Հա
13/08/2020 - 10:15

Կազմակերպւած եւ զօրաշարժի կարող Սփիւռքը կենսական գործօն է, որպէսզի Հայաստանը միջազգային հարթակում գոյութիւն ունենայ

Բուէնոս Այրէսի Սան Անդրէս համալսարանի միջազգային յարաբերութիւնների եւ քաղաքականութեան պրոֆեսոր, ՀՅԴ անդամ Խաչիկ Տէր-Ղուկասեանի դիտարկմամբ՝ հայրենադարձութիւնն ազգային պատասխանատու յանձնառութիւն է, ուստի այն չպէտք է բովանդակազրկել անպատասխանատու եւ անտեղի կոչերով, այլ կերպ՝ էժան լոզունգի չպէտք է վերածել այն:

«alikonline.ir» - Բուէնոս Այրէսի Սան Անդրէս համալսարանի միջազգային յարաբերութիւնների եւ քաղաքականութեան պրոֆեսոր, ՀՅԴ անդամ Խաչիկ Տէր-Ղուկասեանի դիտարկմամբ՝ հայրենադարձութիւնն ազգային պատասխանատու յանձնառութիւն է, ուստի այն չպէտք է բովանդակազրկել անպատասխանատու եւ անտեղի կոչերով, այլ կերպ՝ էժան լոզունգի չպէտք է վերածել այն:

Արդեօ՞ք այս օրերին լիբանանահայերին Հայաստան ներգաղթելու կոչերը եւս անպատասխանատու յայտարարութիւններ են, 168.am-ի հետ զրոյցում Խաչիկ Տէր-Ղուկասեանը նշեց.

«Ոչ։ Անպատասխանատւութիւն է դրա անտեղի եւ ամբոխահաճոյ, ինչպէս նաեւ՝ էժան հայրենասիրութիւն անելու, կամ քաղաքական դիւիդենտներ ձեռք բերելու համար գործածութիւնը: Հայրենիքի դռները միշտ էլ բաց են վերադառնալ ցանկացողների համար, բարեբախտաբար, այդ համոզումը կայ»:

Ինչ վերաբերում է ՀՀ-ում իրականացւող հայրենադարձութեանը միտւած ծրագրերին, Սան Անդրէս համալսարանի միջազգային յարաբերութիւնների եւ քաղաքականութեան պրոֆեսորն ասաց, որ հայրենիքում հաստատւելու պայմանները բոլորովին այլ խնդիր է, եւ, որ այն երբեմն՝ հասկանալիօրէն, երբեմն էլ՝ ոչ այնքան հասկանալի, չի կատարւում:

«Սփիւռքի յանձնակատարի յայտարարութեամբ՝ հայրենադարձներն ընդունելութեան կարժանանան, կը գրանցւեն, յետո՞յ… Ես լաւ գիտեմ հայրենիքի սահմանափակումները հայրենադարձների համար՝ ստեղծելու տնտեսական վերապրումի եւ զարգացման պայմաններ, որոնք գրաւական են, որպէսզի հայրենադարձութիւնը չվերածւի հիասթափութեան: Հէնց այդ պատճառով զուսպ պիտի լինել՝ ամէն պահի հայրենադարձութիւնը յայտարարելու ազգի միակ փրկութիւնը: Այդպէս չէ, կազմակերպւած եւ զօրաշարժի կարող Սփիւռքը կենսական գործօն է, որպէսզի Հայաստանը միջազգային հարթակում գոյութիւն ունենայ: Մի վիրաւորւէք, բայց այդպէս է. առանց Սփիւռքի՝ Հայաստանի աշխարհաքաղաքական մեկուսացումը եւ համաշխարհային տնտեսութեան մէջ չգոյութիւնը հայրենիքի վերապրումի երկրորդ մեծագոյն սպառնալիքն է՝ թուրք-ադրբեջանական սպառնալիքից յետոյ: Հետեւաբար, վերադառնալով լիբանանահայութեանը, այսօր անհրաժեշտ է զօրավիգ կանգնել համայնքի ղեկավարութեան ճիգերին՝ դուրս գալու այս տագնապից: Ոչ թէ խուճապ ստեղծող հայրենադարձութեան մասին բարձրաձայնել՝ յայտարարելով այդ համայնքի վաղաժամ չքացումը: Ի վերջոյ, փափագողի եւ նիւթական նւազագոյն պայմաններն ունեցողի համար հայրենադարձութիւնն այլընտրանք է արդէն»,- շեշտեց Խաչիկ Տէր-Ղուկասեանը:

Դիտարկմանը, որ այսօր Լիբանանում թուրքական գործօնն ուժեղ է, եւ այս հարթութիւնում մտածելու բան կայ, մեր զրուցակիցն արձագանքեց՝ շատ:

«Թեմա, որի լուծումը հայրենադարձութիւնը չէ, այլ ընդհանրապէս Սփիւռքի ֆիզիկական անվտանգութիւնը, որի մասին երեւի պիտի մտածի Սփիւռքի գործերի գլխաւոր յանձնակատարը, փոխանակ աշխատանքից ազատելու այսքան տարի սփիւռքեան համայնքների հետ սերտ աշխատող եւ այդ համայնքներին ծանօթ մասնագէտների»:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։