Յովհաննէս Այւազովսկու անւան պատկերասրահում, ոը գտնւում է Թէոդոսիայում վերանորոգման աշխատանքները նախատեսւում է աւարտել ապրիլի վերջին, իսկ այցելուների համար պատկերասրահի դռները կը բացւեն ամռանը։
«alikonline.ir» - Յովհաննէս Այւազովսկու անւան պատկերասրահում, ոը գտնւում է Թէոդոսիայում վերանորոգման աշխատանքները նախատեսւում է աւարտել ապրիլի վերջին, իսկ այցելուների համար պատկերասրահի դռները կը բացւեն ամռանը։ Այս մասին ըստ Panorama.am-ի՝ ՏԱՍՍ-ին յայտնել է թանգարանի տնօրէն Տատեանա Գայդուկը։
«Շինարարական աշխատանքների աւարտից յետոյ մենք կը սկսենք աշխատել: Անհրաժեշտ կը լինի բացարձակապէս ամբողջ հաւաքածուն տեղափոխել նոր շէնք՝ գրեթէ 13 հազար միաւոր։ Դրանցից մի քանիսը շատ մեծ են եւ ծանր՝ մինչեւ 300 կգ: Դրա համար առնւազն երկու ամիս կը պահանջւի»,- նշել է նա։
Պատկերասրահի բացումից յետոյ այցելուները կը կարողանան տեսնել նորացւած ցուցադրութիւնը: Այսպիսով, 2007 թւականից ի վեր առաջին անգամ կը բացւի գլխաւոր ցուցասրահը, որտեղ 1880 թւականին Յովհաննես Այւազովսկին բացեց Ռուսաստանում առաջին մասնաւոր հանրային պատկերասրահը։
«Էքսպոզիցիան տարբեր է լինելու, մենք պատրաստել ենք էքսկուրսիաների մի քանի նոր ձեւեր, որոնց ընթացքում այցելուները, նոյնիսկ նրանք, որոնք բազմիցս այցելել են պատկերասրահ, կը տեսնեն եւ կը լսեն նոր բաներ Այւազովսկու կեանքի, գործունէութեան եւ նրա ընտանիքի աւանդոյթների մասին»,- ասել է թանգարանի տնօրէնը։
Միեւնոյն ժամանակ, շէնքի վերակառուցումը հնարաւորութիւն կը տայ ցուցահանդէսներն աւելի թեմատիկ դարձնել։ Նախկինում պատկերասրահի տարածքը յարմարեցւած չէր ծովանկարչի մեծ նկարներին, ինչի պատճառով դրանք երբեմն ստիպւած էին լինում պատահական հերթականութեամբ տեղադրւել։
«Այս առումով նորացւած էքսպոզիցիաներն աւելի հետաքրքիր կը լինեն հանրութեանը»,- յաւելել է Գայդուկը։
Հայազգի յայտնի ծովանկարիչ Յովհաննէս Այւազովսկին ծնւել է 1817 թւականի յուլիսի 17-ին (29) Թէոդոսիայում։ Նրա հիմնադրած պատկերասրահը Ռուսաստանի ամենահին արւեստի թանգարաններից մէկն է, որտեղ պահւում է նկարչի ստեղծագործութիւնների աշխարհի ամենամեծ հաւաքածուն՝ 416 աշխատանք, այդ թւում՝ 49 տեղեկանք, ինչպէս նաեւ նրա ուսանողների եւ հետեւորդների կտաւները: Պատկերասրահը տեղակայւած է 1848 թւականին Այւազովսկու նախագծով կառուցւած տանը, աւելի ուշ նկարիչը դրան կցեց մեծ ցուցասրահ։
Այւազովսկին մահացել է 1900 թւականին, թաղւած է Թէոդոսիայում:
