Հա
20/07/2019 - 09:50

Գլեդիս Բերեջիքլեանը յուսով է` Աւստրալիան մօտ ապագայում կը ճանաչի Հայոց Ցեղասպանութիւնը

Աւստրալիայի Նոր Հարաւային Վելզ նահանգի հայազգի վարչապետ Գլեդիս Բերեջիքլեանը չորրորդ անգամ է Հայաստանում: Այս անգամ այցը մասնաւոր է, սակայն հանդիպումներ են կայացել ՀՀ վարչապետի եւ նախագահի հետ: «Արմէնպրես»-ը Գլեդիս Բերեջիքլեանի հետ զրուցել է առաջիկայ ծրագրերի, Նոր Հարաւային Վելզ նահանգի հայ համայնքի, Հայոց Ցեղասպանութեան ճանաչման եւ այլ թեմաների շուրջ:

«alikonline.ir» - Աւստրալիայի Նոր Հարաւային Վելզ նահանգի հայազգի վարչապետ Գլեդիս Բերեջիքլեանը չորրորդ անգամ է Հայաստանում: Այս անգամ այցը մասնաւոր է, սակայն հանդիպումներ են կայացել ՀՀ վարչապետի եւ նախագահի հետ: «Արմէնպրես»-ը Գլեդիս Բերեջիքլեանի հետ զրուցել է առաջիկայ ծրագրերի, Նոր Հարաւային Վելզ նահանգի հայ համայնքի, Հայոց Ցեղասպանութեան ճանաչման եւ այլ թեմաների շուրջ:

 

- Տիկին Բերեջիքլեան, 2019 թ. մարտի 23-ին Նոր Հարաւային Վելզ նահանգում տեղի ունեցած ընտրութիւնների արդիւնքում դարձաք նահանգի հայազգի եւ կին առաջին վարչապետը: Նոր Հարաւային Վելզն իր մեծութեամբ եւ բնակչութեան թւաքանակով մի քանի անգամ գերազանցում է Հայաստանին, իր տնտեսութեամբ գերազանցում է նաեւ մի շարք առաջատար երկրների: Համագործակցութեան ի՞նչպիսի հեռանկարներ էք տեսնում Հայաստանի Հանրապետութեան հետ: Փոխգործակցութեան ծրագրեր ունէ՞ք, որոնք այս այցի ընթացքում արդէն քննարկել էք Հայաստանի վարչապետի կամ նախագահի հետ:

- Ծրագրերը շատ լայն են, եւ յոյս ունեմ, որ ապագայում կը կարողանանք պաշտօնական մակարդակում հզօր կապեր ստեղծել, որովհետեւ ոչ պաշտօնական մակարդակում մեր սրտերը շատ մօտ են: Նոր Հարաւային Վելզ նահանգի հայ համայնքը շատ հզօր է: Հայ համայնքի անդամները միշտ ցանկանում են ոչ միայն այցելել Հայաստան, այլ նաեւ օգտակար լինել երկրին: Պաշտօնական մակարդակում յարաբերութիւնները խորացնելու հարցը շատ լուրջ քննարկեցինք թէ՛ վարչապետի, թէ՛ նախագահի հետ, եւ յոյս ունեմ, որ ապագայում կը կարողանանք մեր յարաբերութիւններին պաշտօնական կարգավիճակ տալ:

 

- Հայաստան այցելել էք նաեւ 2013 թ.-ին՝ աւստրալական քաղաքական գործիչների պատւիրակութեան կազմում։ Այդ այցից 6 տարի է անցել, ի՞նչ փոփոխութիւններ էք նկատում Հայաստանում եւ ի՞նչ տպաւորութիւններ ունէք այսօր:

- Սա առաջին անգամ է, որ Հայաստան այցելում եմ որպէս վարչապետ, բայց, ընդհանուր առմամբ, չորրորդ այցն է: Այստեղ ազգականներ ունեմ, եւ միշտ փորձում եմ գալ Հայաստան: Հայաստանում շատ փոփոխութիւններ եմ նկատել: Կարծում եմ` ժողովուրդն աւելի լաւատես է, ապագայի նկատմամբ աւելի յոյսով է լցւած, շինարարութիւնն է բաւական զարգանում, սակայն որոշ հարցեր կան, որոնք ապագայում պէտք է լուծւեն: Բայց ես լաւատես եմ Հայաստանի հետ կապւած եւ զգում եմ, որ սփիւռքի հայութիւնը միշտ Հայաստանի կողքին կանգնած է:

 

- Հայաստանում ինչն է ձեզ առաւել գրաւել, եւ Նոր Հարաւային Վելզի զբօսաշրջիկներին ինչը կարող է գրաւել, որպէսզի նրանք էլ այցելեն Հայաստան:

- Կարծում եմ` Հայաստանում կը գրաւեն անուշ պատմութիւնը, տեսարժան վայրերը: Հայաստանն աւելի լաւ ձեւով պէտք է մատուցի իր հարստութիւնները, մանաւանդ պատմական արժէք ներկայացնող կոթողները: Օրինակ` արեւմտեան աշխարհը, եթէ տեղեկանայ, որ այստեղ գոյութիւն ունեն 4-5-րդ դարերի եկեղեցիներ, նրանց մօտ մեծ հետաքրքրութիւն կառաջանայ:

 

- Նախորդ անգամ նաեւ Արցախ էիք այցելել, այս անգամ այդպիսի այց նախատեսո՞ւմ էք:

- Դժբախտաբար, ոչ: Այս անգամ այցը շատ կարճ է, միայն մէկ շաբաթով եմ ժամանել ընտանեկան հարցերով, պէտք է մասնակցեմ հարսանեկան արարողութեան: Բայց ապագայում դարձեալ կայցելեմ Արցախ, երկու անգամ եմ այնտեղ եղել, եւ միշտ ընկերներիս յորդորում եմ, որ իրենք էլ գնան: Մօտ ապագայում Աւստրալիայից պատգամաւորական այլ խումբ կը ժամանի, յուսով եմ, որ նրանք կը գնան Արցախ:

 

- Հպարտօրէն նշում էք, որ 1915 թ. Հայոց Ցեղասպանութիւնը վերապրած ընտանիքի թոռնուհի էք, ձեր գործունէութեան ընթացքում բազմիցս Աւստրալիայի իշխանութիւններին կոչ էք արել ճանաչել Հայոց Ցեղասպանութիւնը: Ըստ ձեզ՝ Աւստրալիան երբ կը ճանաչի Հայոց Ցեղասպանութիւնը, ինչ հնարաւորութիւններ կան դրա համար, եւ ինչ քայլեր էք ձեռնարկում այդ ուղղութեամբ:

- Մեր նահանգն արդէն 20 տարի է` ճանաչել է Հայոց Ցեղասպանութիւնը, Արցախի անկախութիւնը ճանաչում է: Մենք յուսով ենք, որ Աւստրալիան նոյնպէս կը ճանաչի, եթէ Գերմանիան եւ որոշ երկրներ կարող են ճանաչել, եւ ես միշտ իմ խորհրդարանական ընկերների մօտ այդ հարցը բարձրացնում եմ: Յուսով եմ, որ մօտ ժամանակներս Աւստրալիան նոյնպէս կը ճանաչի Հայոց Ցեղասպանութիւնը:

 

- Հայաստանից դուրս բարձր պաշտօնների շատ քիչ թւով հայեր են կարողանում հասնել: Ի՞նչ խորհուրդ կը տաք սփիւռքում բնակւող մեր հայրենակիցներին, ովքեր դեռ նոր են պատրաստւում զբաղւել քաղաքականութեամբ:

- Երկու բան է ինձ միշտ օգնել` հաւատն ու աշխատասիրութիւնը: Եթէ անընդհատ աշխատես, ամէն ինչ կարող ես անել: Ինձ միշտ հարցնում են, թէ ո՞րն է գաղտնիքը, ասում եմ` գաղտնիք չկայ: Գիշեր-ցերեկ պէտք է աշխատես, եւ պէտք է միշտ լաւատես լինես, այդ երկու բաները շատ կարեւոր են:

 

- Ապագայում աւելի բարձր պաշտօններ զբաղեցնելու ծրագրեր ու նպատակներ ունէ՞ք:

- Ոչ, իմ վարչապետի պաշտօնը բավական է: Սակայն 17 տարի առաջ, երբ խորհրդարանի անդամ դարձայ, բնաւ չէի պատկերացնում, որ մի օր պէտք է վարչապետ լինեմ: Բայց կամաց-կամաց, երբ մէկ յաջողութիւն գրանցում ես, հասկանում ես, որ միւսին եւս կարող ես հասնել: Այդպէս հասայ այս պաշտօնին:

 

- Շնորհակալ եմ հարցազրոյցի համար:

Հարցազրոյցը` Նորայր Շողիկեանի

Լուսանկարները` Տաթեւ Դուրեանի

Յարակից լուրեր

  • Թրամփ-Էրդողան հանդիպմանն ընդառաջ. Ի՞նչ կը փոխւի տարածաշրջանում
    Թրամփ-Էրդողան հանդիպմանն ընդառաջ. Ի՞նչ կը փոխւի տարածաշրջանում

    Նոյեմբերի 12-13-ին ԱՄՆ նախագահ Դոնալդ Թրամփի հրաւէրով Թուրքիայի նախագահ Ռեջեփ Թայիփ Էրդողանը այցելելու է ԱՄՆ: Թրամփի հրաւէրի մասին յայտնի էր դարձել դեռեւս հոկտեմբերի սկզբին, սակայն Թուրքիայի կողմից հոկտեմբերի 9-ին սկսած «Խաղաղութեան ակունք» ռազմական գործողութեան մեկնարկից յետոյ այս այցը հարցականի տակ էր, քանզի երկուստեք իրարամերժ յայտարարութիւններ էին հնչում. մի կողմից Թրամփը կոչ էր անում Էրդողանին յիմար չլինել, այլապէս կը ոչնչացնի Թուրքիայի տնտեսութիւնը, միւս կողմից էլ նշում էր, որ Էրդողանն իր ընկերն է եւ ոչ մի խնդիր չկայ Թուրքիայի եւ ԱՄՆ-ի միջեւ:

  • Ակնարկ. Էրտողանի Ուաշինկթըն այցելութիւնը միակամ զօրաշարժի հրաւէր
    Ակնարկ. Էրտողանի Ուաշինկթըն այցելութիւնը միակամ զօրաշարժի հրաւէր

    Միացեալ Նահանգներու նախագահ Տոնըլտ Թրամփ կը պատրաստուի չորեքշաբթի, 13 նոյեմբերին հիւրընկալելու Թուրքիոյ նախագահ Ռեճեփ Թայիփ Էրտողանը: Սա անուղղակի հրաւէր մըն է հայութեան` յաւելեալ զօրաշարժի ենթարկելու իր քաղաքական-քարոզչական կարողութիւնները, միացնելու Հայաստանի ու սփիւռքի ձեռքերը, Միացեալ Նահանգներու եւ աշխարհի աչքերուն դիմաց պարզելու համար Թուրքիոյ պետութեան անցեալի ու ներկայի ոճրային արարքները` Ցեղասպանութենէն մինչեւ ճակատագրակից ժողովուրդներու սպանդը, Կիպրոսն ու Սուրիա-Իրաքը, քիւրտերն ու եզիտիները:

  • «Իրանում քրիստոնեայ լինել»՝ Ատրպատականի հայոց թեմի առաջնորդ Սրբազանի Հօր հարցազրոյցը
    «Իրանում քրիստոնեայ լինել»՝ Ատրպատականի հայոց թեմի առաջնորդ Սրբազանի Հօր հարցազրոյցը

    Թաւրիզի Ա․ հայագիտական գիտաժողովի (2017) մասնակիցներից, Գերմանիայի Բոխումի համալսարանի դասախօս՝ աստւածաբան դոկտ․ Գլաուտիա Ռամմելթ Գերմանիա վերադարձին փափագ էր յայտնել թեմիս առաջնորդ Սրբազան Հօր հետ հարցազրոյց ունենալ։

  • «Ճանաչումն ուժ է, այլ ոչ թուլութիւն». ՀՀ նախագահը NYT-ի հետ խօսել է Ցեղասպանութեան ճանաչման մասին
    «Ճանաչումն ուժ է, այլ ոչ թուլութիւն». ՀՀ նախագահը NYT-ի հետ խօսել է Ցեղասպանութեան ճանաչման մասին

    Թուրքիայի կողմից Հայոց Ցեղասպանութեան ճանաչումը միեւնոյն ժամանակ կը լինի ճանաչումն այն փաստի, որ այդ երկիրը հանդուրժող պետութիւն դառնալու ճանապարհին է: Այս մասին Հայաստանի Հանրապետութեան նախագահ Արմէն Սարգսեանն ասել է ամերիկեան հեղինակավոր The New York Times պարբերականի լրագրող Ռոժեր Կոհենին տւած հարցազրոյցում:

  • Չաւուշօղլուն եւ Պոմպէոն քննարկել են Հայոց Ցեղասպանութիւնը ճանաչելու մասին ԱՄՆ ներկայացուցիչների պալատի ընդունած բանաձեւը
    Չաւուշօղլուն եւ Պոմպէոն քննարկել են Հայոց Ցեղասպանութիւնը ճանաչելու մասին ԱՄՆ ներկայացուցիչների պալատի ընդունած բանաձեւը

    Թուրքիայի արտգործնախարար Մեւլութ Չաւուշօղլուն եւ ԱՄՆ պետքարտուղար Մայք Պոմպէոն հեռախօսազրոյց են ունեցել, որի ընթացքում քննարկել են հոկտեմբերի 29-ին ԱՄՆ ներկայացուցիչների պալատի կողմից ընդունւած բանաձեւերը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։