Երէկ՝ հոկտեմբերի 21-ին, Հ. Մ. «Արարատ» Կ.-ի Արւեստից միութեան նախաձեռնութեամբ՝ Հ. Մ. «Արարատ» մարզաւանի «Վաչիկ Ղարաբէգեան» սրահում տաղանդաւոր դերասան Վարդան Պետրոսեանը՝ թեհրանահայ հանդիսականի համար բեմականագրեց իր վերջին՝ «Խոստում» մենաներկայացումը:
«alikonline.ir» - Երէկ՝ հոկտեմբերի 21-ին, Հ. Մ. «Արարատ» Կ.-ի Արւեստից միութեան նախաձեռնութեամբ՝ Հ. Մ. «Արարատ» մարզաւանի «Վաչիկ Ղարաբէգեան» սրահում տաղանդաւոր դերասան Վարդան Պետրոսեանը՝ թեհրանահայ հանդիսականի համար բեմականագրեց իր վերջին՝ «Խոստում» մենաներկայացումը:
Տաղանդաւոր դերասան, սցենարիստ, գրող, կատակերգուն երկու ժամ տեւողութեան իր ներկայացման ընթացքում անդրադարձաւ ամենատարբեր թեմաների, այդ թւում՝ կորոնավիրուս, պատերազմ, նախկիններ, ներկաներ, լեզու, մշակոյթ, կրօն, պատմութիւն եւ այլն:
Միջոցառմանը ներկայ էին՝ ԻԻՀ-ում ՀՀ արտակարգ եւ լիազօր դեսպանի տիկին՝ Մերի Աւետիսեանը, ԻԻՀ-ում Հայաստանի Հանրապետութեան դեսպանութեան դիւանագիտական կազմը, Թեհրանի հայոց թեմի Պատգամաւորական ժողովի ներկայացուցիչներ, Թեհրանի հայոց թեմի Թեմական խորհրդի ատենապետ ճրտ. Նորայր Արամեանը, «Ալիք» հաստատութեան ներկայացուցիչ Սեւան Դանիէլեանը, «Ալիք» օրաթերթի եւ տպարանի վարիչ՝ Արգիշտի Թովմասեանը եւ քոյր միութիւնների ներկայացուցիչներ:
Բացման խօսքով հանդէս եկաւ Հ. Մ. «Արարատ» Կ.-ի Արւեստից միութեան անդամ Մեղեդի Նազարեանը։ Նա իր խօսքերում նշեց, որ վերջին տարիների անհարթ եւ անսովոր ժամանակներում անգամ, Հայ մշակութային «Արարատ» կազմակերպութիւնը ոչ մի ջանք չի խնայել համայնքում եռուզեռ ստեղծելու համար:
«Այսօր բոլորս միասին հաւաքւել ենք այստեղ վայելելու հայ ազգի սիրւած դերասան, սցենարիստ, կատակերգու, գրող, Վարդան Պետրոսեանի «Խոստում» մենաներկայացումը: Վարդան Պետրոսեանը առաջին անգամ 2005 թւականին, ժամանակի Հ.Մ.Ա.Կ.-ի Արւեստից միութեան հրաւէրով ներկայացել է «Հազար ու մի ելք», այնուհետեւ, 2008 թւականին «Վերելք» անմոռանալի ներկայացումները»,- շեշտեց Մեղեդի Նազարեանը՝ յաւելելով, միութեան շնորհակալական խօսքերն դերասանին՝ հրաւէրն ընդառաջելու եւ իր մենաներկայացումը բեմականացնելու համար:
Նա իր ելոյթի մէկ այլ հատւածում Հ.Մ.Ա.Կ.-ի Արւեստից միութեան անունից ողջունեց եւ իր շնորհակալական խօսքերն ուղղեց նաեւ հանդիսատեսին, ով օրւայ ոչ դիւրին պայմաններին բարձր գնահատելով՝ «Վարդան Պետրոսեան» հեղինակութիւնը եւ կարեւորելով նոր փոխանցման նիւթը՝ ջերմ ներկայութիւն է ունեցել ծրագրին, որից յետոյ մեկնարկեց Վարդան Պետրոսեանը:
Ներկայացման բեմականացման աւարտին լռութեան ու ծանր լոյսի ներքոյ Վարդան Պետրոսեանի արտասանեց իր «խոստումը»․ «Բոլորիս անունից 1 րոպէ լռութիւն քեզ՝ գերագոյն գլխաւոր հրամանատար», 1 րոպէ լռութիւն, որում ամփոփւած են այն նախատինքը, ամօթը, ցասումը, անզօրութիւնը, ճիչը, բողոքը, վիշտը, որին ամէն օր բախւում ենք պատերազմից յետոյ, կը կարողանա՞նք վերջ տալ մեր կեանքը քայքայող ատելութեանը, մեզ ներսից բզկտող անմիաբանութեանը, դառնալ դէպի լոյսը, ապրել սիրով՝ ցոյց կը տան ժամանակը ու մեր տւած խոստումը։
Ներկայացման աւարտին բեմ հրաւիրւեց Հ. Մ. «Արարատ» կազմակերպութեան նախագահ Հենրիկ Խալոյեանը: Հ. Մ. «Արարատ» կազմակերպութեան նախագահն իր խօսքերում մասնաւորապէս նշեց, որ ներկայացումից յետոյ խօսքերն աւելորդ են: «Խոնարհւում ենք մեր հերոսների յիշատակին փառք մեր չպարտւող երիտասարդ ՝ նոր սերնդին խոստանանք, որ մենք կանենք կարելին այդ ուղղութեամբ եւ ծափահարենք մտաւորականութեանը»,- շեշտեց Խալոյեանը, այնուհետեւ Հ.Մ.Ա.Կ.-ի անունից յուշանւէր յանձնեց դերասանին:
Ներկայացման աւարտին Վարդան Պետրոսեանը յուշանւէրը ստանալուց յետոյ, կրկին կիսեց իր տպաւորութիւնները՝ ներկայացման բովանդակութեան վերաբերեալ եւ սցենարի բեմականացման պահին ունեցած իր ապրումների մասին: Վարդան Պետրոսեանը կրկին ահազանգեց սթափւելու անհրաժեշտութեան, միմեանց նկատմամբ հանդուրժողականութեան դրսեւորման, սիրոյ պակասի լրացնելու հարկադրանքի մասին: Նա իր հանդիսականին կամեցաւ անսահման սէր՝ միմեանց նկատմամբ:
Վարդան Պետրոսեանն ինչպէս իր ներկայացման ընթացքին այնպէս էլ բեմականացման աւարտին հռետորական հարց ուղեց հանդիսականին կը կարողանա՞նք վերջ տալ մեր կեանքը քայքայող ատելութեանը, մեզ ներսից բզկտող անմիաբանութեանը, դառնալ դէպի լոյսը, ապրել սիրով՝ ցոյց կը տան ժամանակը ու մեր տւած խոստումը»,- ասաց դերասանը:
Նիւթը՝ ՍԻՒՆԷ ՖԱՐՄԱՆԵԱՆԻ
Լուս.՝ ՀԱՏԻՍ-ի
