Հա

Ազգային

24/04/2020 - 09:00

Այդ տղաքը՝ արդարութեան մարտիկները, քանդեցին լռութեան պատը

Այսօր, յախուռն ոգիով եւ աներեր վճռականութեամբ հայը կը գործէ պահանջատիրութեամբ։ Պահանջատիրութիւն՝ ի խնդիր հատուցման ու իրաւազրկումի վերացման։ Պահանջատիրութիւն՝ ի սպաս հայրենիքի ամբողջացման ու հայութեան հայրենացման։

ՍԵԴՕ ՊՈՅԱՃԵԱՆ

 

Այսօր, յախուռն ոգիով եւ աներեր վճռականութեամբ հայը կը գործէ պահանջատիրութեամբ։ Պահանջատիրութիւն՝ ի խնդիր հատուցման ու իրաւազրկումի վերացման։ Պահանջատիրութիւն՝ ի սպաս հայրենիքի ամբողջացման ու հայութեան հայրենացման։

Բայց կար ժամանակ երբ այդպէս չէր հայը։ Կը յիշեր իր զոհերն ու իրաւազրկումը, սակայն լուռ էր աշխարհը։ Հայը վճռեց ցնցել աշխարհը, որպէսզի խոցուի անոր խուլութիւնը։

Տասնամեակներ շարունակ մեծ, միջակ եւ փոքր պետութիւններ փորձեցին թաղել իրաւազրկուածի մեր հաւաքական յիշողութիւնը եւ պարտադրեցին մեզի հաշտուիլ կատարուած իրողութեան հետ։

Անոնք լուռ էին եւ լռութիւն պահեցին մեր ժողովուրդի դէմ կատարուած ցեղասպանութեան ու մեր հայրենի հողերու մեծ մասի բռնագրաւման անարդար փաստին առջեւ։ Ծանր լռութեան հաստ պատ մը բարձրացուցին մեր թուղթէ աղերսներուն դիմաց։

Մեզի պարտադրեցին որպէսզի քանդենք այդ լռութեան պատը՝ իրենց հասկցած լեզուով։ Մեր պահանջատէր երիտասարդութեան վիճակուեցաւ լռութեան այդ պատի քանդումը ուժական պայքարով։

Այդ երիտասարդները արդարութեան մարտիկներն էին, Լիզպոնի հինգ տղաքն էին...։ Իրենց առաքելութիւնն էր ճեղքել մեր պահանջատիրութիւնը արգելակող լռութեան պատեանը։ Իրենց յանձնուած էր պետութիւններու հանգիստը խանգարելու եւ ստատուս քուոն խախտելու պարտականութիւնը։ Իրենց վստահուած էր Հայ Դատի թղթածրարը վերաբանալու դժուարին գործը։ Եւ անոնք կատարեցին իրենց յանձնառութիւնը անշեղօրէն ու գիտակից կերպով։ Կատարեցին հաւատքով, նոյնիսկ իրենց կեանքի զոհաբերութեամբ, որպէսզի իրաւազրկման դէմ հայուն յանդգնութիւնը շարունակուի եւ ընդարձակուի։

Այդ տղաքը՝ արդարութեան մարտիկները, հարթեցին ճամբան մեր պահանջատիրութեան գործին։

Այդ տղաքը՝ արդարութեան մարտիկները, քանդեցին լռութեան պատը...

Յարակից լուրեր

  • Ամերիկեան նաւազները (marines) Արարատեան դաշտ չմտան
    Ամերիկեան նաւազները (marines) Արարատեան դաշտ չմտան

    Հայաստանի թէ Սփիւռքի տարածքին մեր ազգային կեանքի մէջ ախտագին ու միաժամանակ վտանգաւոր իրականութիւն է արեւելումի (օրիէնթացիայի) խանութպաններուն երեւոյթը։ Ըստ իրենց շրջանակի թիւին, մարդիկ խանութ կը բանան կամ կրպակ կը հաստատեն՝ ծախելու այս կամ այն օտար երկրի ենթադրեալ օգուտն ու հովանաւորութիւնը՝ հայութեան եւ Հայաստանին համար։

  • Բթամիտներուն վերադարձը
    Բթամիտներուն վերադարձը

    Պոլշեւիկներու ժամանակ անոնք գովերգեցին պոլշեւիզմը Դաշնակցութիւնը հալածելով։ Ապա դարձան պոլշեւիկներուն դէմ Դաշնակցութիւնը մեղադրելով։

  • Մակունցը կը հետեւի Թուրքիոյ դեսպանի օրինակին՝ ընդդէմ հայ երիտասարդներուն
    Մակունցը կը հետեւի Թուրքիոյ դեսպանի օրինակին՝ ընդդէմ հայ երիտասարդներուն

    Երէկ Ուաշինկթընի ՀՀ դեսպանատան մէջ ՀՀ դեսպան Լիլիթ Մակունցը «գունագեղ» ընդունելութիւն մը կազմակերպած էր՝ նշելու համար ՀՀ անկախութեան 30-ամեակը։

  • Մենք չենք ինչ որ էինք
    Մենք չենք ինչ որ էինք

    Մենք կ՚ըսենք, թէ մենք ե՛նք ինչ որ էինք, բայց մենք չենք ինչ որ էինք։

    Կը ներկայացնենք մենք մեզ ինչ որ էինք, բայց մենք շուքն իսկ չենք ինչ որ էինք։

  • Դուք չէիք թոյլ տար որ հոս հասնի հայրենիքը
    Դուք չէիք թոյլ տար որ հոս հասնի հայրենիքը

    Մեր մեծ ընկերներ, Անկախութեան Օրն է այսօր։ Կ՚ուզենք ձեզի ըսել «Անկախութեան Օրը Շնորհաւոր»։

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։