Հա

Ազգային

21/12/2020 - 12:30

«Պէտք է հետեւողականօրէն աշխատենք, որպէսզի վէրքերը սպիանան եւ աւելի ուժեղացած ոտքի կանգնենք»․ Հեղինէ Էւինեան

Yerkir.am -ի զրուցակիցն է ՀՅԴ Եւրոպայի Հայ Դատի գրասենեակի գործադիր տնօրէն Հեղինէ Էւինեանը։

«alikonline.ir» - Yerkir.am -ի զրուցակիցն է ՀՅԴ Եւրոպայի Հայ Դատի գրասենեակի գործադիր տնօրէն Հեղինէ Էւինեանը։

 

Հ.- Տիկին Էւինեան, Հայ Դատի Եւրոպայի գրասենեակը սեպտեմբերի 27-ին Ադրբեջանի կողմից սանձազերծւած ագրեսիայի ընթացքում մեծ աշխատանք իրականացրեց, որը շարունակւում է նաեւ զինադադարի եռակողմ յայտարարութեան ստորագրումից յետոյ։ Երկու օր առաջ էլ տեղեկացանք, որ Եւրոպական Խորհրդարանի երեք պատգամաւորներ հանդէս են եկել «Լեռնային Ղարաբաղի հետ բարեկամութեան եւ համերաշխութեան խումբ» ստեղծելու նախաձեռնութեամբ։ Կը մանրամասնէ՞ք խօսքն ինչի մասին է։

Պ.- Դեռեւս կազմաւորման եւ ընդլայնման փուլում գտնւող այս բարեկամութեան խմբի նպատակը, Եւրոպական Խորհրդարանում արցախահայութեան իրաւունքները պաշտպանելն է, ինչպէս նաեւ Եւրոպական Միութեան գործադիր մարմիններին՝ մասնաւորապէս Արտաքին գործողութիւնների ծառայութեանը, Եւրոմիութեան Խորհրդին կամ Եւրոյանձնաժողովին, այս համատեքստում հարցումներ ուղղելը եւ այսպիսով, անհրաժեշտութեան դէպքում, ինչ-որ տեղ ճնշում գործադրելը։ Այսպիսի բարեկամութեան խմբերը չունեն պաշտօնական կարգավիճակ, բայց ակտիւ աշխատելու դէպքում կարող են լաւ հարթակ լինել Եւրոպական Խորհրդարանում կարեւոր հարցեր բարձրացնելու, խորհրդաժողովներ եւ այլ միջոցառումներ կազմակերպելու համար։ Իհարկէ, ԵԽ-ում պատգամաւորների այսպիսի կորիզ ունենալը առաջին հերթին կարեւոր է ընդունւող բանաձեւերում նպաստաւոր դիրքորոշումներ արձանագրելու համար։ Սա առաջին անգամը չէ, որ Եւրոպական Խորհրդարանում Արցախի հետ բարեկամութեան խումբ է ձեւաւորւում․ անցեալ օրէնսդրական շրջանում եւս՝ 2014-2019 թթ․ ստեղծւել էր այսպիսի խումբ, որի հետ անմիջական համագործակցութիւն ենք ունեցել եւ տարբեր նախաձեռնութիւններ իրականցրել։ Եւրոխորհրդարանի՝ 2019-ի ընտրութիւններից յետոյ խումբը վերակազմելու անհրաժեշտութիւն կար։

Եւրոպայի Հայ Դատի գրասենեակը սերտ համագործակցութիւն ունի նոր խմբի նախաձեռնքող բոլոր երեք պատգամաւորների հետ (օրինակ մեր հրաւէրով պարոն Ալֆոնսին եւ պարոն Վան Դալենը մասնակցել եւ ելոյթ են ունեցել նաեւ Բրիւսէլում տեղի ունեցած բազմահազարանոց ցոյցին՝ ի պաշտպանութիւն Արցախի, տիկին Գիեոմի հետ նոյնպէս տարբեր առիթներով համագործակցել ենք): Անշուշտ ջերմօրէն ողջունում ենք իրենց այս նշանակալի նախաձեռնութիւնը՝ ի պաշտպանութիւն ճշմարտութեան եւ արդարութեան։ Հիմնադիր անդամներին օժանդակելու ենք բարեկամութեան խմբի ընդլայնման հարցում եւ ամէն կերպ պէտք է աջակցենք, որպէսզի խումբը ակտիւ աշխատանք տանի Եւրոպական Խորհրդարանում:

 

Հ.- Կարո՞ղ էք առանձնացնել այս ընթացքում ՀՅԴ Եւրոպայի Հայ Դատի գրասենեակի կողմից կատարւած աշխատանքի արդիւնք հանդիսացող ամենակարեւոր ձեռքբերումներից մի քանիսը։

Պ.- Սեպտեմբերի 27-ից ի վեր ստեղծւել է ֆորսմաժորային եւ դժւար մի կացութիւն, երբ պէտք է աշխատենք եւ այժմ էլ աշխատում ենք տարբեր ուղղութիւններով, օրինակ՝ Եւրոպայում քաղաքական եւ մեդիա շրջանակներում իրազեկման աշխատանք տանելով, ինչպէս նաեւ համայնքային նախաձեռնութիւններին ակտիւօրէն աջակցելով։ Գիտէք, ստեղծւած իրավիճակում դժւար է խօսել ձեռքբերումներից։ Այնուամենայնիւ, Եւրոպայի Հայ Դատի գրասենեակն իր կարեւոր ներդրումն է ունեցել օրինակ, որպէսզի Եւրոպական Խորհրդարանի հոկտեմբերի լիագումար նիստին ընդառաջ պատգամաւորները լիովին տեղեկացւած լինէին Արցախում զարգացումների մասին եւ իրենց յստակ ճնշող մեծամասնութիւնը հրապարակայնօրէն պաշտպանի արցախահայութեան իրաւունքները՝ դատապարտելով Ադրբեջանին եւ Թուրքիային։ Բազմաթիւ եւրոպատգամաւորների կողմից քննադատական բաց նամակներ են յղւել բարձր յանձնակատար Ժոզէֆ Բորէլին՝ կոչ անելով նաեւ սանկցիաներ կիրառել Ադրբեջանի եւ Թուրքիայի նկատմամբ։ Եւրոպայի Հայ Դատի գրասենեակը նաեւ ակտիւ աշխատել է, որպէսզի Բելգիայի տարբեր խորհրդարանների կողմից, այդ թւում նաեւ Դաշնային խորհրդարանի, ընդունւի բաւականին ուժեղ, հայանպաստ բանաձեւ, որն ի թիւս այլ կարեւոր շեշտադրումների, Ադրբեջանին կոչ է անում զօրքերը դուրս բերել Արցախից։ Նպաստաւոր բանաձեւեր են ընդունւել նաեւ Ֆլամանական եւ Վալոնիայի խորհրդարանների կողմից։ Ֆրանսիայի մեր յանձնախումբը եւ ակտիւիստները եւս շօշափելի աշխատանք են կատարել Ֆրանսիայի Սենատի եւ Ազգային Ժողովի ընդունած բանաձեւերի կայացման հարցում։ Պատերազմի ընթացքում մեր գրասենեակը ակտիւօրէն օժանդակել եւ կազմակերպել է պատգամաւորների եւ օտարերկրեայ լրագրողների այց Արցախ։ Սրանք իհարկէ մի քանի օրինակներ են։

 

Հ.- Մամուլում տեղեկութիւններ տարածւեցին, որ դեկտեմբերի սկզբին Արցախ էին այցելել բելգիացի ներկայ ու նախկին խորհրդարանականներ, կը մանրամասնէ՞ք այցի նպատակները եւ ընթացքը։

Պ.- Պատւիրակութեան անդամները Բելգիայում Արցախի հետ ֆրանսախօս բարեկամութեան խմբի անդամներ են, որոնք առաջին անգամը չէ, որ Արցախում էին։ Դեռեւս 2013-ից ի վեր, Եւրոպայի Հայ Դատի գրասենեակն ակտիւօրէն աշխատել է Եւրոպայում՝ տւեալ պարագայում Բելգիայում, Արցախի հետ հասարակական եւ քաղաքական գործիչներից բաղկացած բարեկամութեան խմբերի ստեղծման եւ կայացման վրայ։ Այսինքն՝ այս պատւիրակութեան բոլոր անդամները Արցախի իսկական եւ սրտացաւ բարեկամնր են, ովքեր եկել էին ասելու, որ իրենք յատկապէս այս դժւարին շրջանում իրենց ընկերներին մենակ չեն թողնում եւ պատրաստ են արցախցիներին նեցուկ լինել։ Բացի այդ, այս այցն ունէր նաեւ շատ գործնական նպատակ պատգամաւորների համար, այն է՝ տեղում ծանօթանալ իրավիճակին, հասկանալ թէ ինչի կարիք կայ, որպէսզի հետագայում իրենց քայլերն աւելի նպատակային լինեն եւ Բելգիա վերադառնալուց յետոյ օգնութիւնն աւելի ճիշտ կազմակերպեն՝ կը լինի դա շինարարութեան ոլորտում աջակցելով, դեղորայք տրամադրելով թէ այլ կերպ։ Իհարկէ իրենք նաեւ շարունակելու են բարձրաձայնել արցախահայութեան իրաւունքների մասին։

 

Հ.- Եւ վերջում, որո՞նք են Եւրոպայի Հայ Դատի գրասենեակի գործունէութեան հիմնական ուղղութիւններն այս պահին եւ ի՞նչ արդիւնքների սպասել մօտ ապագայում։

Պ.- Անշուշտ Արցախը շարունակելու է գլխաւոր տեղ զբաղեցնել Եւրոպայի Հայ Դատի գրասենեակի եւ յանձնախմբերի օրակարգում։ Ստեղծւած նոր իրականութիւնը եւ իրավիճակը հաշւի առնելով՝ պէտք է իհարկէ վերանայենք մեր անելիքները՝ արցախահայութեան իրաւունքներն արդիւնաւէտ պաշտպանելու համար։ Ամէն ինչ դեռեւս շատ թարմ է եւ ժամանակ է անհրաժեշտ։ Այսօր մեր գերխնդիրը Արցախի մեր հայրենակիցների անվտանգութիւնն է։ Այսինքն՝ ցանկացած քայլ, որ ձեռնարկենք, պէտք է միտւած լինի մեր հայրենակիցների անվտանգութեան եւ բարեկեցութեան ապահովմանը։ Պէտք է ամէն ինչ անենք, որպէսզի Արցախի այս մնացած հատւածը շարունակի մնալ հայկական, որպէսզի մեր հայրենակիցներն ուզենան ապրել հայրենի հողում եւ շէնացնել այն։ Պէտք է հետեւողականօրէն աշխատենք, որպէսզի վէրքերը սպիանան եւ աւելի ուժեղացած ոտքի կանգնենք։ Եւ իհարկէ պէտք է հետամուտ լինենք, որ հետագայ բանակցութիւնների ընթացքում Արցախի ժողովրդի ազատ ինքնորոշման իրաւունքն իրացւի՝ որպէս անվտանգութեան երաշխիք։ Իսկ մօտ ապագայում պատրաստւում ենք նաեւ տարբեր տեսակի նիւթական օժանդակութեան ծրագրերի վրայ աշխատել՝ մեր եւրոպացի բարեկամների շրջանակների հետ միասին։ Կը շարունակենք նաեւ կազմակերպել Եւրոպական տարբեր պատւիրակութիւնների այցելութիւններ դէպի Արցախ։

 

Յարակից լուրեր

  • Մենք դեռ կը վերադառնանք
    Մենք դեռ կը վերադառնանք

    ՅԴ Արցախի երիտասարդական միութեան անդամները, մայիսի 9-ին՝ Շուշիի ազատագրման օրւայ առթիւ այցելել են Շուշիի տանկ-յուշարձան, ծաղիկներ խոնարհել, տեղադրել Արցախի Հանրապետութեան պետական դրօշն ու «Մենք դեռ կը վերադառնանք» գրառմամբ պաստառ. տեղեկացնում է «Ապառաժ»-ը:

  • «Դաշնակցութեան յուսահատիլ արտօնուած չէ». Յակոբ Տէր-Խաչատուրեան
    «Դաշնակցութեան յուսահատիլ արտօնուած չէ». Յակոբ Տէր-Խաչատուրեան

    «Արեւելք»-ի «Անկեղծ Զրոյց» ծրագրի շրջանակներուն մէջ Սագօ Արեան հարցազրոյց մը ունեցած է ՀՅԴ Բիւրոյի ներկայացուցիչ՝ Յակոբ Տէր-Խաչատուրեանին հետ։

  • Մայիսի 9-ի դաժան սիմւոլիզմը
    Մայիսի 9-ի դաժան սիմւոլիզմը

    Պատմութիւնը դաժան է նաեւ խորհրդանիշներով, որոնք, որպէս կանոն, լինում են ոչ պատահական։ Ուղիղ երեք տարի առաջ այս օրը՝ մայիսի 9-ին, պսեւդոզինւորական շապիկը վարչապետի փողկապով փոխարինած Նիկոլ Փաշինեանը Ստեփանակերտում յայտարարեց, որ Արցախը պէտք է վերադառնայ բանակցային գործընթաց, որ առանց Արցախի մասնակցութեան՝ բանակցութիւններ չեն կարող լինել։

  • Պետութեան ու ժողովրդի ապագայով մտահոգ իւրաքանչիւր մարդ մայիսի 9-ին կը լինի Ազատութեան հրապարակում
    Պետութեան ու ժողովրդի ապագայով մտահոգ իւրաքանչիւր մարդ մայիսի 9-ին կը լինի Ազատութեան հրապարակում

    Արցախի առաջին ու Հայաստանի երկրորդ նախագահ Ռոբերտ Քոչարեանը հակիրճ, բովանդակալի, վստահութիւն ներշնչող «Կհանդիպենք վաղը» գրառմամբ մայիսի 9-ին բոլորիս, ազատամիտ ու հայրենասէր ողջ հայութեանը, պետութեան ու ժողովրդի ապագայով մտահոգ իւրաքանչիւր քաղաքացու հրաւիրել է Ազատութեան հրապարակ` ներկայ լինելու ու մասնակցելու իր նշանակած հանրահաւաքին։

  • «Մենք արցախեան օրակարգով մեր քաղաքական եւ քարոզչական զէնքերը վայր չենք դրել». Հրաչ Վարժապետեան
    «Մենք արցախեան օրակարգով մեր քաղաքական եւ քարոզչական զէնքերը վայր չենք դրել». Հրաչ Վարժապետեան

    Մայիսի 4-ին առցանց «Հրապարակ»-ի «Հանդիպում» հաղորդաշարի հիւրն էր ՀՅԴ Արեւմտեան Եւրոպայի Կենտրոնական կոմիտէի ներկայացուցիչ Հրաչ Վարժապետեանը:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։