Հա

Ազգային

25/07/2020 - 09:55

Խանասորի աւանդը

Յուլիսի 25-ն, կը յիշենք եւ կը տօնենք թշնամին անվրէպ հարուածող մեր ֆետայիներու յաղթանակներէն Խանասորի արշաւանքը։

ՍԵԴՕ ՊՈՅԱՃԵԱՆ

 

Յուլիսի 25-ն, կը յիշենք եւ կը տօնենք թշնամին անվրէպ հարուածող մեր ֆետայիներու յաղթանակներէն Խանասորի արշաւանքը։

1896-ին, Սուլթան Ապտիւլ Համիտի հրամանով, Քրտական մազրիկ ցեղախումբը յարձակեցաւ ու ջարդեց անզէն հայ ֆետայիներու խումբ մը, որ ուղղուած էր դէպի Պարսկաստան։ Հայ Յեղափոխական Դաշնակցութեան պատժական պատասխանը չուշացաւ։

Տարի մը ետ։ 1897-ի յուլիսի 25-ին, Դաշնակցութեան զօրախումբէն 253 ֆետայիներ, Նիկոլ Դումանի զինուորական ծրագրումով, հրամանատարութեամբ Վարդանի եւ Իշխանի (Յովսէփ Արղութեան), յարձակեցան ու բնաջինջ ըրին մազրիկ ցեղախումբը՝ խնայելով միայն կանանց եւ երեխաներուն Այդ օրը, հայ ֆետայիներու պատժական «կարկուտը տեղաց Խանասորի» դաշտին վրայ։

Կը յիշենք եւ կը տօնենք այդ նուիրական օրը։ Կը խոնարհինք ու վառ կը պահենք յիշատակը Խանասորի կռիւին ինկած մեր 25 ֆետայիներուն, որոնց շարքին էր Ռոստոմի եղբայրը Կարօն (Արիստակէս Զօրեանը)՝ Ագուլիսցի քաջ պատանին։ Անոնք՝ ինկած բայց աննման ֆետայիները, լուսագծեցին մարտական հայուն աւանդը, որ պէտք է հարուածել հայութեան սպառնացող որեւէ օտար ուժի։ Այդ աւանդը փոխանցուեցաւ սերունդէ սերունդ, մինչեւ Սարդարապատ, Նեմեսիս, Արդարութեան մարտիկներ, Արցախ, Թալիշ եւ Տաւուշ։ Այդ աւանդին հաւատարիմ մնացին ու կը մնան բոլոր սերունդները, միշտ առաջնորդուելով Ագուլիսցի քաջ պատանիի օրինակով՝

«Սուրս առնեմ ելլեմ յառաջ,

Թուրքեր ջարդեմ ես ձախ ու աջ,

Ես ալ հայ եմ պարտաճանաչ,

Ազգիս համար մեռնիմ ես քաջ»:

Խորաթափանցել է պէտք Խանասորի արշաւանքի իմաստին եւ աւանդին։ Այս արշաւանքը Հայ Յեղափոխական Դաշնակցութեան մէկ սոսկ պատժական սխրագործութիւնը չէր։ Խանասորի արշաւանքը հայ ֆետայիին ու հայ ազատամարտիկին խոստումն էր պաշտպանել ժողովուրդն ու երկիրը, հարուածել մեզի դէմ ուղղուած որեւէ սպառնացող քայլ ու տրամադրութիւն։ Որեւէ ուժ, որ կը սպառնայ եւ վտանգէ մեր հայրենիքը, մեր ժողովուրդը ու մեր դատը, այդ ուժը կը ստանայ, պի՛տի ստանայ հայուն պատասխանը։

Այս աւանդը նոյնն էր Ապրիլեան պատերազմին, նոյնն էր այս Յուլիսի բախումներուն։ Աւանդը պիտի շարունակհ մնալ նո՛յնը մեր ազգը վտանգող բոլոր ուժերուն դէմ։

Սքանչելի Պարոյր Սեւակ կը պատգամէր.- «Սերունդներ դուք ձեզ ճանաչէ՛ք Սարդարապատից»: Սակայն Սարդարապատի հերոսները իրենք զիրենք ճանաչեցին Խանասորի արշաւանքով։

Թէհլիրեանները, Շիրակեանները, Երկանեանները, իրենք զրենք ճանաչեցին Խանասորի արշաւանքով։

Արդարութեան մարտիկները եւ Լիզպոնի հինգ հերոսները իրենք զրենց ճանաչեցին Խանասորի արշաւանքով, եւ անոր աւանդով մղեցին Հայ Դատի պահանջատիրական պայքարը։

Արցախի ազատամարտիկները եւ հայութեան պաշտպանական ուժերը՝ Շահումեանէն մինչեւ Շուշի, Թալիշէն մինչեւ Տաւուշ, իրենք իրենց ճանաչեցին ու կը ճանաչեն Խանասորի արշաւանքով՝ միշտ հետեւելով անոր աւանդին։

Խանասորի արշաւանքը Դաշնակցական ֆետայիի,  հայ մարտիկի, ազատամարտիկի եւ բանակայինի անմեղութեան խորհրդանիշն է։ Մեր ժողովուրդը չի կրնար թոյլատրել, որպէսզի անոնց անմեղութիւնը խաթարուի ու խորթացուի։

Այդ անխաթար անմեղութիւնը անոնց  պայքարն է, գործն է, նուիրումն է՝ միայն ու միայն ի սպաս եւ ի պաշտպանութիւն Հայաստանին, հայութեան եւ Հայ Դատին։ Եւ միշտ ուղղուած՝ մեր հաւաքական լինելութեան սպառնացող որեւէ ուժի դէմ։

Խաթարել այդ անմեղութիւնը կը նշանակէ մեղանչել ընդդէմ Քրիստափորին, Զաւարեանին, Ռոստոմին, Նիկոլ Դումանին, Արամին, Դրոյին, Նժդեհին, Արդարութեան մարտիկներուն, Լիզպոնի հինգ ընկերներուն, Արթուր Մկրտչեանին, Շահէն Մեղրեանին, Արցախի ազատամարտիկին, նաեւ ընդդէմ Տաւուշի մեր հինգ նահատակներուն...։

Խանասորի աւանդը մեր բոլորինն է, եւ պիտի մնայ մեր բոլորինը։

Յուլիս 24, 2020

Լոս Անճելըս

Յարակից լուրեր

  • Նիկոլ Փաշինեան իրաւունք չունի տարածքային զիջումի որեւէ փաստաթուղթ ստորագրելու
    Նիկոլ Փաշինեան իրաւունք չունի տարածքային զիջումի որեւէ փաստաթուղթ ստորագրելու

    Ակնարկելով համացանցի վրայ բացայայտուած «փաստաթուղթ»-ին, Մայիս 20-ի կառավարութեան նիստի բացումին «վարչապետի պաշտօնակատար» Նիկոլ Փաշինեան յայտարարեց, «Այո՛, ես այդ թուղթը ստորագրելու եմ»։ Այս «թուղթի» ամբողջական բովանդակութիւնը ցարդ չէ հրապարակուած, կը մնայ գաղտնի։ Համացանցով հրապարակուած «փաստաթուղթը» որոշ պատկերացում մը կու տայ անոր էութեան մասին, ուր ի միջի այլ պայմաններու, Հայաստանի Հանրապետութիւնը կը պարտաւորուի Ատրպէյճանին յանձնել նոր հողաշերտեր եւ կատարել համապատասխան սահմանագծումներ։

  • Դդում մը եւս
    Դդում մը եւս

    Ազգային Ժողովը Հայաստանի բարձրագոյն օրէնսդիր մարմինն է։ Անոր գլխաւորագոյն պարտականութիւնն է մշակել եւ ընդունիլ օրէնքներ՝ ի սպաս հայրենիքին եւ ժողովուրդին։ Անոր անդամները ժողովուրդին կողմէ ընտրուած պատգամաւորներն են, որոնք իրենց օրէնսդրական պարտականութիւնը կատարելու համար առնուազն պէտք է իւրացուցած ըլլան երկրի հիմնական օրէնքները, այսինքն՝ ՀՀ Սահմանադրութեան բոլոր տրամադրութիւնները։

  • Լեւոն Տէր-Պետրոսեանը կեղծ կատեգորիա է
    Լեւոն Տէր-Պետրոսեանը կեղծ կատեգորիա է

    Հայաստանի քաղաքական մենակեացը՝ առաջին նախագահ Լեւոն Տէր-Պետրոսեան, որ տակաւին 1991-ին կը յայտարարէր թէ «ազգային գաղափարախօսութիւնը կեղծ կատեգորիա է», այսօր կրկին կը ցցէ իր գլուխը՝ ընդդէմ ազգային գաղափարախօսութեան։

  • Խաժակին՝ հին զինուորը չի մահանար, ան պարզապէս կ՚ անյայտանայ
    Խաժակին՝ հին զինուորը չի մահանար, ան պարզապէս կ՚ անյայտանայ

    Թանկագին Խաժակ,

    Կը հեռանաս հին զինուորի նման։ Մեր ճանապարհը, ուրկէ քալեցինք միասին, կը մնայ անշեղ։ Երկար է այդ ճանապարհը, այնքան դժուար նոյնքան քաղցր։ Համոզուած էինք, որ այդ ճամբուն վրայ անմահը գաղափարն է, մնայունը պայքարն է։ 

  • Նիկոլ Փաշինեանը ոչ վարչապետ է, ոչ էլ վարչապետի պաշտօնակատար
    Նիկոլ Փաշինեանը ոչ վարչապետ է, ոչ էլ վարչապետի պաշտօնակատար

    Հիմք ունենալով ՀՀ Սահմանադրութեան եւ «Կառավարութեան կառուցուածքի եւ գործունէութեան մասին» Օրէնքի տրամադրութիւնները, Նիկոլ Փաշինեան դադրեցաւ Հայաստանի վարչապետի պաշտօնէն Ապրիլ 25-ին, երբ ան ներկայացուց իր հրաժարականը։ Ներկայիս ան պաշտօնանկի կարգավիճակ ունի եւ, ըստ օրէնքի, իրաւունք չունի շարունակելու պաշտօնավարել իբրեւ վարչապետ։ Ներկայիս իր հանգամանքը պարզ քաղաքացիի հանգամանք է։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։