Հա
26/04/2020 - 13:40

Քաղաքական բարձրագոյն մակարդակով զօրակցութիւն Հարաւային Ամերիկայի մէջ Հայոց Ցեղասպանութեան 105-րդ տարելիցին առիթով

Արժանթինի եւ Ուրուկուայի նախագահները՝ Ալպերթօ Ֆեռնանտէս եւ Լուիս Ալպերթօ Լաքաժէ Փօու իրենց ընկերային ցանցերու մէջ զօրակցական պատգամներ յղեցին Հայոց Ցեղասպանութեան 105-րդ տարելիցին առիթով: Նոյն քայլին դիմեցին իրենց Արտաքին Գործոց նախարաները՝ Ֆելիփէ Սոլա եւ Էրնեսթօ Թալվի:

Արժանթինի եւ Ուրուկուայի նախագահներն ու արտգործ նախարարները պատգամներ հրապարակեցին

 

«Փրենսա ԱՐՄԵՆԻԱ» (Պուէնոս Այրէս, 25.04.2020). Արժանթինի եւ Ուրուկուայի նախագահները՝ Ալպերթօ Ֆեռնանտէս եւ Լուիս Ալպերթօ Լաքաժէ Փօու իրենց ընկերային ցանցերու մէջ զօրակցական պատգամներ յղեցին Հայոց Ցեղասպանութեան 105-րդ տարելիցին առիթով: Նոյն քայլին դիմեցին իրենց Արտաքին Գործոց նախարաները՝ Ֆելիփէ Սոլա եւ Էրնեսթօ Թալւի: Բազմաթիւ այլ անձնաւորութիւններ՝ պատգամաւոր, քաղաքական ղեկավար, հանրային գործիչ, մտաւորական եւ արուեստագէտ Արժանթինի, Ուրուկուայի եւ Պրազիլի մէջ, ընդառաջելով ՀՅԴ Հարաւային Ամերիկայի Հայ Դատի յանձնախումբի դիմումին, ընկերային ցանցերով իրենց մասնակցութիւնը բերին Քորոնաժահրի պայմաններու մէջ բացառաբար համացանցային նախաձեռնութիւններով տեղի ունեցող 105-րդ տարելիցի համայնքային միջոցառումներով:

Ապրիլ 24-ի առաւօտեան, Արժանթինի նախագահական պալատի կայքէջին վրայ նշում կար 105-րդ տարելիցին.

«Հայ ժողովուրդի դէմ գործադրուած ցեղասպանութիւնը դաս մը պէտք է ըլլայ աւելի լաւ աշխարհ մը կառուցելու համար»:

Նախագահ Ալպերթօ Ֆեռնանտէս Թուիթըրի իր հաշիւով այդ զօրակցութիւնը տարածեց: Գրութիւնը կը նշէր Արժանթինի թիւ 26199 օրէնքը, որով եւ Ցեղասպանութիւնը պաշտօնապէս ճանչցուեցաւ: Օրէնքը քուէարկուեցաւ դեկտեմբեր 2006-ին եւ նախագահ Նեսթոր Քիրչնէր չառարկեց անոր, որով եւ այն վաւերացուեցաւ 11 յունուար 2007-ին:

Գրեթէ զուգահեռ նախագահական պատգամին, Արտաքին Գործոց Նախարարութեան կողմէ հրապարակուեցաւ Թուիթըրեան պատգամ մը, որ կ’ըսէր. «Հայ եւ Արժանթինցի ժողովուրդներ այսօր միացած են այս թուականով» նշելու համար Ցեղասպանութեան 105-րդ տարելիցը: «Առանց յիշողութեան մարդկութեան համար լաւագոյն ապագայ չկայ», կ’եզրակացնէ գրութիւնը:

Կրթութեան նախարարութեան նախաձեռնութեամբ, համացանցի վրայ զետեղուեցաւ Հայոց Ցեղասպանութեան մասին նիւթեր առ ի օգտագործում մանկավարժներու եւ դաստիարակներու:

Սեպտեմբեր 1987-ին, նախագահ Ռաուլ Ալֆոնսին Հայոց Ցեղասպանութիւնը ճանչցած առաջին արժանթինցի նախագահը եղաւ:

Այդ օրուընէ ի վեր, Գործադիր մարմինը առիթներով միայն անուղղակի զօրակցութիւններ յղած է Ապրիլեան ոգեկոչումներուն: Մինչեւ նախագահ Նեսթոր Քիրչնէր, սկզբունքային կեցուածք որդեգրեց եւ մերժեց թրքական ճնշումներուն տեղի տալ, որով եւ Արժանթին ունեցաւ Ցեղասպանութիւնը ճանչցող օրէնք: Իր նախորդներէն Գարլոս Սաուլ Մենէմ 1995-ին վեթոյի ենթարկած էր Ցեղասպանութիւնը ճանչցած նմանօրինակ օրէնք մը ի հետեւանք թրքական Ազգային Ժողովէն յատուկ Արժանթին ճամբորդած պատուիրակութեան մը ճնշումներուն: Ի բացառութիւն Ռաֆայէլ Պիելսայի եւ Խորխէ Թայեանայի, Արժանթինի արտգործ նախարարները ընդհանրապէս խուսափած են հարցին անդրադառնալէ՝ Թուրքիոյ հետ դիւանագիտական անհասկացողութիւնը շրջանցելու համար: Ցեղասպանութեան 105-րդ տարելիցին, Ապրիլ 24-ի օրը, Նախագահական պալատի եւ արտգործ նախարարութեան այս զոյց պատգամները Հայ Դատի նորագոյն յառաջընթաց մըն են Արժանթինի մէջ, որ ցարդ միակ երկիրն է աշխարհի մէջ ուր Ցեղասպանութիւնը ճանչցուած է գործադիր, օրէնսդիր եւ արդարադատական իշխանութեանց մակարդակով:

Ուրուկուայի մէջ, Ապրիլ 24-ին, նախագահ Լուիս Ալպերթօ Լաքաժէ Փօու ընկերային ցանցերով տարածեց գրութիւն մը օրը նշելով որպէս «յիշողութեան եւ խորհրդածութեան օր հայերուն եւ համայն մարդկութեան համար»: Ան իր ողջոյնը փոխանցեց Ուրուկուայի հայ համայնքին նշելով Ուրուկուայի ներդրումը Հայ Դատին: Փոխ-նախագահ Պէաթրիս Արխիմոն նմանօրինակ պատգամով մը յիշեց որ այս տարի Ուրուկուայի մէջ Ցեղասպանութեան ճանաչման օրէնքի 55-ամեակն է: Երկրի արտգործ նախարար Էրնեսթօ Թալւի նաեւ նշեց Ուրուկուայի այդ եզակիութիւնը: Արտգործ փոխ-նախարարը, Պաշտպանութեան նախարարն ու Ծերակոյտի նախագահուհին եւս զօրակցութեան պատգամներ յղեցին:

Ուրուկուայ աշխարհի մէջ առաջին երկիրն է որ օրէնքով զօրակցեցաւ Հայ Դատին՝ Սեւրի Դաշնագրին հիմնաւորումով:

1965-ի այդ օրէնքին մէջ Ցեղասպանութիւնը կը նշուի օրէնքին տուն տուող պատճառներուն մէջ, որով եւ պաշտօնապէս կը ճանչցուի: Օրէնքի 55-ի կողքին, համայնքը կարեւորութեամբ յիշեցուց որ 20 տարիէ ի վեր երկրի Խորհրդարանին մէջ պաշտօնապէս կ’ոգեկոչուի Ցեղասպանութիւնը: Հասկնալիօրէն այս տարի բոլոր միջոցառումները սահմանափակուեցան համացանցային նախաձեռնութիւններով:

Հայոց Ցեղասպանութեան 105-րդ տարելիցին առիթով, եւ այն համոզումով որ տունը մնալու հրամայականը չէր կրնար յիշելու եւ պահանջելու հրամայականը մոռցնել, Հայ Յեղափոխական Դաշնակցութեան Հարաւային Ամերիկայի Հայ Դատի յանձնախումբը տարածաշրջանին մէջ դիմեց քաղաքական եւ մտաւորական անձնաւորութիւններու, հանրածանօթ հանրային գործիչներու եւ արուստագէտներու որպէսզի իրենց ընկերային ցանցերով հանդէս գան հայութեան արդար պահանջատիրութեան: Մեծ թիւով անձնաւորութիւններ ընդառաջեցին եւ անոնց ելոյթները ամբողջ օրուայ ընթացքին տեղադրուեցան Հայ Դատի յանձնախումբի ընկերային ցանցերուն միջոցաւ: Այդ բոլորէն ծաղկաքաղ մը ընելով, Հայ Դատի յանձնախումբը պատրաստեց յատուկ տեսահոլովակ մը որ զետեղեց ֆէյսպուքեան իր էջին վրայ (https://www.facebook.com/watch/?v=2786997108095537&external_log_id=4e326b98897bc5d7bde940fc293d329e&q=consejo%20nacional%20armenio%20de%20sudamerica) ցոյց տալով անոնցմէ 28 արժանթինցի՝ Փերոնական, Ռատիքալ, Ընկերվարական, Կեդրոն-աջ եւ Միացեալ Ձախ կուսակցութիւններէ, մէկ ուրուկուայցի Ազգային Կուսակցութենէն, 8 պրազիլցի՝ Ընկերային Ազատական, Աշխատաւորական, Ընկերվար-Ժողովրդավար, Համայնավար, Հանրապետական, եւ Կանաչ կուսակցութիւններէ, մէկ չիլէցի (ընկերվարական) եւ մէկ փարակուայցի (Ժողովրդավար Յառաջդիմական):

 

Prensaarmenia.com.ar

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։