Հա

Ազգային

01/06/2019 - 09:30

Անդրադարձ. Հաւաստիութեան համար երկու նախապայմաններ

28 մայիսին, Սարդարապատի յուշահամալիրին մէջ տեղի ունեցած պաշտօնական արարողութեան ընթացքին Հայաստանի Հանրապետութեան վարչապետ Նիկոլ Փաշինեան յայտարարեց, թէ Հայաստանի Ա Հանրապետութեան պետական այրերուն երազանքը կ՛ապրի եւ պիտի իրագործուի:

ՎԱՀՐԱՄ ԷՄՄԻԵԱՆ

 

28 մայիսին, Սարդարապատի յուշահամալիրին մէջ տեղի ունեցած պաշտօնական արարողութեան ընթացքին Հայաստանի Հանրապետութեան վարչապետ Նիկոլ Փաշինեան յայտարարեց, թէ Հայաստանի Ա Հանրապետութեան պետական այրերուն երազանքը կ՛ապրի եւ պիտի իրագործուի:

Իրաւամբ ալ այդ երազանքը տակաւին կենդանի է, սակայն իր թուած չորս վարչապետներուն երազանքը, որ իրականութեան մէջ անոնց կուսակցութեան` ՀՅԴ-ի ազատ, անկախ եւ միացեալ Հայաստան կերտելու երազանքն է եւ ոչ թէ պարզապէս անձնական, ինչպէ՞ս կրնայ իրագործուիլ առանց ատոր ծնունդ տուած կուսակցութեան, առաւել եւս առանց համազգային ջանքերու միատեղման, որուն համար սիրոյ եւ համերաշխութեան իսկական մթնոլորտ մը աւելի քան կենսական է: Մթնոլորտ մը, որուն ձեւաւորման պատասխանատուութիւնը կ՛իյնայ ինքնին Հայաստանի Հանրապետութեան իշխանութիւններուն, նախ եւ առաջ վարչապետի ուսերուն:

Ի զուր չէր, որ Հայաստանի Հանրապետութեան նախագահ Արմէն Սարգսեան նոյն առիթով իր արտասանած խօսքին մէջ նշեց. «Համազգային խնդիրները կրնան լուծուիլ միայն համազգային ջանքերով: Հայաստանի, Արցախի ու սփիւռքի բոլոր կարողութիւնները եւ ներուժը օգտագործելով… Մեզմէ իւրաքանչիւրը պէտք է ներգրաւուած ըլլայ ընդհանուր հարցերուն վերաբերող որոշումներու կայացման հոլովոյթին մէջ… Այսօր մենք կրնանք եւ պարտաւոր ենք միասնաբար` Հայաստանի, Արցախի եւ սփիւռքի եռապատիկ ուժն ու կարելիութիւնները ծառայեցնելու Հայաստանին»:

Եթէ Հայաստանի ներկայ իշխանութիւններուն նպատակը իրապէս Ա. հանրապետութիւնը կերտած պետական այրերու երազանքի իրագործումն է, ապա առնուազն կարելի է զարմանալ անոնց կիրարկած ներկայ քաղաքականութեան հանդէպ: Արդարեւ, երկրին հասարակութիւնը, քաղաքական տեսադաշտը սեւերու եւ սպիտակներու, յեղափոխականներու եւ հակայեղափոխականներու բաժնելով չէ, որ կ՛իրականանայ Քաջազնունիի, Խատիսեանի, Օհանջանեանի եւ Վրացեանի` դաշնակցական այդ մեծ դէմքերուն երազանքը: Վարչապետին հնչեցուցած այդ գեղեցիկ յայտարարութենէն քիչ անց Սարդարապատի համալիրին մէջ 28 մայիսին ՀՅԴ-ի նախաձեռնութեամբ, ՀՅԴ-ի Քանատայի կառոյցին հովանաւորութեամբ եւ Թորոնթոյէն Վարուժ Լափոյեանի մեկենասութեամբ զետեղուած Արամ Մանուկեանի ծննդեան 140-ամեակին նուիրուած յուշակոթողին բացումին ՀՅԴ-ի հայաստանեան եւ քանատական կառոյցները եւ նոյնիսկ բարերարը հեռու պահելու քայլով` իշխանութիւնները անմիջապէս հարցականի տակ առին վարչապետ Փաշինեանի այդ յայտարարութիւնը եւ ընդգծեցին գործին ու խօսքին միջեւ հսկայական վիհի գոյութեան դառն իրականութիւնը:

Ազատ, անկախ եւ միացեալ Հայաստանի երազանքի իրագործման նախաքայլը Արցախի միացումն է Հայաստանին: Այսօրուան պայմաններուն մէջ, եթէ վերջինս անմիջականօրէն իրագործելի չէ, ապա առնուազն պէտք է կնքել Արցախ-Հայաստան ռազմավարական դաշինքը: Ահաւասիկ երկու նախապայմաններ, առանց որոնց Ա. հանրապետութեան երազանքի իրագործման մասին հնչող գեղեցիկ յայտարարութիւնները փուճ են ու ոչ հաւաստի:

 

«Ազդակ»

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։