«Գաղափարը ծնւել է դեռեւս անցեալ տարի, երբ նոյեմբերին գնացի Շուշի, եւ սկսեցինք երեխաների հետ տիկնիկներ պատրաստել՝ օգտագործելով մանրանկարչութեան տարբեր նմուշներ, այդտեղից էլ գաղափար ծնւեց մի կարճ մուլտֆիլմ նկարահանել, որտեղ կամփոփւի մեր ողջ աշխատանքը»,- ասաց Մ. Աւագեանը:
«armenpress.am» - «Նարեկացի» արւեստի միութեան աջակցութեամբ Յովհաննէս Թումանեանի համանուն հեքիաթի հիման վրայ նկարահանւել է «Ծիտը» մուլտֆիլմը, որը կը գայ համալրելու մանուկների սիրւած մուլտֆիլմերի շարքը եւ իր ներդրումը կունենայ երեխաների դաստիարակութեան գործում:
Ինչպէս «Արմէնպրես»-ին տեղեկացրին միութիւնից, մուլտֆիլմի ռեժիսոր եւ սցենարի համահեղինակ Մայդա Շանդէզ Աւագեանը կարեւորում է նման մուլտֆիլմերի գոյութիւնը, քանզի դրանք ունեն ուսուցողական եւ խրատական բնոյթ:
«Գաղափարը ծնւել է դեռեւս անցեալ տարի, երբ նոյեմբերին գնացի Շուշի, եւ սկսեցինք երեխաների հետ տիկնիկներ պատրաստել՝ օգտագործելով մանրանկարչութեան տարբեր նմուշներ, այդտեղից էլ գաղափար ծնւեց մի կարճ մուլտֆիլմ նկարահանել, որտեղ կամփոփւի մեր ողջ աշխատանքը»,- ասաց Մ. Աւագեանը:
Արդիւնքում՝ «Նարեկացի» արւեստի միութեան հետ համատեղ՝ ստեղծւել է առաջին մուլտֆիլմը՝ «Գիրք մանկաց»-ը, որի յաջողութիւնից յետոյ՝ գաղափար ծնւեց մուլտֆիլմ նկարահանել Յովհաննէս Թումանեանի հեքիաթի հիման վրայ՝ պայմանաւորւած նաեւ նրանով, որ Շուշիի «Նարեկացի» արւեստի միութիւնում տարին թումանեանական է:
Մայդա Շանդէզ Աւագեանը կամաւոր է Ֆրանսիայից, նա մասնագիտութեամբ բեմանկարչուհի է եւ արդէն երկար ամիսներ աշխատում է «Նարեկացի» արւեստի միութեան երեխաների հետ:
Աշխատանքն արւել է «Նարեկացի» արւեստի միութեան ֆիլմերի պատասխանատու Արեւիկ Աւանէսեանի հետ, որը նաեւ սցենարի համահեղինակն է: «Մուլտֆիլմի վրայ արհեստավարժ աշխատանք է արւել: Իմ եւ Մայդայի կողմից գրւել է սցենարը, աշխատել ենք շուրջ հինգ ամիս: Տիկնիկները պատրաստւել են Շուշիի «Նարեկացի» արւեստի միութեան երեխաների ձեռքերով, նկարահանումն արւել է հէնց Շուշիում»,- նշեց Ա. Աւանէսեանը:
Որպէս այս նախագծի պրոդիւսեր՝ Արեւիկ Աւանէսեանը կարեւորում է յատկապէս Մայդայի ներդրումը՝ մուլտֆիլմի ստեղծման գործում, որի պատրաստակամութեան շնորհիւ է սա իրականութիւն դառնում:
Մուլտֆիլմի տեւողութիւնը 8 րոպէ է: Նախատեսւում է ունենալ նաեւ դրա ֆրանսերէն եւ անգլերէն տարբերակները: Մուլտֆիլմի հեքիաթասացը Կարէն Ջհանգիրովն է, իսկ ծտին մարմնաւորել է հնգամեայ Աւետիս Իսկէնեանը: Օգտագործւել է Արտօ Թունջբոյաջեանի երաժշտութիւնը՝ իր թոյլտւութեամբ եւ աջակցութեամբ: Մուլտֆիլմի դիտումը նախատեսւում է սեպտեմբերի 4-ին՝ «Նարեկացի» արւեստի միութիւնում, որը լինելու է փակ, իսկ առաջին ցուցադրութիւնը կը լինի նոյեմբերին:
