Հա

Մշակոյթ

21/12/2015 - 08:20

Ստացւած գրքեր

Գրքի անուն՝ «70-ամեակ Թեհրանի Ս. Աստւածածին եկեղեցի»

Գրքի անուն՝ «Իրաւակարգի 1500-ամեայ ակունքներն Արցախում»

Գրքի անուն՝ «Մարդը ժամանակի հետ» (Պատմւածքներ եւ ապրումներ)

Գրքի անուն՝ «Նո՞յնն են արդեօք իբերները, քարթւելները եւ վրացիները. զուտ վրացական յաւակնութիւններ»

 

Խմբագրութիւնս շնորհակալութեամբ ստացել է.


Գրքի անուն՝ «70-ամեակ Թեհրանի Ս. Աստւածածին եկեղեցի»

Կազմեց եւ խմբագրեց՝ ՎԱՐԱՆԴ Ս. ՔԻՒՐՔՉԵԱՆ

Ծաւալ՝ 112 էջ

Չափս՝ 14.5 x 22 cm.

Տպ. թւական՝ 2015 թ.

Տպ. վայր՝ Թեհրան

Տպաքանակ՝ 500 օրինակ

151221e03aՏպարան՝ «Ալիք»
Հրատարակ.՝ Ս. Աստւածածին եկեղեցու 70-ամեակի նշման կազմակերպիչ յանձնախումբ

* * *

Սոյն գունատիպ ու գեղեցիկ յուշամատեան-հատորը լոյս է տեսել մեկենասութեամբ պրն. Յովիկ Տէր-Պօղոսեանի եւ իր քոյրերի, իրենց հանգուցեալ ծնողների՝ Հայկանուշ եւ Սուրէն Տէր-Պօղոսեանների յիշատակին: Գիրքը պարունակում է՝ պատմական ակնարկ, նիւթեր եւ լուսանկարներ ժամանակի մամուլից, կենսագրականներ, ուղերձներ, Ս. Աստւածածին եկեղեցու շրջափակում աշխատող կառոյցների մասին նիւթեր, եկեղեցու վարչական կազմերը 70 տարիների ընթացքում եւ այլն: Յիշատակելի է, որ վերջին տարիների լուսանկարները (գունաւոր)՝ տրամադրել են Արման Ստեփանեանն ու Վարուժան Եդիգարեանը:

Վ.

 

* ******** * ******** * ******** * ******** * ******** * ******** * ******** *

Գրքի անուն՝ «Իրաւակարգի 1500-ամեայ ակունքներն Արցախում»
Հեղինակ՝ ԿԻՄ ՂԱԶԱՐԵԱՆ
Լեզու՝ Հայերէն, ռուսերէն, անգլերէն

151221e03bՀրատարակւել է 2010 թւականին Երեւանում «ԴԱԼԼ» հրատարակչութեան միջոցով: 158 էջ (փոքր չափով), գունաւոր լուսանկարներով: Խմբագիր՝ Կարէն Զախարեան: Թարգմանիչներ՝ Լիլիթ Կարապետեան եւ Վլադիմիր Տէր-Ղազարեան:

* * *

Գրքում լուսաբանւած են 5-րդ դարի վերջերին Արցախում ձեւաւորւած թագաւորութեան, ինչպէս նաեւ Վաչագան թագաւորի կողմից ստեղծւած ու համաժողովրդական ձեւով ընդունւած սահմանադրութեան հանգամանքները: Ցոյց է տրւած այդ սահմանադրութեան դերն Արցախում իրաւական գիտակցութեան ձեւաւորման եւ պետականութեան ամրապնդման գործում՝ սկսած Վաչագան Բարեպաշտից մինչեւ Լեռնային Ղարաբաղի Հանրապետութիւն:

Ա. Յ.

* ******** * ******** * ******** * ******** * ******** * ******** * ******** *

Գրքի անուն՝ «Մարդը ժամանակի հետ» (Պատմւածքներ եւ ապրումներ)

Հեղինակ՝ ՅԱԿՈԲ ՊԱԼԵԱՆ

Ծաւալ՝ 220 էջ

151221e03cՊարունակում է 20 պատմւածքներ: Տպագրւել է 2014 թւականին, Երեւանում, մեկենասութեամբ՝ Յասմիկ եւ Վահագն Յովնանեանների:
Գիրքը հեղինակի կողմից նւիրւել է իր վաղեմի ընկերոջ, հետեւեալ ընծայագրով.-
«Առեւանգւած եւ անյայտ կորած ՅԱԿՈԲ ՊԱՐՍՈՒՄԵԱՆԻ յիշատակին՝ որուն հետ մեր առաջին խմորատիպ թերթը լոյս ընծայեցինք»:

* * *

Ազգային-հասարակական գործիչ, գրականագէտ, ուսուցիչ եւ վաստակաւոր խմբագիր՝ Յակոբ Պալեանը ծնւել է 1935 թւականին՝ Ալեքսանդրէթում (Եգիպտոս): Մանկութեան տարիներին փոխադրւել է Հալէպ: Աւարտել է Հալէպի «Քարէն Եփփէ» հայկական ճեմարանը եւ Բէյրութի ֆրանսիական համալսարանի «Բարձրագոյն դպրութեանց» դպրոցը (Ecole Superieure des Lettres) իբրեւ գրականութեան եւ իմաստասիրութեան (փիլիսոփայութեան) ուսուցիչ: Պաշտօնավարել է՝ «Քարէն Եփփէ» ճեմարանում, Լիբանանի «Մարիստների» կոլէջում, «Ս. Նշան» վարժարանում եւ «Նշան Փալանճեան» ճեմարանում: 1974 թւականին հաստատւել է Փարիզում եւ գործօն դեր ունեցել Մարսէյլի ճեմարանի հիմնադրութեան գործում: Մի շրջան խմբագրել է Փարիզում լոյս տեսնող «Կամք» օրաթերթը եւ վարել Փարիզի հայկական ձայնասփիւռը: Ներկայ «Բագին» գրական հանդէսի վարիչ-խմբագիրն է:

Յակոբ Պալեանը էապէս յանձնառու մտաւորական է: Իր տագնապների առանցքն են կազմում՝ հայոց իրաւունքը, մշակոյթը, արեւմտահայի եւ արեւմտահայերէնի անաղարտ գոյատեւումը, անմնացորդ նւիրում Հայ Դատին եւ հայի ինքնութեան պահպանումն ու վերականգնումը: Բացի ներկայ գիրքը, լոյս են տեսել Յակոբ Պալեանի գրչին պատկանող մէկ վէպ, մէկ բանաստեղծութիւնների հատոր եւ 15 այլ հատորներ՝ գրական, գրականագիտական եւ հրապարակագրական բովանդակութեամբ:

Ա. Յ.

* ******** * ******** * ******** * ******** * ******** * ******** * ******** *

 

 

Գրքի անուն՝ «Նո՞յնն են արդեօք իբերները, քարթւելները եւ վրացիները. զուտ վրացական յաւակնութիւններ»

Հեղինակ՝ ՀԱՄԼԵՏ ԴԱՒԹԵԱՆ

Տպագրւել է 2014 թւականին Երեւանում, «ԴԱԼԼ» հրատարակչութեան միջոցով: 140 էջ, (20 էջ գունաւոր քարտէզներով): Խմբագիր՝ Գէորգ Դաւթեան:

* * *

151221e03dԳիրքը սկսւում է հետեւեալ տողերով .-
«Ովքե՞ր են վրացիները, կա՞յ արդեօք վրացի ազգը, ի՞նչ անուն են կրել նրանք նախկինում, որտե՞ղ են ապրել, ինչպէ՞ս են կազմաւորւել: Այս եւ նման հարցերին անաչառ պատմութիւնն ու վրացիները միանգամայն տարբեր պատասխաններ են տալիս: Ճշմարտութիւնը, սակայն, հիմնւում է անկախ փաստերի եւ դրանց անկողմնակալ մեկնաբանութեան վրայ: Հեղինակը, հարուստ փաստական նիւթեր օգտագործելով, հայ, վրացի, այլազգի գիտնականների եւ պատմագիրների վկայութիւնները բերելով ոչ միայն ներկայացնում է վրացիների ծագման վաղ շրջանը, բացայայտում վրացիների հեղինակների կողմնակալ մօտեցումներն ու ոչ-գիտական հնարանքները, այլեւ ցոյց է տալիս, թէ ինչու է այդպէս արւում, ինչ հեռահար նպատակներ են իրագործում վրացիները նման մօտեցումով եւ, վերջապէս, ինչ նկրտումներ են ցուցաբերում հայ ժողովրդի պատմութեան եւ հայկական պատմական տարածքների նկատմամբ»:

Ա. Յ.

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։