Հա

Ազգային

03/08/2019 - 14:15

«Վստահ չեմ, որ ՀՀ իշխանութիւնները Արցախի օժանդակութեան հետ կապւած ինչ-որ բան ասում են ԱՄՆ իշխանութիւններին». Կիրօ Մանոյեան

«Յատկապէս այս Սպիտակ տունը առաջին անգամը չէ, որ փորձում է Արցախին տրամադրւող օժանդակութիւնը ոչ միայն կրճատել, այլեւ ընդհանրապէս դադարեցնել: Թէեւ նախորդ վարչակազմի օրօք էլ այնպէս չէր, որ ուղղակի բիւջէի մէջ գրւում էր յատկացման մասին, բայց ինչ-որ տեղ արձանագրւում էր: Այս իշխանութիւնների համար մի քանի խնդիր կայ, որոնցից գլխաւորը Ադրբեջանի ազդեցութեան հարցն է»,- «Փաստինֆօ»-ի հետ զրոյցում ասաց ՀՅԴ Բիւրոյի անդամ, Հայ Դատի եւ քաղաքական հարցերի գրասենեակի պատասխանատու Կիրօ Մանոյեանը:

«alikonline.ir» - «Յատկապէս այս Սպիտակ տունը առաջին անգամը չէ, որ փորձում է Արցախին տրամադրւող օժանդակութիւնը ոչ միայն կրճատել, այլեւ ընդհանրապէս դադարեցնել: Թէեւ նախորդ վարչակազմի օրօք էլ այնպէս չէր, որ ուղղակի բիւջէի մէջ գրւում էր յատկացման մասին, բայց ինչ-որ տեղ արձանագրւում էր: Այս իշխանութիւնների համար մի քանի խնդիր կայ, որոնցից գլխաւորը Ադրբեջանի ազդեցութեան հարցն է»,- «Փաստինֆօ»-ի հետ զրոյցում ասաց ՀՅԴ Բիւրոյի անդամ, Հայ Դատի եւ քաղաքական հարցերի գրասենեակի պատասխանատու Կիրօ Մանոյեանը:

Յիշեցնենք՝ նախօրէին ԱՄՆ Հայ Դատի յանձնախումբն ահազանգել էր, որ Ամերիկեան վարչակազմը մտադիր է երկու ամսւայ ընթացքում դադարեցնել Արցախին տրամադրւող ֆինանսական օգնութիւնը, որը նախնական հաստատման էր արժանացել 2020 թւականի ֆինանսական ծրագրով:

Կիրօ Մանոյեանի խօսքով, առհասարակ, Միացեալ Նահանգների գործող իշխանութիւնը նւազեցրել է մարդասիրական օժանդակութիւնները: Սպիտակ տունը, ինչպէս նշեց Կիրօ Մանոյեանը, պատճառաբանութիւններ են ներկայացնում, որոնք սակայն, ըստ մեր զրուցակցի, զուտ պատրւակ են: «Իրական նպատակն այն է, որ իրենք Ադրբեջանին չանհանգստացնեն, քանի որ ԱՄՆ-ը աշխարհում միակ պետութիւնն է, որը այսպէս ուղղակի մարդասիրական օժանդակութիւն է տրամադրում Արցախին»,- համոզւած է Կիրօ Մանոյեանը:

Նշենք, որ Միացեալ Նահանգներն Արցախին մարդասիրական օժանդակութիւն է տրամադրում 1998 թւականից ի վեր: Կիրօ Մանոյեանը վստահ չէ, որ Հայաստանի իշխանութիւնները Արցախին տրամադրւող օժանդակութեան հնարաւոր դադարեցման հարցը բարձրացրել են ամերիկեան կողմի մօտ:

«Վստահ չեմ, որ ՀՀ իշխանութիւնները Արցախի օժանդակութեան հետ կապւած խնդրով ինչ-որ բան ասում են ԱՄՆ իշխանութիւններին: Եթէ համեմատենք, օրինակ` Ֆրանսիայում առկայ խնդրի հետ, երբ Ֆրանսիայի իշխանութիւնները ադրբեջանական ճնշումների ազդեցութեան տակ սկսեցին դատական գործերով Արցախի քոյր քաղաքների հետ կապւած որոշումները չեղարկել, ՀՀ իշխանութիւնը՝ մեր ԱԳՆ-ն ասաց, որ դա Արցախի խնդիրն է, Արցախն է զբաղւում, մենք անելիք չունենք: Այս դէպքում էլ շատ վստահ չեմ, որ ՀՀ իշխանութիւնները դժգոհութիւն կամ մտահոգությիւն արտայայտած լինեն»,- ասաց Կիրօ Մանոյեանը:

Նշենք, որ բոլորովին վերջերս՝ յուլիսի 14-26-ը աշխատանքային այցով ԱՄՆ էր մեկնել ՀՀ ԱԺ նախագահ Արարատ Միրզոյեանի գլխաւորած պատւիրակութիւնը: Մօտաւորապէս նոյն օրերին Միացեալ Նահանգներում էին նաեւ ՀՀ փոխվարչապետ Տիգրան Աւինեանն ու արտգործնախարար Զոհրաբ Մնացականեանը:

Հարցին, պատահակա՞ն է արդեօք, որ Արցախին տրամադրւող օժանդակութեան վերաբերեալ տեղեկատւութիւնն ստացւել է հայ բարձրաստիճան պաշտօնեաների ամերիկեան այցերից յետոյ, Կիրօ Մանոյեանն արձագանքեց. «Արարատ Միրզոյեանը ԱՄՆ Կոնգրեսի Ներկայացուցիչների պալատի ղեկավարութիւնը միջոցառմանը մասնակցելու համար էր մեկնել, նոյն օրերին փոխվարչապետ Աւինեանն էր այնտեղ եւ արտգործնախարար Մնացականեանը, բայց ամենակարեւոր հարցն այն է՝ նրանք այս խնդրով խօսե՞լ են, թէ չեն խոսել: Այդ հարցը պարզ չէ: Այնպէս չէ, որ հայ-ամերիկեան յարաբերութիւնները վատանում են, այս ամէնը վկայում է, որ ԱՄՆ իշխանութիւնները Արցախի հարցով Ադրբեջանին բաւարարելու համար ինչ-որ կեցւածք են որդեգրել: Եթէ Հայաստանի իշխանութիւնը նոյն կերպ է առաջնորդւում, ինչ Ֆրանսիայի հարցում, նշանակում է, որ ոչ թէ չեն կարողացել որեւէ բան անել, այլ պարզապէս քայլեր չեն արել, չեն զբաղւել այդ հարցով, ինչը սխալ է»:

Կիրօ Մանոյեանի խօսքով, Հայաստան-Արցախ ռազմավարական համագործակցությեան պայմանագիրը, որի կնքման անհրաժեշտութեան մասին բարձրաձայնում է Դաշնակցութիւնը, հէնց նման իրավիճակների համար էական նշանակութիւն կարող է ունենալ: Այդ փաստաթղթում, ըստ Մանոյեանի, յստակ կը դրւի հարցը, որ Հայաստանի թէ արտգործնախարարութիւնը, թէ խորհրդարանական դիւանագիտութիւնն ու պետական այլ կառոյցներ պէտք է Արցախին օժանդակեն միջազգային յարաբերութիւնները պատշաճ իրականացնելու համար: ՀՅԴ Հայ Դատի յանձնախմբերը, նրա խօսքով, այս ուղղութեամբ քայլեր իհարկէ, իրականացնում են, բայց ՀՀ-ն իր բոլոր հնարաւորութիւններով պէտք է աջակցի այդ քայլերին:

Դիտարկմանը, թէ այսօր Հայաստանն իր արտաքին քաղաքականութիւնը կառուցում է, այսպէս ասած, «թաւշեայ յեղափոխութիւն» բրենդի վրայ, արդեօք ս՞ա արդիւնաւէտ կարող է լինել նոյն ԱՄՆ-ի հետ յարաբերութիւններում, Կիրօ Մանոյեանը պատասխանեց.«Այդ բրենդը մեր իշխանութիւններն օգտագործում են, բայց, ըստ էութեան, արտաքին քաղաքականութեան մէջ որեւէ փոփոխութիւն չեն մտցրել, նոյն Արցախի Հանրապետութեան ճանաչմանն աջակցելու մասով այս իշխանութիւնները շարունակում են նախորդ իշխանութիւնների կեցւածքը: Մենք երկուսի մէջ էլ եղել ենք ինչ-որ ժամանակ, բայց չենք կարողացել մեր գործընկերներին համոզել, որ անհրաժեշտ է, որ ՀՀ արտաքին քաղաքականութեան մաս կազմի նաեւ Արցախի Հանրապետութեան միջազգային ճանաչմանն աջակցելը: Այս իշխանութիւնները նոյնն են անում: Մեծ փոփոխութիւններ ընդհանրապէս չեն բերել հակառակը, եթէ ինչ-որ բան արւում է, դա աւելի շատ քաղաքականութեան ոչ յաջող կիրառումն է, քան քաղաքականութեան մէջ փոփոխութիւններ մտցնելը, որովհետեւ այսօր նաեւ տարբեր խնդիրներ ունենք»:

Կիրօ Մանոյեանը չբացառեց նաեւ, որ ԱՄՆ գործադիր իշխանութեան կեցւածքը Արցախին տրամադրւող օժանդակութեան մասով կարող է պայմանաւորւած լինել ՀՀ իշխանութիւններին Արցախի հարցով, այսպէս ասած, լռեցնելու ԱՄՆ-ի փորձով: «Երբ օրինակ պատրաստւում են ՀՀ-ին տրամադրւող օժանդակութիւնը բարձրացնել, որը, հաւանաբար, պէտք է տրամադրւի դատական համակարգի փոփոխութիւններին, հէնց դա կարող է լինել պատճառներից մէկը, որ Արցախին տրամադրւող կէս միլիոնը իրենք փորձում են հանել յատկացւող գումարներից»,- ասաց Կիրրօ Մանոյեանը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։