Հա

Ազգային

05/10/2020 - 11:50

«Դրօշակ»-ի առաջնորդող. Նոր պատերազմ, հին դասեր

Սեպտեմբերի 27-ին Ադրբեջանը հերթական պատերազմը սանձազերծեց: Երբ դեռ թարմ են տաւուշեան դասերը, հարց է ծագում, թէ ինչու Ադրբեջանը նախաձեռնեց նոր արկածախնդրութիւն: Միւս կողմից` ադրբեջանական իշխանութիւնների` վերջին շաբաթների ագրեսիւ հռետորաբանութիւնը, ռազմական միջոցների եւ վարձկան ծայրայեղականների ակտիւ ներմուծումը երկիր իրական էին դարձնում հնարաւոր պատերազմի հաւանականութիւնը:

Սեպտեմբերի 27-ին Ադրբեջանը հերթական պատերազմը սանձազերծեց: Երբ դեռ թարմ են տաւուշեան դասերը, հարց է ծագում, թէ ինչու Ադրբեջանը նախաձեռնեց նոր արկածախնդրութիւն: Միւս կողմից` ադրբեջանական իշխանութիւնների` վերջին շաբաթների ագրեսիւ հռետորաբանութիւնը, ռազմական միջոցների եւ վարձկան ծայրայեղականների ակտիւ ներմուծումը երկիր իրական էին դարձնում հնարաւոր պատերազմի հաւանականութիւնը: Բացի այդ` թշնամի երկրի ղեկավարի համար միեւնոյն է, թէ ինչպէս կը գնահատեն իր յանցաւոր քայլերը «դրսում»` նկատի ունենալով ընթացող բանակցութիւններն ու պայմանաւորւածութիւնները հակամարտութիւնը խաղաղ ճանապարհով կարգաւորելու վերաբերեալ:

Ալիեւը ցանկանում է հայութեանը ներշնչել, որ երբեք հանգիստ չի տալու, մաշող ու սողացող, պարբերաբար սառչող ու տաքացող հակամարտութիւնը շարունակւելու է, մինչեւ հայկական կողմը հրաժարւի Արցախի նկատմամբ յաւակնութիւններից: Սրան կարող ենք աւելացնել ներքին խնդիրները, որոնցից սեփական ժողովրդին մշտապէս ձգտում է շեղելու նաւթի ու արիւնի բռնապետը: Բոլորիս համար ակնառու դարձաւ նաեւ, որ այս անգամ եւ գուցէ այսուհետ գլխաւոր թելադրողի դերում է նէոօսմանիզմի ցնորքներով համակւած Թուրքիայի նախագահը, ով այսօր արդէն իշխում է Նախիջեւանում եւ ձգտում է իր իշխանութիւնը տարածելու ողջ Ադրբեջանում: Սահմանակից եւ ոչ սահմանակից տարածաշրջաններում ազդեցութեան հաստատման համարձակ ու կոշտ մրցակցութեան մէջ նետւած Թուրքիան, կարելի է ասել, որ իրականացնում է իր նւիրական երազանքներից եւս մէկը, ներգրաււում է կովկասեան գործերում եւ, ձգձգւող հակամարտութեան մէջ դերակատար դառնալով, փորձում է այն դարձնել գերուժերի եւ մասնաւորապէս Ռուսաստանի հետ իր աշխարհաքաղաքական առեւտրի խաղաթղթերից մէկը:

Հայկական կողմը պէտք է լրջօրէն գնահատի այս իրողութիւնը եւ անի ճիշտ հետեւութիւններ՝ առաջնորդւելով միայն իր շահերով եւ դիմակայելով արտաքին թելադրողների ճնշումներին: Չաւարտւած այս նոր պատերազմում եւս հայութեան գլխաւոր զէնքը իր միասնականութիւնն է: Այն ողջախոհութիւնն է, որով առաջնորդւելով` ընդդիմութեան հիմնական ուժերը եւ առաջին հերթին Դաշնակցութիւնը յայտարարեցին, որ ճակատագրական պահին անհրաժեշտ է մի կողմ դնել բոլոր ներքաղաքական տարաձայնութիւնները եւ համախմբւել միասնական ուժերով երկիրը նոր փորձութիւնից յաղթականօրէն դուրս բերելու նպատակի շուրջ:

Նոր պատերազմի համար Ադրբեջանի արկածախնդիր ղեկավարութեանը հաւանաբար ոգեւորեցին նաեւ Հայաստանի ներքին կեանքում արձանագրւած որոշ գործընթացներ, որոնց դասը նոյնպէս մենք պարտաւոր ենք քաղել, ինչպէս եւ խաղաղասիրութեան պատրանքներից սթափւելով` մտածել առաջնային անելիքների մասին` վերականգնել ներքին միասնականութիւնը, իրական քայլեր ձեռնարկել տնտեսական կայուն զարգացման մայրուղի դուրս գալու ուղղութեամբ, վարել ակտիւ արտաքին քաղաքականութիւն այն հարթակներում, որոնցում ունենք արդիւնաւէտ գործելու փորձ ու հնարաւորութիւն, ինչպէս եւ շահերի համընկնումներ: Պահի աներկբայ թելադրանքն է, որ Հայաստանը Արցախի հետ կնքի ռազմաքաղաքական դաշինք` յստակօրէն արտայայտւելով այն բաների մասին, որոնցով արդէն իսկ զբաղւում է` հաւաստելով բազմակողմանի հովանաւորութիւնը հայկական երկրորդ պետութեան եւ այնտեղ ապրող ժողովրդի հանդէպ: Քաղաքականօրէն ամրագրելով յանձնառութիւնները՝ պէտք է բարեկամ պետութիւնների համար հիմնաւորի Արցախի անկախութեան ճանաչման իրաւական անհրաժեշտութիւնը: Աշխարհաքաղաքական ուժեղ, ակտիւ դերակատար, գրաւիչ Հայաստանը կը կարողանայ վերջնականապէս յաղթահարել այն փորձութիւնը, որը կարելի է անւանել ադրբեջանաթուրքական ֆաշիզմ: Ժամանակն ու թաւալգլոր զարգացումները սխալւելու եւ յապաղելու շռայլութիւնը չեն ընձեռում մեզ:

 

Ա. Շ.

«Դրօշակ», թիւ 10 (1644), հոկտեմբեր, 2020 թ.

Յարակից լուրեր

  • «Դրօշակ»-ի առաջնորդող․ Որպէս սկիզբ ազատւել ապազգային իշխանութիւնից
    «Դրօշակ»-ի առաջնորդող․ Որպէս սկիզբ ազատւել ապազգային իշխանութիւնից

    Ներկայ իրականութիւնը մերժում է այն պատմագիտական տեսակէտը, ըստ որի` անհատների դերը վճռորոշ չէ պատմական գործընթացներում: Եթէ այսօրւայ եւ 100-102 տարի առաջւայ հայաստանեան իրականութիւնը զուգահեռենք, ապա ակնյայտ կը դառնայ, որ մի դէպքում դարերով պետականազուրկ երկրի մի սերունդ, ցեղասպանւած ազգի մէջ ոգի ներարկելով, կարողացել է պետականութիւն կերտել, իսկ միւս դէպքում, հարիւրամեայ պետականութեան ու ինքնազարգացման ճանապարհ անցած նոյն ժողովրդի մի զգալի զանգւածի մէջ բացասական կրքեր գրգռելով, ապազգային եւ օտարասուն տարրը կարողացել է յաղթանակած ու կայուն պետութիւնը տանել կործանման: 

  • Լոյս է տեսել ՀՅԴ պաշտօնաթերթ «Դրօշակ»-ի 12-րդ համարը
    Լոյս է տեսել ՀՅԴ պաշտօնաթերթ «Դրօշակ»-ի 12-րդ համարը

    2020 թւականի յունւարից վերահրատարակւող ՀՅԴ Բիւրոյի պաշտօնաթերթ «Դրօշակ»-ը ընթերցողին է ներկայացնում տարեվերջեան թիւ 12-րդ համարը: Դժբախտաբար անցնող տարւայ ամփոփումն ու նորի դիմաւորումը հայ ժողովուրդը այս անգամ չի անում ընդունւած տրամադրութեամբ եւ «Դրօշակ»-ի խմբագրակազմն էլ պաշտօնաթերթի ներկայ թիւը նւիրել է գլխաւորաբար արցախին, արցախեան ողբերգական իրադարձութիւնների հետ կապւած ներքաղաքական եւ արտաքին քաղաքական խնդիրներին, Արցախեան հարցի զարգացման պատմական հոլովոյթին: 

  • Արեան եւ հայրենիքի հաշւին առեւտուր չեն անում
    Արեան եւ հայրենիքի հաշւին առեւտուր չեն անում

    Յայտնի իրադարձութիւնների պատճառով, որպէս երկրի ղեկավար, Փաշինեանը լիովին կորցրել է իր բարոյական լեգիտիմութիւնը, իսկ իրավական լեգիտիմութեան հարցը, ակնառու փաստերի կողքին, ամբողջ խորութեամբ ու ծաւալով կը բացայայտւի, երբ վարչապետի աթոռը զբաղեցնող անձը կը կանգնի արդարադատութեան առջեւ:

  • Բախտախնդիրը պէտք է հեռանայ
    Բախտախնդիրը պէտք է հեռանայ

    1920 թւականի ծանր յիշողութիւնները վերակենդանանում են, կարծես պատմութիւնը կրկնւում է: Ճիշտ ինչպէս 100 տարի առաջ, նոյն օրերին տեղի է ունենում թուրքական նոր ներխուժում: Այս անգամ արդէն դերակատարները երկու թուրքական պետութիւններ են առջեւներից որպէս թնդանոթի մսացու քշելով միջազգային թիւ մէկ ահաբեկչական շարժման զինեալներին: Հայ ժողովուրդը, ըմբռնելով փորձութեան ահագնութիւնը տեղի ունեցողը անւանում է հայրենական պատերազմ:

  • Մօտիկ կամ հեռու տանող հետեւութիւններ
    Մօտիկ կամ հեռու տանող հետեւութիւններ

    Համացանցում աչքիս ընկաւ նոյեմբերի 14-ին լոյս տեսած մի հրապարակում, որի վերնագիրն էր. «Կորուստի ահաւորութեան անհամաչափ ընդվզումի լոյսին տակ»: Այս նիւթի հրապարակման օրւանից որոշակի ժամանակ է անցել, բայց, ինչպէս ասում են, արծարծւած խնդիրները արդիականութիւնը չեն կորցրել եւ որոշեցի արձագանքել:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։