Հա

Ազգային

31/01/2021 - 13:15

2020 թ. ՀՅԴ Բիւրոյի հրատարակութիւնները 

Նորութիւն յայտնած չենք լինի, եթէ ասենք, որ անցնող 2020 թւականը հայութեան համար եղաւ իրադարձութիւններով յագեցած, լարւած տարի: Այդ մթնոլորտն իր ազդեցութիւնն ունեցաւ նաեւ Հայ Յեղափոխական Դաշնակցութան եւ մասնաւորապէս նրա բարձրագոյն մարմնի՝ ՀՅԴ Բիւրոյի գործունէութեան վրայ: Բազմաճակատ անելիքների շրջանակում իր տեղն ունեցաւ նաեւ մտաւոր-գաղափարական աշխատանքը, ինչի կարեւորութիւնը Դաշնակցութեան կողմից չի անտեսւել հայութեան եւ կուսակցութեան համար ամենաբարդ ժամանակներում անգամ:

Նորութիւն յայտնած չենք լինի, եթէ ասենք, որ անցնող 2020 թւականը հայութեան համար եղաւ իրադարձութիւններով յագեցած, լարւած տարի: Այդ մթնոլորտն իր ազդեցութիւնն ունեցաւ նաեւ Հայ Յեղափոխական Դաշնակցութան եւ մասնաւորապէս նրա բարձրագոյն մարմնի՝ ՀՅԴ Բիւրոյի գործունէութեան վրայ: Բազմաճակատ անելիքների շրջանակում իր տեղն ունեցաւ նաեւ մտաւոր-գաղափարական աշխատանքը, ինչի կարեւորութիւնը Դաշնակցութեան կողմից չի անտեսւել հայութեան եւ կուսակցութեան համար ամենաբարդ ժամանակներում անգամ: Այս դէպքում մեր ակնարկը վերաբերում է ՀՅԴ այն հրատարակութիւններին, որոնք, ինչպէս վերն ասւեց, լոյս են ընծայւել Դաշնակցութեան բարձրագոյն մարմնի նախաձեռնութեամբ եւ միջոցներով:

Այս ընթացքում շարունակւել է «Վէմ» համահայկական հանդէսի հրատարակութիւնը: 1930-ականներին Սիմոն Վրացեանի խմբագրմամբ լոյս տեսած հայագիտական այս պարբերականը, տասնամեակներ անց վերահրատարակւելով հայրենիքում, դարձել է յայտնի եւ սիրելի յատկապէս գիտական, մտաւորական եւ ուսումնական շրջանակներում: Տարիների ընդմիջումից յետոյ` 2020 թւականի սկզբից, ՀՅԴ Բիւրոն սկսեց վերահրատարակել նաեւ կուսակցութեան աւագ պարբերական ու իր պաշտօնական օրգան «Դրօշակ»-ը: Անցնող տարւայ ընթացքում «Դրօշակ»-ը հրատարակւեց ամսական պարբերականութեամբ եւ, վերագտնելով ընթերցողին, գալիք ժամանակներում վստահաբար կը շարունակի իր կենսագրութիւնը գրել:

ՀՅԴ վերոնշեալ երկու պարբերականները անցնող տարւայ ընթացքում նաեւ սեփական մատենաշարերի սկիզբը դրեցին: «Վէմ» մատենաշարի 1-ին համարի ներքոյ հրատարակւեց «ՔՐԻՍՏԱՓՈՐ ՄԻՔԱՅԷԼԵԱՆԻ ԱՆՏԻՊ ՆԱՄԱԿՆԵՐԸ» գիրքը: ՀՅԴ հիմնադիր Քրիստափոր Միքայէլեանի անտիպ նամակները հրատարակութեան է պատրաստել ՀՅԴ անւանի գործիչ, պատմաբան Երւանդ Փամբուկեանը: Նամականին, անշուշտ, հարստացնում է ՀՅԴ պատմագիտական ժառանգութիւնը եւ հետաքրքրութիւն է ներկայացնում ինչպէս պատմաբանների, այնպէս էլ համապատասխան թեմաներով հետաքրքրվող ընթերցողների համար:
Իրադարձութիւններից առաջ չընկնելով` տեղեկացնենք, որ 2021 թ. շեմին «Վէմ»-ը նոր հաճելի անակնկալ կը մատուցի` ընթերցողի սեղանին դնելով իր մատենաշարի երկրորդ հրատարակութիւնը:

2019 թւականին լրացաւ Հայաստանի Առաջին Հանրապետութեան կառավարութեան կողմից ընդունւած` «Միացեալ եւ Անկախ Հայաստանի» հռչակման յայտարարագրի 100-ամեակը: Այս առթիւ 2020 թւականին «Դրօշակ»-ի մատենաշարի անդրանիկ հրատարակութեամբ լոյս տեսաւ պատմաբան Արարատ Յակոբեանի «ՄԻԱՑԵԱԼ ԵՒ ԱՆԿԱԽ ՀԱՅԱՍՏԱՆԻ ԳԱՂԱՓԱՐԸ (Հայոց պատմութեան հոլովոյթում)» գիրքը: Սկսելով Միացեալ Հայաստանի տեսլականի ակունքներից` աշխատութեան հեղինակը ներկայացնում է սոյն գաղափարի զարգացման ընթացքը, պատմական Հայաստանի երկու հատւածների միաւորման ուղղութեամբ հայ պետական եւ հասարակական-քաղաքական շրջանակների իրականացրած աշխատանքները, մասնաւորապէս` միջազգային ատեաններում այս խնդրի շուրջ ծաւալւած քննարկումները: Մենագրութիւնը ուշագրաւ տեղեկութիւններ է պարունակում հիմնահարցի վերաբերեալ եւ կը հետաքրքրի ինչպէս պատմաբաններին, այնպէս էլ ընթերցող լայն շրջանակների:

Ի դէպ, անցնող տարւայ ընթացքում կուսակցութեան ուշադրութիւնից չի վրիպել Արարատ Յակոբեանի մէկ այլ աշխատութիւն` «ՀՅ ԴԱՇՆԱԿՑՈՒԹԻՒՆ ԿՈՒՍԱԿՑՈՒԹԻՒՆԸ ԼՈՒԾԱՐԵԼՈՒ ՀԱՅԿՈՄԿՈՒՍԻ ՓՈՐՁԵՐԸ. 1920-ԱԿԱՆ ԹՒԱԿԱՆՆԵՐ» գիրքը:

Տարւայ հրատարակչական հունձքի մէջ է եղել նաեւ Հայկազուն Ալւրցեանի հեղինակած «Հայաստանի Հանրապետութեան պետական խորհրդանշանները» գիրքը: Աշխատութեան մէջ ներկայացւում է Հայաստանի Հանրապետութեան խորհրդանշանների (դրօշ, զինանշան, օրհներգ) ընդունման համառօտ պատմութիւնը 1918-1920 թթ. եւ դրանց իմաստների ու խորհուրդների գիտական մեկնութիւնը:

Թւարկւած աշխատութիւններով, անշուշտ, չի սպառւում անելիքն այս ասպարէզում: 2021 թւականի ընթացքում վկան կը լինենք ՀՅԴ Բիւրոյի ձեռնարկած նման նոր նախաձեռնութիւնների, որոնք կը հարստացնեն հայագիտութիւնն ու կը նպաստեն մեր ազգային ինքնաճանաչողութեանը: Եւս մէկ անգամ կը փաստեն, որ Դաշնակցութեան համար քաղաքական-գաղափարական աշխատանքը առանցքային կարեւորութիւն ունի քաղաքական-հասարակական եւ պետական կեանքի զարգացման գործում:

 

«Դրօշակ», թիւ 12 (1646), դեկտեմբեր, 2020 թ.

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։