Ուրբաթ, մարտի 10-ին Հ. Ուս. «Չհարմահալ» միութեան «Յ. Թումանեան» դահլիճում կայացաւ նոյն միութեան յարկի տակ երկար տարիներ աշխատող «Ակունք» պարային համոյթի ելոյթը:
«ԱԼԻՔ», Կ. Դ. - Ուրբաթ, մարտի 10-ին Հ. Ուս. «Չհարմահալ» միութեան «Յ. Թումանեան» դահլիճում կայացաւ նոյն միութեան յարկի տակ երկար տարիներ աշխատող «Ակունք» պարային համոյթի ելոյթը:
«Ակունք» պարային համոյթի գեղարւեստական ղեկավար եւ բեմադրիչն է Կարինէ Մանուչերեանը, որի դաստիարակած սաները տարիքային տարբեր խմբերում, երկու ժամերի ընթացքում հանդիսատեսին հրամցրին հայկական եւ միջազգային պարեր: Միջոցառմանը ցուցադրւեց տեսաֆիլմ ներկայացնելով համոյթի աւելի քան 30-ամեայ անցած ուղին: Օրւայ ելոյթի աւարտին, Կարինէ Մանուչերեանը իր գնահատանքը յայտնեց Սրբազան Հօրը,ազգային իշխանութեանը, Հ. Ուս. «Չհարմահալ» միութեանը, սաներին ու ծնողներին եւ ներկաներին իրենց անվերապահ հովանաւորութիւնների համար եւ հրաւիրեց արտայայտւելու միութեան վարչութեան նախագահ Վազրիկ Յակոբեանին, ով գնահատեց «Ակունք» պարային համոյթին եւ ղեկավարին իրենց աշխատանքների համար: Միջոցառմանը հրաւիրւեց Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, ով կարեւորելով մշակութային տարբեր միջոցներով նոր սերնդին հայկական արւեստին հաղորդ պահելը, Կարինէ Մանուչերեանին յանձնեց գնահատագիր: Եզրափակիչ խօսքի համար հրաւիրւեց Թեհրանի հայոց թեմի առաջնորդ Տ. Սեպուհ արք. Սարգսեանը:
Սրբազան Հայրը անհրաժեշտ համարելով հայ երիտասարդ-երիտասարդուհիների մասնակցութեանը արւեստի տարբեր բնագաւառներին, եւ այս դէպքում պարարւեստին, կարեւորեց արւեստի դերը, որպէս ներշնչանքի աղբիւր եւ անդրադարձաւ հայկական հարուստ արւեստի տարածման կարեւորութեանը:
