Հա
31/12/2021 - 11:55

Համախմբւինք ազգի ու հայրենիքի գերագոյն շահերուն շուրջ

Նոր տարւան սեմին, քրիստոնէական սիրով ու հայրապետական օրհնութեամբ կողջունենք մեր ժողովուրդի սիրելի զաւակները։

Նոր տարին մարդը, անհատապէս թէ հաւաքաբար, ինքնահայեցողութեան ու ինքնաքննութեան հրաւիրող պահ է։ Եկէք պահ մը մեր հայեացքները սեւեռենք հայ կեանքին վրայ։

Ն.Ս.Օ.Տ.Տ. ԱՐԱՄ Ա ԿԱԹՈՂԻԿՈՍԻ ԱՄԱՆՈՐԻ ՊԱՏԳԱՄԸ

 

Նոր տարւան սեմին, քրիստոնէական սիրով ու հայրապետական օրհնութեամբ կողջունենք մեր ժողովուրդի սիրելի զաւակները։

Նոր տարին մարդը, անհատապէս թէ հաւաքաբար, ինքնահայեցողութեան ու ինքնաքննութեան հրաւիրող պահ է։ Եկէք պահ մը մեր հայեացքները սեւեռենք հայ կեանքին վրայ։

Ինչպէս համայն մարդկութիւնը, նոյնպէս մեր ժողովուրդը կը շարունակէ ապրիլ համաճարակին ստեղծած դժւար պայմաններուն մէջ։ Սփիւռքի բոլոր գաղութները, առաւել կամ նւազ չափով, կը դիմագրաւեն այլազան մտահոգութիւններ։ Այս ծիրէն ներս, յատկապէս Լիբանանի հայութիւնը կապրի ծանր օրեր՝ տնտեսական աննախընթաց տագնապին հետեւանքով։ Հակառակ ներկայ դառն պայմաններուն, մենք պիտի շարունակենք վերանորոգ հաւատքով ու վճռակամութեամբ, վերականգնումի մեր հաւաքական երթը՝ միշտ ըլլալով մեր ժողովուրդի զաւակներուն հետ ու անոնց կողքին։

Արդարեւ, 2022 տարին հռչակած ենք Սփիւռքի տարի։ Կը հրաւիրեմ մեր բոլոր կառոյցները, մամուլը, մտաւորականները եւ գաղութները՝ իրապաշտ մօտեցումով ու համապարփակ հայեացքով եւ այս առիթով հրապարակած Մեր Հայրապետական Գիրը ունենալով որպէս ուղեցոյց, նախ, ինքնարժեւորումի ենթարկելու եւ ապա վերակազմակերպումի առաջնորդելու Սփիւռքը։ Սա հրամայական ու անյետաձգելի առաջնահերթութիւն է։

Դառնանք Հայաստանին։ Մեր հայրենիքը կը շարունակէ անորոշութեան ու յուսահատութեան ալիքներու մէջ օրօրւիլ։ Մէկ կողմէն՝ ներ-Հայաստանեան քաղաքական լարւած մթնոլորտը կը ջլատէ մեր հաւաքական ուժը։ Միւս կողմէն՝ թշնամին յաղթապանծ դիրքերէ պայմաններ կը դնէ Հայաստանին՝ անտեսելով Հայաստանին հողային ամբողջականութիւնը ու գերիշխանութիւնը, ինչպէս նաեւ՝ միջազգային օրէնքը։

Այո՛, մենք փոքր երկիր ենք. հարկ է իրատես մօտեցում ունենալ տարածաշրջանի ներկայ աշխարհաքաղաքական պայմաններու հոլովոյթին նկատմամբ։ Սակայն, այդ չի նշանակեր, որ Հայաստանը ըսելիք պիտի չունենայ իր ազգային շահերուն առնչւած եւ իր ներկան ու ապագան ճշտող խնդիրներուն գծով։

Այո՛, տարածաշրջանէն ներս համապարփակ ու մնայուն խաղաղութեան հաստատման համաձայն ենք, բայց ո՛չ պարտւողական ու զիջողական դիրքերէ։

Այո՛, տարածաշրջանէն ներս տնտեսական զարգացումներու նպաստող ծրագիրներու համաձայն ենք, բայց ո՛չ ի հեճուկս Հայաստանի ու Արցախի գերիշխանութեան, անկախութեան, անվտանգութեան ու հողային ամբողջականութեան։

Այսօր, Թուրքիայի եւ Ադրբեջանի կողմէ համադրւած պանթուրանական ռազմավարութիւն մը կը փորձւի ի գործ դրւիլ Հայաստանի եւ ամբողջ շրջանին նկատմամբ։ Ըլլանք զգօն ու հեռատես։ Արդարեւ, որեւէ համաձայնագրի ստորագրութիւն Ադրբեջանի հետ, ուր Ադրբեջանի տարածքային ամբողջականութեան մէջ ներառւած է Արցախը, նոյնպէս, որեւէ համաձայնութիւն Թուրքիայի հետ, որ կընդունի Թուրքիայի բացայայտ նախապայմանները, փաստօրէն Հայաստանի կողմէ խախտում պիտի ըլլայ Անկախութեան Հռչակագրին եւ Սահմանադրութեան սկզբունքներուն։ Նման վտանգալից քայլերու նկատմամբ Սփիւռքը չի կրնար անտարբեր մնալ։ Համահայկական խնդիրներու քննարկման մէջ Սփիւռքը իր գործօն մասնակցութիւնը պէտք է ունենայ՝ ինչպէս յաճախ շեշտած ենք։ Մեր թշնամիները ու բարեկամները պէտք է իմանան, որ Հայաստանը անտէր չէ, որբ չէ, ողջ Սփիւռքը իր կողքին է, հայութիւնը մէկ ու անբաժանելի ամբողջութիւն է։

Ինչ-ինչ պատճառներով ճակատամարտ մը կորսնցուցինք, բայց ոչ՝ պատերազմը։ Ի խնդիր Հայաստանի ու Արցախի անկախութեան ամրապնդման եւ մեր ազգային իրաւունքներու վերահաստատման համահայկական պայքարը կը շարունակւի…։

Համահայկական պայքարը պէ՛տք է շարունակւի՝

- Հայոց Բանակը վերակազմակերպելով ու զայն արդիական զէնքերով օժտելով։

- մեր սահմանները պաշտպանելով, ի պահանջել հարկին ժողովրդային դիմադրութեան դիմելով։

- մարտունակ ոգիով բանակցութիւններ վարելով։

- համախմբւելով հայրենիքի գերագոյն ու ընդհանրական շահերուն շուրջ։

Եկէ՛ք վերանորոգենք մեր ազգային ուխտը, եւ առաւել հաւատքով ու կամքով գօտեպնդւած ողջունենք զիրար ըսելով՝ Շնորհաւոր Նոր տարի։ Թող Աստւած օրհնէ մեր ազգին բոլոր զաւակները եւ ամէն տեսակի չարէ ու չարիքէ հեռու պահէ մեր ազգն ու հայրենիքը։

 

ԱՐԱՄ Ա ԿԱԹՈՂԻԿՈՍ

ՄԵԾԻ ՏԱՆՆ ԿԻԼԻԿԻՈՅ

26 դեկտեմբերի, 2021

Անթիլիաս, Լիբանան

 

Յարակից լուրեր

  • «Սփիւռքը սկսել է մաշւել ու գունաթափւել, անտարբերանալ, յուսախաբ լինել Հայաստանի նկատմամբ»․ Արամ Ա
    «Սփիւռքը սկսել է մաշւել ու գունաթափւել, անտարբերանալ, յուսախաբ լինել Հայաստանի նկատմամբ»․ Արամ Ա

    Անթիլիասում, Մեծի Տանն Կիլիկիոյ Արամ Ա կաթողիկոսը յունւարի 14-ին անցկացրել է հանդիպում-խորհրդակցութիւն լիբանանահայ մտաւորականների հետ` 2022 տարին «Սփյուռքի տարի» հռչակելու առիթով: Արամ Ա-ի ֆէյսբուքեան էջում այդ հանդիպմանն ունեցած ելոյթից մի հատւած է հրապարակւել՝ կապւած 2022-ը Սփիւռքի տարի հռչակելու պատճառների հետ»:

  • Սփիւռքի տարւայ հռչակագիրն ընթերցւեց Սպահանի հայոց թեմի եկեղեցիներում
    Սփիւռքի տարւայ հռչակագիրն ընթերցւեց Սպահանի հայոց թեմի եկեղեցիներում

    Կիրակի՝ յունւարի 16-ի առաւօտեան, Նոր Ջուղայի Ս. Յովհաննու Կարապետ եկեղեցում մատուցւող կիրակնօրեայ ս. եւ անմահ պատարագի ընթացքում, Սպահանի հայոց թեմի առաջնորդ գերշ. Տ. Սիփան Ս. եպս. Քէչէճեանի միջոցով ընթերցւեց Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Ա Վեհափառ Հայրապետի հռչակագիրը՝ 2022 թւականը «Սփիւռքի տարի» հռչակելու կապակցութեամբ։

  • Անթիլիասի Մայրավանքին մէջ. լիբանանահայ մտաւորականներու խորհրդակցական հանդիպում` «Սփիւռքի տարուան» առիթով
    Անթիլիասի Մայրավանքին մէջ. լիբանանահայ մտաւորականներու խորհրդակցական հանդիպում` «Սփիւռքի տարուան» առիթով

    Ն.Ս.Օ.Տ.Տ. Արամ Ա. Վեհափառ Հայրապետին հրաւէրով, Ուրբաթ, 14 Յունուարին 2022-ի երեկոյեան ժամը 6:00-ին, Անթիլիասի Մայրավանքի Վեհարանի դահլիճին մէջ տեղի ունեցաւ հանդիպում-խորհրդակցութիւն լիբանանահայ մտաւորականներու հետ` 2022 տարին «Սփիւռքի Տարի» հռչակելուն առիթով:

  • 2022 - ՍՓԻՒՌՔԻ ՏԱՐԻ
    2022 - ՍՓԻՒՌՔԻ ՏԱՐԻ

    Վերջին տարիներին, Սփիւռքին առնչւած զանազան խնդիրների եւ երեւոյթների շուրջ գիտաժողովներ տեղի ունեցան, ուսումնասիրութիւններ կատարւեցին եւ յօդւածներ ստորագրւեցին։ Անորոշութիւններով ու տագնապներով լեցուն Սփիւռքի ներկայ իրավիճակը, մեր ղեկավար մարմիններին եւ մտաւորականներին մղելու է՝ իրապաշտ ոգով ու պատասխանատու մօտեցումով տագնապելու, մտածելու, քննելու, խորհրդակցելու, Սփիւռքի ներկան վերակազմակերպելու եւ ապագան հունաւորող ճամբաներ եւ միջոցներ որոնելու։

  • Արամ Ա կաթողիկոսը 2022 թւականը հռչակել է Սփիւռքի տարի
    Արամ Ա կաթողիկոսը 2022 թւականը հռչակել է Սփիւռքի տարի

    Ն.Ս.Օ.Տ.Տ. Արամ Ա Մեծի Տանն Կիլիկիոյ Կաթողիկոսը 2022 թւականը հռչակել է Սփիւռքի տարի։ Այս մասին յայտնում է Մեծի Տանն Կիլիկիո կաթողիկոսութեան մամուլի ծառայութիւնը։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։