Հա

Մշակոյթ

21/12/2021 - 13:00

Ամփոփւել է «Մէկ ամիս իրանական ժամանակակից գրականութեան հետ» գրական նախագիծը

ԵՊՀ Պալեանների անւան դահլիճում երէկ՝ տեղի է ունեցել «Մէկ ամիս իրանական ժամանակակից գրականութեան հետ» գրական նախագծի ամփոփման հանդիսաւոր արարողութիւնը:

«alikonline.ir» - ԵՊՀ Պալեանների անւան դահլիճում երէկ՝ տեղի է ունեցել «Մէկ ամիս իրանական ժամանակակից գրականութեան հետ» գրական նախագծի ամփոփման հանդիսաւոր արարողութիւնը. տեղեկացնում է ԵՊՀ-ի կայքը:

Միջոցառմանը ներկայ էին ԵՊՀ արեւելագիտութեան ֆակուլտետի իրանագիտութեան ամբիոնի վարիչ Վարդան Ոսկանեանը, ՀՀ-ում ԻԻՀ դեսպանութեան մշակոյթի կենտրոնի խորհրդական Սէյէդ Հոսէյն Թաբաթաբային, ԵՊՀ իրանագիտութեան ամբիոնի դասախօսներ, ուսանողներ:

Ողջունելով ներկաներին՝ Վ. Ոսկանեանը նշեց, որ հէնց ԵՊՀ արեւելագիտութեան ֆակուլտետի իրանագիտութեան ամբիոնն է այն վայրը, որտեղ պէտք է ամփոփւի նմանատիպ կարեւորագոյն գիտական-գրական միջոցառումը. «Ես պարբերաբար շեշտում եմ, որ հէնց մշակութային գիտական համագործակցութեան դաշտն է ստեղծում պատեհ հնարաւորութիւն՝ զարգացնելու Հայաստանի եւ Իրանի հազարամեայ պատմութիւն ունեցող քաղաքական յարաբերութիւնները, եւ ըստ էութեան, մեր ամբիոնն է ապահովում այն մթնոլորտը, որտեղ այդ յարաբերութիւնները կարող են էլ աւելի զարգանալ»:

Իրանագիտութեան ամբիոնի վարիչը յաւելեց, որ զեկուցումներով հանդէս են գալու ամբիոնի դասախօսներ, ինչպէս նաեւ ուսանողներ՝ անդրադառնալով Իրանի ժամանակակից գրականութեան այնպիսի ներկայացուցիչների, ինչպիսիք են Նիմա Իւշիջն ու նրա հիմնած գրական աւանդոյթների լաւագոյն շարունակող Ահմադ Շամլուն:

Մեզ հետ զրոյցում Վ. Ոսկանեանը նշեց, որ ուշագրաւ է այն փաստը, որ այս երկու հեղինակներն էլ յաճախ են անդրադարձել Իրանում ապրող հայերին եւ նրանց վարած հայկական կեանքին, ինչը շատ կարեւոր է նաեւ հայաստանցի ունկնդրի համար:

Սէյէդ Հոսէյն Թաբաթաբային, շնորհակալութիւն յայտնելով ներկաներին, փաստեց, որ իւրաքանչիւր երկրի ժամանակակից գրականութիւն տւեալ հասարակութեան հայելին է, եւ կարդալով այդ գործերը՝ մարդիկ ծանօթանում են տեղի ունեցող գործընթացներին. «Անձամբ ինձ շատ է ոգեւորում այն, որ հայ հասարակութիւնը քաջատեղեակ է ժամանակակից իրանական գրականութեանը, յատկապէս պոէզիային»:

Խորհրդականը շեշտեց, որ «Մէկ ամիս իրանական ժամանակակից գրականութեան հետ» գրական նախագծի շրջանակում կազմակերպւել եւ իրականացւել են բազմաթիւ միջոցառումներ, շնորհանդէսներ եւ գրական քննարկումներ, ամենայն հաւանականութեամբ նմանատիպ նախաձեռնութիւնները շարունակական բնոյթ են կրելու:

Միջոցառման վերջում տեղի ունեցաւ նաեւ ԻԻՀ դեսպանութեան մշակոյթի կենտրոնի կողմից անցկացւող ասմունքի մրցոյթի ամփոփման արարողութիւնը, եւ մասնակիցներին տրւեցին պատւոգրեր:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։