Հա

Ազգային

07/01/2021 - 08:10

Պիտի փնտռե՛նք քեզ…

Հայ կեանքի լաւ օրերու անկրկնելի երեւոյթներէն էր Գառնիկ Մկրտիչեան։ Մէկը, որուն համար անծանօթ մը չկար իր թաղամասին, երկրին, Սփիւռքին եւ հայ աշխարհին մէջ ընդհանրապէս։

ՎԻԳԷՆ ԱՒԱԳԵԱՆ

 

Հայ կեանքի լաւ օրերու անկրկնելի երեւոյթներէն էր Գառնիկ Մկրտիչեան։ Մէկը, որուն համար անծանօթ մը չկար իր թաղամասին, երկրին, Սփիւռքին եւ հայ աշխարհին մէջ ընդհանրապէս։

Դաշնակցական էր ան ողն ու ծուծով։ Համազգայնական էր համոզումով, Հ.Մ.Ը.Մ.-ական էր ամէնօրեայ ապրումով ու կիրքով եւ, դեռ, Ազգային իշխանութեան մարմիններու անդամ էր ամենայն բարեխղճութեամբ եւ լայնասրտութեամբ։ Խօսակից բոլորին, յարգալիր՝ մեծին ու փոքրին, բոլորը համախմբող, բոլորին հայր, եղբայր ու հարազա՛տ։

Երեւոյթ էր Գառնիկ Մկրտիչեան, Պուրճ Համուտին իր ամուր կառչածութեամբ, լիբանանահայութեան հանդէպ իր ունեցած անսասան հաւատքով ու կամքով։ Այդ պատճառով ալ, ուր որ գնաց ան, ուր որ եղաւ, Պուրճ Համուտի՝ «Սարդարապատ»-ի համն ու հոտը տարաւ իր հետ։

Գառնիկ Մկրտիչեան անձնական կեանքէն աւելի պատկանեցաւ հաւաքական մեր կեանքին։ Ան եղաւ ամէն տեղ. Կոմիտէի եւ Կեդրոնական Կոմիտէի անդամ, Ազգային Քառասնից Մանկանց Վարժարանի եւ Ազգ. Լեւոն եւ Սոֆիա Յակոբեան Քոլէճի խնամակալ, Համազգայինի եւ Հ.Մ.Ը.Մ.-ի Պուրճ Համուտի մասնաճիւղերու անդամ։ Պուրճ Համուտի քաղաքապետական խորհուրդի երկար տարիներու անդամ։ Աւելի քան 40 տարի ան ծառայեց, գործեց, տքնեցաւ եւ դարձաւ բոլորի՛ն Գառնիկը։ Վերջին տասնամեակին ան եղաւ Հ.Մ.Ը.Մ.-ի շրջուն դեսպանը աշխարհին մէջ։ Այցելեց միութեան բոլոր մասնաճիւղերը մէկ առ մէկ, խրախուսեց բոլորը, ստեղծեց նոր մասնաճիւղեր եւ իր կեանքին մեծագոյն երազը՝ միութեան 100-ամեակը ծրագրեց, կազմակերպեց եւ իրագործեց ազգային-պետական շուքով, փառքով ու պատիւով։

Կարելի է երկար վկայել Գառնիկ Մկրտիչեան մարդուն, կուսակցականին եւ Հ.Մ.Ը.Մ.-ականին մասին, մանաւանդ որ քառորդ դարու ընկերութիւն մը մեզ դարձուցած էր անբաժանելի մտերիմներ, գործակիցներ, յաճախ գրեթէ ամէնօրեայ շփման եւ խորհրդակցութեան մէջ։ Անակնկալ կորուստին ցնցումը մեր աչքերուն դիմաց կը պարզէ անմոռանալի գործակցութեան երկա՜ր պատմութիւն մը՝ 1995-ի մեր առաջին ծանօթութենէն մինչեւ անակնկալ հրաժեշտէն քանի մը օր առաջ, երբ հեռաձայնով Նոր Տարին շնորհաւորեցինք եւ արագ ապաքինում մաղթեցինք իրեն։

Կանուխ էր ընկեր։ Տակաւին տալիք ունէիր։ Տակաւին սորվելիք ունէինք քեզմէ։ Դուն կ’երթաս միանալու «Սարդարապատ»-ի սիրելի ընկերներուդ՝ Շէրիֆին (Յարութիւն Թէնքէրեան) ու Խաչիկին (Արապեան), Արային (Քէնտիրճեան) եւ միւսներուն։ Կ’երթաս նաեւ միանալու Հ.Մ.Ը.Մ.-ական գործակից եղբայրներուդ՝ Միհրանին (Շիմշիրեան) եւ Կարոյին (Թիւթիւնճեան), Բիւզանդին (Թորիկեան) եւ Պատրիկին (Կիւլպէնկեան)։

Պիտի կարօտնանք քեզի։

Պիտի փնտռե՛նք քեզ։

Յարակից լուրեր

  • Դէպի ուժեղ Հայաստան
    Դէպի ուժեղ Հայաստան

    Յետ-հաշուարկը սկսած է Հայաստանի մէջ։

    Հայութիւնը յուսադրիչ տրամադրութիւններով կը նշէ մինչեւ 20 Յունիս, «Իմ քայլ»-ական իշխանութեան 6 շաբաթ մնացած ըլլալու իրողութիւնը, յառաջիկայ ընտրութիւններով անկէ ձերբազատելու կամ, նուազագոյնը, չարիքը նուազագոյնի իջեցնելու հաւատքով եւ համոզումով։

  • Մեկնողներուն տեղը  
    Մեկնողներուն տեղը  

    Գաղտնիք մը բացայայտած չենք ըլլար եթէ խոստովանինք, որ այսօր մեր կեանքի ամէնէն լուրջ տագնապներէն մէկը սերունդներու յաջորդականութեան ապահովումն է։ Հանրանուէր, ստեղծագործ եւ յանձնառու մարդու պակաս ունինք քիչ մը ամէն տեղ։ Մոմով կը փնտռենք նոր դէմքեր, որոնք կարենան արդարացնել իրենց վրայ դրուած յոյսերը, մեկնողներուն կիսատ ձգած գործը շարունակելու պատրաստակամութեամբ։

  • Միութենականութիւն (Ազգային հոգեր-Գ.)
    Միութենականութիւն (Ազգային հոգեր-Գ.)

    Միութիւններու գոյութիւնը չափանիշ է ժողովուրդներու ինքնագիտակցութեան, եւ միութենականներու թիւը կարելի է ցուցանիշ նկատել հաւաքականութիւն մը կազմող անհատներու քաղաքակրթական եւ քաղաքացիական զարգացման աստիճանին։

  • «Վայրկեան մը յոտնկայս» (Ազգային հոգեր- Բ.)
    «Վայրկեան մը յոտնկայս» (Ազգային հոգեր- Բ.)

    Յարգանքը հազար ձեւ ունի։ Ձեւերէն մէկն ալ յետ-մահու յարգանքն է անոնց, որոնք կեանք մը ամբողջ նուիրաբերած են իրենց ժողովուրդին, միութեան եւ կազմակերպութեան։ Յոգնած են, վազվզած են, միտք ու հոգի մաշեցուցած են, առողջութիւն սպառած են՝ իրենց ողջութեան մնալով շուքի եւ լուսանցքի մէջ։

  • Մեր երիտասարդութեան հետ դէմ յանդիման
    Մեր երիտասարդութեան հետ դէմ յանդիման

    Երիտասարդութիւնը նորութիւն եւ արդիականութիւն կը փնտռէ իր շուրջ։ Հետամուտ է լայն հորիզոններու։ Այսօրուան երիտասարդութիւնը չի փափաքիր կառուցային-կանոնագրային կաղապարներու ենթարկուիլ։ Ան կը նախընտրէ միութենական աշխատանքներու մասնակցիլ, բայց միութեան մը չանդամակցիլ։ Կը նախընտրէ մնալ համակիր՝ քան յանձնառութիւն եւ պատասխանատուութիւն ստանձնել։ Կը նախընտրէ գործել որոշ նպատակի մը համար, բայց ոչ՝ միութենական պարտաւորութիւններու շարքի մը համար։

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։