Դեկտեմբերի 7-ին Փարիզում տեղի է ունեցել Արցախի Հանրապետութեան նախագահ Արայիկ Յարութիւնեանի գլխաւորած պատւիրակութեան հանդիպումը ֆրանսահայ համայնքի ներկայացուցիչների հետ, որը կազմակերպւել էր Ֆրանսահայ միութիւնների համակարգող խորհրդի (CCAF) կողմից:
Դեկտեմբերի 7-ին Փարիզում տեղի է ունեցել Արցախի Հանրապետութեան նախագահ Արայիկ Յարութիւնեանի գլխաւորած պատւիրակութեան հանդիպումը ֆրանսահայ համայնքի ներկայացուցիչների հետ, որը կազմակերպւել էր Ֆրանսահայ միութիւնների համակարգող խորհրդի (CCAF) կողմից:
Ողջոյնի խօսքով հանդէս են եկել Խորհրդի համակարգողներ՝ ՀՅԴ Բիւրոյի անդամ Մուրադ Փափազեանը եւ ֆրանսահայ հասարակական գործիչ Արա Թորանեանը:
Իր հերթին երկրի ղեկավարը հանդիպման մասնակիցներին է ներկայացրել Հանրապետութիւնում ընթացող սոցիալ-տնտեսական բազմաթիւ ծրագրերը՝ ուղղւած պատերազմի հետեւանքով բռնի տեղահանւած անձանց, ենթակառուցւածքային ռազմավարական խնդիրների լուծմանը, բնակչութեան բնականոն կենսագործունէութեան համար բաւարար պայմանների ստեղծմանը:
Առկայ մարտահրաւէրներին դիմակայելու, կատարւող աշխատանքները յաջողութեամբ իրականացնելու ու պատերազմից յետոյ ստեղծւած ճգնաժամը յաղթահարելու հարցում Նախագահը կարեւորել է համահայկական համախմբւածութեան, իւրաքանչիւր հայի ներգրաււածութեան աստիճանի բարձրացման եւ ներուժի օգտագործման անհրաժեշտութիւնը:
«Ամէն մէկը, որտեղ էլ լինի, իր գիտելիքների, փորձի, կարողութիւնների, ունակութիւնների ու հմտութիւնների սահմաններում պէտք է նպաստի Հայրենիքի զարգացմանն ու զօրացմանը: Սա է հայոց պետականութիւնն ամրացնելու, ժամանակակից յարափոփոխ աշխարհում մեր ազգային ինքնութիւնը պահելու միակ ճանապարհը: Մենք այլընտրանք չունենք»,- ասել է Արայիկ Յարութիւնեանը:
Միաժամանակ նախագահ Յարութիւնեանը նշել է, որ Ֆրանսիայի հայկական համայնքը միշտ կանգնած է եղել Արցախի կողքին ու այսօր էլ օգնում է ապաքինւել պատերազմի ծանր վէրքերից եւ դառնալ կենսունակ երկիր` միշտ մնալով հայկական: Նախագահ Յարութիւնեանը վստահութիւն է յայտնել, որ ֆրանսահայերը կը շարունակեն իրենց հայրենանւէր գործունէութիւնը ու կը նպաստեն Արցախի եւ Ֆրանսիայի միջեւ գործնական կապերի խորացմանը:
Հանդիպման ընթացքում Արայիկ Յարութիւնեանը նաեւ պատասխանել է ներկաներին յուզող հարցերին: Անվտանգութեանն առնչւող հարցին ի պատասխան՝ Նախագահը նշել է, որ Արցախի իշխանութիւնները բազմիցս յայտարարել են, որ մինչեւ հակամարտութեան վերջնական կարգաւորումը անհրաժեշտ է ապահովել ՌԴ խաղաղապահների, որպէս Արցախի ժողովրդի անվտանգութեան երաշխաւորի, անժամկէտ առաքելութիւնն Արցախում՝ դրան զուգահեռ աշխատելով լրացուցիչ միջազգային երաշխիքների ապահովման ուղղութեամբ:
Հանդիպմանը մասնակցում էին նաեւ Ֆրանսիայում ՀՀ արտակարգ եւ լիազօր դեսպան Յասմիկ Տոլմաջեանը, Ֆրանսիայի օրէնսդիր մարմնի ներկայացուցիչներ:
Arfd.am
