Print this page
20/01/2021 - 08:22

«Արցախահայութիւնն իր թիկունքում պէտք է զգայ 10 մլն հայութեան շունչը». Իշխան Սաղաթելեանն ամփոփել է Արցախ այցի արդիւնքները

Արցախի անվտանգութեան խորհրդի քարտուղար Վիտալի Բալասանեանի եւ արտաքին գործերի նախարար Դաւիթ Բաբայեանի հետ քննարկել ենք հարցերի լայն շրջանակ. Արցախ այցի շրջանակներում ունեցած պաշտօնական հանդիպումների արդիւնքների ամփոփման ժամանակ նշել է ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը։

«alikonline.ir» - Արցախի անվտանգութեան խորհրդի քարտուղար Վիտալի Բալասանեանի եւ արտաքին գործերի նախարար Դաւիթ Բաբայեանի հետ քննարկել ենք հարցերի լայն շրջանակ. Արցախ այցի շրջանակներում ունեցած պաշտօնական հանդիպումների արդիւնքների ամփոփման ժամանակ նշել է ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը։

Ըստ նրա՝ հարցերի առաջին խումբն առնչւել է Արցախի սահմանների պաշտպանութեանն ու ազգաբնակչութեան անվտանգութեան ապահովմանը, երկրորդը՝ Արցախի կարգավիճակին, երրորդ խումբը՝ Արցախի բնակչութեան առջեւ ծառացած սոցիալ-տնտեսական խնդիրներին։

«Մենք` իբրեւ Դաշնակցութիւն, մէկ անգամ եւս վերահաստատեցինք, որ ՀՅԴ-ն իր համահայկական ողջ կառոյցով եւ հնարաւորութիւններով պատրաստ է ամբողջական եւ գործուն մասնակցութիւն ունենալ այս երեք ուղղութեամբ իրականացւող աշխատանքներին»,- նշել է ՀՅԴ ՀԳՄ ներկայացուցիչը՝ աւելացնելով, որ Դաշնակցութեան կամաւորներն անհրաժեշտութեան դէպքում պատրաստ են կրկին պաշտպանել հայրենիքի սահմանները։

Հանդիպումների ընթացքում երկուստեք բացառւել է Արցախի կարգավիճակի ամրագրումն Ադրբեջանի կազմում։ Ըստ այդմ՝ Արցախի միջազգային ճանաչման ուղղութեամբ հետագայ քննարկումները շարունակելու եւ աշխատանքները համադրելու մասով եւս ձեռք է բերւել լրացուցիչ պայմանաւորւածութիւն։

«ՀՅԴ-ն իր համահայկական ողջ ներուժով, Հայ Դատի գրասենեակներով եւ յանձնախմբերով պատրաստ է այս նոր իրավիճակում լծւել այդ աշխատանքներին»,- փաստել է Ի. Սաղաթելեանը։

Սոցիալ-տնտեսական ուղղութեամբ եւս մի շարք աշխատանքներ կան իրականացնելու, եւ այստեղ եւս Դաշնակցութիւնը պատրաստ է իր մասնակցութիւնն ունենալ։

«Այս փուլում ամենակարեւորն այն է, որ Արցախի բնակչութիւնն իր թիկունքում զգայ 10 մլն հայութեան շունչը։ Մենք պէտք է այսօր կանգնենք Արցախի եւ արցախցու կողքին, եւ դա չպէտք է լինի խօսք, այլ` յստակ գործ։ Մենք պարտւելու իրաւունք չունենք. ժողովուրդը պէտք է ոտքի կանգնի, եւ դա պէտք է տեղի ունենայ համայն հայութեան աջակցութեամբ, համատեղ մշակւած քայլերով»,- նշել է Իշխան Սաղաթելեանը։

«Կորցնել Արցախը` նշանակում է կորցնել Հայաստանի Հանրապետութիւնը եւ առհասարակ փակել հայ ժողովրդի պատմութեան վերջին էջը։ Ով, ով, բայց Դաշնակցութիւնը դա թոյլ չի տալու»,- եզրափակել է Իշխան Սաղաթելեանը։ 

Յարակից լուրեր