Հա
28/05/2022 - 14:40

«Հայաստանը կարիքն ունի խոհեմութիւն ու հեռատեսութիւն, քաջութիւն ու տեսլական ունեցող քաղաքական ղեկավարների». Արամ Ա

Մեծի Տանն Կիլիկիոյ կաթողիկոս Արամ Ա-ն ուղերձ է յղել Հանրապետութեան տօնի առթիւ:

«alikonline.ir» - Մեծի Տանն Կիլիկիոյ կաթողիկոս Արամ Ա-ն ուղերձ է յղել Հանրապետութեան տօնի առթիւ:

Նա, մասնաւորապէս, նշել է.

«Հայրապետական օրհնութեամբ, քրիստոնէական ջերմ սիրով եւ ազգային վառ ապրումներով ողջունում ենք մեր ժողովրդի սիրելի զաւակներին:

Դարձեալ մայիսի 28-ն է, ազատոութեան ու անկախութեան ձգտող, պայքարող հայ ժողովրդի համար իւրաքանչիւր օր Մայիսի 28 է եւ պէտք է այդպէս լինի:

Այս տեսլականով եւ յանձնառութեամբ սերունդներ կազմւեցին երկար տարիներ եռագոյնով ամբողջական Հայաստանը ամբողջական հայութեամբ վերակերտելու հաւատքը եւ կամքը տասնամեակներ շարունակ իմաստաւորեցին օրերը մեր ժողովրդի զաւակների:

Արդարեւ աշխարհաքաղաքական պայմանների պարտադրանքով, մեր կորցրած անկախութիւնը 1991-ին վերականգնեցինք՝ անկախ ազգերի շարքին եռագոյնը բարձրացնելով, միջազգային համայնքի դիմաց հայրենիքի անկախութիւնն ամրացնելու մեր վճռականութիւնը հաստատելով:

Անցնող 30 տարիներին իւրաքանչիւր հայ ազգի համաքական տունը ամրացնելու եւ ծաղկեցնելու, համազգային ճիգին տարբեր կերպերով բերեց իր գործուն մասնակցութիւնը: Սակայն դժբախտաբար ահաւոր փտածութիւնը, անհեռատես քաղաքականութիւնը, ջլատիչ անմիաբանութիւնը դարձան քանդիչ ներկայութիւն Հայաստանի մէջ:

Մինչ մենք մեր յաղթանակով շլացանք, առանց այն դիւանագիտական յաղթանակաի եւ տնտեսական զարգացման վերածելու, եւ մեր բանակը կազմակերպելու, թշնամին լուռ կերպոփվ պատրաստւեց, հերոսների արիւնով ձեռք բերւած մեր յաղթանակը պարտութեան վերածելու վճռականութեամբ: Պատահեց աղէտը: կորցրեցինք հայի արիւնով ազատագրւած հողերը, կորցրեցինք շուրջ 5 հազար երիտասարդ հերոսներ, կորցրեցինք հայի ստեղծագործ ոգու ու հաւատքի արտայայտութիւնը եղող վանքեր, եկեղեցիներ եւ մշակութային անհամար կոթողներ:

Այսօր յուսահատութեան ու անորոշութեան ամպեր են կուտակւած Հայաստանի ու Արցախի երկնքի վերեւում: Վերանկախացած Հայաստանի հզօրացման մասնակից դարձած Սփիւռքի հայութեան երկնակամարը սկսել է ծածկւել անտարբերութեան ու հոռետեսութեան ամպերով:

Արդարեւ, խոր ցաւով ու մտահոգութեամբ ենք հետեւում Հայաստանում տեղի ունեցող զարգացումներին: Փաստօրէն, հայ կեանքից ներս փոխադարձ ատելութիւնն ու անհանդուրժողութիւնը դարձել են իրական: Արցախի պատերազմից յետոյ փոխանակ մեր ուժերը համախմբելու, մեր միասնականութիւնը ամրապնդելու ու մեր ներուժը կազմակերպելու ներքին բեւեռացումը դարձել է աւելի խորը, ազգակործան ու հայրենաքանդ վտանգներով լեցուն;

Ներկայ կացութեան մէջ թշնամին դարձել է աւելի պահանջկոտ ու յարձակողապաշտ, եւ մեր մօտ ու հեռու գործընկերներն ու բարեկամները սկսել են անտարբեր լինել Հայաստանի նկատմամբ:

Ապրիլի 24-ի հայրեպետական մեր պատգամի մէջ մեր խորը մտահոգութիւնն արտայայտեցինք միաժամանակ մեր յստակ պատկերացումը պարզեցինք Հայաստանի ներկայի ու մանաւանդ ապագայի նկատմամբ: Ասացինք ու կրկնում ենք այսօր՝ մենք խաղաղութեան գործընթացին համաձայն ենք, սակայն ոչ ի հեճուկս Հայաստանի ամբողջականութեան ու անվտանգութեան եւ Արցախի հայութեան ինքնորոշման:

Մենք տարածաշրջանում Թուրքիայի հետ դիւանագիտական յարաբերութիւնների բնականոնացման սկզբունքին համաձայն ենք, սակայն դարձեալ ոչ ի հեճուկս Հայոց Ցեղասպանութեան ճանաչման եւ մեր ժողովրդի իրաւունքների հատուցման:

Պարտւողական ու զիջողական դիրքերից պէտք չէ բանակցել, պէտք է խուսափենք համաձայնագրեր, դաշնագրեր ստորագրելուց: Հայաստանի իշխանութիւնն այսօր, վաղը եւ միշտ պէտք է գիտակցի, որ համահայկական տարողութիւն ունեցող խնդիրների գծով ինչպէս յաճախ շեշտել ենք, իրաւունք չունի առանձին որոշումներ առնելու: Հայաստանի բարեկամներն ու թշմանիները եւս պէտք է իմանան, թէ հսկայ Սփիւռք կայ Հայաստանի ու Արցախի ժողովրդի կողքին, եւ նրանց պահանջների թիկունքին: Իր հողային ամբողջականութինն ու անվտանգութիւնը, ինչպէս նաեւ Արցախի ինքնիշխանութիւնը կորցնելու վտանգի ենթակայ, անորոշ ապագայի դիմաց գտնւող Հայաստանը կարիքն ունի խոհեմութիւն ու հեռատեսութիւն, քաջութիւն ու տեսլական ունեցող քաղաքական ղեկավարների:

Կրկնում ենք, հեռատեսութիւն եւ քաջութիւն, տեսլական ու խոհեմութիւն ունեցող քաղաքական ղեկավարների, որոնք կարողանան

Առաջին. Հայրենիքի գերագույն շհերի շուրջ համախմբել մեր ժողովրդի բոլոր զաւակներին եւ անսասան պահել Հայաստանի գերիշխանութիւնը,

Երկրորդ. Վերջ տալ այլամերժութիւնը խորացնող ու բռնութեան առաջնորդող բեւեռացումներին,

Երրորդը. Արցախի հայութեան ինքնորոշման արդար իրաւունքը երբեք սակարկութեան նիւթ չդարձնել,

Չորրորդ. Հայոց բանակի հզօրացումը, կազմակերպումը եւ արդիականացումը նկատել առաջնահերթ:

Սիրելի հայ ժողովուրդ, ի Հայաստան, Արցախ եւ սփիւռս աշխարհի, լինենք արթուն, Թուրքիան եւ Ադրբեջանը ուզում են կտրատել Հայաստանը եւ ջլատել մեր ազգի հաւաքական ուժը: Լինենք իրատես, ներկայ վտանգալից կացութեան շարունակումը պէտք է հիւծի մեր ներուժը, քայքայի տնտեսութիւնը եւ արտագաղթի դռները Արցախից ու Հայաստանից լայնօրէն բանան: Մեր ժողովրդի ժամանակակից պատմութեան այս ճակատագրական հանգրւանին ահաւոր տագնապներով շրջապատւած ու հոգեվարքի մէջ գտնւող Արցախն ու Հայաստանը, Սփիւռքի հետ միասին հրամայական ու անյետաձգելի կարքն ունեն հայրենիքը դէպի փրկութիւն առաջնորդող ամուր միասնականութեան:

Սարդարապատի միասնականութիւնը փրկեց Հայաստանը, չմոռանանք պատմութիւնը: Այսօր եւս սարդարապատյան շնչով ու ոգով թրծւած նոյն միասնականութիւնը պէտք է փրկի մեզ:

Սիրելի ժողովուրդ հայոց, Մայիսի 28-ը հրաւէր է զգաստութեան եւ ինքնաքննութեան, եւ կոչ պատասխանատւութեան ու նպատակասլաց յանձնառութեան ի խնդիր միակամ հայութեան, ինքնավար Արցախի եւ հզօր Հայաստանի:

Այժմ եւ միշտ եւ յաւիտեանս յաւիտենից ամէն:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։