Էրբիլում ՀՀ գլխաւոր հիւպատոսութեան պաշտօնական բացման երկրորդ տարեդարձի կապակցութեամբ գլխաւոր հիւպատոսութիւնը փետրւարի 26-ին, Իրաքեան Քուրդիստանի մշակոյթի եւ երիտասարդութեան հարցերով նախարարութեան հետ համատեղ, մշակոյթի նախարարութեան գլխաւոր սրահում կազմակերպել էր ՀՀ-ում բնակւող քուրդ, եզդի եւ ասորի ազգային փոքրամասնութիւնների մասին շուրջ 70 պատմական լուսանկարների եւ արխիւային փաստաթղթերի ցուցահանդէս, որի պաշտօնական բացումին նախորդել է հայատառ քրդական ձեռագրերի, հայատառ քրդերեն տպագիր գրքերի մասին Մատենադարանի գիտաշխատող Գոռ Երանեանի ելոյթ-պրեզենտացիան:
«alikonline.ir» - Էրբիլում ՀՀ գլխաւոր հիւպատոսութեան պաշտօնական բացման երկրորդ տարեդարձի կապակցութեամբ գլխաւոր հիւպատոսութիւնը փետրւարի 26-ին, Իրաքեան Քուրդիստանի մշակոյթի եւ երիտասարդութեան հարցերով նախարարութեան հետ համատեղ, մշակոյթի նախարարութեան գլխաւոր սրահում կազմակերպել էր ՀՀ-ում բնակւող քուրդ, եզդի եւ ասորի ազգային փոքրամասնութիւնների մասին շուրջ 70 պատմական լուսանկարների եւ արխիւային փաստաթղթերի ցուցահանդէս, որի պաշտօնական բացումին նախորդել է հայատառ քրդական ձեռագրերի, հայատառ քրդերեն տպագիր գրքերի մասին Մատենադարանի գիտաշխատող Գոռ Երանեանի ելոյթ-պրեզենտացիան:
Ինչպէս «Արմէնպրես»-ը տեղեկանում է ՀՀ ԱԳՆ-ի տարածած հաղորդագրութիւնից, պատմական լուսանկարները եւ արխիւային փաստաթղթերը տրամադրւել էին ՀՀ Ազգային արխիւի, Մատենադարանի, Պատմութեան թանգարանի, Ե. Չարենցի անւան արւեստի եւ գրականութեան թանգարանի ու Արմէնպրեսի կողմից:
Միջոցառմանը ներկայ էին Իրաքեան Քուրդիստանի մի շարք բարձրաստիճան պաշտօնեաներ, մշակութային եւ քաղաքական գործիչներ, մտաւորականներ, Էրբիլում հաւատարմագրւած դիւանագիտական առաքելութիւնների անդամներ, հայ, ասորի եւ եզդի համայնքների ներկայացուցիչներ:
Միջոցառման ընթացքում ելոյթներով են հանդէս եկել Իրաքեան Քուրդիստանի մշակոյթի եւ երիտասարդութեան հարցերով նախարար Մուհամմադ Սայիդ Ալին, գլխաւոր հիւպատոս Արշակ Մանուկեանը, ինչպէս նաեւ ընթերցւել է այս կապակցութեամբ ՀՀ ԿԳՄՍՆ նախարարի տեղակալ Արթուր Մարտիրոսեանի ողջոյնի խօսքը:
Նախարար Մուհամմադ Սայիդ Ալին իր ելոյթում նշել է, որ նման ցուցահանդէսի կազմակերպումը Էրբիլում իր տեսակով աննախադէպ է: Նա անդրադարձել է հայ-քրդական պատմական յարաբերութիւններին, Հայաստանի, յատկապէս Խորհրդային Հայաստանի ունեցած կարեւոր դերակատարութեանը քրդական մշակոյթի եւ ինքնութեան պահպանման գործում:
Նախարարը անդրադարձ է կատարել նաեւ իր՝ նախորդ տարի օգոստոսին Երեւան այցին՝ յատուկ ընդգծելով, որ քրդական պատւիրակութիւնն այցելել է նաեւ Ծիծեռնակաբերդ՝ յարգանքի տուրք մատուցելու Հայոց Ցեղասպանութեան անմեղ զոհերի յիշատակին:
Նշւում է, որ պատմական նշանակութիւն ունեցող նիւթերի ցուցադրումը եւս մէկ անգամ ի ցոյց է դրել Հայաստանի կարեւոր դերակատարութիւնը քուրդ, եզդի, ասորի ժողովուրդների ինքնութեան եւ մշակոյթի պահպանման գործում:
