Հա

Ազգային

21/01/2020 - 11:30

Կազմեցէ՛ք կառավարութիւնը

Անցնող օրերու դէպքերուն թաւալգլոր ընթացքը կը մղէ լիբանանցի քաղաքացին դուրս գալու տրամաբանութեան, իրատեսութեան եւ ողջմտութեան ամէն «կապանք»-է եւ բարձրաղաղակ գոռալու`

Յ. ԲԱԳՐԱՏՈՒՆԻ

 

Անցնող օրերու դէպքերուն թաւալգլոր ընթացքը կը մղէ լիբանանցի քաղաքացին դուրս գալու տրամաբանութեան, իրատեսութեան եւ ողջմտութեան ամէն «կապանք»-է եւ բարձրաղաղակ գոռալու`

«Ա՛լ կը բաւէ, վե՛րջ տուէք այս խեղկատակութեան»:

Իրաւամբ, երկրին մէջ փտածութիւնը, օրինազանցութիւնը, պետական գանձի իւրացումը, դրամատիրական դասակարգի բարբարոս շահագործումը, քաղաքացիի հացին ոտնակոխումը ստեղծած էին այնպիսի շնչահեղձ մթնոլորտ, որ երբ եկաւ հոկտեմբեր 17-ի ժողովրդային ցասումը եւ աւելի ուշ կառավարութեան հրաժարականը, լիբանանցին յոյսի շունչ քաշեց ու ակնկալեց տասնամեակներու վրայ երկարած տառապանքի լուծման նախանշաններ տեսնել:

Դժբախտաբար, յոյսը արագօրէն յօդս ցնդեցաւ:

Ժողովրդային պոռթկումի անկեղծ պահանջատէրերը դէմ յանդիման գտնուեցան քաղաքականօրէն թափանցուած տարրերու, քաղաքական ուժեր շահագործեցին ցոյցերը, համայնքային մտածողութիւնը վերադարձաւ, փողոց ընդդէմ փողոցի խաղը վերսկսաւ, միջթաղային եւ պատերազմը յիշեցնող բախումներ կամ անցարգելներ արձանագրուեցան, օտար սպասարկութիւններ (ներառեալ թրքական) տեղական «յաճախորդներ» գործի լծեցին, ու նենգափոխուեցաւ արդար պահանջներով հրապարակ եկած ցասումի խաղաղ եւ քաղաքակրթուած արտայայտութիւնը:

Լիբանանեան թղթոսկիի արժեզրկումը, դրամատուներու շահամոլական դիտաւորութիւնն ու քաղաքացիին ճակտի արդար քրտինքին արգասիքը պատանդ վերցնելու գործընթացը, եւ դեռ` քաղաքական դէմքերու կոշտ, անտեղի, թունաւոր, զիրար փոքրացնող ու քանդիչ արտայայտութիւնները ստեղծեցին դէպի անօթութիւն եւ սով երթալու դիտաւորեալ խուճապ:

Իսկ երկրի քաղաքական ու տնտեսաելեւմտական վերնախաւը շարունակեց եւ դժբախտաբար կը շարունակէ ականջ եւ աչք փակելու իր գործելաոճը` պահելու համար իր առանձնաշնորհումները, քաղաքական առաւելութիւններն ու նիւթական շահերը:

Կասկածելի շարժումներ, պետական կարգ մը հաստատութիւններու վրայ յարձակումներ, խափանարարական արարքներ, խուլիկանութիւն, աւազակութիւն եւ գողութիւն, երկրի ապահովութեան հսկող ուժերուն դէմ յարձակումներ, համեմուած` լրատուական մարզի կարգ մը շրջանակներու նպատակաուղղուած, բայց ոչ անպայման ազատ կարծիք կոչուող իրաւունքի պահպանման սիրոյն եղող թիւր տեղեկարշաւ, եղան անպակաս, առանց անոնց ալ կոտտացող եւ արիւնաքամ քաղաքացիին հանապազօրեայ «հաց»:

Ամբոխները խելագարած…

Երկիրը ամբողջ պատանդ` քաղաքական խունթայի մը…

Բայց կարելի չէ մոռնալ, որ երբ տաճարը փուլ գայ, բոլորս կը մնանք անոր փլատակներուն տակ:

Զգաստութեան ժամանակն է: Արդէն ուշ ալ է:

Վե՛րջ պէտք է տրուի այս խեղկատակութեան:

Նախարար մը աւելի, նախարարութիւն մը պակաս, համայնքային իրաւունք մը աւելի կամ պակաս, քաղաքական ղեկավարի մը արժանապատուութիւն կամ կրօնաւորի մը նոր քարոզ կամ պատգամ այլեւս արժէք չունին:

Կազմեցէ՛ք կառավարութիւնը:

Լսեցէ՛ք ժողովուրդը:

Կազմեցէ՛ք կառավարութիւնը եւ սկի՛զբ դրէք բարեկարգումներուն:

Վե՛րջ տուէք այս զաւեշտին:

Դադրեցուցէ՛ք արիւնահոսութիւնը:

«Ազդակ»

Յարակից լուրեր

  • Մուսթաքպալ պլոքի պատուիրակութիւնը այցելեց «Շաղզոյեան»
    Մուսթաքպալ պլոքի պատուիրակութիւնը այցելեց «Շաղզոյեան»

    ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի եւ պլոքի անդամ երեսփոխաններ Յակոբ Թերզեան եւ Ալեքսանտր Մաթոսեան երէկ «Շաղզոյեան» կեդրոնին մէջ ընդունեցին Մուսթաքպալ պլոքի պատուիրակութիւնը` գլխաւորութեամբ պլոքի նախագահ երեսփոխան Պահիա Հարիրիի: Պատուիրակութեան մաս կը կազմէին երեսփոխաններ Ռուլա Թապըշ եւ Նազիհ Նաժըմ:

  • «Մենք պիտի մնանք ձեզի հետ, մի՛շտ ձեր կողքին». Շեշտեց Յ. Բագրատունի
    «Մենք պիտի մնանք ձեզի հետ, մի՛շտ ձեր կողքին». Շեշտեց Յ. Բագրատունի

    ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի «Վանայ Ձայն»-ի հետ ունեցած իր հարցազրոյցին ընթացքին անդրադարձաւ լիբանանեան տագնապին եւ լիբանանահայութեան:

  • Լիբանանը եւ Լիբանանի հայութիւնը դանդաղ քայլերով կ’ընթանայ դէպի խաւար, պետութեան մասնատում եւ կործանում
    Լիբանանը եւ Լիբանանի հայութիւնը դանդաղ քայլերով կ’ընթանայ դէպի խաւար, պետութեան մասնատում եւ կործանում

    Արդէն աւելի քան երկու տարիներէ ի վեր ահագնացող քաղաքական, տնտեսական, ֆինանսական եւ ընկերային ճգնաժամը չափազանց պայթիւնավտանգ դարձած է Լիբանանի մէջ ըստ տեղեկութիւններու, շուրջ 800 միլիառ տոլար երկրէն դուրս բերուած է՝ հայրենասիրութեան դոյզն զգացումներէ զուրկ, աւազակաբարոյ ղեկավարիկներու եւ այս չքնաղ երկիրը իրենց սեփական ագարակի վերածած, քաղաքացիական պատերազմի ոճրատիպ անձերու կողմէ, որոնք պատանդ վերցուցած են երկիրն ու ժողովուրդը։ 

  • Յայտարարութիւն ՀՅԴ Լիբանանի 72-րդ Շրջանային ժողովի
    Յայտարարութիւն ՀՅԴ Լիբանանի 72-րդ Շրջանային ժողովի

    ՀՅԴ Լիբանանի 72-րդ Շրջանային ժողովը, որ գումարուեցաւ 10-15 յունիսին` Հայաստանի եւ Արցախի մէջ վերջին երկու տարիներու զարգացումներուն լոյսին տակ կը վերահաստատէ Հայաստանի եւ Արցախի ժողովուրդին կողքին կանգնելու իր երկարամեայ ու հաստատ յանձնառութիւնը, ինչպէս նաեւ իր բոլոր կարելիութիւններով հայկական երկու հանրապետութիւններու ժողովուրդին աջակցելու աշխատանքը վճռականութեամբ շարունակելու վերանորոգ կամքը:

  • «Կը մաղթենք ՀՅ Դաշնակցութիւնը պատասխանատու չնկատել կառավարութեան կազմութեան հոլովոյթին դիմագրաւած արգելքներուն». Շեշտեց երեսփոխան Յ. Բագրատունի
    «Կը մաղթենք ՀՅ Դաշնակցութիւնը պատասխանատու չնկատել կառավարութեան կազմութեան հոլովոյթին դիմագրաւած արգելքներուն». Շեշտեց երեսփոխան Յ. Բագրատունի

    ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի երէկ երեկոյեան հարցազրոյցներու ընթացքին անդրադարձաւ նշանակուած վարչապետ Սաատ Հարիրիի յայտարարութիւններուն, որոնց լոյսին տակ մաղթեց, որ ՀՅ Դաշնակցութիւնը պատասխանատու չնկատուի կառավարութեան կազմութեան հոլովոյթին դիմագրաւած արգելքներուն:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։