Հա

Ազգային

21/04/2020 - 14:40

«Ազատ օր»-ի հարցազրոյցը Հ.Յ.Դ. Բիւրոյի ներկայացուցիչ ընկ․ Յակոբ Տէր-Խաչատուրեանի հետ

Պսակաձեւ ժահրի պարտադրած համաշխարհային արգիլումներու լոյսին տակ, «Ազատ օր» ընկ. Յակոբ Տէր-Խաչատուրեանին հետ ունեցաւ հեռավար հարցազրոյց մը, որուն ընթացքին խօսակցութիւնը ընթացաւ Հայաստանը, Արցախը եւ հայաշխարհը յուզող օրակարգերուն շուրջ, մասնաւորաբար՝ լուսարձակի տակ առնուեցան ներհայաստանեան ու արցախեան զարգացումները եւ Հ.Յ.Դաշնակցութեան գործունէութիւնը։ Բնականաբար, մեր խօսակցութիւնը ընդգրկեց նաեւ իր Յունաստան այցելութեան արժեւորումը։ Ստորեւ, մեր ընթերցողներուն կը ներկայացնենք հարցազրոյցի ամբողջութիւնը:

Մարտի սկիզբը, Յունաստան այցելեց Հ.Յ.Դ. Բիւրոյի ներկայացուցիչ ընկ․ Յակոբ Տէր-Խաչատուրեան։

Օրին, անդրադարձած էինք իր ունեցած կարեւոր հանդիպումներուն Յունաստանի քաղաքական անձնաւորութիւններու հետ, որոնցմէ յատկանշական եղաւ ջերմ ընդունելութիւնը՝ Յունաստանի Հանրապետութեան օրուան նախագահ պ. Փրոքոփիս Փաւլոփուլոսին կողմէ։ Նաեւ, ան առիթը ունեցաւ Աթէնքի եւ Թեսաղոնիկէի մէջ հանդէս գալու գաղութային կառոյցներու ներկայացուցիչներուն առջեւ եւ սպառիչ կերպով ներկայացնելու Հ.Յ.Դաշնակցութեան տեսակէտները ազգային, համահայկական եւ հայրենի իրականութեան հետ աղերս ունեցող հարցերուն շուրջ։

Պսակաձեւ ժահրի պարտադրած համաշխարհային արգիլումներու լոյսին տակ, «Ազատ օր» ընկ. Յակոբ Տէր-Խաչատուրեանին հետ ունեցաւ հեռավար հարցազրոյց մը, որուն ընթացքին խօսակցութիւնը ընթացաւ Հայաստանը, Արցախը եւ հայաշխարհը յուզող օրակարգերուն շուրջ, մասնաւորաբար՝ լուսարձակի տակ առնուեցան ներհայաստանեան ու արցախեան զարգացումները եւ Հ.Յ.Դաշնակցութեան գործունէութիւնը։ Բնականաբար, մեր խօսակցութիւնը ընդգրկեց նաեւ իր Յունաստան այցելութեան արժեւորումը։ Ստորեւ, մեր ընթերցողներուն կը ներկայացնենք հարցազրոյցի ամբողջութիւնը:

 

- Ձեր Հայաստան վերջին այցելութեան ընթացքին, հանդիպում ունեցաք Հայաստանի նախագահին եւ վարչապետին հետ։ Կը խնդրենք աւելի մանրամասնել այդ մասին։

- Հայաստանի Հանրապետութեան նախագահին եւ վարչապետին հետ պարբերաբար հանդիպում կ՚ունենանք երբ Հայաստան գտնուիմ: Նախագահին հետ խօսակցութիւնը ընդգրկեց Հայ Դատի մեր գրասենեակներու եւ յանձնախումբերու վերջին խորհրդաժողովի արդիւնքները, 2020-ի համահայկական նախաձեռնութիւնները՝ ներառեալ Սեւրի դաշնագիրի 100-ամեակի նշումը, Հայաստանի եւ Արցախի քաղաքական իրավիճակը եւ ազգային օրակարգի հարցերը: Հ.Հ. վարչապետին հետ նաեւ քննարկեցինք համահայկական ու տարածաշրջանային հարցերը, ներառեալ Արցախի բանակցութիւններու ներկայ փուլը եւ Հայաստան-Վրաստան յարաբերութիւնները: Երկու հանդիպումներն ալ անցան փոխադարձ հասկացողութեան մթնոլորտի մէջ:

Մենք, անկախ իշխանութեան հետ մեր ունեցած ներքաղաքական տարաձայնութիւններէն, միշտ զգացած ենք անհրաժեշտութիւնը համահայկական ու Հայ Դատի աշխատանքներու շուրջ խորհրդակցելու հայրենի իշխանութեան բարձրագոյն ներկայացուցիչներուն հետ, տեղեկութիւններ փոխանակելու, փոխադարձ համագործակցութեան եզրեր գտնելու եւ աշխատանքը համադրելու առընչութեամբ:

 

- Փետրուարի վերջաւորութեան, Արցախի մէջ տեղի ունեցաւ Հայ Դատի աշխարհասփիւռ յանձնախումբերու եւ գրասենեակներու խորհրդաժողովը։ Օրին, մեր մամուլը անդրադարձաւ ժողովին մասին, սակայն այժմ կը խնդրենք ունենալ ձեր գնահատականը:

- Մենք, պարբերաբար կը գումարենք Հայ Դատի խորհրդաժողովներ, ուր ի մի կը բերենք մեր գրասենեակներն ու յանձնախումբերը: Որոշ տարիներ, այդ խորհրդաժողովները կը կատարենք տարածաշրջանային հիմքով, իսկ 2-3 տարին անգամ մըն ալ՝ կեդրոնական մակարդակով Հայաստանի ու Արցախի մէջ:

Վերջին տարիներուն, մեր մեծագոյն յաջողութիւնը այն է, որ գրասենեակներու ցանցը ընդարձակուած է համալրուած՝ յաւելեալ արհեստավարժ Հայ Դատի նուիրեալներով, որոնք պատնէշի վրայ են օրը 24 ժամ, շաբաթը 7 օր, տարին 365 օր։ Անոնք էապէս Հայ Դատով կ՚ապրին, կը գործեն, կ՚աշխատին որպէս կազմակերպ ու անխոնջ բանակ: Այլեւս, միայն կամաւոր աշխատանքով չենք բաւարարուիր, թէեւ այդ երբէք չ՚ենթադրեր անտեսումը այն հսկայ գործին, որ կը կատարեն մեր յանձնախումբերու կազմերու ու անոնց շուրջ համախմբուած կամաւորները, աւելի քան երեսուն երկիրներու մէջ:

Այս վերջին խորհրդաժողովի նիստերը տեղի ունեցան թէ՛ Երեւանի եւ թէ՛ Ստեփանակերտի մէջ։

Օրակարգը կ՚ընդգրկէր Հայ Դատի մեր նորօրեայ սահմանումին չորս հիմնական գլուխները։

Առաջինը՝ մեր իրազեկման -լոպպիինկի- աշխատանքներն են մեր երկու պետութեանց ի նպաստ:

Հայաստանի պարագային՝ պետութեան հզօրացման օրակարգն է, անոր միջազգային հեղինակութեան ամրապնդումը եւ տարբեր տիպի օժանդակութիւններ ապահովելը: Արցախի պարագային՝ օժանդակութիւն ապահովելու կողքին, անոր ինքնորոշման իրաւունքի շեշտաւորումն է եւ, ուր որ կարելի է, Արցախի անկախութեան ճանաչման հետապնդումը: Օրինակ մը նշեմ օժանդակութեան հարցով. Ամերիկայի Միացեալ Նահանգներու մերօրեայ մարտահրաւէրներն են վերահաստատելը Արցախին ուղղակի օժանդակութեան, որ Թրամփի վարչակարգը կը փորձէ ջնջել եւ Հայաստանի յատկացուելիք Ամերիկայի նպաստը դէպի պսակաձեւ ժահրի դէմ պայքարելու ուղելը:

Երկրորդ հիմնական գլուխը Ցեղասպանութեան ճանաչման, կանխարգիլման եւ դատապարտման աշխատանքներն են, որոնց վրայ աւելցած է մասնագիտօրէն մեր պահանջատիրութեան օրինական երեսներու ուսումնասիրելու խնդիրը: Այս վերջին նպատակին համար ստեղծեցինք «Armenian Legal Center for Justice and Human Rights» (Արդարութեան եւ մարդկային իրաւանց հայկական իրաւական կեդրոն) կազմակերպութիւնը, որ Ուաշինկթընի մէջ գրանցուած ըլլալով հանդերձ, ունի միջազգային տնօրէն խորհուրդ, որ կը բաղկանայ տարբեր երկիրներէ ընդգրկուած մասնագէտներէ եւ ունի երկու հիմնական նպատակներ.-

Առաջին՝ Ցեղասպանութեան հետեւանքներու վերացման համար օրինական ճանապարհներու որոնումը եւ, երկրորդ՝ Արցախի հարցով օրինական ո՞ր ճանապարհի ճշդումը՝ հասնելու համար մեր հիմնական նպատակին:

Երրորդը՝ առհասարակ հայապատկան հողերու վրայ կամ ընդհանրապէս Սփիւռքի մէջ հայութեան իրաւունքներու պաշտպանութեան խնդիրն է: Այս բաժինը կը պարփակէ բնականաբար Ջաւախքի մեր քոյրերուն եւ եղբայներուն մարդկային անհատական եւ հաւաքական իրաւունքներու խնդիրները, որպէսզի անոնք կառչած մնան իրենց հողին: Այս գլխուն տակ կ՚իյնայ նաեւ թագուն հայերու հարցը Արեւմտեան Հայաստանի մէջ, ինչպէս նաեւ այլ փոքրամասնութիւններու հետ յարաբերութիւնը, որպէսզի մեր հողերուն վրայ հայկական ներկայութիւնը խրախուսուի եւ հայակերտումը ամրապնդուի: Հոս կը զետեղուին նաեւ Սփիւռքահայութեան իրաւունքները ըստ միջազգային դաշնագիրներու կամ առանձին երկիրներու օրէնքներու սահմանումներուն. յատուկ ուշադրութեան առարկայ են Միջին Արեւելքի, Թիֆլիսի եւ Պոլսոյ հայութեան պարագաները: Իսկ կարգ մը շրջաններու մէջ կայ հայութեան վերադարձի երեւոյթը, հայակերտման խնդիրը, որ կը քաջալերենք ամենուրէք։

Այսօր, ուրախութեամբ ականատեսն ենք նոր սերունդներու հայրենասէր ներկայացուցիչներու, որոնց ծնողները հեռացած էին իրենց արմատներէն եւ հիմա իրենք սկսած են վերադառնալ հայութեան: 

Չորրորդ գլուխը՝ երիտասարդութեան ներգրաւման եւ քաղաքականացման խնդիրն է. որպէսզի անոնք տեղ հասնին այլազան երկիրներու մէջ՝ բարձր մակարդակի պաշտօններ ստանձնելով քաղաքական տնտեսական, ֆինանսական, լրատուական կառոյցներու եւ միջազգային կազմակերպութիւններու կեդրոններու մէջ:

 

- Անցնինք Հայաստանի այսօրուան քաղաքական իրավիճակին. Սահմանադրութեան փոփոխութեան հանրաքուէ, պսակաձեւ ժահրի դէմ պայքար, քաղաքական շիկացած մթնոլորտ։ Ո՞րն Է Հ.Յ.Դաշնակցութեան կեցուածքը եւ դիրքորոշումը։

- Ճիշդ է, որ շիկացած է մթնոլորտը Հայաստանի մէջ: Դժբախտաբար իշխանութիւնը տակաւին կը հետապնդէ բաժանարար գիծեր ստեղծելու քաղաքականութիւն: Տակաւին կը յամենայ թշնամանքի ու ատելութեան մթնոլորտ, որ առողջ երեւոյթ չէ եւ կը քանդէ համերաշխութեան եւ համախմբուածութեան որեւէ յաւանականութիւն: Սահմադրական հանրաքուէն յետաձգուած է պսակաձեւ ժահրի առթած վտանքին պատճառաւ:

Հ.Յ.Դաշնակցութեան Հայաստանի կազմակերպութիւնը յստակօրէն բացատրած է թէ ինչու հակասահմանադրական է այս հանրաքուէի ընթացքը եւ էութիւնը՝ սահմանադրական դատարանի քանի մը դատաւորներէն ձերբազատուելու համար։ Առաւել, ունինք լուրջ մտահոգութիւն, որ օրէնսդիր եւ գործադիր բոլոր լծակները ունենալով իր ձեռքը, իշխանութիւնը հիմա նաեւ կ՚ուզէ իր ամբողջական հակակշիռին տակ առնել դատական համակարգը, որ մեզի համար անընդունելի է. ժողովրդավարական երկիրներու մէջ դատական համակարգը ունի իր անկախութիւնը եւ չի գործեր օրէնսդիր ու գործադիր իշխանութեան տակ:

Մենք կողմնակից եղած ենք - եւ վարչապետին հետ հանդիպումներուն ալ փոխանցած ենք - դատաիրաւական համակարգին մէջ բարեփոխումներ մտցնելու անհրաժեշտութեան, բայց անոնք պէտք է ըլլան հանգրուանային, համախոհական եւ սահմանադրութեան համապատասխան: Մենք կը հաւատանք, որ դժբախտաբար, այս հանրաքուէն անգամ մը եւս պիտի բեւերացնէ մեր ժողովուրդը եւ սեւերու ու սպիտակներու բաժանարար գիծերը պիտի յայտնաբերէ: Սահմանադրական փոփոխութիւններու խորհրդարանական գործընթացը արդէն սկսած է եւ իշխանութենէն կ՚ակնկալենք որ ստեղծէ համերաշխ մթնոլորտ, փոփոխութիւններու թղթածրարը մանրամասնօրէն եւ համապարփակ կերպով քննարկելու համար: Մենք անցեալին անդրադարձած էինք այս կապակցութեամբ մեր առաջնահերթութիւններուն՝ այսինքն երկքաղաքացիներու նկատմամբ բոլոր տեսակի սահմանադրական արգելքներու վերացման, նախագահի իրաւասութիւններու ընդարձակման կամ աւելի ճիշդ վարչապետի եւ նախագահի լիազօրութիւնները հաւասարկշռելու, խորհրդարանական համակարգի ամրապնդման եւ արդարադատութեան ճիւղի առաւել անկախացման առընչութեամբ: Առաւել՝ ընտրական օրէնսգրքի մէջ անհրաժեշտ փոփոխութիւններ մտցնելու վերաբերեալ:

Բնականաբար, այս հարցերը հիմա սառեցուած են պսակաձեւ ժահրի դէմ պայքարելու առաջնահերթութենէն թելադրուած:

Հ.Յ.Դ. Բիւրոն կոչով դիմեց աշխարհասփիւռ հայութեան համախմբուելու պետութեան շուրջ եւ միասնական ուժերով դիմագրաւելու համար այս մարտահրաւէրը: Մենք կառավարութեան ներկայացուցինք առաջարկներ այս ուղղութեամբ եւ, Հ.Օ.Մ.-ի ու Հայ Դատի մեր յանձնախումբերու գործակցութեամբ, անմիջապէս ի գործ դրինք օժանդակութեան ծրագիրներ, որոնց մէկ մասը տակաւին ընթացքի մէջ է:

 

- Վերջերս Հայաստանի մէջ Ամենայն Հայոց Կաթողիկոսը հանդէս եկաւ Հ.Հ. երկրորդ նախագահ Ռ. Քոչարեանի խափանման միջոցի փոփոխութեան առաջարկով: Անոր յաջորդած հրապարակային թեր ու դէմ կարծիքները ալեկոծեցին Հայաստանի մամուլն ու ընկերային ցանցերը: Ի՞նչ ունիք ըսելիք այս ուղղութեամբ:

- Ամենայն Հայոց Կաթողիկոսի հայրապետական յորդորին մէջ որեւէ արտառոց բան չկայ. Վեհափառը պարզապէս կը նշէր որ, մեկնած Հ.Հ. երկրորդ նախագահի առողջական վիճակի ու պսակաձեւ ժահրի առթած մտահոգութենէն, բոլոր կանխարգելիչ միջոցներուն պէտք է դիմել ապահովելու համար նախագահի առողջութիւնն ու անվտանգութիւնը: Հոն, որեւէ անդրադարձ չկար դատավարութեան էութեան ու քրէական մեղադրանքներուն մասին: Արդ՝ իսկապէս անհասկնալի է այն ծաւալած աղմուկը եւ մանաւանդ շղթայազերծուած պայքարը ոչ միայն Վեհափառի անձին, այլ Հայաստանեայց Առաքելական Եկեղեցւոյ հանդէպ:

Անգամ մը եւս կը շեշտենք, որ Հայաստանեայց Առաքելական Եկեղեցին ազգային էական կառոյցներէն է, որու կարեւորութիւնը նշուած է Հ.Հ. Սահմանադրութեան մէջ եւ որու դերը լոկ կրօնական սահմաններէն շատ անդին անցած է մեր պետութեան կորուստի խաւարի դարերուն: Եկեղեցւոյ դէմ ծրագրաւորուած այս յարձակումներն ու անոր դերը դիտումնաւոր նսեմացնելը հարուածներ են ուղղուած ողջ հայութեան եւ ըստ այմն լրիւ դատապարտելի:

Իսկ, ինչ կը վերաբերի Հ.Հ. երկրորդ նախագահին, ապա կալանքը որպէս խափանման միջոց ընտրելու եւ ձգձգուող դատավարութեան հետ կապուած մեր յստակ դիրքորոշումն ու մտահոգութիւնները վաղուց յայտնած ենք։ Աշխարհը պատուհասած այս համավարակի պայմաններուն մէջ, այսօր առաւել եւս անընդունելի կը նկատենք առողջական խնդիրներ ունեցող եւ վտանգուած տարիքային խումբի մէջ գտնուող Հ.Հ. երկրորդ նախագահին նկատմամբ ազատազրկման ծայրահեղ միջոցներ կիրառելը։ Արդարադատութեան իրականացումը կարելի չէ ըլլալ ընտրովի եւ պետք չէ հակասէ իրաւունքի գերակայութեան սկզբունքներուն:

 

- Այժմ, խօսինք Արցախի զոյգ ընտրութիւններուն եւ բնականաբար՝ Հ.Յ.Դաշնակցութեան մասնակցութեան մասին։

- Արցախի ընտրութիւններու առաջին փուլը յատկանշուեցաւ աշխուժ մասնակցութեամբ եւ բարդ ու խճողուած խճանկարով: Առաջին անգամն է, որքան որ կը յիշեմ, որ ունեցանք 14 նախագահական թեկնածուներ եւ 12 կուսակցութիւններ ու դաշինքներ: Ամենայնդէպս, մեր յորդորն էր, որ ընտրութիւնները ընթանան արդար, հաւասար ու թափանցիկ պայմաններու տակ։ Թէեւ, ի սկզբանէ մտահոգ էինք, որ արդէն աւելի քան տարիէ մը ի վեր, կարգ մը ուժեր ձեռնարկած էին անպաշտօն ընտրարշաւի, ամէն տեսակի լծակներու օգտագործումով: Անհրաժեշտ էր նաեւ ապահովել պատերազմական վիճակի մէջ գտնուող Արցախի կայունութիւնը եւ ցոյց տալ աշխարհին, որ Արցախը կայացած պետութիւն է եւ ժողովրդավարութեան բարձր մակարդակով կրնայ ընտրել իր քաղաքական ներկայացուցիչները:

Մենք ներկայացանք մեր նախագահական թեկնածուով, յանձին՝ ընկ. Դաւիթ Իշխանեանի, եւ Ա.Ժ.-ի համար որակաւոր ցանկով՝ կազմուած ընկերներ-ընկերուհիներէ ու համակիրներէ: Մեր մրցակիցներուն իսկ հաստատումով, ունեցանք ամենէն որակաւոր եւ իրապաշտ ընտրական ծրագիրը:

Առաջին փուլի ընթացքին ի յայտ եկան որոշ խախտումներ եւ յստակացաւ, որ կարգ մը ուժեր, մանաւանդ մեծագոյն տոկոս ստացած դաշինքը, պետական լծակներու ամբողջական օգտագործումով եւ շռայլ խոստումներով են առաւելագոյն քուէներ ապահոված: Դաշնակցութեան քուէները նախկին ընտրութեան համեմատ անկում կրեցին ու Հ.Յ.Դ.-ն նոր խորհրդարանին մէջ ունեցաւ 3 աթոռ:

Երկրորդ փուլի արդիւնքը արդէն կանխորոշուած էր նախագահական թեկնածուներու քուէներու մեծ տարբերութեան եւ երկրորդ բարձրագոյն քուէ հաւաքած թեկնածուին այդ փուլին չմասնակցելու կոչին հետեւանքով:

Ինչպէս միշտ, եւ անկախաբար ընտրական արդիւնքէն, Դաշնակցութիւնը անպայման պիտի ունենայ իր կարեւոր դերը Արցախի քաղաքական կեանքին մէջ եւ պիտի շարունակէ պաշտպանել Արցախի իրաւունքները աշխարհով մէկ: Անշուշտ, մեր նպատակը Արցախի անկախութեան իրաւական ամրագրումն է, որպէս միջանկեալ լուծում, եւ վերջ ի վերջոյ անոր միացումը Հայաստանի:

 

- 2020 թուականը կը յատկանշուի նշանակալից պատմական իրադարձութիւններու ոգեկոչումներով։ Կրնա՞ք աւելի մանրամասնել Հ.Յ.Դաշնակցութեան ծրագրած նախաձեռնութիւնները։
- 2019-ն մեզի համար բաւական բեղմնաւոր տարի եղաւ, որովհետեւ քանի մը մեծ նախաձեռնութիւններ ունեցանք:

Բիւրոյի նոր կազմի ընտրութենէն անմիջապէս ետք, տարին սկսանք Արցախի համար ռազմական դաշինքի կապակցութեամբ հայկական ուժերու համախմբում ստեղծելով եւ համաժողով գումարելով։ Նոյն ուղղութեամբ եւ այս անգամ աւելի քան 150 օտար քաղաքական դէմքերու, ակադեմիկոսներու եւ լրագրողներու մասնակցութեամբ գոմարեցինք Արցախի Բարեկամներու խորհրդաժողովը՝ Արցախի արտաքին գործոց նախարարութեան հետ:

Մեր ոչ-հայ բարեկամները կարողացանք հաւաքել Արցախի մէջ, հակառակ Ատրպէյճանի սպառնալիքներուն, որ անոնց անունները կ՚արձանագրուին իր «սեւ ցանկ»-ին վրայ: Այս բոլոր անձնաւորութիւնները՝ Ամերիկայի Միացեալ Նահանգներէն, Գանատայէն, Եւրոպայի այլազան երկիրներէն եւ Միջին Արեւելքէն, շեշտեցին Արցախի ժողովուրդի ինքնորոշման իրաւունքը եւ սա իսկապէս մեծ յաջողութիւն էր:

Հայաստանի պարագային, մեր կազմակերպութիւնը Ապրիլին գումարեց իր Գերագոյն ժողովը եւ ընտրեց նոր մարմին: Կազմակերպեցինք զանազան շրջանային հանդիպումներ, խորհրդաժողովներ՝ մեր քաղաքական, տնտեսական եւ ընկերային ուղղութիւնները ճշդելու համար: Հանդիպումներ ունեցանք Հ.Հ. իշխանութեան այլազան օղակներուն հետ: Ծրագրուեցան նաեւ Ջաւախքի մեր հայրենակիցներուն իրաւունքներու հետապնդման եւ առհասարակ օժանդակութեան նոր ուղիներ:

Իսկ, Սփիւռքի մէջ նոր աւիշ, նոր երանդ բերելու նպատակով սկիզբը դրինք նոր գործընթացի. յատուկ ուշադրութիւն ընծայեցինք Սուրիոյ պատերազմին ու Լիբանանի տնտեսական տագնապին հետեւանքով ստեղծուած իրավիճակին ու մեր ընելիքներուն: Եւ անդրադարձանք, որ մեր ժողովուրդը մեծապէս նեցուկ կանգնեցաւ մեզի՝ Նոյեմբերին ձեռնարկուած Հայ Դատի աշխատանքներու Պրիւքսէլի հանգանակութեան, որ ինքնին գօտեպնդիչ երեւոյթ էր:

Եւ 2020 թուականը սկսանք մեծ եռանդով ու ծրագիրներով:

2020-ի փետրուարին, մենք ունեցանք Հայ Դատի խորհրդաժողովը, որ շարունակութիւնն էր 2019-ի Արցախի համար կայացած երկու նախաձեռնութիւններուն: Նոյն օրերուն, Հայաստանի Արտաքին գործերու նախարարութեան հետ ունեցանք համադրական ժողով:

Մարտին, պսակաձեւ ժահրի համաճարակը խանգարեց մեր գարնանային եւ ամառնային ծրագիրները. այսպիսով՝ Ապրիլին ծրագրուած Ցեղասպանութեան ցոյցերն ու քայլարշաւները, մեր ուղեկից միութիւններու եւ յարակից կառոյցներու հետ ժողովը Հայաստանի մէջ, Մայիսին Հ.Յ.Դաշնակցութեան հիմնադիրներէն՝ Քրիստափոր Միքայէլեանի մահուան 115-ամեակի նշումը Պուլկարիոյ մէջ, Եւրոպայի երիտասարդութեան համագումարը, Պատանեկան միութիւններու խորհրդաժողովը Լիբանանի մէջ, Սփիւռքի հարցերու համաժողովը եւ Հայաստանի ու Արցախի մէջ կայանալիք ամառնային բանակումները ջնջուեցան կամ յետաձգուեցան:

Կը յուսանք, որ աշնան պիտի կարողանանք յատուկ կերպով նշել Սեւրի Դաշնագիրի 100-ամեակը եւ այդ իրագործել Սեպտեմբերին Սեւրի մէջ, իսկ նախագահ Ուիլսընի իրաւարար վճիռի 100-ամեակը Նոյեմբերին՝ Ուաշինկթընի մէջ:

Իսկ այս տարի, բոլոր շրջանները պիտի տօնեն Հ.Յ.Դ. հիմնադրութեան 130-ամեակը, բայց գլխաւոր ձեռնարկը տեղի պիտի ունենայ Երեւանի մէջ՝ Նոյեմբերի սկիզբը։ Երեւանի մէջ, միաժամանակ պիտի ունենանք մեր ներկայացուցիչներու ժողովը, որ կը գումարենք տարին անգամ մը:

 

- Յունաստան ձեր մարտի այցելութեան ընթացքին ունեցաք շարք մը քաղաքական եւ ներգաղութային հանդիպումներ։ Ինչպէ՞ս կը գնահատէք այդ տեսակցութիւնները։

- Մեծապէս կը գնահատեմ Յունաստանի մեր պատասխանատու ընկերներու եւ համակիրներու ծրագրային աշխատանքը, որ տարած էին ժամանումէս առաջ: Թէ՛ ներքին կազմակերպական իմաստով, թէ՛ քաղաքական իմաստով նախաձեռնութիւնները իսկապէս տպաւորիչ էին եւ կարճ՝ չորս օրերու ընթացքին, բծախնդրօրէն իրագործուեցան: Տեղի ունեցան բարձր մակարդակի քաղաքական յարաբերութիւններ, որոնց արդէն անդրադարձած էք «Ազատ օր»-ին մէջ։

Ուրախ եմ, որ կարողացայ հանդիպումներ ունենալ Առաջնորդին, ազգային իշխանութեան, համայնքի ներկայացուցիչներուն եւ ուղեկից կառոյցներուն, կուսակցական շարքերուն եւ երիտասարդութեան հետ։ Ինծի համար գօտեպնդիչ էր տեսնելը, որ յունահայութիւնը կը շարունակէ մնալ պատնէշի վրայ, երիտասարդութիւնը գործունեայ է, իսկ կուսակցական, ազգային ու միութենական ղեկավարութիւնը աշխուժ է ու ամբողջովին նուիրուած՝ իր ժողովուրդին, հայրենիքին ու դատին:

Վարձքերնիդ կատար: 

«Ազատ օր»

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։