Հա

Ազգային

19/10/2020 - 13:50

Ֆրանսիան կարող է սկիզբը լինել Արցախի ճանաչման գործընթացի

lragir.am-ի զրուցակիցն է ՀՅԴ Բիւրոյի անդամ, Ֆրանսիայի հայկական կազմակերպութիւնների համակարգող խորհրդի համանախագահ Մուրադ Փափազեանը:

«alikonline.ir» - lragir.am-ի զրուցակիցն է ՀՅԴ Բիւրոյի անդամ, Ֆրանսիայի հայկական կազմակերպութիւնների համակարգող խորհրդի համանախագահ Մուրադ Փափազեանը:

 

- Պարոն Փափազեան, շատերն ասում են, որ Ֆրանսիան կարող է ճանաչել Արցախը: Իսկապէ՞ս այդքան մօտ ենք այդ նպատակի իրականացմանը:

- Ոչ, այդքան մօտ չենք: Պրոցեսը հետեւեալն է. պէտք է նախ խորհրդարանում արձանագրւի հարցը, եւ արդէն մի շարք պատգամաւորներ բոլոր քաղաքական խմբակցութիւններից ստորագրել են այդ նախաձեռնութեան տակ: Հիմա պէտք է խորհրդարանական մի խումբ դա օրակարգ մտցնի: Ընդհանրապէս, օրակարգը կառավարութիւնն է ճշտում, սակայն ամէն ամիս առիթներ կան, որ հնարաւորութիւն է տրւում խմբակցութիւններին օրակարգի հարցեր ներկայացնել: Հիմա մենք քննարկումների մէջ ենք խմբակցութիւնների հետ, ուզում ենք տեսնել, թէ որ խմբակցութիւնն է աւելի մօտ իշխանութիւններին, որ խմբակցութեան կողմից հարցի ներկայացումն աւելի օգտակար կը լինի: Առաջիկայ մի քանի օրերին յստակութիւն կը լինի այս հարցում: Բայց հարցի լուծումն այդքան շուտ չի լինի, որքան շատերն ակնկալում են:

 

- Մենք տեսնում ենք, որ եւրոպական երկրներում հայկական սփիւռքը ակտիւ է, Հայ Դատի գրասենեակները շատ ակտիւ աշխատում են, եւրոպական տարբեր երկրներում փողոցներ ու մայրուղիներ են փակւում: Ի՞նչ ակնկալիքներ կան այդ ակտիւ գործունէութիւնից:

- Այո, Հայ Դատի գրասենեակներն ակտիւ աշխատում են, բայց գիտէք, որ ԵՄ անդամ երկրները, թերեւս բացառութեամբ Ֆրանսիայի, այդքան էլ պատրաստ չեն այդ քայլն անելուն, որովհետեւ ուրիշ հաշիւներ ունեն Թուրքիայի եւ Ադրբեջանի հետ: Այն աշխատանքը, որ մենք իրականացնում ենք եւրոպական երկրների հասարակութիւնների մէջ, պետական մարմինների հետ, անշուշտ որոշակի ազդեցութիւն ունենում է: Այդուհանդերձ, այդ աշխատանքը դժւար է եւ պէտք է շարունակել: Այդ առումով Ֆրանսիան կարող է սկիզբը լինել Արցախի ճանաչման գործընթացի:

 

- Տարօրինակ չէ՞, որ հայերին աւելի շատ աջակցում են ձախերը, մինչդեռ տրամաբանութիւնը յուշում է, որ առաջին աջակցողները պէտք է լինէին ազատականները, որոնք կարեւորում են մարդու իրաւունքները:

- Պետութիւնները կարեւորում են իրենց շահերը, ոչ թէ մարդու իրաւունքները: Որպէսզի կարեւորեն նաեւ մեր շահերը, պէտք է մենք հզօրացնենք մեր պայքարը, որը յարատեւ պայքար է: Մենք պէտք է անընդհատ աշխատենք ու ճնշում բանեցնենք բոլոր ուղղութիւններով՝ ցոյցերով, անհատական կապերով, մեդիաների հետ արդիւնաւէտ աշխատանքով: Սա մեր աշխատանքն է եւ միշտ էլ դրանով զբաղւել ենք: Չմոռանանք, որ մեր դիմաց որպէս հակառակորդ կանգնած են շատ զօրաւոր պետութիւններ, որոնց դիւանագիտութիւնը ակտիւ է, արթուն է: Նրանք ունեն մեծ ռեսուրսներ, եւ մենք մեր միջոցներով այս երկու պետութիւնների դէմ աշխատում ենք: Իրենք էլ մեր դէմ են աշխատում: Այո, պայքարը դժւար է, մինչեւ հիմա մենք միշտ յաղթել ենք, բայց Արցախի ճանաչման հարցը դժւար հարց է: Այդուհանդերձ, դա է մեր այսօրւայ թիւ մէկ գործը, որ պէտք է առաջ մղենք:

 

- Պաշտօնական Երեւանը սկսել է առաջ մղել «անջատում յանուն փրկութեան» բանաձեւը: Դուք ի՞նչ վերաբերմունք ունեք սրա վերաբերեալ:

- Դա շատ կարեւոր հանգամանք է, եւ մենք մեր աշխատանքում օգտագործում ենք այդ փաստարկը: Այն, ինչ տեղի է ունենում Արցախում եւ Հայաստանում, որ Թուրքիան ու Ադրբեջանը չեն յարգում հրադադարները, դա եւս կարող է մեզ օգնել, որովհետեւ Ռուսաստանը, Ֆրանսիան, ԱՄՆ-ը ջանքեր են գործադրում, փաստաթղթեր են ստորագրւում, որ հրադադար լինի, եւ 5 րոպէ յետոյ Ադրբեջանը չի յարգում այդ ստորագրութիւնը: Սա ցոյց է տալիս, որ միջազգային հանրութիւնը չի կարող վստահել Ադրբեջանի ստորագրութեանը:

 

ՍԻՐԱՆՈՒՇ ՊԱՊԵԱՆ

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։