Հա

Մշակոյթ

06/06/2017 - 11:30

«Ոսկէ ծիրան» փառատօնին ցուցադրւելու են Կաննի փառատօնի լաւագոյն 8 ֆիլմերը

«Կինոփառատօնը մեր իրականութեան մէջ ոչ միայն կինոյի տօն է, այլ նաեւ մշակոյթի, արւեստի եւ տրամադրութեան տօն։ «Ոսկէ ծիրան»-ը ամէն տարի կարողանում է բերել ուրախութիւն, ջերմութիւն, պայծառ գոյներ մեր քաղաքին, հանրապետութեանը։ «Ոսկէ ծիրան»-ը կինոյի զարգացման մեր պատկերացրած հայեցակարգում կարեւորագոյն եւ լրջագոյն դերակատարութիւն է ունենալու»,- նշեց Արմէն Ամիրեանը։ 

«alikonline.ir» - «Ոսկէ ծիրան» կինոփառատօնը կարող է շատ մեծ դերակատարութիւն ունենալ Հայաստանում կինոյի զարգացման գործում։ 
«Արմէնպրես»-ի հաղորդմամբ՝ այս մասին լրագրողների հետ զրոյցում ասաց ՀՀ մշակոյթի նախարար Արմէն Ամիրեանը։ 
«Կինոփառատօնը մեր իրականութեան մէջ ոչ միայն կինոյի տօն է, այլ նաեւ մշակոյթի, արւեստի եւ տրամադրութեան տօն։ «Ոսկէ ծիրան»-ը ամէն տարի կարողանում է բերել ուրախութիւն, ջերմութիւն, պայծառ գոյներ մեր քաղաքին, հանրապետութեանը։ «Ոսկէ ծիրան»-ը կինոյի զարգացման մեր պատկերացրած հայեցակարգում կարեւորագոյն եւ լրջագոյն դերակատարութիւն է ունենալու։ Այս կինոփառատօնը հարթակ է, որտեղ պէտք է շփւեն, մտքեր, նաեւ գործնական  ծրագրեր փոխանակեն կինոարտադրողներն ու կինոգործիչները, ինչպէս նաեւ այն կազմակերպութիւնները, որոնք հետաքրքրւած են այդ դաշտում լրջագոյն դերակատարումն ունենալ հայաստանեան նոր զարգացող իրավիճակում»,- նշեց Արմէն Ամիրեանը։ 
Նախարարը տեղեկացրեց, որ 14-րդ կինոփառատօնին կտրամադրւի 4 շարժական կինոթատրոն, 3-ն ունի կինոփառատօնը եւ քաղաքի եօթ կետերում կլինեն բացօթեայ ցուցադրութիւններ։ 
«ՎիւաՍել-ՄՏՍ»-ի գլխաւոր տնօրէն Ռալֆ Յիրիկեանն ընդգծեց, որ «Ոսկէ ծիրան» փառատօնը անգնահատելի ազդեցութիւն է թողնում հասարակութեան կեանքում։ 
«Կան իրադարձութիւններ, որոնք անգնահատելի ազդեցութիւն են թողնում հասարակութեան կեանքում՝ ձեւաւորում են մտածողութիւն, ստեղծում երկրի հեղինակութիւնը բարձրացնելու հնարաւորութիւն եւ սերունդներ դաստիարակում։ Այդպիսի իրադարձութիւններից մէկն է «Ոսկէ ծիրան» կինոփառատօնը։ Այն արդէն 14 տարի դարձել է Հայաստանի համար այցեքարտ»,- ասաց Յիրիկեանը։ 
«Ոսկէ ծիրան» Երեւանի միջազգային կինոփառատօնի հիմնադիր տնօրէն Յարութիւն Խաչատրեանը յայտնեց այս տարւայ նորութիւնը, այն է՝ փառատօնի պաշտօնական ազդագիրը։ 
«Այս տարի ազդագիրը փոխւել է, որի հեղինակները նոր դիզայներներ են՝ Սիլւի Բեգլարեանը եւ Դիանա Աղամեանը, ում հետ մենք առաջին անգամ ենք աշխատում։ Ազդագիրը արտաքինից փառատօնի խորհրդանիշ ծիրանն է յիշեցնում երկրաչափական մարմնի տեսքով»,- նշեց Խաչատրեանը եւ յաւելեց, որ իրենք աշխատում են Երեւան բերել աշխարհի լաւագոյն ֆիլմերը՝ Կաննի փառատօնի 7-8 լաւագոյն ֆիլմեր։ Այս տարի նորամուծութիւն է եղել՝ ֆիլմերի ընտրութեան հարցում ընդգրկւել է նաեւ հանդիսատեսը։ Այն ֆիլմերը, որոնք բազմաթիւ ձայներ են ստացել, կներկայացւեն «Ոսկէ ծիրան» կինոփառատօնին։ 
«Ոսկէ ծիրան» Երեւանի 14-րդ միջազգային կինոփառատօնը մայրաքաղաքի մշակութային կեանքը կակտիւացնի յուլիսի 9-16-ը։ Փառատօնն այս տարի ստացել է մօտ 1100 յայտ՝ 96 երկրից, եւ մրցութային ու արտամրցութային տարբեր ծրագրերում ընդգրկւել են աւելի քան հարիւր ֆիլմ։

ՀՀ մշակոյթի նախարարութեան աջակցութեամբ այս տարի տեղի է ունենալու երեք աստղի բացում Շարլ Ազնաւուրի հրապարակում՝ Ֆրունզւ Դովլաթեանի, Իւրի Երզնկեանի եւ Սերգէյ Իսրայէլեանի։ 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։