Հա

Ազգային

10/08/2019 - 11:00

ՀՀ-ի արեւելումի մասին

ՀՀ ներքաղաքական այնպիսի զգայուն խնդրի վերաբերեալ, ինչպիսին Քոչարեանի դատավարութիւնն է եւ մարտի 1-ի ողբերգական իրադարձութիւններին առնչւող քննարկումները, BBC-ի ռուսական ծառայութեան հրապարակումը յստակօրէն բացայայտեց մի քանի հանգամանքներ․

ՎԱՀԷ ՍԱՐԳՍԵԱՆ

 

ՀՀ ներքաղաքական այնպիսի զգայուն խնդրի վերաբերեալ, ինչպիսին Քոչարեանի դատավարութիւնն է եւ մարտի 1-ի ողբերգական իրադարձութիւններին առնչւող քննարկումները, BBC-ի ռուսական ծառայութեան հրապարակումը յստակօրէն բացայայտեց մի քանի հանգամանքներ․

Քոչարեանի շուրջ ծաւալւող իրադարձութիւնների հիմքում դրւած է ՀՀ-ի արեւելումի հարցը, եւ արեւմտեան այդ լրատւամիջոցի նմանաբովանդակ անդրադարձը լաւագոյնս փարատեց մեր այս պնդման հիմքում առկայ կասկածները։ Իհարկէ, մինչ այս հրապարակումը եւս տեսանելի էր Ռուսաստանի բացայայտ աջակցութիւնը վայելող ՀՀ երկրորդ նախագահի շուրջ ծաւալւող իրադարձութիւններին արեւմուտքի մասնակցութիւնը, սակայն այժմ իրադարձութիւնները թեւակոխում են գերտէրութիւնների բացայայտ եւ լայնածաւալ բախումների փուլ։

Գաղտնիք չէ, որ անգլոսաքսոնական խօսափող BBC-ն աւելին է, քան սոսկ լրատւամիջոցը, եւ վերջինիս խառնւելը Քոչարեանի շուրջ ծաւալւող իրադարձութիւններին մեզ լիարժէք հիմք են տալիս ենթադրելու, որ այդ իրադարձութիւններն իրենց խորքում գերտէրութիւնների՝ ՀՀ-ի արեւելումին առնչւող  պայքարի հետեւանք են եւ ոչ թէ պատճառ։ Գերտէրութիւնները լաւագոյնս օգտւեցին եւ օգտւում են ՀՀ-ի իշխանութիւնների այսպիսի վարքագծից եւ Քոչարեանի խնդիրը դիտարկում սեփական ազդեցութեան տարածման լաւագոյն հարթակ։ Այստեղ անգամ աւելորդ է նշել, թէ որեւէ երկրի վրայ ազդելու կամ այն սեփական շահերի տիրոյթում պահելու համար ինչպիսի կարեւոր պայմաններ են բախումները, անկայութիւնը, հասարակութեան պառակտումը, սրանց հետեւանքով տնտեսութեան քայքայումը, ճգնաժամը, արտաքին նիւթական եւ քաղաքական աջակցութիւններին ապաւինելու անհրաժեշտութիւնը եւ այլն։

ՀՀ-ում ընթացող նշեալ գործընթացի հիմքում առկայ արեւելումի հարցում ՀՀ-ի իշխանութիւնները յստակօրէն կողմնորոշւած են դէպի արեւմուտք, եւ այստեղ ամէն ինչ շատ պարզորոշ է։ Արեւածաղիկ վաճառող տատիկն էլ գիտի․ առանց ՀՀ-ի բարձրագոյն ղեկավարութեան թոյլտւութեան բացառւում է, որ արեւմտեան նման լրատւամիջոցին հասանելի դառնային այդպիսի յոյժ կարեւոր եւ նախաքննական գաղտնիքներ պարունակող փաստաթղթերը։ Աւելին՝ այստեղ որեւէ տարօրինակ կամ զարմանալի բան չկայ, եւ ամէն ինչ շատ օրինաչափ է։ Իրականում այս քայլով ՀՀ-ի իշխանութիւնները ազդարարեցին ՀՀ-ի արեւելումի վերջնական յստակեցման մասին՝  ազդարարելով, որ ՀՀ-ի ուժային կառոյցներն արդէն համագործակցում են ոչ թէ ռուսական, այլ արեւմտեան կենտրոնների հետ։

ՀՀ հասարակական էլիտայի գիտակից շրջանակներն անուղղակի կամ ուղղակի կերպով դատապարտեցին BBC-ի ռուսական ծառայութեան նշեալ հրապարակումը՝ մատնանշելով մի շարք հեռահար վտանգներ։ Ճիշտ հակառակը, ելնելով սեփական նիւթաքաղաքական մանր շահերից, ՀՀ-ի իշխանութիւնների աջակցութիւնը վայելող կամ այդ նոյն իշխանութիւններին ծնունդ տւած հասարակական-քաղաքական շրջանակներն ակնյայտ հրճւանք ապրեցին այս հրապարակման ե՛ւ փաստի, ե՛ւ բովանդակութեան կապակցութեամբ։

Հաշւի առնելով միջազգային համակարգերում ՀՀ-ի ներկայ կարգավիճակը՝ դժւար չէ կռահել, թէ ՀՀ իշխանութիւնների այսպիսի կտրուկ շրջադարձն ինչպիսի աղետի կարող է յանգեցնել, որի ողջ ծանրութիւնն իր վրայ է կրելու ՀՀ-ում արդէն ոչինչ չորոշող ժողովուրդը։

ՀՀ-ի իշխանութիւնները, փաստօրէն, ՌԴ-ի ազդեցութիւնը թոթափում են ոչ թէ հայկական շահերի ամրացման, հայակենտրոն քաղաքականութիւն վարելու ճանապարհով, այլ արեւմուտքին ծառայելու, երկիրը արեւմտեան գործակալների գործողութիւնների, օտար բախումների թատերաբեմի վերածելու կործանարար ուղու միջոցով։ ՀՀ-ի ղեկավարութեան այս քայլերը որոշակիօրէն յիշեցնում են սահակաշւիլիական Վրաստանը, Իւշչենկոյի կամ Պորոշենկոյի Ուկրայինան, որոնց մասին, բնականաբար, խօսքերն ու մեկնաբանութիւններն աւելորդ են։

 

Yerkir.am

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։