Հա

Ազգային

11/04/2020 - 14:50

«Ապառաժ»-ի խմբագրական. Ընտրութիւնների վերջնագծին

2020 թ. Արցախի համապետական ընտրութիւնները կայացան բացառիկ պայմաններում: Նախ, բովանդակային առումով այս ընտրութիւնները տարբերւում էին նախորդներից: Արցախի Սահմանադրութեան համաձայն՝ միաժամանակ տեղի ունեցան թէ՛ նախագահական եւ թէ՛ խորհրդարանական ընտրութիւններ: Ի դէպ, առաջին անգամ Ազգային ժողովը ձեւաւորւեց միայն համամասնական ընտրակարգով:

2020 թ. Արցախի համապետական ընտրութիւնները կայացան բացառիկ պայմաններում: Նախ, բովանդակային առումով այս ընտրութիւնները տարբերւում էին նախորդներից: Արցախի Սահմանադրութեան համաձայն՝ միաժամանակ տեղի ունեցան թէ՛ նախագահական եւ թէ՛ խորհրդարանական ընտրութիւններ: Ի դէպ, առաջին անգամ Ազգային ժողովը ձեւաւորւեց միայն համամասնական ընտրակարգով:

Միւս իւրայատկութիւնը թեկնածուների առատութիւնն էր. նախագահի 14 թեկնածուներ, 10 քաղաքական կուսակցութիւններ եւ երկու դաշինք: Եւ այս բոլորը՝ միայն 75.000 ակտիւ ընտրողների առկայութեան դէպքում: Կոպիտ հաշւարկով իւրաքանչիւր 5000 ընտրողի բաժին է հասնում մէկ կուսակցութիւն կամ դաշինք եւ մէկ նախագահի թեկնածու: Ընդունենք, ինչ-որ բան այն չէ: Այս բազմերանգ ու անբովանդակ համայնապատկերում ակնառու էր նաեւ քաղաքական գործիչների ու կուսակցութիւնների «հապճեպութիւնը»:

Ընտրութիւններից դեռ 1.5-2 տարի առաջ սկսած քարոզարշաւը եւ պետական ռեսուրսների «սեփականացման» միջոցով բարեգործութիւնները, աւելի ճիշտ՝ ակնկալիքով «լաւութիւնը», ի յայտ բերեց ընտրութիւնների նեխած կողմը: Իսկ արդէն իսկ ապականւած այս մթնոլորտը եկաւ աւելի թունաւորելու իրական հիւանդութիւնը՝ կորոնավիրուսը (թագավարակը): Մենք եւս միացանք աշխարհում տիրող մտավախութեան, տատամսկոտութեան եւ անորոշ հեռանկարի ալիքին:

Ընտրութիւնների բովանդակութեան եւ քաղաքական մթնոլորտի վերաբերեալ վերը նշւած երկու հանգամանքները կանխատեսելի էին ՀՅԴ-ի համար: Ժամանակին ՀՅ Դաշնակցութիւնը իր մտահոգութիւնն էր յայտնել եւ քայլեր ձեռնարկել դրանք կանխելու ուղղութեամբ: Խօսքը Սահմանադրութեան, Ընտրական օրէնսգրքի, միասնական օրակարգի ու համաձայնեցւած թեկնածուի մասին է:

Ինչեւէ, կայացան ընտրութիւնները, որոնք ժողովրդավարական ուղի որդեգրած համակարգի զարգացման առումով ինքնին առաջընթաց էին, իսկ բովանդակային առումով ապացուցւեց, որ դեռ շատ անելիքներ կան եւ իւրաքանչիւր սայթաքում նահանջ է նախկին նւաճումներից:

Այսպիսով, յաղթահարեցինք մեր պետականութեան զարգացման այս փուլը եւս: ԱՀ քաղաքացիներն իրենց մասնակցութեամբ եւ ընտրութեամբ պատասխանատու կեցւածք դրսեւորեցին՝ իրենց կամարտայայտութեամբ վերջակէտ դնելով լարւած անհանդուրժողականութեան մթնոլորտին: Բնական է, որ կարճ ժամանակում չենք կարող ամբողջութեամբ ամոքել հանրութեան մէջ առաջացած վէրքերը: Այնուամենայնիւ, այս փուլի աւարտն առիթ է եւ հնարաւորութիւն՝ ճշտելու իրական բացերն ու գնահատական տալու քաղաքական գործընթացներին, եւ վերարժեւորելու դրանք՝ միշտ նկատի ունենալով ազգային ու պետական շահը:

Վստահ ենք, որ բոլոր կողմերը՝ իշխանութիւն թէ ընդիմութիւն, ՀՅԴ-ի հետ քննարկումների եւ համագործակցութեան կարիքը կունենան: Ինչպէս միշտ մենք բաց ենք քննարկումների համար: Այնուամենայնիւ, միշտ պէտք է յիշել, որ Դաշնակցութեան համար առանցքայինը իր ուժերն ի սպաս դնելն է Արցախի ներքին եւ արտաքին հիմնախնդիրները լուծելու համար:

 

«Ապառաժ»

11 ապրիլի, 2020 թ.

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։