Հա
31/07/2021 - 13:00

Մուսթաքպալ պլոքի պատուիրակութիւնը այցելեց «Շաղզոյեան»

ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի եւ պլոքի անդամ երեսփոխաններ Յակոբ Թերզեան եւ Ալեքսանտր Մաթոսեան երէկ «Շաղզոյեան» կեդրոնին մէջ ընդունեցին Մուսթաքպալ պլոքի պատուիրակութիւնը` գլխաւորութեամբ պլոքի նախագահ երեսփոխան Պահիա Հարիրիի: Պատուիրակութեան մաս կը կազմէին երեսփոխաններ Ռուլա Թապըշ եւ Նազիհ Նաժըմ:

«ՀՅ Դաշնակցութեան համար բացարձակին մէջ անձեռնմխելիութեան կարիքը չկայ: Միակ նպատակը Պէյրութի աղէտը պատճառող պատասխանատուները դատավարութեան ենթարկելն ու պատժելն է». Շեշտեց Յ. Բագրատունի

 

ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի եւ պլոքի անդամ երեսփոխաններ Յակոբ Թերզեան եւ Ալեքսանտր Մաթոսեան երէկ «Շաղզոյեան» կեդրոնին մէջ ընդունեցին Մուսթաքպալ պլոքի պատուիրակութիւնը` գլխաւորութեամբ պլոքի նախագահ երեսփոխան Պահիա Հարիրիի: Պատուիրակութեան մաս կը կազմէին երեսփոխաններ Ռուլա Թապըշ եւ Նազիհ Նաժըմ:

Հանդիպումին ընթացքին Հայկական երեսփոխանական պլոքին ներկայացուեցան Մուսթաքպալ պլոքին առաջադրած օրինագիծերը, որոնք կը վերաբերին դատական իշխանութեան ներկայացուցիչներն ու պետական այրերը անձեռնմխելիութենէ զրկելու առաջարկին` 4 օգոստոսի Պէյրութի նաւահանգիստի պայթումին հարցով արդարութիւն հաստատելու նպատակով: 

Հանդիպումէն ետք Յ. Բագրատունի յայտնեց, որ 4 օգոստոսի աղէտին նախօրեակին, իբրեւ Հայկական երեսփոխանական պլոք եւ ՀՅ Դաշնակցութիւն, կը նկատենք, որ բացարձակին մէջ անձեռնմխելիութեան կարիքը չկայ:

«Անձեռնմխելիութեան վերացումը այսօր եւ ապագային` արդարութեան հիմքն է: Կարեւորագոյնը կը մնայ Պէյրութի պայթումին բոլոր պատասխանատուները դատավարութեան ենթարկել եւ պատժել` հասնելու համար արդարութեան, որուն հիմքը հաւասարութիւնն է»,- հաստատեց ան:

Երեսփոխան Բագրատունի շեշտեց, որ պէտք է ամէն տեսակի անձեռնմխելիութիւն վերացնել` սկսելով երեսփոխանները անձեռնմխելիութենէ զրկելու քայլէն եւ հասնելով այլ մարզերու:

«Այսօր կան շարք մը առաջարկներ, որոնք կը միտին հասնիլ արդարութեան: Երեսփոխան Պահիա Հարիրիի նախագահութեամբ այսօրուան նիստին ընթացքին մեր տեսակէտը յայտնեցինք Մուսթաքպալ հոսանքի առաջարկներուն մասին, իսկ մեր կոչը պիտի ըլլայ, որ բոլորս խորհրդարանին մէջ համաձայնինք յարմարագոյն որոշումին շուրջ` հեռու մնալով համայնքային, կուսակցական կամ տեղայնական տարակարծութիւններէ, որովհետեւ մեր նպատակը մէկ է, եւ որովհետեւ նաւահանգիստի, Պէյրութի եւ անոր արուարձաններու զոհերուն թափած արիւնը շատ աւելի կարեւոր է ամէն տեսակի սահմանադրութիւններէն եւ բոլոր երկիրներէն: Սահմանադրութիւնն ու օրէնքը ի սպաս քաղաքացիին են եւ ոչ հակառակը:

Այս հիման վրայ իբրեւ պլոք պիտի սերտենք Մուսթաքպալ պլոքի առաջարկները, ինչպէս նաեւ կոչ կ՛ուղղենք ամէն մակարդակներուն վրայ վերացնելու անձեռնմխելիութիւնները: Նահատակներուն թափած արեան դիմաց մեծ ու փոքր գոյութիւն չունին»:

Իր կարգին, Թապըշ յայտնեց, որ Մուսթաքպալ պլոքին այցելութիւնները կը ներառեն տարբեր երեսփոխանական պլոքներ, որոնց կը ներկայացուին երկու օրինագիծերը, որոնցմէ առաջինը կը վերաբերի դատաւորները, իրաւաբաններն ու պաշտօնեաները անձեռնմխելիութենէ զրկելու:

«Այս օրինագիծը երկուշաբթի օր պիտի ներկայացուի խորհրդարան եւ ապա երեսփոխանական համապատասխան յանձնախումբին, որպէսզի ամէնէն արագ ժամանակամիջոցին ներկայացուի խորհրդարանի լիագումար նիստին: 

Իսկ երկրորդ օրինագիծը սահմանադրութեան փոփոխութեան չի վերաբերիր, այլ` անձեռնմխելիութեան վերաբերող սահմանադրութեան կարգ մը կէտերու առկախումին»,- ըսաւ ան:

Թապըշ յայտնեց, որ Մուսթաքպալ պլոքին կողմէ ներկայացուած այս զոյգ օրինագիծերուն նպատակն է պետական բուրգին գագաթէն մինչեւ ամէնէն պարզ պաշտօնեան անձեռնմխելիութենէ զրկել, իսկ դատավարութեան ընթացքը նոյնացնել` դատական մէկ ատեանի մօտ, «որովհետեւ այսօր պայթումին թղթածրարը կը սերտուի երեք ատեաններու կողմէ` Նախագահներու դատավարութեան, Դատական գերագոյն խորհուրդին եւ Դատաւորները դատավարութեան ենթարկող ատեանին, ինչպէս նաեւ Արդարութեան խորհուրդին կողմէ: Նման ոճիրի մը թղթածրարը պէտք է սերտուի մէկ հեղինակութեան կողմէ, որովհետեւ ի վերջոյ նման քստմնելի եւ ահռելի ոճիրի մը դիմաց բոլորին նպատակը մէկ է»:

Ան աւելցուց, որ նման ոճիրներ եւ աղէտներ ապրող տարբեր երկիրներու մէջ սահմանադրութիւնները կ՛առկախուին եւ բոլորը անձեռնմխելիութենէ կը զրկուին:

«Ինչպէս պաշտօնակիցս` երեսփոխան Բագրատունի ըսաւ. նպատակը մէկ է` ճշմարտութիւնը իմանալ, յանցագործները պատասխանատուութեան կանչել, արդարութիւն հաստատել եւ իմանալ, թէ ո՛վ քանդեց Պէյրութը եւ սպաննեց անոր զաւակները»,- ըսաւ ան:

Թապըշ նշեց նաեւ, որ նախ եւ առաջ կայ այն հարցը, թէ ո՞վ ամոնիում նայթրէյթը Լիբանան բերել տուաւ, եւ աւելցուց, որ պէտք է հաշուետուութեան կանչել եւ պատժել բոլորը:

Թապըշ ընդգծեց, որ երեսփոխանական բոլոր պլոքներուն հետ խորհրդակցութիւնները բաց են: Ան նկատել տուաւ, որ կարգ մը երեսփոխանական պլոքներ համաձայնութիւն յայտնած են իրենց առաջարկին եւ ստորագրած առաջարկները, իսկ ոմանք չեն ստորագրած` սակայն կը կիսեն իրենց տեսակէտներն ու ունին նոյն նպատակը: Այս առաջարկները, ինչպէս նաեւ այլ պլոքի մը կողմէ ներկայացուելիք որեւէ առաջարկ քննարկումի առարկայ են` խորհրդարանի լիագումարին ընթացքին:

Պատասխանելով լրագրողներուն հարցումներուն` Թապըշ շեշտեց, որ նուազագոյնը անգամուան մը համար թող օրէնքներն ու սահմանադրութիւնը բոլորին վրայ պարտադրուին, առանց խտրութեան:

 

«Ազդակ»

 

Յարակից լուրեր

  • Լիբանանի նոր կառավարութեան կազմութենէն ետք
    Լիբանանի նոր կառավարութեան կազմութենէն ետք

    Առկայ բոլոր խոչընդոտները յաղթահարելով եւ հեղձուցիչ դարձած տնտեսական կացութեան ու արտաքին ուժերու տիրական միջամտութեան իբրեւ հետեւանք, Միքաթիի կառավարութիւնը արդէն իրականութիւն է այսօր եւ իր աշխատանքային ծրագիրով կը ներկայանայ խորհրդարան` ստանալու համար անոր վստահութիւնը:

  • Արտօնուեցաւ կազմել նոր կառավարութիւն
    Արտօնուեցաւ կազմել նոր կառավարութիւն

    Եւ վերջապէս, տրուեցաւ որոշումը, կազմուեցաւ նոր կառավարութիւն:

    13 ամսուան անձկալի սպասումէ ետք, 2 նշանակեալ վարչապետներու հրաժարումէն ետք, Նեժիպ Միքաթի կազմեց կառավարութիւն մը, որ նուազագոյն ակնկալութեամբ համեստ յոյսեր պիտի ներշնչէ բազմաչարչար լիբանանցի քաղաքացիին:

  • Վերջապէս… Նոր կառավարութիւն
    Վերջապէս… Նոր կառավարութիւն

    Լիբանանի ահագնացող տագնապը լուծման ճանապարհի սեմը կրցաւ թեւակոխել վերջապէս: Հիմքով քաղաքակա՞ն, թէ՞ աշխարհաքաղաքական, տագնապը, արտաքին որոշողներու ու ներքին գործադրողներու պարտադրանքով վերաճեցաւ տնտեսականի, ապա ընկերայինի, ի վերջոյ յանգելու համար պետութեան կառոյցներու գրեթէ ամբողջական ամլացումին: Լիբանանեան թղթոսկիի գահավէժ արժեզրկումը, պետական նպաստներու ցամքումը յառաջացուցին համատարած աղքատութիւն եւ երկրի տնտեսական կեանքի կասեցում:

  • «Լիբանանում նոր կառավարութեան ձեւաւորումը դեռեւս ճգնաժամի հանգուցալուծում չէ». Շահան Գանտահարեան
    «Լիբանանում նոր կառավարութեան ձեւաւորումը դեռեւս ճգնաժամի հանգուցալուծում չէ». Շահան Գանտահարեան

    Լիբանանում լոյս տեսնող «Ազդակ» թերթի գլխաւոր խմբագիր Շահան Գանտահարեանը անդրադարձել է Լիբանանում երկար դադարից յետոյ նոր կառավարութեան ձեւաւորմանն ու առկայ խնդիրների լուծման անհրաժեշտութեանը։ 

  • Լիբանանում նոր կառավարութիւն է ձեւաւորւել. կազմում կայ մէկ հայ
    Լիբանանում նոր կառավարութիւն է ձեւաւորւել. կազմում կայ մէկ հայ

    Լիբանանի նախագահ Միշէլ Աունը հաստատել է ազգային փրկութեան կառավարութեան կազմը, որը կը զբաղւի բարեփոխումների իրականացմամբ եւ Բէյրութի վերակառուցմամբ, որն էապէս տուժել էր նախորդ տարւայ օգոստոսին նավահանգստում տեղի ունեցած պայթիւնից։ Բաաբդա պալատում հանդէս գալով լրագրողների առաջ՝ վարչապետի աշխատակազմի քարտուղար Մահմուդ Մեքիան յայտարարել է, որ նախագահը ստորագրել է վարչապետ Նաջիբ Միքաթիի կառավարութեան կազմի նշանակման մասին հրամանագիրը։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։