Հա

Ազգային

19/06/2019 - 14:20

«Կարեւորը հետագայ պահւածքն է». Կիրօ Մանոյեանը՝ Սինանեանի նշանակման մասին

«Պէտք է ասեմ, որ բաւականին դժւար պատասխանատւութիւն է՝ նախ հաշւի առնելով, որ ընդհանրապէս նոր է ձեւաւորւում գրասենեակը, գործառոյթները».- ասաց Մանոյեանը՝ անդրադառնալով յանձնակատարի նշանակման հարցին։

«alikonline.ir» - 2019 թւականի մայիսի 8-ին ընդունւեց «Կառավարութեան կառուցւածքի եւ գործունէութեան մասին» օրէնքում փոփոխութիւնների նախագիծը, որով Սփիւռքի նախարարութիւնը լուծարւում էր՝ փոխարէնը վարչապետի աշխատակազմում կազմաւորւելով Սփիւռքի հարցերով յանձնակատարի գրասենեակ: Յունիսի 14-ին Նիկոլ Փաշինեանի կողմից յանձնակատարի պաշտօնում նշանակւեց ԱՄՆ Քալիֆորնիա նահանգի Գլենդէյլի քաղաքային խորհրդի նախկին անդամ եւ քաղաքապետ, քաղաքագէտ, իրաւաբան Զարեհ Սինանեանը։

Այս կապակցութեամբ «Ա1+»-ը զրուցեց ՀՅԴ հասարակական-քաղաքական գործիչ Կիրօ Մանոյեանի հետ։

«Պէտք է ասեմ, որ բաւականին դժւար պատասխանատւութիւն է՝ նախ հաշւի առնելով, որ ընդհանրապէս նոր է ձեւաւորւում գրասենեակը, գործառոյթները».- ասաց Մանոյեանը՝ անդրադառնալով յանձնակատարի նշանակման հարցին։

Անկախ նրանից, թէ ով կը նշանակւէր այդ պաշտօնում, ըստ ՀՅԴ գործչի, այն մեծ պատասխանատւութիւն ունեցող պաշտօն է, որովհետեւ Հայաստան-Սփիւռք յարաբերութիւններում կարեւոր դերակատարութիւն ունենալու համար է կոչւած այդ գրասենեակը։

Քաղաքական գործչի խօսքով՝ Սինանյեանը մշտապէս մասնակցել է Հայ Դատի յանձախմբերի աշխատանքներին, բայց վերջին շրջանում որոշ քայլեր էր ձեռնարկել, որոնք մի քիչ անհասկանալի են եղել.

«Յատկապէս՝ վիրահայութեան կամ ջաւախահայութեան հարցերի հետ կապւած»,- ասաց նա։

Հարցին, թէ ինչ անհասկանալի քայլերի մասին է խօսքը, նա ասաց, որ Սինանեանը Վրաստանում ՀՅԴ ղեկավարների դէմ է ուղղակի խօսել։

Անդրադառնալով խնդրին, թէ մտահոգութիւններ կան Իրանի եւ Ռուսաստանի հայ համայնքներում՝ կապւած Սինանեանի՝ ԱՄՆ քաղաքացի լինելու հետ՝ քաղաքական գործիչն ասաց, որ պարզապէս քաղաքացիութիւնը պէտք չէ, որ կանխորոշի. հետագայ գործերը եւ փաստերը ցոյց կը տան։

«Ինքն էլ այդ մասին մտահոգութիւն արտայայտել է եւ ինքը կարող է այդ ուղղութեամբ ակտիւ, դրական աշխատանք տանել, յուսանք»,- ասաց Մանոյեանը՝ յաւելելով, որ եթէ յանձնակատարը Ռուսաստանի քաղաքացի լինէր, Ամերիկայի հայ համայնքը կարող էր մտահոգութիւն յայտնել եւ որ ամէն դէպքում հետագայ պահւածքն է կարեւոր։

Իսկ թէ այս նշանակումն ինչպէս է ընկալւում ընդհանուր ՀՅԴ կառոյցներում, շեշտեց, թէ այնպէս չէ, որ «աշխարհի մեր բոլոր կառոյցներով քննարկել ենք Սինանեանի նշանակումը։ Նշանակւել է, մէկը պէտք է նշանակւէր, ի վերջոյ։ Անակնկալ չէր, որ ինքը պէտք է նշանակւի, որովհետեւ արդէն որոշ ժամանակ խօսակցութիւններ գնում էին»։

«Յուսով ենք՝ որպէս բարձր յանձնակատար՝ կը լինի պետութեան ներկայացուցիչ, ոչ թէ այս կամ այն շրջանակի»,- եզրափակեց Կիրօ Մանոյեանը։

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։