Հա

Ազգային

09/09/2020 - 12:50

Յունաստանի հաւատարմագիրն ու Բաքւի սպառնալիքը

Միջերկրական ծովի արեւելեան հատւածում տեղի ունեցող զարգացումների վերաբերեալ Հայաստանի Հանրապետութեան ԱԳՆ յայտարարութիւնն արժանացել էր Թուրքիայի եւ Ադրբեջանի ԱԳՆ-ների ջղաձգային արձագանքին: 

Միջերկրական ծովի արեւելեան հատւածում տեղի ունեցող զարգացումների վերաբերեալ Հայաստանի Հանրապետութեան ԱԳՆ յայտարարութիւնն արժանացել էր Թուրքիայի եւ Ադրբեջանի ԱԳՆ-ների ջղաձգային արձագանքին: 

Քաղաքական ընկալումով գուցէ օրինաչափ կը լինէր Անկարայի արձագանգը. ի վերջոյ Երեւանը զօրակցում էր Յունաստանին եւ Կիպրոսին՝ երկու պետութիւնների ուղղութեամբ Թուրքիայի ոտնձգութիւնների դէմ։ Բայց արդէն պարզ է, որ նման իւրաքանչիւր յայտարարութեան, այսուհետեւ միանալու է ածանցեալ Բաքւի հակազդեցութիւնը։ Սսակայն Բաքուն սրանով չէր բաւարարւելու։ 

Յունաստանի նոր դեսպանի հետ հանդիպման ժամանակ Ալիեւը Հայաստանին անւանել է «բռնազաւթող երկիր» եւ պնդել, որ Երեւանը անտեսում է միջազգային իրաւունքը եւ ՄԱԿ-ի Անվտանգութեան խորհրդի բանաձեւերը: Նա ասել է, որ երկու տարի առաջ Եւրոմիութիւնն ու Ադրբեջանը ստորագրել են «Գործընկերութեան առաջնահերթութիւնները» փաստաթուղթը,  եւ Եւրոմիութիւնը պարտաւորւում է աջակցել Ադրբեջանի միջազգայնօրէն ճանաչւած սահմանների, տարածքային ամբողջականութեանը, ինքնիշխանութեան եւ անվտանգութեան պահպանմանը:  

Ադրբեջանի նախագահը նաեւ կրկնել է իր պնդումը՝ Տաւուշի մարզում Բաքւի եւ Երեւանի վերջին բախումներից յետոյ Ռուսաստանի կողմից բեռնատար ռուսական ինքնաթիռներով Հայաստանին զէնք մատակարարելու հարցը եւ յաւելել է. «Ցանկացած երկրի հետ Հայաստանի ռազմական համագործակցութիւնը մտահոգիչ է մեզ համար: Սա մեծ սպառնալիք է Ադրբեջանի համար, քանի որ Հայաստանն օգտագործում է այդ զէնքը մեր ռազմական եւ քաղաքացիական ուժերին սպանելու համար»։ 

Լրատւութեան բովանդակութիւնն աւելի խօսում է երկու երկրների միջեւ ծագած դիւանագիտական տագնապի, քան հաւատարմագիր ընդունելու արարողարակարգային հանդիպման մասին։ Հաւատարմագրեր ընդունելիս երկրի ղեկավարները ընդհանրապէս խօսում են երկու երկրների միջեւ գոյութիւն ունեցող կապերը սերտացնելու, յարաբերութիւնները զարգացնելու հեռանկարներին մասին։  

Այստեղ կարգը գլխիվայր շրջւել է։ Այն տպաւորութիւնն է ստացւում, որ նորանշանակ դեսպանը կանչւել է համապատասխան գերատեսչութիւն բացատրութիւն տալու քաղաքական այնպիսի գործընթացների մասին, ինչը խոցել է Ադրբեջանի արժանապատւութիւնը։ 

Աւելին.  դիւանագիտականօրէն որքա՞ն ընկալելի է, որ հաւատարմագիր ընդունող կողմը սուր ակնարկութիւններ անի երրորդ եւ չորրորդ պետութիւնների ուղղութեամբ։ Այստեղ թէ՛ Հայաստանի Հանրապետութիւնն է մեղադրւում իբրեւ «բռնազաւթող» կողմ, թէ՛ Ռուսաստանի Դաշնութիւնը իբրեւ բռնազաւթողին զինտեխնիկայով սպառազինող եւ ադրբեջանցիներին միջնորդաւորւած «սպանող» կողմ։ 

Աւելին. այստեղ կայ չբարձրաձայնւող պարզ ուղերձ։ Բաքուն զգուշացնում է Աթենքին, Ռուսաստանի օրինակը յուշելով, որ ցանկացած երկրի՝ Հայաստանի Հանրապետութեան հետ ռազմական գործակցութիւնը մտահոգիչ է Բաքւի համար եւ սպառնալիք։  

Այսքան պարզ. Յունաստանը սպառնալիք է Ադրբեջանի համար. սա է ասում Ալիեւը՝ իրեն հաւատարմագիր յանձնելու եկած Յունաստանի դեսպանին։ 

Իսրայէլը զինում է Ադրբեջանին։ Ապրիլեան պատերազմին իսրայէլեան ԱԹՍ-երը խփեցին հայ անզեն բնակչութեանը։ Իսրայէլի դեսպանի հաւատարմագիր յանձնելու արարողակարգին չհնչեցին նման մեղադրանքներ։ Երեւանը յարգեց միջազգային օրինաչափութիւններն ու արարողակարգային ընթացակարգերը։ Պատեհ առիթին, պաշտօնական Երեւանը արձագանքեց այդ մասին՝ մատնանշելով իսրայէլեան ռազմական օժանդակութեան անընդունելիութիւնը։ 

Միջազգային ընտանիքը անպայման կը նկատի այս տարբերութիւնները։ Այլ հարց է՝ կարձագանգի՞, թէ՞ ոչ։

 

ՇԱՀԱՆ ԳԱՆՏԱՀԱՐԵԱՆ

«Ազդակ» թերթի գլխաւոր խմբագիր

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։