Հա

Ազգային

04/03/2020 - 11:00

«Դաշնակցութեան ծրագրում կայ փաստ ու այդ փաստի լուծման ճանապարհ». Վահրամ Բալայեան

ՀՅԴ Արցախի Կենտրոնական կոմիտէի անդամ, ԱՀ Ազգային ժողովի փոխնախագահ ու պատգամաւորի թեկնածու Վահրամ Բալայեանի հիմնաւորումը, թէ ինչու ժողովուրդը պէտք է վստահութեան քւէ տայ Դաշնակցութեանը։

Ինչու՝ վստահութեան քւէ տալ Դաշնակցութեանը

 

ՀՅԴ Արցախի Կենտրոնական կոմիտէի անդամ, ԱՀ Ազգային ժողովի փոխնախագահ ու պատգամաւորի թեկնածու Վահրամ Բալայեանի հիմնաւորումը, թէ ինչու ժողովուրդը պէտք է վստահութեան քւէ տայ Դաշնակցութեանը։

* * *

Դաշնակցութիւնն իրաւունք ունի՞ լինել Ազգային ժողովում եւ ստանա՞լ ժողովրդի վստահութեան քւէն։

Այո, միանշանակ։ Ինչո՞ւ ունի այդ վստահութիւնը, որովհետեւ ունի կենսագրութիւն։ Մի կուսակցութիւն, որը մի դարի ընթացքում երկու անգամ վերակերտեց պետականութիւն։ Մի կուսակցութիւն, որը գլխաւորեց ազգային ազատագրական պայքարը։ Մի կուսակցութիւն, որը ծնւեց ժողովրդի պատւէրով՝ ժողովրդին ազատագրելու համար։

Դաշնակցութիւնը չի ստեղծւել նրա համար, որպէսզի որեւէ մէկին պատգամաւոր դարձնի: Այս կուսակցութիւնը չի ծնւել նրա համար, որպէսզի որեւէ մէկին նախագահ դարձնի։ Այս կուսակցութիւնը ծնւել է ծառայելու հայ ժողովրդին, սպասարկելու հայ ժողովրդի շահերը իր ծնւած օրից սկսած։

Ուշադիր հետեւէք ու կը տեսնէք, որ այս կամ այն հարցում ժողովուրդը մեղադրում է հէնց Դաշնակցութեանը, որովհետեւ մեզանից սպասելիքները շատ են։ Իսկ որպէսզի սպասելիքներն իրականութիւն դառնան, պէտք է Դաշնակցութեանը տալ համապատասխան իրաւունքներ։ Իրաւունքները եւ պարտականութիւնները պէտք է համարժէք լինեն։ Չի կարող պատահել, որ մարդ ունենայ պատասխանատւութիւն, բայց չունենայ իրաւունք։ Այդ իսկ տեսանկիւնից հանրութիւնը պէտք է գիտակցի, գնահատի եւ որոշում կայացնի։

Որոշում կայացնի, որովհետեւ առաջիկայ տարիներին մենք նոր բնագծեր ունենք նւաճելու։ Իսկապէս բարդ ժամանակահատւած ենք ապրում։ Մենք ստեղծել ենք մեր պետականութիւնը. սա աննախադէպ հարստութիւն է, բազում սերունդների երազանք է, բայց այս պետականութիւնը պէտք է պահել՝ ոչ պատեհապաշտութեամբ, նիւթապաշտութեամբ, պաշտօնասիրութեամբ։ Այս պետականութիւնը պէտք է պահել երկիրը սիրելով, իր կողքինին սիրելով, հարեւանին սիրելով ու յարգելով։

Ես կարծում եմ, որ Դաշնակցութեան մէջ եղած մեր գործիչներն ունեն այդ որակները: Այդ որակներն ունեն, որովհետեւ կուսակցութիւնը մաղ է. ովքեր չեն դիմանում այդ մրցակցութեանը՝ դուրս են մղւում։ Դաշնակցական լինելը հեշտ բեռ չէ, եւ այն մարդկանց, որոնք այդ բեռն ուսած տանում են, պէտք է արժանաւոյնս վերաբերւել։

Մենք միասին իսկապէս երկար ճանապարհ ունենք անցնելու: Միասին կերտեցինք յաղթանակը, այսօր այդ յաղթանակը պէտք է կերտենք խաղաղ կեանքում, բայց դաւադիր թշնամին միշտ հետամուտ է, որպէսզի խլի մեր ձեռքից խաղաղութիւնն ու անկախութիւնը։

Դաշնակցութիւնն ահա այստեղ է, որ զինւոր է, կարող է պաշտպանել այդ խաղաղութիւնը, անվտանգութիւնը եւ անկախութիւնը, որովհետեւ ասելիք ունի աշխարհասփիւռ իր կառոյցներով։

Դաշնակցութեան նախընտրական ծրագիրը տալիս է բազում ու բազմաթիւ հարցերի պատասխաններ։ Այստեղ պոպուլիզմ չկայ։ Դաշնակցութեան ծրագրում կայ փաստ ու այդ փաստի լուծման ճանապարհ։ Մենք առաջարկում ենք այդ ճանապարհը, եւ այդ ճանապարհը մենք կարող ենք անցնել ժողովրդի օժանդակութեամբ։

 

Լուսինէ Թեւոսեան

«Ապառաժ»

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։