Հա

Ազգային

24/05/2019 - 11:00

«Դուք այլեւս իշխանութիւն էք, «դուխով»-ն արդէն վաղուց ակտուալ չէ, եւ պէտք է գործել խելքով ու մտքով». Իշխան Սաղաթելեան

Երէկ Ազատութեան հրապարակում #Լրջացէք# Յանուն Երկրի կարգախօսով` Հայ Յեղափոխական Դաշնակցութեան նախաձեռնած հանրահաւաքում ելոյթով հանդէս եկաւ ՀՅԴ Հայաստանի ԳՄ ներկայացուցիչ Իշխան Սաղաթելեանը: Ելոյթը ներկայացնում ենք ստորեւ` ամբողջութեամբ: 

 

«alikonline.ir» - Երէկ Ազատութեան հրապարակում #Լրջացէք# Յանուն Երկրի կարգախօսով` Հայ Յեղափոխական Դաշնակցութեան նախաձեռնած հանրահաւաքում ելոյթով հանդէս եկաւ ՀՅԴ Հայաստանի ԳՄ ներկայացուցիչ Իշխան Սաղաթելեանը: Ելոյթը ներկայացնում ենք ստորեւ` ամբողջութեամբ: Գրում է «Yerkir.am»-ը:

Յարգելի' հայրենակիցներ, հանրահաւաքի սիրելի' մասնակիցներ, դաշնակցական ընկերնե'ր, համակիրնե'ր

Մէկ տարի առաջ ժողովրդի պահանջով մեր երկրում տեղի ունեցաւ իշխանափոխութիւն։ ՀՀ քաղաքացին դժգոհեց եւ մերժեց մեր երկրում գոյութիւն ունեցող աղքատութիւնը, գործազրկութիւնը, ցածր աշխատավարձը, անարդարութիւնը, բարեփոխումների դանդաղ ընթացքը, հասարակութեան բեւեռացումը։

Եւ այս բոլոր հարցերը լուծելու սպասումով ձեւաւորեց նոր իշխանութիւն։ Աւելի բարեկեցիկ, աւելի արդար, աւելի պաշտպանւած, աւելի համերաշխ, աւելի անվտանգ, հզօր եւ համախմբւած պետութիւն ունենալու ակնկալիքով։ ՀՅԴ-ն, չնայած իր բազմաթիւ մտահոգութիւններին, վարչապետի առաջարկով մաս կազմեց նոր կառավարութեանը, եւ այդ որոշումը պայմանաւորւած էր համաժողովրդական շարժումն արդիւնաւորելու, երկիրն առանց ցնցումների զարգացման նոր փուլ տեղափոխելու անկեղծ մղումով։ ՀՅԴ-ն` իբրեւ համահայկական կառոյց, պատրաստակամութիւն յայտնեց իր ամբողջ ներուժը եւ հնարաւորութիւնները ներդնելու` երկրի առջեւ կանգնած մարտահրաւէրները լուծելու համար, այդպիսով՝ մենք ամէն ինչ արեցինք, որ յաջողենք, քանի որ բազմիցս ասել ենք՝ ժողովրդին կրկին յուսախաբ անելը կունենայ ծանր հետեւանքներ։ Բայց իշխանութիւններն ընտրեցին այլ ճանապարհ՝ սեւեր-սպիտակներ, յեղափոխականներ-հակայեղափոխականներ, տեսակէտի, որոշման ու կամքի պարտադրում։ Արդիւնքում, խախտելով քաղաքական պայմանաւորւածութիւնները, նշանակեցին ընտրութիւններ, ձեւաւորեցին իշխանութիւն։

Մէկ տարի անց պէտք է փաստենք, որ հասարակութեան ակնկալիքները եւ սպասումները չեն արդարացել, իսկ իշխանութեան խոստումները մնացել են օդում կախւած։ ՀՀ նոր իշխանութիւնները չունեն երկրի զարգացման ծրագիր, տեսլական, պրոֆեսիոնալ թիմ՝ երկրի առջեւ ծառացած խնդիրները լուծելու համար։

Ազգային միասնական օրակարգ ձեւաւորելու, հասարակութեանը համախմբելու, հասարակական համերաշխութիւն հաստատելու, հայ ժողովրդի համահայկական ներուժը եւ կարողութիւնները կազմակերպելու եւ առաջ տանելու փոխարէն ՀՀ իշխանութիւնները ապրում, աշխատում, շնչում եւ արտաշնչում են անցելով։ Այո, պարզ է՝ անցեալի մասին խօսելը հեշտ է եւ յաճախ անպատասխանատու, իսկ ներկայի եւ ապագայի մասին խօսելն ու որոշումներ ընդունելը դժւար եւ պատասխանատու, յանձնառու։

ՀՀ իշխանութիւնները ժողովրդի կողմից ստացել են բարձր վստահութեան քւէ, ունեն ՀՀ Սահմանադրութեամբ եւ օրէնքներով  ամրագրւած  լիազօրութիւններ եւ հնարաւորութիւններ երկրում իրական համակարգային տնտեսական, քաղաքական, դատաիրաւական փոփոխութիւններ անելու համար, բայց, դժբախտաբար, այդ լիազօրութիւնները օգտագործում են այլ նպատակով։

Անբացատրելի է եւ զարմանալի 70% քւէ ստացած իշխանութեան ինքնավստահութեան պակասը, որը դրսեւորվում է յաճախ իր մկանները, ֆիզիկակական ուժը տեղի-անտեղի ցուցադրելով, «ասֆալտին փռել», «պատերին ծեփել» արտայայտութիւններով։ Թէեւ իշխանութիւնները պէտք է թիւ մէկ շահագրգիռը լինեն երկրում կայունութիւն եւ համերաշխութիւն հաստատելու համար, այդուհանդերձ, իրենց քայլերով ոչ միայն չեն նպաստում դրան, այլեւ հակառակը` երկրում հրահրում են բախումներ։

Մենք եկել ենք ասելու հետեւեալը`  եթէ այսպէս էք քայլ անելու, աւելի լաւ է կանգ առէք, լրջացէք, նստէք տեղներդ եւ գործ արէք։ Դուք այլեւս իշխանութիւն էք, «դուխով»-ն արդէն վաղուց ակտուալ չէ, եւ պէտք է գործել խելքով ու մտքով։

Մենք վիճակը գնահատում ենք տագնապեցնող, համոզւած ենք, որ սխալ ընթացքով ճիշտ հանգրւանի չենք հասնի։ Յատուկ ուզում եմ ընդգծել՝ մեր երկրի արդարադատութեան համակարգի արմատական բարեփոխման հարցը մշտապես կարեւորւել է մեր կողմից։ Այո, բարեփոխումների անհրաժեշտութիւնը կայ, բայց դրանք պէտք է իրականացնել յստակ հայեցակարգով, Սահմանադրութեան տառին ու ոգուն համապատասխան, այլ ոչ թէ սպառնալիքներով ու ամբոխավարութեամբ։ Այդ ճանապարհով երկիրը վերջնականորեն տանելու էք քաոսի։

Հարկ եմ համարում յիշեցնել՝ անցած 5 ամիսների ընթացքում ՀՅԴ-ն հանդէս է եկել մի շարք նախաձեռնութիւններով։ Մենք մանրամասն եւ հիմնաւորւած տեսակէտներ ենք ներկայացրել կառավարութեան գործունէութեան ծրագրի, կառավարութեան կառուցւածքի, հարկային օրէնսգրքի, բազմաթիւ այլ հարցերի  մասին։ Հրաւիրել ենք քննարկումներ, յայտնել տեսակէտներ, այդ ամէնը չլսելու ու չտեսնելու են տւել։ Ասել ենք՝ եկէք թուղթ ու գրիչով խօսենք, որ ճիշտ լուծումները գտնենք, որ սխալ  ընթացք չլինի։ Ձայն բարբառո հանապատի։ Հիմա էլ ենք ասում՝ պատրաստ ենք օգնել ու որեւէ շահախնդրութիւն չունենք՝ ո'չ պաշտօն ենք ուզում, ո'չ աշխատավարձ, ո'չ էլ պարգեւավճար։ Ունենք մի ցանկութիւն` երկիրը զերծ պահել արկածախնդրութիւնից:

Ուզում եմ անդրադառնալ մի կարեւոր հարցի եւս։ Վարչապետը շարունակ պնդում է, որ երկրում կան օտարերկրեայ գործակալներ, Արցախը յանձնելու մտադիր դաւաճաններ, պետութեան դէմ հիւսւող դաւադրութիւններ։ Եթէ, իրօք, վարչապետն ունի նման տեղեկութիւններ, ապա պարտաւոր է հնչեցնել կոնկրետ անուններ, հակառակ պարագայում` դա կը դիտարկւի հասարակութեանը եւ սեփական ժողովրդին երեւակայական թշնամիներով ահաբեկելու փորձ։

Սիրելի' հայրենակիցներ, յատուկ ուզում եմ ընդգծել, որ այս հանրահաւաքի հետ կապւած եղան տարբեր մեկնաբանութիւններ, շահարկումներ, ուղղորդւած քարոզչութիւն՝ հանրահաւաքը իր բուն նպատակից շեղելու համար։ Յատուկ ուզում եմ յայտարարել, որ այս հանրահաւաքը ո'չ ընդդէմ է, ո'չ էլ` հանուն որեւէ անհատի։ Սա հանրահաւաք է ընդդէմ ազգային պառակտումի, ընդդէմ պետական ինստիտուտների կազմաքանդման, ընդդէմ ժողովրդավարութեան անւան տակ քաղաքական մենիշխանութիւն հաստատելու փորձի: Սա հանրահաւաք է՝ յանուն մեր պետականութեան, յանուն Արցախի, յանուն Հայաստանի Հանրապետութեան եւ ամբողջ հայութեան, սա՛ է Դաշնակցութեան օրակարգը։ Այդ օրակարգի կրողն է Հայաստանի առողջ, գիտակից, մտածող, արժանապատիւ քաղաքացին, որի հետ մենք ճանապարհ ունենք անցնելու։

Առարկայական այս արձանագրումների հիման վրայ, ահագնացող խնդիրների լիարժէք ընկալումով եւ դրանց անդառնալի հետեւանքների խորը գիտակցումով ՀՅԴ մեծ ընտանիքի անունից օրւայ իշխանութիւններիից պահանջում ենք՝

դուրս եկէ՛ք ձեր պոպուլիստական եւ քաղաքական թաքստոցից,

եղէ՛ք ազնիւ ձեզ իշխանութեան բերած ժողովրդի հետ եւ հրաժարւէք արհեստական օրակարգերից,

ընդմիշտ հասկացէք եւ, ի վերջոյ, գիտակցէք` զիջումների ճանապարհը կործանարար է Հայաստանի եւ Արցախի համար,

յարգէ'ք մեր երկրի Սահմանադրութիւնը, իրապէս ստանձնեք մայր օրէնքով իշխանութիւնների համար ամրագրւած ողջ պատասխանատւութիւնը,

համախմբէ'ք հայ ժողովրդին եւ լծւէք երկրի կառուցման գործին,

դադարէ'ք սեփական ժողովրդի մէջ թշնամիներ փնտրել, հասկացէք, որ ձեր տեսակէտները չկիսողները կամ ձեզ քննադատողները եւս ժողովուրդ են եւ անպայման ձեր հակառակորդները չեն,

հրաժարւէ'ք շոուներից, պոպուլիզմից եւ ամբոխավարութիւնից, ուժի եւ սպառնալիքի միջոցով ժողովրդի անունից մենիշխանութիւն հաստատելու ձգտումից:

Սա զգուշացում է` դեղին քարտ, լրջացէ'ք:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։