Հա

Ազգային

19/02/2020 - 10:30

Փետրւարեան ապստամբութիւնը պէտք է դաս լինի օրւայ իշխանութիւնների համար. ՀՅԴ միջոցառումը

Հայ ժողովուրդը փետրվարեան ապստամբութեան շնորհիւ ցոյց տւեց, որ չի հանդուրժելու օտարի բռնութիւնը, օտարի օգնութեամբ իշխանութեան եկած ցանկացած ուժի, թէկուզեւ այդ ուժը ներկայացնում էր այնպիսի հզօր երկիր, ինչպիսին Ռուսաստանն էր. Փետրւարեան ապստամբութեան 99-ամեակի առիթով Երեւանի Անգլիական այգում տեղի ունեցած միջոցառմանն իր ելոյթում նշեց Խ. Աբովեանի անւան ՀՊՄՀ դասախօս, պ.գ.դ.., պրոֆեսոր Խաչատուր Ստեփանեանը:

«alikonline.ir» - Հայ ժողովուրդը փետրվարեան ապստամբութեան շնորհիւ ցոյց տւեց, որ չի հանդուրժելու օտարի բռնութիւնը, օտարի օգնութեամբ իշխանութեան եկած ցանկացած ուժի, թէկուզեւ այդ ուժը ներկայացնում էր այնպիսի հզօր երկիր, ինչպիսին Ռուսաստանն էր. Փետրւարեան ապստամբութեան 99-ամեակի առիթով Երեւանի Անգլիական այգում տեղի ունեցած միջոցառմանն իր ելոյթում նշեց Խ. Աբովեանի անւան ՀՊՄՀ դասախօս, պ.գ.դ.., պրոֆեսոր Խաչատուր Ստեփանեանը: Գրում է Yerkir.am-ը:

1921 թ. Երեւանի բանտում կացնահարւածների յիշատակին նւիրւած յուշարձանի մօտ ամէն տարի տեղի ունեցող միջոցառումն այս անգամ եւս բազմամարդ էր. ներկայ էին ՀՅԴ Երեւանի Քաղաքային կոմիտէութեան ներկայացուցիչները, մտաւորականներ, հասարակական-քաղաքական գործիչներ, սփիւռքից ժամանած մեր հայրենակիցները եւ այլք: 

Ըստ էութեան հայ ժողովուրդը Փետրւարեան ապստամբութեան ժամանակ ընդվզելով հայ բոլշեւիկեան իշխանութիւնների դէմ՝ ընդվզեց բոլշեւիկեան Ռուսաստանի դէմ, որովհետեւ այն հայ բոլշեւիկների միջոցով սպառնում էր Հայաստանի անկախութեանը՝ ոտնակոխ անելով այն. Փետրւարեան ապստամբութեան հանգամանքերի մասին խօսելիս նշեց Խ. Ստեփանեանը:

Ըստ պատմաբանի` Փետրւարեան ապստամբութեան շնորհիւ հայ ժողովուրդը կամքի մի քանի այլ դրսեւորում եւս ցուցաբերեց. փաստւեց, որ հայ ժողովուրդը պատրաստ է ամէն գնով պահելու, փրկելու, պահպանելու իր մտաւորականութեանը եւ զինւորականութեանը:

«Յայտնի է, որ Փետրւարեան ապստամբութեան նախօրէին բոլշեւիկեան բանտերում գտնւող հայ մտաւորականութեանը սպառնում էր սպանդ: Արդէն սկսւել էին կացնահարութիւնները եւ սպանւել էին Համազասպը, Նիկոլայ Ղորղանեանը եւ ուրիշներ: Փրկւած մտաւորականութիւն, որը, ինչպէս ցոյց տւեց պատմութիւնը, ձեռնամուխ եղաւ նոր կազմաւորւող Սփիւռքի կեանքի կազմաւորմանն ու հունաւորմանը: Առանց այդ մտաւորականութեան՝ Սփիւռքում կազմակերպւած համայնքներ չէինք ունենայ, եւ հայապահպանութիւնը կը լինէր շատ աւելի ծանր պայմանների մէջ: Նիկոլ Աղբալեան, Յովհաննէս Քաջազնունի, Լեւոն Շանթ, Համօ Օհանջանեան… կացնահարումից փրկւած մտաւորականներ, ովքեր կարողացան կազմակերպել հայապահպանութեան հսկայածաւալ աշխատանքը Սփիւռքում»,- փաստեց ՀՊՄՀ դասախօսը:

Փետրւարեան ապստամբութիւնը, ըստ բանախօսի, նաեւ ամրագրեց, որ անկախութիւնը մեր համար գերակայ արժէք է. «Հայհեղկումի իշխանութեան գալուց օրեր անց Հայաստանի անկախութիւնը ոտնահարւեց բոլոր բնագաւառներում. մերժւեց «Մեր հայրենիքը», պետական զինանշանը, դրօշը, օրէնսդրութիւնը: Հայաստանի Հանրապետութեան օրէնսդրութեան փոխարէն բոլշեւիկներն սկսեցին կիրառել Խորհրդային Ռուսաստանի օրէնքները: Հայ ժողովուրդը ցոյց տւեց, որ անկախութիւնն իր համար գերակայ արժէք է, եւ Փետրւարեան ապստամբութիւնը իւրատեսակ պայքար էր անկախութեան վերականգնման համար»,- փաստեց նա:

Խ. Ստեփանեանը զուգահեռներ տարաւ նաեւ 1921 թւականին եւ մեր օրերում ստեղծւած հասարակական-քաղաքական իրադրութիւնների միջեւ: Այն օրերին իշխանութեան էին եկել մարդիկ, ովքեր չունէին կադրային ռեսուրս, եւ իրենց իշխանութեան հաստատւելու մարմաջը դրսեւորում էին անցեալը մերժելու մէջ: Չկարողանալով որեւէ նոր բան ստեղծել՝ բոլշեւիկները մերժում եւ ոչնչացնում էին տարիներին կառուցածը, գործիչներին եւ այլն:

Յաջորդ կարեւոր ընդհանրութիւնը, ըստ ՀՊՄՀ պրոֆեսորի, դա ատելութեան քարոզն էր:

«Բոլշիկեան թերթերը ամենավերջին մաղձն էին թափում ՀՀ կառավարութեան եւ Դաշնակցութեան հասցէին: Եւ իրենց թւում էր, թէ ատելութիւն քարոզը ինքնահաստատւելու ամենայարմար միջոցն էր: Նոյնը կատարւում է այսօր»,- նշեց Խ. Ստեփանեանը` յաւելելով, որ Փետրւարեան ապստամբութեան օրինակը պէտք է դաս լինի օրւայ իշխանութիւնների համար, որպէսզի խուսափենք նոր արիւնահեղութիւններից, ընդհարումներից եւ հայ ժողովրդին զերծ պահենք հնարաւոր կործանարար հետեւանքերից:

Միջոցառումն ամփոփւեց աւանդական երդման արարողութեամբ, որի ժամանակ Խ. Ստեփանեանի կնքահայրութեամբ երդւեցին եւ ՀՅԴ շարքերն անցան ՀՅԴ Երեւանի Քաղաքային կոմիտէութեան նորագիրները:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։