Հա

Ազգային

06/02/2021 - 12:50

Սա կուսակցական պայքար չէ, սա պէտք է դառնայ համաժողովրդական պայքար

Թէեւ վերջին շրջանում յաճախակիացել են Հայրենիքի փրկութեան շարժման վախճանի մասին լուրերը, սակայն վեցնեակի վերջին հանդիպումից յետոյ շարժումը վերսկսեց անհնազանդութեան ակցիաները։ Նախօրէին խորհրդարանի դիմաց էին քաղաքացիներին հաւաքել՝ «Իմ քայլը» խմբակցութեան պատգամաւորների լուսանկարներով ու «դաւաճան» գրառումներով. «Չենք ուզում Ազգային ժողովում օրէնք ընդունի մի պատգամաւոր, ով չի տիրապետում հայաստանեան իրավիճակին, եւ նա հայ կոչւելու իրաւունք չունի»։ 

«alikonline.ir» - Թէեւ վերջին շրջանում յաճախակիացել են Հայրենիքի փրկութեան շարժման վախճանի մասին լուրերը, սակայն վեցնեակի վերջին հանդիպումից յետոյ շարժումը վերսկսեց անհնազանդութեան ակցիաները։ Նախօրէին խորհրդարանի դիմաց էին քաղաքացիներին հաւաքել՝ «Իմ քայլը» խմբակցութեան պատգամաւորների լուսանկարներով ու «դաւաճան» գրառումներով. «Չենք ուզում Ազգային ժողովում օրէնք ընդունի մի պատգամաւոր, ով չի տիրապետում հայաստանեան իրավիճակին, եւ նա հայ կոչւելու իրաւունք չունի»։ Հայրենիքի փրկութեան շարժման համակարգող, ՀՅԴ Հայաստանի Գերագոյն մարմնի ներկայացուցիչ Իշխան Սաղաթելեանը վստահեցրեց, որ Հայրենիքի փրկութեան շարժումը ոչ թէ փլուզւում է, այլ նոր թափով է վերսկսում ակցիաները։ Hraparak.am-ը զրուցել է Իշխան Սաղաթելեանի հետ։

 

- Վեցնեակի վերջին հանդիպման ընթացքում քննարկե՞լ էք արդեօք արտահերթ ընտրութիւններին մասնակցել-չմասնակցելու հարցը, յատկապէս, որ Ռոբերտ Քոչարեանը յստակ յայտարարեց, որ ինքը մասնակցելու է։

- Մեզանից որեւէ մէկն արտահերթ ընտրութիւններին դէմ չէ, արտահերթ ընտրութիւնները եղել է մեր պահանջը։ Բայց մենք ներկայացրել ենք արտահերթ ընտրութիւններին հասնելու մեր ճանապարհային քարտէզը եւ օրակարգը։ Իհարկէ, իշխանութիւնները պէտք է ձեւաւորւեն ժողովրդի կամարտայայտութեամբ եւ ընտրութիւնների միջոցով, բայց ընտրութիւնները չեն կարող տեղի ունենալ այս չարիքի կառավարութեան, մասնաւորապէս՝ Նիկոլի վարչապետութեան օրօք, որովհետեւ իր ամէն օր աւել մնալը կորուստ է մեր երկրի համար, իր վարչապետութեամբ մեր երկրում երբեք կայունութիւն եւ խաղաղութիւն, համերաշխութիւն չի լինելու, եւ մեծ վտանգ կայ, որ այդ ընտրութիւններում ինքն օգտագործելու է վարչական ռեսուրսը, որովհետեւ հասկանում է՝ եթէ չվերարտադրւի, դատւելու է։

Բացի այդ, Շուշին թուրքական անւանող, այդ քաղաքական թիմով ո՞նց են կազմակերպելու ընտրութիւն, իրենք ընդհանրապէս ունե՞ն իրաւունք ընտրութիւն կազմակերպելու եւ այս ժողովրդից քւէ խնդրելու։

 

- Այս տրամաբանութեամբ՝ իրաւունք չունէին պատերազմից յետոյ պաշտօնավարելու, բայց, ինչպէս տեսնում ենք, երեք ամիս է անցել...

- Դրա համար ենք ասում, որ օր առաջ նրանց պէտք է հեռացնել։

 

- Ռոբերտ Քոչարեանը յայտարարեց, որ ցանկալի ճանապարհը շարժման ճանապարհային քարտէզով առաջ գնալն է, բայց եթէ Նիկոլ Փաշինեանը յայտարարի արտահերթ ընտրութիւն, ինքը կը մասնակցի։ Ասում են՝ ինքը միայնակ չէ, վեցնեակում էլի ուժեր կան, որ չեն բացառում մասնակցութիւնը։ Այս հարցը քննարկե՞լ էք, ինչպէ՞ս էք վերաբերւում նման դիրքորոշմանը։

- Եթէ Նիկոլի վարչապետութեամբ տեղի ունենան արտահերթ ընտրութիւններ, ցանկացած քաղաքական ուժ, այդ թւում շարժման ներկայացուցիչները, իր մասնակցութեան կամ չմասնակցութեան դիրքորոշումը կը ճշտի։ Մենք ունենք 100 տոկոսանոց կոնսենսուս, որ երկրի փրկութեան ելքն այս իշխանութեան հեռացումն է, եւ մենք դա հաստատել-վերահաստատել ենք նախկինում հրապարակած ճանապարհային քարտէզում։

 

- Իշխանական ճամբարում կարծում են, որ ձեր օրակարգը քաղաքացիների կողմից աջակցութիւն չստացաւ, երէկ էլ Ալէն Սիմոնեանը յայտարարեց, որ քաղաքացիների համար իշխանութիւնն այսօր աւելի լաւն է, քան ընդդիմութիւնը, հէնց այս պատճառով էլ ընդդիմադիր որոշ լիդերներ գտնում են, որ պէտք է ընտրութեան գնալ, փողոցով հարց չի լուծւում։

- Եթէ իրենց թւում է, որ մեր երկիրը կարող են հասցնել անդունդի եզրին, կորցնել մեր հայրենիքի մի կարեւոր մասը, դառնան այսքան զոհերի, անհետ կորածների, գերիների պատճառ ու այս ամէն ինչի արդիւնքում պատասխանատւութիւն չկրեն, իրենք շատ սխալ պատկերացում ունեն մեր ժողովրդի մասին։ Եւ եթէ իրենց թւում է, որ կարող են մոլորեցնել մեր հանրութեանը, շարունակել իշխել եւ վերջնականապէս կործանել մեր պետականութիւնը, կրկին սխալւում են։ Ես վստահ եմ, որ իրենց հեռացումը երկար չի տեւելու։

 

- Ինչպէ՞ս, նոր գործիքակա՞զմ էք կիրառելու, անցած ամիսների ակցիաները բաւարար չէին, որ իշխանութիւնն ընկրկեր ու հեռանար։

- Ակնյայտ է, որ իրենք անհայրենիք մարդիկ են, կառչել են իրենց աթոռներից եւ ամէն ինչ անելու են այդ աթոռները պահելու համար։ Միակ ճանապարհը համաժողովրդական ճնշման միջոցով այս իշխանութիւններին հեռացնելն է։ Անշուշտ, մենք ունեցել ենք մեծ ձեռքբերումներ, բայց նաեւ բացթողումներ, այս ամէնը լուծելով՝ մենք պայքարը նոր հուն պիտի մտցնենք, նոր թափ հաղորդենք եւ առաջիկայում տարբեր տիպի մեծ ու փոքր բողոքի, անհնազանդութեան ակցիաներ, հանրահաւաքներ ու երթեր անցկացնենք։ Կը շարունակւեն նաեւ իրաւական գործընթացները․ ինչպէս գիտէք՝ երեք հաղորդում է ներկայացւած դատախազութիւն։

 

- Իսկ շարժման լիդերները պատրա՞ստ են նոր թափով պայքար սկսելուն, իրենց ուժերը ներդնել այդ պայքարում։ Որքան էլ հերքեք տարաձայնութիւնները, բայց տեսնում ենք, չէ՞, առնւազն 3 կուսակցութիւն՝ ՀՀԿ-ն, ՀՅԴ-ն, ԲՀԿ-ն, վերջին ընտրութիւններին տասնեակ հազարաւոր քաղաքացիների քւէ են ստացել, մինչդեռ ակցիաներին այդ մարդիկ չեն մասնակցում։

- 100 տոկոս կոնսենսուս կայ, որ պայքարը շարունակելու ենք մեր ընտրած ձեւաչափում, իսկ թէ ով ինչքան է այդ պայքարում ներդրնում ունենում, կարծում եմ՝ մէկը շատ, մէկը՝ քիչ մասնակցութիւն ունենում են։ Սա կուսակցական պայքար չէ եւ չպէտք է այդպիսին լինի, սա պէտք է դառնայ համաժողովրդական պայքար, կուսակցութիւնները այդ հսկայական պահանջը ձեւակերպող, առաջ տանողներն են։ Կուսակցութիւնները պատրաստ են այդ պատասխանատւութիւնը ստանձնելու։

 

- Բայց որոշ ուժեր աւելի շատ կուսակցական, քաղաքական շահով են առաջնորդւում, ասում են՝ ԲՀԿ-ն կողմ է արտահերթ ընտրութիւնների։ Եթէ ներսում չկայ վստահութիւն...

- Դուք այս հարցերը կուղղէք ԲՀԿ-ին եւ կը ստանաք պատասխանները, բացի այդ, մենք տեսնում ենք բազմաթիւ յայտարարութիւններ ԲՀԿ-ի կողմից։

 

- Դուք չէ՞ք ուղղել, օրինակ՝ եթէ յունիսին արտահերթ ընտրութիւններ յայտարարեն, ի՞նչ էք անելու։

- Մենք այդ հարցը չենք քննարկում, մեր օրակարգը հիմա դա չէ։

 

- Իսկ «17-ի ֆորմատ» ձեւակերպումը ճի՞շտ է, թէ՞ վեցնեակն է որոշումներ կայացնում։ Քանի կուսակցութիւն է ձեզ հետ, շարժման խորհրդի կազմում ովքեր են՝ ցանկը չհրապարակւեց։

- Շարժման խորհրդի կազմը հազար անգամ տեսել էք, հրապարակային բաց նիստեր են անում, 40-ից աւել անձ է ներգրաււած, բոլորին էլ, կարծում եմ, ճանաչում էք, այստեղ ինտրիգ չկայ։ Ինչ վերաբերում է 17-ի ֆորմատին, այդ ֆորմատը չկայ այն պահից, երբ ձեւաւորւեց Հայրենիքի փրկութեան շարժումը։

 

- Իսկ քանի՞ կուսակցութիւն կայ շարժման մէջ, լսում ենք, որ վեցն են որոշումներ կայացնում։

- Կարծում եմ՝ այդ լուրերն այլ տեղ ուղղորդելու նպատակով է արւում, շարժման ղեկավարութիւնը, անդամները պարբերաբար տարբեր ֆորմատներով հաւաքւում են, ունենք ընդլայնւած, նեղ նիստեր, յանձնաժողովներ եւ այլն։ Ձեր ասած վիճակը չէ։

 

- Իսկ հրապարակում տեղադրւած վրանին ի՞նչ ճակատագիր է սպասւում։ Հնարաւո՞ր է ապամոնտաժէք։

- Երբ տեսնենք, որ այլեւս արդիւնաւէտ չէ, այդ օրւանից վրանը կը հանենք։ Ցրտի պայմաններում այդ վրանն անհրաժեշտ էր։ Մէկ ամիս շարունակ այնտեղ նստացոյց է եղել, միջավայր է ձեւաւորւել, մարդիկ պարբերաբար եկել-գնացել են։ Երբ հասկանանք, որ այլեւս պէտք չէ, կը հանենք, չի բացառւում, որ ինչ-որ պահի նորերը պէտք լինեն՝ աւելացնենք։

 

Լուսինէ Շահվերդեան

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։