորդ Սրբազան Հօր հրաւէրով Թեհրան ժամանած Տ. Վաղինակ ծ. վրդ. Մելոյեանի մատուցւեց սուրբ եւ անմահ պատարագ:

  • Այցելութիւն ազգային առաջնորդարան
    Այցելութիւն ազգային առաջնորդարան

    Շաբաթ, 19 նոյեմբերի 2022 թ.-ի երեկոյեան ժամը 5-ին, Թեհրանի հայոց թեմի առաջնորդ՝ գերշ. Տ. Սեպուհ Ս. արք. Սարգսեանը, իր գրասենեակում ընդունեց Հայաստանի «Հայրենիք» կուսակցութեան նախագահ եւ ՀՀ Ազգային անվտանգութեան ծառայութեան նախկին տնօրէն Արթուր Վանեցեանին եւ ԵՊՀ Իրանագիտութեան ամբիոնի վարիչ Վարդան Ոսկանեանին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։