Հա

Ազգային

31/10/2019 - 13:00

«ԱՄՆ ներկայացուցիչների պալատի` Հայոց Ցեղասպանութիւնը ճանաչող բանաձեւը նաեւ մեսիջ էր Թուրքիային, բայց չպէտք է թերագնահատել Հայ Դատի յանձնախմբերի աշխատանքը». Գ. Կարապետեան

Հոկտեմբերի 29-ին ԱՄՆ Կոնգրեսի ներկայացուցիչների պալատում կայացած քւէարկութեան արդիւնքում ընդունւեց Հայոց Ցեղասպանութիւնը ճանաչող բանաձեւը։ Քւէարկութեանը մասնակցած կոնգրեսականներից կողմ քւէարկեց 405-ը, դէմ՝ 10-ը, ձեռնպահ՝ 3-ը, իսկ 14 կոնգրեսական չի քւէարկել։ Թեմայի շուրջ Tert.am-ը զրուցել է Հայ Դատի Եւրոպայի յանձնախմբի գրասենեակի ղեկավար Գասպար Կարապետեանի հետ:

«alikonline.ir» - Հոկտեմբերի 29-ին ԱՄՆ Կոնգրեսի ներկայացուցիչների պալատում կայացած քւէարկութեան արդիւնքում ընդունւեց Հայոց Ցեղասպանութիւնը ճանաչող բանաձեւը։ Քւէարկութեանը մասնակցած կոնգրեսականներից կողմ քւէարկեց 405-ը, դէմ՝ 10-ը, ձեռնպահ՝ 3-ը, իսկ 14 կոնգրեսական չի քւէարկել։ Թեմայի շուրջ Tert.am-ը զրուցել է Հայ Դատի Եւրոպայի յանձնախմբի գրասենեակի ղեկավար Գասպար Կարապետեանի հետ:

 

- Պարո՛ն Կարամպետեան, ինչո՞ւ ԱՄՆ-ի ներկայացուցիչների պալատը հիմա որոշեց ընդունել Հայոց Ցեղասպանութիւնը ճանաչող բանաձեւ: 

- ԱՄՆ ներկայացուցչական պալատից Հայոց Ցեղասպանութեան ճանաչման հարցը նոր չէ. բաւական անգամներ եղել են: Արտաքին յարաբերութիւնների յանձնաժողովը, օրինակ, ճանաչել էր, բայց հարցը մինչեւ Ներկայացուցիչների պալատի լիագումար նիստ չէր հասել: Այս նոր բանաձեւը Ադամ Շիֆի նախաձեռնութեամբ դրւեց լիագումար նիստում, որին օգտակար եղան նաեւ Ներկայացուցչական պալատի այլ անդամներ, այդ թւում` երկու հայկական ծագում ունեցող ներկայացուցիչներ: Պէտք է նկատի ունենանք, որ Միացեալ Նահանգերի Հայ Դատի յանձնախումբն ու Վաշինգտոնի գրասենեակները երկար աշխատանք են տարել եւ արդէն զօրակցութիւն էին ապահովել երկու մեծ կուսակցութիւններից: Այնպէս որ, սպասելի էր, որ այս անգամ աւելի լաւը պէտք է լինի արդիւնքը: Հաւանաբար, կարող էր այդ միաձայն արդիւնքը չլինել, բայց իմ գործընկերների կողմից կար ակնկալութիւնը, որ այս անգամ շատ աւելի արդիւնաւէտ պէտք է լինի այս հարցի ընդունումը:

 

- Կա՞ր արդեօք ԱՄՆ-ի կողմից Թուրքիային ինչ-որ բան հասկացնելու գործօնը: 

- Բազմաթիւ աշխատանքներ են կատարւել, բայց, անշուշտ, ընթացքն աւելի արագացաւ` նկատի ունենալով նաեւ Թուրքիայի գործօնը` Սիրիայի վրայ յարձակումը, եւ Թուրքիա-ԱՄՆ՝ վերջին շրջանի յարաբերութիւնները: Բայց պէտք է հաշւի առնենք, որ իւրաքանչիւր անգամ, երբ մեզ համար որեւէ դրական կամ ժխտական որոշում է կայացւում, միշտ զգացում ունենք, որ այդ որոշման հետ մենք` Հայ Դատի գրասենյակը, կապ չունենք, ուրիշների միջեւ խաղեր են, ուրիշների կողմից զանազան հետապնդումների հարցեր են: Անշուշտ, Միացեալ Նահանգներն այսօր Թուրքիային քաղաքական մեսիջ ունի յղելու: Թուրքիան այդ մեսիջը լաւ կերպով չստացաւ, բայց նաեւ պէտք է հասկանանք, որ չպէտք է ասել` այս որոշումը միայն Թուրքիային մեսիջ յղելու համար էր: Սա որոշում է, որի կարեւորութիւնը որեւէ կերպ չպէտք է փորձել նւազեցնել: Մեր միտքը պէտք է լինի միայն դէպի մեր յաղթանակը. ինչ-որ երրորդ կողմի հետապնդումը երրորդի հարցն է, մերը չէ:

 

- Որո՞նք են ԱՄՆ-ի հիմնական քաղաքական շահերն ու նպատակները` այս բանաձեւն ընդունելու համար:

- Միացեալ Նահանգների ներկայացուցչական պալատը Ծերակոյտում երկրի օրէնքների մշակման կամ բանաձեւերի քւէարկութեան հիմնական օրէնսդրական մարմինն է, այնպէս որ, կարող ենք ասել, որ այո, ԱՄՆ-ն ճանաչել է Հայոց Ցեղասպանութիւնը, ինչպէս ճանաչել են 29 երկրներ, որոնցից միայն 4-ն են, որ օրէնքի ուժով կատարել են ընդունումը, մնացածը բանաձեւերով են: Ովքեր հետեւեցին Ներկայացուցչական պալատի քւէարկութեան ընթացքին, տեսան, որ քւէարկողների մօտեցումը մարդկային իրաւունքների պաշտպանման գծի մէջ էր, իրենք յուզւած էին, որ, ի վերջոյ, ժողովրդի համար արդար որոշում պէտք է կայացնեն: Անշուշտ, իրենց մէջ կան մարդիկ, որոնք քաղաքական դրդապատճառներ ունեն, բայց կարեւոր մեծ մասի որոշումը հիմնւած էր նաեւ մարդկային արժէքների վրայ, եւ այդ մէկը չպէտք է թերագնահատել եւ փորձել այդ մարդկանց արած մեծ քայլն ուրիշ հանգամանքների մէջ տեսնել: Բայց այստեղ պէտք է յստակեցնել` չպյտք է շփոթել օրէնսդիր մարմինը գործադիրի հետ: Օրէնսդիր մարմինն իր առաքելութիւնը եւ մօտեցումներն ունի, գործադիրը` իր: Երկրի արտաքին քաղաքականութիւնը եւ պետական շահերը, որոնք վերաբերում են արտաքին աշխարհին, որոշում է գործադիր մարմինը, այս պարագայում` ԱՄՆ նախագահն ու Արտաքին գործերի նախարարութիւնը:

 

- Ի՞նչ ընթացակարգ է սպասւում այս ամէնից յետոյ, հետագայ քայլերը որո՞նք են լինելու:

- Անշուշտ, այդ հսկայ աշխատանքը, որ սկսւեց եւ տասնեակ տարիներով կատարւեց մեր Հայ Դատի յանձնախմբի, այլ ամերիկեան-հայկական կառոյցների եւ ԱՄՆ` մեր հայրենակիցների կողմից, որպէսզի հասնենք այսօրւայ իրականութեանը, աւարտւած չէ: Մէկ մասը` Ներկայացուցչական պալատի քւէարկութիւնը, որ չափազանց կարեւոր էր, կատարւեց, այժմ կմնան Ծերակոյտը եւ, իհարկէ, ԱՄՆ նախագահի յաջորդ յայտարարութիւնը, որ պէտք է լինի 2020 թ. ապրիլի 24-ին: Որքանով այս պահին տեղեկացւած ենք Վաշինգտոնի Հայ Դատի գրասենեակի մեր գործընկերների կողմից, Ծերակւյտի մեջ էլ արդէն ներկայացւած է նման բանաձեւ, 2 կուսակցութիւնների 21 անդամներ արդէն ստորագրել են, այլ անդամներ էլ յայտնել են իրենց ստորագրելու ցանկութիւնը, որը պէտք է հասցնեն կատարել Ծերակոյտի լիագումար նիստին, որպէսզի այնտեղ հարցը քննւի եւ քւէարկութեան դրւի: Կարծում ենք, որ այս վերջին գրեթէ միաձայն քւէարկութիւնից յետոյ ընթացքը լաւը կը լինի, եւ Ծերակոյտն էլ կընդունի Հայոց Ցեղասպանութիւնը: Դրանից յետոյ կը մնայ ԱՄՆ նախագահը: Երբ երկրի երկու օրէնսդրական մարմինները ընդունած լինեն բանաձեւը, կը տեսնենք` նախագահը կը ցանկանա՞յ շրջանցել այդ որոշումները, թէ Ապրիլի 24-ի յայտարարութիւնը այլ կերպ կը հնչի: Իրենց մարտավարութիւնն էլ ցոյց կը տայ` ինչ կանենք հետագայում:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։