Հա

Ազգային

26/02/2020 - 12:20

«Մեր գործունէութիւնը լոբբինգի հողի վրայ շարունակւելու է նոյնկերպ, ով էլ լինի իշխանութեան». Յարութ Շիրինեան

Lragir.am-ը զրուցել է Բելգիայի Հայ Դատի գրասենեակի ներկայացուցիչ, Եւրոպայի Հայ Դատի գրասենեակի հանրային կապերի պատասխանատու Յարութ Շիրինեանի հետ: Զրոյցում վերջինս անդրադարձել է Հայ Դատի գործունէութեանը՝ նշելով, որ յանձնախմբերի աշխատանքը լոբբինգի հողի վրայ շարունակւելու է նոյնկերպ, ով էլ լինի իշխանութեան:

«alikonline.ir» - Lragir.am-ը զրուցել է Բելգիայի Հայ Դատի գրասենեակի ներկայացուցիչ, Եւրոպայի Հայ Դատի գրասենեակի հանրային կապերի պատասխանատու Յարութ Շիրինեանի հետ: Զրոյցում վերջինս անդրադարձել է Հայ Դատի գործունէութեանը՝ նշելով, որ յանձնախմբերի աշխատանքը լոբբինգի հողի վրայ շարունակւելու է նոյնկերպ, ով էլ լինի իշխանութեան:

«Մեր զրուցակիցն է Բելգիայի Հայ Դատի գրասենեակի ներկայացուցիչ, Եւրոպայի Հայ Դատի գրասենեակի հանրային կապերի պատասխանատուն Յարութ Շիրինեանը:

 

- Վերջին շրջանում երիտդաշնակցականների՝ կուսակցութիւնից հեռացնելը ինչպէ՞ս էք գնահատում։ Այլակարծութեան նկատմամբ անհանդուրժողականութի՞ւն կայ։

- Ես ներկայացնում եմ Բելգիայի Հայ Դատի գրասենեակը եւ չեմ ներկայացնում որեւէ կուսակցական կառոյց։ Այսինքն՝ մեր գրասենեակը կարող ենք համարել նաեւ անկուսակցական գրասենեակ, մենք աշխատում ենք հայ ժողովրդի, Արցախի ժողովրդի իրաւունքների պաշտպանութեան համար, ընդհանրապէս, ներքին կուսակցական հարցերով չենք զբաղւում։ Բայց որպէս երիտասարդ ես կարծում եմ, որ ՀՅԴ-ի մէջ, ընդհանրապէս հայ հասարակութեան մէջ երիտասարդութիւնն արդէն իր տեղը գտել է։

 

- Կա՞յ գաղափարական բախում ՀՅԴ-ի ներսում, որովհետեւ նշւում է, որ դրսի ու ներսի դաշնակցութեան մէջ կան տարբերութիւններ ու տարաձայնութիւններ։

- Բնական է, որ սերունդների մէջ մտածելակերպի տարբերութիւն կայ, բայց կարծում եմ, որ բոլոր դաշնակցական ուժերը, լինեն երիտասարդ, թէ աւելի աւագ տարիքի, բոլորի ուղղութիւնը մէկն է։ Իսկ դրսի ու ներսի տարբերութեան մասին անկարելի է խօսել, որովհետեւ մենք, լինելով Բելգիայի Հայ Դատի գրասենեակի աշխատակազմ, ամենօրեայ կապի մէջ ենք մեր Հայաստանի ընկերների հետ, միասին կատարում ենք մեր գործունէութիւնն ի նպաստ Հայ Դատի, ի նպաստ Հայաստանի եւ Արցախի։

 

- Իբրեւ ընդդիմութի՞ւն է ՀՅԴ-ն կարողանում լաւ աշխատել, թէ՞ երբ կոալիցիայի մաս էր։ Այսօր Դաշնակցութիւնը գործող իշխանութիւններին դեղին քարտ է ցոյց տալիս, քննադատում է, հանրահաւաք է անում, հիմա էլ կոչ է անում բոյկոտել սահմանադրական հանրաքւէն։ Նախկինում, երբ ՀՅԴ-ն կոալիցիայի մէջ էր ՀՀԿ-ի հետ, այդ ժամանակ երկրում լրջագոյն խնդիրներ կային, բայց ՀՅԴ-ն այսպիսի կեցւածք չէր դրսեւորում։

- Նորից ասեմ, որ ես Դաշնակցութեան անունից չեմ կարող պատասխանել, ուղղակի կարող եմ ասել, որ մենք որպէս Հայ Դատի գրասենեակ, բոլոր իշխանութիւնների աշխատել ենք նոյն ձեւով։ Մենք չենք կարող զիջել մեր գագաթնային արժէքները, ով էլ լինի իշխանութեան, մենք պէտք է աշխատենք։ Մենք ամենօրեայ կապի մէջ ենք մեր դեսպանատան հետ, կապի մէջ ենք ԵՄ-ում Արցախի ներկայացուցիչների հետ։ Ինչպիսին էլ լինի Հայաստանի ներքին իրավիճակը, մենք աշխատելու ենք։ Շատ նորմալ է, որ Հայաստանում ընդդիմութիւն կայ, այդպէս էլ պէտք է լինի, սակայն դա մեզ ընդհանրապէս չի վերաբերում։ Մեր գործունէութիւնը դիւանագիտութեան հողի վրայ, լոբբինգի հողի վրայ շարունակւելու է նոյնկերպ, ով էլ լինի իշխանութեան։

 

- Իսկ վերջին 1-2 տարւայ ընթացքում լոբբինգի առումով ի՞նչ արդիւնքներ են արձանագրւել։

- Մեր օրակարգում Արցախի հարցը առաջին հորիզոնականում է։ Այսինքն՝ մենք գործում ենք գրեթէ այնպէս, ինչպէս կգործեր Արցախի դեսպանատունը Եւրոպայում, եթէ այդպիսին լինէր։ Բոլոր մարդկային եւ այլ ռեսուրսները դրել ենք դրա համար։ Օրինակ՝ Եւրոխորհրդարանում ամէն ամիս, ամիսը երկու անգամ բանաձեւներ են լինում, որոնք կարող են վերաբերել Թուրքիային, Ադրբեջանին, տարածաշրջանին։ Մենք այդ բանաձեւներին պէտք է շատ ուշադիր լինենք, որպէսզի հակահայ նախադասութիւններ, արտայայտութիւններ չլինեն։ Մենք գիտենք, թէ այս հարցում որքան կարեւոր է թուրքական, ազերիական լոբբինգը, մենք գիտենք, թէ որքան մեծ ռեսուրսներ են նրանք ծախսում, նրանց լոբբինգն իսկապէս պետական մակարդակի վրայ է։ Իրենց լոբբինգը պետական մակարդակի վրայ է, մերը աւելի մարդկային հողի վրայ է։ Մեզ յաջողւել է բաւական մեծ թւով բանաձեւերի վրայ ազդեցութիւն ունենալ՝ աշխատելով Եւրոխորհրդարանի մեզ ընկեր անդամների հետ։ Նրանք արդէն շատ են։ Եւրոխորհրդարանի վերջին ընտրութիւններից յետոյ բաւական թւով հայամէտ պատգամաւորներ չընտրւեցին։ Մենք հիմա նոր ընթացքի մէջ ենք, որ նոր ընկերներ ձեռք բերենք, նրանց համոզենք Հայաստան եւ Արցախ այցելել։ Անցեալ տարի Արցախում տեղի ունեցած ֆորումին մեզ յաջողւեց բերել բաւական մեծ թւով եւրոպացի գործիչների։ Կային բելգիացիներ, ֆրանսիացիներ, յոյներ, գերմանացիներ, կիպրոսցիներ եւ այլն։ Նրանք առաջին անգամ լինելով Արցախում, հանդիպեցին Արցախի իշխանութիւնների հետ, ծանօթացան Արցախի հակամարտութեան գաղտնիքներին, առաջին ձեռքից տեղեկութիւններ ստացան։ Դա մեզ համար շատ կարեւոր է, որովհետեւ դրանից յետոյ մենք իրենց որեւէ բան փաստելու կարիք չունենք, որքան տեսնեն, որ Արցախի ժողովուրդը մեկուսացած վիճակում է ապրում Ադրբեջանի վարած քաղաքականութեան պատճառով, դա արդէն բաւական է, որ նրանք վերադառնալով Եւրոպա ամէն ինչ անեն Արցախի ժողովրդին օգնելու համար։

 

- Արցախի խնդրի կարգաւորման հարցում իշխանութեան քայլերի վերաբերեալ ի՞նչ անհամաձայնութիւն կամ համաձայնութիւն ունէք։ Օրինակ, նշւում է, որ մադրիդեան սկզբունքները փոխւեցին միւնխէնեան սկզբունքներով՝ վերջին հանդիպումից յետոյ։ Այս մասով իշխանութիւնների հետ կա՞ն անհամաձայնութիւններ։

- Մենք բանակցութիւններից ընդհանրապէս լուր չունենք եւ այդպէս էլ պէտք է լինէր։ Մենք այդ ամէնին հետեւում ենք այնպէս, ինչպէս ամբողջ հասարակութիւնը։ Ինչ վերաբերում է մադրիդեան սկզբունքներին, ապա կարծում ենք, որ դրանք պէտք է փոփոխութեան ենթարկւեն։ Թէ ինչով պէտք է դրանք փոխարինւեն, միւնխէնեան, թէ մէկ այլ սկզբունքներով, այդ մէկը հարցականի տակ է։ Միւնխէնում տեղի ունեցածն, իմ կարծիքով, որեւէ ձեւով չպէտք է ազդի բանակցային գործընթացի վրայ, որովհետեւ դա քայլ էր ժողովրդին ցոյց տալու, որ տեսէք, երկու երկրների ղեկավարները կարող են կողք-կողքի նստել։ Բայց այնտեղ ամէն մի ղեկավար իր դիրքորոշումն առաջ տարաւ եւ փորձեց դիմացինի փաստարկներին յաղթել։ Ինչպիսին էլ լինի բանակցութիւնների իրավիճակը, մենք պարտաւոր ենք աշխատել նախեւառաջ Արցախի ժողովրդի ինքնորոշման իրաւունքը պահպանելու համար, եւ դա յստակ նշւի միջազգային բանաձեւերում։ Յետոյ նաեւ պէտք է փորձենք մասնակցել Արցախի մեկուսացումից դուրս բերելու աշխատանքին։ Դա կարող է լինել ոչ միայն Եւրոպայի քաղաքական գործիչներ Արցախ բերելով, այլ նաեւ Արցախի մասին դրական ձեւով խօսելով եւ ցոյց տալով, որ այստեղ կայ ժողովուրդ, որն ապրում է իր հողում, սակայն չի կարողանում ունենալ իր տարրական իրաւունքները, ինչպէս ցանկացած երկրի բնակիչ։

 

- 1.5 տարի առաջ տեղի ունեցած Թաւշեայ էեղափոխութիւնից յետոյ նշւում է Հայաստանի՝ միջազգային հարթակներում հեղինակութեան փոփոխութեան մասին։ Ի՞նչ էք Դուք արձանագրում։

- Այո, կայ այդպիսի բան։ Հակառակն ասելը սխալ կը լինի։ Եւրոպայում այսօր Հայաստանը դիտարկւում է որպէս աւելի ժողովրդավար։ Սա ասում եմ ոչ թէ որովհետեւ իշխանութեան փոփոխութիւն եղաւ, այլ որովհետեւ ժողովրդի խօսքը լսւեց։ Փաստը, որ ժողովուրդը դուրս եկաւ եւ դիմեց իշխանափոխութեան, եւ դա տեղի ունեցաւ առանց մէկ զոհի, դա ցոյց տւեց, որ եթէ հայ ժողովուրդը մի բան որոշեց, դա կարող է անել։ Դա Եւրոպայում շատ լաւ է ընկալւել, բայց այդ ամէնը պէտք է արդարացնել։ Յեղափոխութեան յաջորդ տարիները բոլոր երկրներում էլ դժւար է լինում։ Յոյս ունեմ, որ Հայաստանում աւելի արդիւնքի կը կարողանանք հասնել, քան լինում են այլ երկրներում»:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։