Հա

Ազգային

14/11/2020 - 13:30

Հրէշը, ով էլ լինի, պէտք է հեռանայ

Հայեր, իր վերջին ժամերը հաշւող ապիկար կառավարութիւնն ու նրա ղեկավարը անհիմն թեզեր են դրել շրջանառութեան մէջ, թէ իշխանափոխութիւնից յետոյ կը վերսկսւի պատերազմը, նոր զոհեր ու աւերածութիւններ կունենանք: Այս ստոր սուտը յօրինել են վարչապետ կոչւածն ու նրա մարդիկ, որոնք իրենց վարած քաղաքականութեամբ պատճառ դարձան այս սոսկալի պատերազմի, հազարաւոր զոհերի ու հայրենի հարիւրաւոր բնակավայրերի աւերմանը:

ԷԴԻԿ ԱՆԴՐԷԱՍԵԱՆ

 

Հայեր, իր վերջին ժամերը հաշւող ապիկար կառավարութիւնն ու նրա ղեկավարը անհիմն թեզեր են դրել շրջանառութեան մէջ, թէ իշխանափոխութիւնից յետոյ կը վերսկսւի պատերազմը, նոր զոհեր ու աւերածութիւններ կունենանք: Այս ստոր սուտը յօրինել են վարչապետ կոչւածն ու նրա մարդիկ, որոնք իրենց վարած քաղաքականութեամբ պատճառ դարձան այս սոսկալի պատերազմի, հազարաւոր զոհերի ու հայրենի հարիւրաւոր բնակավայրերի աւերմանը: Այդ խայտառակ հերիւրանքի նպատակը մէկն է՝ Հայաստանի Հանրապետութեան քաղաքացիներին հեռու պահել հայրենիքի փրկութեան հանրահաւաքներից ու հնարաւորինս երկարաձգել թաւշեայ փափկամորթների խղճուկ իշխանութիւնը:

Արդ՝ իւրաքանչիւր հայ մարդ պէտք է իմանայ, որ 45 օր տեւած պատերազմը դադարել է ոչ թէ ՀՀ այս անմեղսունակ կառավարութեան ջանքերով, այլ այդ կառավարութեան եւ նրա ղեկավարի անվերապահ կապիտուլեացիայի արդիւնքում: Իւրաքանչիւր հայ պէտք է իմանայ, որ թուրք-ադրբեջանա-ահաբեկչական հորդաները կանգ են առել ոչ թէ թաւշեայ առաջնորդի հանճարի, այլ այն ուժերի ու անհատների շնորհիւ, որոնց աներեւակայելի ջանքերով Հայաստանը, Արցախը եւ հայ ժողովուրդը միայնակ չմնացին մեր հայրենիքն ու մեր պետականութիւնը հիմնայատակ քանդելու ելած համաշխարհային ուժային կենտրոնների ու թուրքական բանակների դէմ:

Իւրաքանչիւր հայ մարդ պէտք է հասկանայ, որ Ադրբեջանը չէր համարձակւի ներխուժել արցախցու տուն, եթէ վստահ չլինէր, որ Հայաստանի թաւշեայ իշխանութիւնն ամէն ինչ արել է, որպէսզի Հայաստանը դուրս դնի վերպետական պաշտպանական կառոյցներից եւ բնական դաշնակիցների շրջանակից:

Ադրբեջանն անցած 30 տարիների ընթացքում արդէն համակերպւել էր հայերի բնօրրանը՝ Արցախը, անդառնալիօրէն կորցնելու մտքի հետ: Արցախը վերադարձնելու յոյսեր Բաքւում եւ Անկարայում արթնացրել է մէկ մարդ, եւ այդ մարդը թաւշեայ խեղկատակութեան առաջնորդն է՝ արտաքին քաղաքականութիւնից ու ռազմագիտութիւնից անտեղեակ մի մարդ՝ էութեամբ հովիւ, ներքին խառնւածքով՝ չտես, առողջապահական թերթիկով՝ անմեղսունակ: Յանկարծահաս փառքից շլացած այդ մարդուն թւաց, թէ իր արտասահմանեան տէրերի աջակցութեամբ կարողանալու է Ռուսաստանի Դաշնութեանը վռնդել Հարաւային Կովկասից եւ նրա ոխերիմ հակառակորդ Թուրքիայի համար ճանապարհ հարթել դէպի արեւելք, դէպի Միջին Ասիա, իսկ այնուհետեւ դէպի Ռուսաստանի խորքերը: Ի՞նչ իմանար էութեամբ հովիւը, որ իր հայրենակործան քայլերն աւարտւելու են հայկական երկու պետականութիւն կորստեան դուռը հասցնելով:

Հայաստանի իշխանութեան ղեկին այդ հովւի գոյութեան իւրաքանչիւր օր ու ժամ այլեւս յղի է Հայաստանի եւ Արցախի վերջնական կործանման վտանգով: Ոչ ոք չի կարող ասել, թէ այս ամենը հայ ժողովրդի գլխին բերելուց յետոյ ինչ ուրիշ դաւեր է նիւթում այդ ողորմելի չտեսը՝ իր ու իր ընտանիքի հետագայ բարօրութիւնը ապահովելու եւ բազմապատկելու համար: Նա իր ստոր դաւաճանութիւնը տակաւին չի հասցրել աւարտին: Մենք երկար ենք հանդուրժել կամակոր անմեղսունակին, նոյնիսկ չափից աւելի, բայց թոյլ տալ, որ նա աւարտին հասցնի իր սեւ գործը, կը նշանակի լինել նրանից աւելի անճարակ, նրանից աւելի անտարբեր հայ մարդու ճակատագրի հանդէպ:

Եւ ուրեմն՝ իւրաքանչիւր հայ մարդ պէտք է իմանայ, որ չարիքը կանգնեցնելու, հակահայ երեւոյթը մեր միջից դուրս նետելու, 2,5-ամեայ մղձաւանջը մեր լեռներից վանելու սուրբ գործի թիւ մէկ պատասխանատուն ինքն է ու պէտք է ոտքի կանգնի՝ երկիրը կանգնեցնելու, երկրի մէջքը շտկելու, հայոց պետականութիւնը ժամանակի յարատեւ ընթացքի մէջ պահելու համար:

Մենք շատ ենք եւ մեզ հայ են ասում: Մենք գալիս ենք Երկիր մոլորակի վրայ արեւի ծագման առաջին օրից ու հասնելու ենք մինչեւ վերջին օրերը մարդկութեան, երբ Թուրքիայի ու թուրքի մասին կը խօսեն որպէս մարդկութեանը պատուհասած ու պատմութեան խորքերում անհետացած չար երազի: Հայը չի կարող ընկրկել թուրքի առաջ, ինչ է թէ Հայաստանում մի հրէշ փակել է ապագայի ճանապարհը: Ապագան մերն է, հրէշը, ով էլ լինի, պէտք է հեռանայ:

Յարակից լուրեր

  • 2021`պարտութիւնը շարունակւում է
    2021`պարտութիւնը շարունակւում է

    Բա հիմա ի՞նչ է լինելու, երբ փաստ է, որ պարտութեան այս սիմւոլը մեզ հետ եկել է 2021 թւական: Երկու ոտքը դրեց մի կոշիկի մէջ ու հրաժարական չտւեց` խորտակելով ապագայի հետ կապւած բոլոր յոյսերը: Մենք ինչքան էլ գեղեցիկ խօսքեր ասենք միմեանց, ինչքան էլ ոգեւորենք իրար, թէ հայ ազգն այսպիսին ու այսպիսին է, միեւնոյն է, այս կարգի ջախջախիչ պարտութիւնից յետոյ երկար, շատ երկար ոտքի կանգնել չենք կարող, եթէ անգամ «Լուսաւոր Հայաստանի» եւ «Իմ քայլի» քաղաքական ամուսնութիւնից որեւէ բան ծնւի, ասենք` յետպատերազմական իրավիճակի անցումային վարչապետ:

  • Սրբավայրը կը մնայ սրբավայր, պղծողը՝ պիղծ
    Սրբավայրը կը մնայ սրբավայր, պղծողը՝ պիղծ

    «Հայրենիքաուրացող, հայաստանատեաց, եղբայրասպան, որդիամերժ, գերեզմանապիղծ, ազգադաւ, կեղտաբերան, վայրահաչող, պնակալեզ ու էլի տարբեր բաների լեզ, կռապաշտ, վայրենի, «կտըցրած», անմիտ, ուղեղահարթ, «քֆուրամեռ», դեբիլ, չարոգի, վախկոտ, անթասիբ, եթէ մենակ չէ՝ «դուխով», վտանգափախ, «մոմենտը ջոգող՝ թռնող», անգրագէտ, գռեհկաբարոյ, քինախնդիր, արարքներ ու մտքեր կապկող, անտրամաբան, կեղտամիտք, հոգով անլւայ, դաժան, չկամ, կեղծամիտ, շողոքորթ, հայերէն ու մարդկերէն չհասկացող, գետնաքարշ, աչքածակ, բնազդաշարժ, դեմագոգ, ստախօս ու ստակերպ, բութ…»:

  • Ամէն նոր Լիպարիտեան լաւ մոռացւած հինն է
    Ամէն նոր Լիպարիտեան լաւ մոռացւած հինն է

    Բարեւ Ձեզ պարոն Լիպարիտեան, լա՞ւ էք… Ասենք՝ ինչո՞ւ պէտք է լաւ լինէք:

    Երկրորդ անգամ Հայաստանում եկաք իշխանութեան եւ երկրորդ անգամ մենք ունենք այն, ինչ ունենք՝ քայքայւած երկիր, պառակտւած հասարակութիւն, պետական թալան, իշխանութիւնների հրաժարականի պահանջ: Հիմա-հիմա մութն ու ցուրտն էլ վրայ կը տան: Մի բան էլ կայ: Դուք էն ժամանակ այսքան չէիք խառնւում պատերազմական գործերին ու մենք յաղթեցինք: Այս անգամ որոշեցիք «յաղթել» ու այսպէս եղաւ:

  • Անլրջութիւն
    Անլրջութիւն

    Տէր-Պետրոսեանի վերջին ելոյթն այլ բառով, քան «անլրջութիւն», չես կարող բնութագրել: Միայն անլուրջ մարդը կարող էր ծանր պատերազմից եւ խայտառակ կապիտուլեացիայից յետոյ իր ժողովրդին սպառնալ նոր՝ քաղաքացիական պատերազմով: Գիտակցաբար, սառը մտածողութեամբ է նա անում դա, թէ էյֆորիկ հոգեվիճակում, արդէն կարեւոր չէ: Նա յստակ ասում է, որ Նիկոլ Փաշինեանը մտադիր չէ հեռանալու եւ գնալու է մինչեւ վերջ, իսկ եթէ Վազգէն Մանուկեանն էլ աննահանջ վճռականութիւն հանդէս բերի, քաղաքացիական պատերազմ կը բռնկւի:

  • Երբ պետականութեան անկիւնաքարերն ես տեղաշարժել
    Երբ պետականութեան անկիւնաքարերն ես տեղաշարժել

    Մարդկութեան պատմութիւնը բազմաթիւ օրինակներ ունի տապալւած կառավարութիւնների եւ առաջնորդների վաղաժամկէտ, եթէ չասեմ էքստրեմալ հեռացման: Դա նորմալ երեւոյթ է, որովհետեւ ժողովուրդ եւ պետականութիւն հասկացութիւնները անհամեմատելիօրէն վեր են իշխանութիւն եւ առաջնորդ հասկացութիւններից: Աննորմալը հակառակն է՝ երբ տապալւած կառավարութիւններն ու դուսպրծուկ առաջնորդները փորձում են իրենց վեր դասել պետութիւնից ու ժողովրդից եւ նոյնիսկ ամենախայտառակ պարտութիւնից ու կապիտուլեացիայից յետոյ էլ չեն ցանկանում թողնել իշխանական աթոռները:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։