Հա

Ազգային

09/02/2020 - 10:30

Հանդիպում-զրոյց՝ ՀՅ Դաշնակցութեան նախընտրական ծրագրի երիտասարդական բաժինն ամբողջացնելու նպատակով

2020 թւականի` Արցախի համապետական ընտրութիւններին ՀՅ Դաշնակցութեան նախընտրական ծրագրի երիտասարդութեան բաժինն ամբողջացնելու համար ՀՅԴ Արցախի Կենտրոնական կոմիտէի ներկայացուցիչ, ԱՀ ԱԺ «Դաշնակցութիւն» խմբակցութեան պատգամաւոր, ՀՅԴ նախագահի թեկնածու Դաւիթ Իշխանեանը փետրւարի 6-ին հանդիպում-զրոյց է ունեցել Արցախի մօտ 100 երիտասարդների հետ:

«alikonline.ir» - 2020 թւականի` Արցախի համապետական ընտրութիւններին ՀՅ Դաշնակցութեան նախընտրական ծրագրի երիտասարդութեան բաժինն ամբողջացնելու համար ՀՅԴ Արցախի Կենտրոնական կոմիտէի ներկայացուցիչ, ԱՀ ԱԺ «Դաշնակցութիւն» խմբակցութեան պատգամաւոր, ՀՅԴ նախագահի թեկնածու Դաւիթ Իշխանեանը փետրւարի 6-ին հանդիպում-զրոյց է ունեցել Արցախի մօտ 100 երիտասարդների հետ:

«Ապառաժ»-ը գրի է առել հանդիպման ընթացքում երիտասարդների հնչեցրած հարցերն ու Դաւիթ Իշխանեանի պատասխանները:

 

Մարզիկների վաշտ

Հարց.- Սպորտի բնագաւառում կարգաւորւած չէ մարզիկների բանակային ծառայութիւնը: ՀՀ-ում հարցը կարգաւորւել է օրէնսդրական նախաձեռնութեամբ՝ բարձր կարգի մարզիկներին համախմբելով մարզական վաշտում: Արցախում ինչպէ՞ս էք տեսնում այդ հարցի լուծումը:

Դաւիթ Իշխանեան.- Հարցը շատ ակտուալ է: Սպորտով զբաղւող եւ համապատասխան յաջողութիւններ արձանագրած մարզիկները, զօրակոչային տարիքի հասնելով, համապատասխան խնդրի առաջ են կանգնում: Այս հարցը, երբեմն անհատական միջամտութիւններով եւ նախաձեռնութիւններով, որոշակի մեղմ քաղաքականութեամբ լուծւել է, բայց, իհարկէ, ես կողմնակից եմ, որպէսզի այդ հարցը օրէնսդրական նախաձեռնութեան եւ կարգաւորման մակարդակի հասնի:

 

Ծրագրեր երիտասարդների համար

Հարց.- Ի՞նչ ծրագրեր պէտք է ներդրւեն՝ երիտասարդների հետ կապւած:

Դաւիթ Իշխանեան.- Պետութեան դերակատարութիւնը երիտասարդութեանը յուզող հարցերում պէտք է լինի բաւականին ծանրակշիռ: Բայց այդ ծանրակշիռ հանգամանքը ոչ միայն համապատասխան քաղաքականութեամբ պէտք է արտացոլւի, այլ այդ ամէնը պէտք է ունենայ իր համապատասխան ֆինանսական հնարաւորութիւնների ընձեռումը եւ կարգաւորումները: Ես մտադիր եմ՝ այս խնդիրները դնել համապատասխան մակարդակի վրայ: Անցած 5 տարիների ընթացքում պետութեան կողմից երիտասարդական դաշտին եւ կազմակերպութիւններին տրամադրւող գումարների արդիւնաւէտութիւնը մենք չենք տեսել: Երիտասարդն ուզում է ուսում, աշխատատեղ, ընտանիք եւ սոցիալական բարեկեցիկ պայմաններ: Իւրաքանչիւր երիտասարդ պէտք է ուղղակիօրէն ինքն իրեն ապահովւած զգայ այդ ամէնով: Մենք պարտաւոր ենք սոցիալական բաւարարւածութեան պայմաններ ստեղծել: Մեր պետական բիւջէով ներկայացւող 18 սոցիալական փաթեթները եւ տրւող արտօնութիւնները բաւարար չեն: Այդ ամէնը պէտք է խտացնել, խմբաւորել, ճիշտ թիրախաւորել եւ համապատասխան միջոցներ ուղղորդել այդ խնդիրները հանգուցալուծելու համար:

 

Սահմանադրական բարեփոխումներ

Հարց.- 2017-ին «Դաշնակցութիւն» խմբակցութիւնը դէմ է քւէարկել Սահմանադրական փոփոխութիւններին: Եթէ Դաշնակցութիւնը գայ իշխանութեան՝ Սահմանադրութիւնը փոփոխութեան կենթարկւի՞:

Դաւիթ Իշխանեան.- Մենք կարծում ենք, որ 2020 թւականի համապետական ընտրութիւններից յետոյ անհրաժեշտ է իրականացնել Սահմանադրական բարեփոխումներ: Ներկայիս գործող Սահմանադրութեան մէջ անհրաժեշտ է փոփոխութիւններ կատարել, քանզի դրանք հարւած են հասցնում մեր պետական համակարգին: Գերկենտրոնացւած նախագահական համակարգով նախագահին է վերապահւած միանձնեայ որոշելու կառավարութեան կառուցւածքը, բայց կառավարութեան կառուցւածքը կոլեգիալ որոշման անհրաժեշտութիւն ունի: Խորհրդարանը պէտք է ունենայ իր դերը:

Միաժամանակեայ նախագահական եւ խորհրդարանական ընտրութիւնները՝ տեսնում ենք, թէ ինչպիսի բեւեռացում են ստեղծել, մէկ տարւայ մէջ նոր կուսակցութիւնների գրանցման եւ ձեւաւորման ինչ հոսք է տեղի ունեցել. 12 կուսակցութիւնից հասել ենք 27-ի:

Սահմանադրական բարեփոխումներն անհրաժեշտութիւն են, եւ այդ առումով մենք կը փորձենք նախաձեռնութիւն ցուցաբերել:

 

Մարզիկների վարձատրութիւն

Հարց.- Ինչպէ՞ս էք տեսնում պրոֆեսիոնալ սպորտի զարգացումը, եթէ բնագաւառի մասնագէտները ստիպւած են մարզաձեւի դասաւանդումը զուգակցել մէկ այլ աշխատանքի հետ՝ բաւարար միջոցներ ստանալու համար:

Դաւիթ Իշխանեան.- Մենք մեր մտայնութեան մէջ պէտք է ունենանք հնարաւորութիւնների եւ համապատասխան մեխանիզմների անցնելու կարողութիւնը: Արդեօ՞ք մեր նիւթական հնարաւորութիւնները բաւարար են պրոֆեսիոնալ մարզիչներին համապատասխան միջոցներով ապահովելու: Հարցն այն է, թէ ինչ միջոցներով պէտք է դա արւի՝ պետական բիւջէո՞վ, անհատական ֆինանսաւորմա՞մբ, ֆեդերացիաներո՞վ, թէ՞ այլ աղբիւրներով: Խնդիրը ֆինանսականի մէջ է, եւ, անկեղծ ասած, ես չեմ կարող ասել, որ հարցը ներկայումս լուծում ունի: Բայց ինքս համոզւած եմ, որ պրոֆեսիոնալ մարզիչի համար մարզաձեւը պէտք է դառնայ մասնագիտութիւն եւ եկամտի աղբիւր: Երբ մենք ունենք յաջողութիւններ միջազգային տարբեր հարթակներում, այդ յաջողութիւնները մեզ հնարաւորութիւն պէտք է տան այս կամ այն ոլորտի մէջ ունենալու պրոֆեսիոնալներ, որոնց հիմնական աշխատանքը եւ գործունէութիւնը համարւի պրոֆեսիոնալ մարզաձեւը:

 

Արտագաղթ գիւղերից

Հարց.- Պետութեան եւ կառավարութեան վարած քաղաքականութեան արդիւնքում գիւղական համայնքներում արձանագրւում է երիտասարդների հոսք դէպի Ստեփանակերտ եւ արտերկիր: Ինչպէ՞ս էք տեսնում հարցի լուծումը:

Դաւիթ Իշխանեան.- Այսօր մեզ մօտ բացակայում է հայեցակարգային մօտեցումը գիւղական համայնքի եւ գիւղացու նկատմամբ: Պետութիւնը չունի այդ հայեցակարգային մօտեցումը: Գիւղատնտեսութեանը յատկացւող միջոցներ, դոտացիաներ, այս կամ այն գիւղերում կրթօջախ, համայնքային կենտրոն, բուժկէտ, մարզադահլիճ կառուցելը պարագայական է: Իմ պատկերացմամբ՝ մենք պէտք է ունենանք իւրաքանչիւր համայնքի զարգացման ծրագիր: Եթէ այսօր մեր գիւղական բնակավայրերի սպայական անձնակազմը, ծառայելով ՊԲ-ում, յատուկ հերթագրւում է եւ բնակարան ստանում քաղաքային բնակավայրերում, եթէ պետութեան կողմից յատուկ քաղաքականութիւն է վարւում՝ բնակարաններով միայն քաղաքային բնակավայրերում ապահովելու, դրանով մենք լուրջ հարւած ենք հասցնում գիւղական բնակավայրերին: Պետութեան կողմից հիմնականում ներդրումներ են կատարւում խոշոր համայնքներում, եւ փոքր համայնքներն աստիճանաբար դատարկւում են:

Այսօր Արցախի ամենամեծ վարչական շրջանի՝ Մարտունու 36 համայնքներից միայն 4 համայնք է ինքնաբաւ:

Այս հարցը համալիր, ընդհանուր քննարկումների անհրաժեշտութիւն է պահանջում: Հիմնական առանցքը երկու միաւորումների՝ պետութեան եւ տեղական ինքնակառավարման մարմնի համադրւած աշխատանքն է, ինչը եւ պէտք է կարգաւորվի:

 

Գիւղատնտեսութեան զարգացում

Հարց.- Գիւղատնտեսութեան ոլորտում արտօնութիւններ տրամադրելուց առաջնահերթութիւն չի տրւում գիւղատնտես մասնագէտին, ինչը գնալով դառնում է մասնագիտութեան հանդէպ հետաքրքրութեան նւազման եւ գիւղատնտեսութեան բնագաւառում յաջողութիւններ չարձանագրելու ու գիւղը լքելու պատճառներից մէկը:

Դաւիթ Իշխանեան.- Պետական բիւջէով գիւղատնտեսութեան ոլորտին ուղղւած ընդհանուր յատկացումները 3-4 տոկոս է, ինչն, իմ կարծիքով, բաւարար չէ: Ես կարծում եմ, որ այստեղ պէտք է վարել նպատակաուղղւած քաղաքականութիւն: Գիւղհիմնադրամի եւ համապատասխան այլ գիւղատնտեսական ծրագրերի իրականացման առումով տեսնում ենք միջոցների ոչ արդիւնաւէտ օգտագործում: Այս ամէնի հետ՝ անհրաժեշտ է ներդնել նաեւ մեխանիզմներ՝ համապատասխան ծրագրերում ներդրւած գումարները վերահսկելու:

 

Հայաստան-Արցախ յարաբերութիւններ

Հարց.- Հաշւի առնելով Դաշնակցութեան Հայաստանի կառոյցի՝ տեղի իշխանութիւնների հետ յարաբերութիւնները, նախագահի պաշտօնում ընտրւելու դէպքում ինչպէ՞ս էք պատկերացնում Արցախի եւ Հայաստանի իշխանութիւնների միջեւ յարաբերութիւնները:

Դաւիթ Իշխանեան.- Հարցին ես անձնաւորւած չեմ մօտենում: ՀՀ-ն ունի երկրի առաջնորդ, ԱՀ-ն կունենայ իր ընտրեալ նախագահը, եւ երկուսն էլ պարտաւոր են բնականոն համագործակցելու դաշտ ապահովել: Մենք ունեցել ենք այնպիսի դառը ժամանակներ, երբ փոխհասկացողութեան եւ փոխհամագործակցութեան բացակայութեան պայմաններում շատ կորուստներ ենք ունեցել: Կարծում եմ, որ ոչ Հայաստանի ներկայիս վարչապետը, ոչ Արցախի նախագահի բոլոր թեկնածուները չպէտք է որեւէ մտայնութիւն ունենան ուղղակիօրէն ենթակայ լինելու մէկը միւսին, կամ էլ հակադրւելու: Մենք նոյն ժողովրդի երկու զաւակներն ենք, եւ մենք պէտք է ընթանանք ազգային նպատակների ուղով:

 

Նշենք, որ երիտասարդների կողմից հանդիպում-զրոյցի ժամանակ բարձրացւած հարցերը դրւելու են ՀՅ Դաշնակցութեան համապատասխան մարմնի քննարկմանը՝ ՀՅԴ նախընտրական ծրագրի երիտասարդական բաժնի դրոյթներում ներառելու նպատակով:

Յաւելենք նաեւ, որ ՀՅ Դաշնակցութեան նախընտրական ծրագրի վերաբերեալ կարծիքներ եւ առաջարկութիւններ ունեցող անձինք կարող են դրանք ներկայացնել՝ գրելով Դաւիթ Իշխանեանի ֆէյսբուքեան էջին, կամ «Ապառաժ» պաշտօնաթերթին՝ Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։ հասցէով:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։