Նախաձեռնութեամբ Հ. Մ. Մ. «Նայիրի» միութեան եւ Մարզական բաժանմունքի, երէկ՝ հոկտ. 25-ի երեկոյեան նոյն միութեան «Արցախ» սրահում կազմակերպւել էր միութեան մարզիկների գնահատման իւրայատուկ երեկոյ:
«ԱԼԻՔ», Կ. Դ. - Նախաձեռնութեամբ Հ. Մ. Մ. «Նայիրի» միութեան եւ Մարզական բաժանմունքի, երէկ՝ հոկտ. 25-ի երեկոյեան նոյն միութեան «Արցախ» սրահում կազմակերպւել էր միութեան մարզիկների գնահատման իւրայատուկ երեկոյ:
Միջոցառմանը հրաւիրւել էին Իրանի 53-րդ Համահայկական խաղերին միութեան կողմից մասնակցած եւ մեդալներ շահած մարզիկները: Գնահատման երեկոյի յայտագիրը յագեցած էր արտայայտութիւններով եւ գեղարւեստական կատարումներով, որոնք հանդիսատեսին հրամցրին մատաղ սերնդի ներկայացուցիչները: Հրաւիրւած էին վետերան մարզիկներ, որոնց ներկայութիւնը ինքնին խրախուսիչ էր երիտասարդ մարզիկների համար: Միջոցառմանը ելոյթներով հանդէս եկան Հ. Մ. Մ. «Նայիրի» միութեան Մարզական բաժանմունքի նախագահ Ռազմիկ Միրզախանեանը, միութեան վարչութեան նախագահ Սերոժ Օհանեանը եւ Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, որոնք իրենց ելոյթների ընթացքում շնորհաւորեցին մարզիկներին եւ նրանց քաջալերեցին չխնայել իրենց կարելին է՛լ աւելի բարձր դիրքերի նւաճման համար, որը պատիւ է բերելու իրանահայ համայնքին: Միջոցառմանը ներկայ էին՝ վետերան մարզիկներ,«Ալիք» հաստատութեան ներկայացուցիչը եւ հրաւիրեալներ:
Վերջում մեդալակիր մարզիկներին գնահատագրեր յանձնեցին պատգամաւոր Արա Շահւերդեանը, վետերան մարզիկ Յովիկ Հաթամզադէն, միութեան վարչութեան եւ Մարզական բաժանմունքի նախագահները եւ միութեան անցեալ շրջանի նախագահ Ալֆրէդ Քեշիշեանը: Երեկոն եւ միութեան կողմից մարզիկների մասնակցութիւնը Համահայկական խաղերին հովանաւորել էին «Սիս» կանացի կօշիկների կրունկներ արտադրող եւ «Արմէն փախշ» հայկական ընկերութիւնները:
