ՀՀ Կրթութեան, գիտութեան, մշակույթի եւ սպորտի նախարարութեան եւ Հայաստանի ազգային կինոկենտրոնի աջակցութեամբ նկարահանւած «Արշալոյսի լուսաբացը» վաւերագրական-անիմացիոն ֆիլմը Հայաստանի, Գերմանիայի եւ Լիտւայի համատեղ արտադրութիւն է (արտադրող ընկերութիւններ՝ «Բարս մեդիա», «Gebrueder Beetz Filmproduktion», «Artbox Laisvalaikio Klubas»): Ռեժիսորը եւ սցենարի հեղինակը Իննա Սահակեանն է, պրոդիւսերներ` Վարդան Յովհաննիսեան, Քրիստիան Բից, Իւստէ Միխայլինայտէ:
«alikonline.ir» - ՀՀ Կրթութեան, գիտութեան, մշակույթի եւ սպորտի նախարարութեան եւ Հայաստանի ազգային կինոկենտրոնի աջակցութեամբ նկարահանւած «Արշալոյսի լուսաբացը» վաւերագրական-անիմացիոն ֆիլմը Հայաստանի, Գերմանիայի եւ Լիտւայի համատեղ արտադրութիւն է (արտադրող ընկերութիւններ՝ «Բարս մեդիա», «Gebrueder Beetz Filmproduktion», «Artbox Laisvalaikio Klubas»): Ռեժիսորը եւ սցենարի հեղինակը Իննա Սահակեանն է, պրոդիւսերներ` Վարդան Յովհաննիսեան, Քրիստիան Բից, Իւստէ Միխայլինայտէ:
Ըստ Panorama.am-ի՝ ԿԳՄՍ նախարարութիւնից յայտնում են՝ նոյեմբերի 3-ից «Արշալոյսի լուսաբացը» ֆիլմը Երեւանում կը բարձրանայ կինոէկրան։
Ֆիլմը ստեղծւել է «Զօրեան» ինստիտուտի գիտական աջակցութեամբ եւ Հայոց Ցեղասպանութեան բանաւոր պատմութեան արխիւի հիման վրայ:
«Արշալոյսի լուսաբացը» ֆիլմը վաւերագրում է Արշալոյս Մարտիկեանի (Աւրորա Մարդիգանեան) կեանքի ոդիսականը՝ Հայոց Ցեղասպանութիւնից մազապուրծ եղած դեռատի աղջիկը զօրավար Անդրանիկի եւ «Մերձաւոր Արեւելքում ամերիկեան օգնութեան կոմիտէի» օգնութեամբ փրկութիւն է գտնում ԱՄՆ-ում։ Ֆիլմում վերականգնւել եւ օգտագործւել են 1919 թւականին Հոլիվուդում նկարահանւած «Հոգիների աճուրդ» համր ֆիլմից հատւածներ, որտեղ Արշալոյսը մարմնաւորում է ինքն իրեն՝ նպատակ ունենալով ֆիլմի հասոյթն ուղղել Ցեղասպանութեան հետեւանքով որբացած հայ մանուկների փրկութեանը: Ֆիլմը դառնում է «Մերձաւոր Արեւելքում ամերիկեան օգնութեան կոմիտէի» բարեգործական արշաւի հիմնաքարը, որը, ընդհանուր առմամբ, հաւաքում է աւելի քան 116 մլն դոլար, ինչի արդիւնքում աւելի քան 132 հազար հայ որբեր խնամք են ստանում։
«Արշալոյսի լուսաբացը» ֆիլմը հիմնւած է իրական մարդու իրական պատմութեան վրայ, միեւնոյն ժամանակ՝ փոխանցում է ժամանակի ընդհանուր նկարագիրը: Այն հերոսուհու երկու եզակի վաւերագրական հարցազրոյցների, «Հոգիների աճուրդ» համր ֆիլմի պահպանւած կտորների, արխիւային նիւթերի եւ անիմացիոն գեղագիտական լուծումների համադրութիւնն է:
«Արշալոյսի լուսաբացը» ֆիլմը նպատակ ունի խօսել Հայոց Ցեղասպանութեան մասին միջազգային հանրութեանը հասանելի լեզւով, որի վառ ապացոյցն է միջազգային հեղինակաւոր կինոփառատօններում ֆիլմի ընդգրկւածութիւնը:
Նշենք, որ ֆիլմի պրեմիերան տեղի է ունեցել «ԱՆՍԻ» անիմացիոն ֆիլմերի միջազգային փառատօնի մրցութային ծրագրում (Annecy International Animation Film Festival): Երեւանի «Ոսկէ ծիրան» միջազգային կինոփառատօնի միջազգային մրցութային ծրագրում տեղի է ունեցել ֆիլմի հայաստանեան պրեմիերան՝ արժանանալով «Արծաթէ ծիրան» մրցանակին: Հայաստանի ազգային կինոակադեմիայի կողմից «Արշալոյսի լուսաբացը» ֆիլմը ներկայացւել է «Օսկար»-ի 95-րդ մրցանակաբաշխութեանը՝ «Լաւագոյն արտասահմանեան ֆիլմ» անւանակարգում: Ֆիլմն ընդգրկւել է նաեւ «FilmFest Hamburg» կինոփառատօնի «Կալէյդասկոպ» մրցութային ծրագրում եւ «DocLisboa» փառատօնի «Երկրից լուսին» ծրագրում:
Լոս Անջելրսի «Animation Is Film» կինոփառատօնի մրցութային ծրագրում տեղի է ունեցել «Արշալոյսի լուսաբացը» ֆիլմի ամերիկեան պրեմիերան: Բացի դրանից՝ ֆիլմն ընդգրկւել է վաւերագրական ֆիլմերի «IDFA» Ամստերդամի վաւերագրական ֆիլմերի միջազգային փառատօնի «Best of Fests» բաժնում, ներկայացւել է «Asia Pacific Screen Award» (APSA) («Ասիա-խաղաղովկիանոսեան էկրանաւորման» մրցանակաբաշխութիւն)՝ «Լաւագոյն անիմացիոն ֆիլմ» անւանակարգում: Նշենք, որ ֆիլմն ընդգրկւել է նաեւ Թալինի միջազգային կինոփառատօնի (Tallinn Black Nights Film Festival) Բալթեան մրցութային ծրագրում, ինչպէս նաեւ եւրոպական Arte հեռուստաալիքի (Ֆրանսիա, Գերմանիա) «Գրանդ Ֆորմատ» եզակի 90 րոպէ տեւողութեամբ գեղագիտական վաւերագրական ֆիլմերի ծրագրում։
